ታደለ አጋጄ
ሊቨርፑል ፌዩንኩ አሜትካዳ ጀርመኑ ሴሌቴንፃንቲ የርገን ክሎፕስ ጉስስታማጊ ኬሽኹሳ ጊዞ ፌይፃ:: ፕሪምየር ሊጉሳስታ ሻምፒዮንስ ሊጉሳ ዋንቼ ሳኪትጝፃ:: ያኼስጉ ፌይኹ አሜቱ ልኺትጚው ዝቤንዳ ኩፅኒ ክሌብሊ አግሌልጛ:: ሊቨርፑል የርገን ክሎፖ ቲካውሳ ዣቪ አሎንሶ ኬፄርጝስ ሊፉኒውላ ሳኪትጛያውላ ይጉዋ:: እንሳ ሲፋማኪላ ሚንችስ አቕስታቲውሳ አርኔ ስሎቶ ኬፄራ:: ኽሳንቲ ሊግዳ ሴሌቴንፅጙ ዴስ እላቲኩ ስሎት ኽሳንቲ እንግሊዝ ፕሪምየር ሊግዳ ሳኪትጛይጝስ ካሌይ ናው ሚንችካው ካሲ እሺኾ::
አሜቱ አባላምቲዳ ዋንቺስ ጌሜትስቱንኩ ጋርዲዮላው ማንቸስተር ሲቲዴስስታ አርቴታው አርሰናልዴስ ኻሳማ ዋንቼ ጉሽጝስ ካላ::
አሚኮ ስፖርት ዜጌብኹስታጊ ፕሪምየር ሊጉ 4 እንክርካ ይጉዋኒስ ዋንቼ ጉሽጝስ ሚንችካስ ጋሺስትካማጊ አግስታና:: ጊዛያስ ክሌቦ ዋይሚስታ ፄውንኩ ስሎት አንፈልድዳ ሲፍፃውሳ እምኔቶ አግፃ::
ዋይሚዴስ ድምክና ኬች እስካዊ ሴሌቴንፃንቲስ ኩታዋ እንክርጙ ዳድ አምንስታንኩ አንፊልድኩ ዴጌፋንትካ ዴስቴንካ ያኻንታ ፄዋ::
ሊቨርፑል ጌቴማኩ ኬችካሊ ኩታዋ ቼፍጝጛማ እንክርጝስ፣ ኩታ ፂካማ እንክርጝስስታ ኩታዋ ቻቤልጝጚስ እንክርጝስ ፌዩንኩ አሜትካዳ ኬሻማ ካንትስትኹ ያኻ::
ጅፊስትኹስታ አንፊልዶ ክሎፕ ባይፅጝስ ቼግርስትካያ:: እስካዊ ሴሌቴንፃንቲ ክሎፕዴስ ኬሻማ አግስታ:: ሊቨርፑል ታሪክስ 20ንቲ ጊዝስ ፕሪምየር ሊጉሳ ዋንቼ ጉሻ::