እንጉስቱኑሳ አግፁንኩ

ዘውዴ በካሉ

አማኻሪ ክልሉ ክንቲ ቢሩ ንባር ቶኬማውስታጊ አማኻሪ ክልልዳ ፌቴርስትኹ ሰላሙ ችግርስ ሴዛ ትኩሚ አንኩዋ ሚሊዮንዴስ ጃላ ያኻንኩ ክንታንትካ ክንቲው ማድዴስ ሴጋ ያኼካ:: 3ሻይ 600ዴስ ጃላ ክንቲ ጝንካ ልምትካ:: እን ሰላሙ ችግር ሌጌሳ ታምብካው አንኩሊዳስታ ሼው ፅንታዳ ጉዳት ታምባታ ፄዋ:: ሰላሙ ችግርስ ክንትጝ ክንትፅጙ ቴርት ኬውጛማ እጂኩ ዙራሙርካዴስኪላ አዊ ብሄረሰቡ ቺፅጝፂ ፋግቲ ለኮማ ወረዳ ችጉዋሊ ትክላሊ ላጛንቲ አች ክንቲ ጝና እምፕሊያኽ::

እን ክንቲ ጝና ሰላሙ ችግርስ ክንትጝ ክንትፅጙ ቴግባር ቴርትዴስ ሴጋ ያኻማ ሴኔቤቱኒዴስ አሜትስታ ዋልቲ አርፋ ያኻ:: ዙራሙሪ ሰላሙ ስጋታኻዳ እሺኹ አኽጝስ ናካ ሰላሙ አኺኒ ዙሩኒዴስ ትር አርፊዴስ ጄሜራማ ክንትጝ ክንትፅጙሳ ካስቶ ሲፍጝፃማ ክንታንትካኪ ያኻ ክንትፃንትካ ክንቲው ቴርትዳ አግስታና::

ክንታንታ ትዝታ ወለላው ችጉዋሊ ላጛንቲ አች ክንቲ ጝናስቲ ክንታንታኽ:: ሰላሙ ችግርስ ክንቲ ልምትጝ አንኩሊዳኪ ያኻ ሼው ፅንታዳ ቻኒስቶ ታምፅⶓ ድኹታ::

ክንታንትካ ክንቲዴስ ሴጋ ያኼካማ ጝን አቕሊ ዝኩጝስ ቼጌርስትⶓ ዙሚት ክንታንታ ኹን ክንታንትካ ድማ ጋቲታ ኽይስቴካማጊ ሼው ታክስኹሳ አኬዱኑሳ ታምባኑላ ይጉⶓኪላ እንክርፄ:: አሜቶስታ ዋልቲ አርፋ ክንቲ ልምትጝስ ናካ ታምባኑ እሺኑሳ ክንቲውሳ አቾ ታምቤውላስ ይጉጝስ ናካ 12ንቲ ቤኑ ክንታንታ አኽⶓ ዲብስታ:: ክንቲ ልምታውላስ ይጉዋስኩኒ እን አሜትስ ኬፍቲኒ ክንቲው ኾትዳ ክንቴት እሺⶓ ድኹታ::

ክንታንቲ ተመስገን አረጋ ችጉዋሊ ትክላሊ ላጛንቲ አች ክንቲ ጝናሱ ክንታንቲ ያኹስ ኬውጛሺኹ ክንቲ ጄሜርጝሰ አይሎ ዴስቲኒ አኽⶓ ዙማ:: አሜትዴስ ጃላ ኬውጛሺኹ ክንቲ ብስስትጝ፣ ክንታንትካ ዩኒፎርሞ ሴይካማ፣ ዴብተሮስታ ፋይፃንኩሳ ክንቲኩሳ ሜሳርካዋ እሚካማ ክንቲ ጝናሾ ካስⶓ ጄሜራኒ እንግራ ካብስ ካሜንስትኹሳ ፄጌርኹ አኽⶓኪላ ዲብሳ:: ክንታንቲ ትር አርፊዴስ ጄሜራማኪላ ክንቲው ቴርት ካስጛማጊ አኽⶓ ቶኬማ::

ችጉዋሊ ክንቲ ጝናስታ ዙራሙሪ አሜትዴስ ጃላ ሰላሙ ችግር እሺኹ አኽⶓ ድኹኽ ክንታንቲ ሚንችካ ክንቲ ጝንካ ልምቱንኩ ዝኩንኩ አኽጝስ አፄብካ ክንቲው ማድዳ አግስታንታ እሊኩ ክንቲ ጝንካጊ ብስስታንታ አሳቦ ዲግሳ::

ክንታንታ ስለናት ጌትነት ኪላ እሊው ክንቲ ጝናዴስ ችጉዋሊ ትክላሊ ላጛንቲ አች ክንቲ ጝናሾ ቲንታታ ክንቴት አኽⶓ ድኹታ:: ክንቲ ብስስትጝስ ጝን አቕዴስ ጄሜራማ ዙራሙሪኩሳ አቖ ኺስታ ዴስቴንካ አኽⶓ ዲብስታ:: እሊው ልምትኹ ክንቲ ጝናዳ ክንታንትካ ጝንዳ ዝኩንኩ አኽጝስ አንኩሊው ቻኒስት ታምባማጊ አኽⶓ ዙሜ:: ሰላሙ ችግርስ ልምትኹ ክንቲ ጝና ብስስታማ ጝንዳ ዝኩንኩ ክንታንትካ ክንቴ ሲፍጛንታ፣ ስራስሪ አፄብካታ ሰላምስ ፌካማ ሰላምስ ቱዋንታ፣ አኬዱኑሳ ሳኪትጝፃንታ ውላጊ  ክንቲው ዜርፍዳ ትኩቶ እይካማ እንፃኽስታንታ እንፅኼንቶኪላ ፌያፌይጝፄ::

ችጉዋሊ ትክላሊ ላጛንቲ አች ክንቲ ጝናሱ ጛራ ሰንታየሁ አብርሃም አሜትዴስ ጃላ ልምታማ ክንትጝ ክንትፅጙ ቴርትዴስ ሴጋ ያኻሺኹ ችጉዋሊ ክንቲ ጝና ክንትጝ ክንትፅጙሳ ቴርቶ ጄሜርⶓ ጌሌፅካ:: ክንቲ ጝና እንግራ ክንቴ ሲፍጝ ዙራሙሪኩሳ እምፕልታቖ ማልጛ ዴስፅኹ አኽⶓ ዙሙንኩ ዊ/ሮ ስንታየሁ ጄርካ ክንቲ ጝና ካስካማ ክንቴ ሲፍጛንታ ቹዋ ታብል ኬፍቲኔ አላፍቶ ፊትጜካማጊ አኽⶓ እርዳትፅካ:: ችጉዋሊ ክንቲ ጝናዳ እሺኹ ሰላሙ ችግርስ ሚንች ንብሬት ዌዴምኹ አኽጝስስታ ክንቲው ጊዝ ባኬንኹ አኽጝስ ፋይፃንኩሳ ክንቲኩሳ ሜሳርካዋስታ ሜፃፍካዋ ዋኽትጝፅጝስ፣ ክንታንትካ ክንቴ ታኬታኑላስ ሲፍጛንታ ካሊስታውሳጊ እንፅኼ እንፃኽስቴካማጊ አኽⶓ ጌሌፅካ::

ክንታንትካ ባኬንኹሳ ክንቲውሳ ጊዞ አግፃንታስታ ክንቲውሳ ፋንቲቴ ሾፌንጝስ ሚዲቢኒ ክንቲው ጊዝ ቤናዴስ ድምክና ክዳማ አድጉዌ ክንትፄካማጊ አኽⶓኪላ ቶኬምካ:: ክንታንትካ ቴግባርስ ክንቴ ሲፍጛንታ ሜፃፍ ጝናሱሳስታ ሙኪሪ ጝናሱሳ እንፅኼ አሌድካማጊ አኽⶓኪላ እርዳትፅካ:: 2017 ምሬት አሜቱ ክንትጝ ክንትፅጙ ካስት ጄሜርኹ ትር አርፊዳ አኽⶓ ድኹንኩ ክንቲ ጝናሱ ጛራ አባላምቴ ክንቴ ጄሜርጝስ ስጋት እሺኹ ያኹኒኪላ ናካዳ እንዳርማኪ ስጋታ ጋቲታ ክንታንትካኪ ያኻ ክንትፃንትካ ክንቲው ማድዳ አግስቴካማ ክንትጝ ክንትፅጙሳ ቴርቶ ካስጝፄካማጊ አኽⶓ ጉሽካ::

አዊ ብሄረሰቡ ቺፅጝፂ ፋግቲ ለኮማ ወረዳ ክንቲ ፅፌት ጝናሱ ወኬልስታንቲ አቶ ደሴ ነጋ ወረዳዳ 77 ምንግስትኩስታ ሹኻ ጛርትኩ ክንቲ ጝንካ ዝኩⶓ ጌሌፅካ:: ሰላሙ ችግርስ ወረዳታጊ ውላጊ ክንቲ ጝንካ ልምትካማ ሴኔቤትⶓ እርዳትፅካ:: 80 ክንቲ ጝንካዴስ 18 ምንግስትኩስታ ላጛ ጛርትኩ ክንቲ ጝንካ ክንትጝ ክንትፅጙሳ ካስቶ ጄሚርⶓኪላ ጌሌፅካ:: ክልል እንኩርኹ ዳብዚስ ክንታንትካው ምዝጋቢ ሜጋቢት 30 ጌርኮ ኺስታ አኽጝስ ሰላም ቼሜትጙኽ ዙራሙሪዳ ካንትጝ ክንትፅⶓ ጄሜርካማጊ አኽⶓ አቶ ደሴ ቶኬምካ:: ዋልታ ክንቲ ጝናዳ ልቓ ሰላም ቼሜትጙኽ ያኹኒኪላ ዋኽስዋኾ ሰላም እላቲው አኽጝስ 2018 ም/አሜት ክንትጝ ክንትፅⶓ ጄሜርጝስ ቴርቴካማጊ አኽⶓኪላ እርዳትፅካ::

ክንትጝ ክንትፅⶓ ጄሜሩንኩ 20 ክንቲ ጝንካ አባላምቲ ድንቤራ ክንቴ አሌድካማ ላጛንቲ ድንቤራ ክንቴ ክንቴካማጊ አኽⶓ ጉሽካ:: አቶ ደሴ ዋልታንቲ፣ ሶኼታንቲስታ 12ንቲ ቤንኩሳ ክንታንትካዋ ክልሉ አችስኪ ያኻ አጌር አቡቑ አችስ ፍታኔ ካፃንኩ አኽጝስ እሊኩሊ ልኺትጛንትካ ያኻንታ ሊሊቲ ትኩት እይስታማጊ አኽⶓ ጌሌፅካ:: ክንታንትካዳኪ ያኻ ክንትፃንትካዳ እንቲታኪ ቹዋ ታብልዳ እንዳርማኪ ሰላሙ ስጋት እንኩሊዳ እንኩዋኽስታቲታ ሼውቴ ፌቴርካማጊ አኽⶓኪላ ጌሌፅካ:: ሰላም ቼሜትጛማ 2018 ም/አሜትዳ ውላጊ ክንቲ ጝንካ ክንትጝ ክንትፅⶓ ጄሜራንታ እክድ እምስትⶓ ጉሹንኩ አቶ ደሴ ውላጊ ዙራሙሪው  ሰላም ማንዲስታታ ታምቦጊ ፊትጝጝ ቱስታው አኽⶓኪላ ታክስፅካ::

አዊ ብሄረሰቡ ቺፅጝፂ ክንቲ ሜምሪው አላፊ አቶ ደስታው አለሙ ብሄረሰቡ ቺፅጝፂታጊ 658 ክንቲ ጝንካ ዝኩⶓ ጌሌፅካ:: ልምታሺንኩ ክንቲ ጝንካዴስ 94 ክንቲ ጝንካ ብስስቱንኩ ያኻኒስ 300ዴስ ጃላ ያኻንኩ ክንቲ ጝንካ ዴሜካ ብስስትካያስኩ አኽⶓ እርዳትፅካ:: ሰላሙ ችግርስ ውላጊ ክንታንቲ ክንቲ ጝና ካሳያሱ አኽⶓ ዙሙንኩ ሜምሪው አላፊ ክንታንትካዋ ሙሬ ዜሬካማ ካሳካሳንኩ ክንትፃንትካዳ አጌትጙስታ ድብዳቢው ቤዴል ታምባማጊ አኽⶓኪላ ጌሌፅካ:: ብሄረሰቡ ቺፅጝፂዳ ልምታሺንኩ ክንቲ ጝንካዴስ እምፕል ችጉዋሊ ትክላሊ ላጛንቲ አች ክንቲ ጝና አኽⶓ ጉሹንኩ ሜምሪው አላፊ አሜትዴስ ጃላ ልምታሺኹ ክንቲ ጝና ብስስታማ እንፅኼ ጄሜርⶓ ቶኬምካ::

ላጛ አሜትዴስ ጃላ ባኬንኹሳ ክንቲውሳ ቴርቶ ክችስጝስስታ ክንቲውሳ ጛሬ ሾፌንጝስ ችኻ ሳኖ ክንትፅጝስ አኬድⶓኪላ ጌሌፅካ:: ብሄረሰቡ ቺፅጝፂታጊ 200ዴስ ጃላ ያኻንኩ ክንቲ ጝንካ ዎዴምⶓኪላ ሜምሪው አላፊ ጉሽካ:: ክንትፄ ጝኖ ፄጌንጝስሰታ ክንትፄ ሜሳሬ ዋኽትጝፅጝስ እዝብ ጌንዜቦ ፍሽጝፃማስታ ክልል እርዳቴ ፄዋማጊ አኽⶓኪላ እርዳትፅካ::

ክንቲውሳ ቴርቶ ሲፍፅጝስኪላ ዳስዳኪላ ያኹኒ ክንትፅጝስ አኬድⶓኪላ ጉሽካ::ክንቲው ዜርፍ ውላዴስጊ ጃላ ቻኒስት ታምብኹ አኽⶓ ታክስፁንኩ ሜምሪው አላፊ ውላጊ ሰላምስ ዜቦ ቲሬንታ እንፅኼንቶ ፌያፌይጝፄካ::