ፄትቲውሳ ችግሮ ዊዳፊስ ኽይጝስ አምኽጚው ቴርት ካስጙኻ

ታደለ አጋጄ

አዮ ጉዋጉሲስታ ዚጋሚ ወረዳው ዎሌን ኬቤልካዳ ዝኩዋንኩ እምፕልታቕ ፄትቲውሳ ችግሮ ዊዳፊስ ኽይጝስ አምኽጚውሳ ቴርቶ አምቢሊ ኬቤሊዳ ፌፄምካ::

አምኽጚው ቴርትዳ ላንጊ ወረዳኩ ዎሌን ኬቤልካዴስ ፊትጙንኩ ዙራሙሪኩ ዝኩዋንትካ፣ አይማኖትኩ ታብል፣ ብሄረሰቡ ቺፅጝፂው አመራርካ፣ ክልሉስታ ወረዳኩ አመራርካ አግስቴካ::

ፄውስትኹ እርኩ ቴርት ድፄ ፌፄማንትካዋ እምፕልትስ ቡንክትጝጝስ ካሊፃው አኽⶓ ላንጊ ወረዳው ዝኩዋንትካ ዙሜካ::

አምቢሊስታ ዎሌን ኬቤልካዳ ፌይኹ አሜትዳ ፄትቲው ችግር ፌቴርስታማ እምፕልታቖ ጉዳትስ ታምፅጝ ታክስስታዊያኽ:: ሚንችካ እምፕልታቕ እሺኑ ዙራሙሪዴስ ፌኔኬልጜካማ ባስኹ ችግራኻዳ እጂካ:: ዲጊስ ምንግስት ፌኔኬልጛሺንኩ ጛርት አቖ እሺኑ ዙራሙሪሾ ዙራንታ ፄውጙሳ እንፅኼ እንፃኽስትካ::

አምኽጚው ቴርትዳ አሴቴፍጙንኩ ጛርት አቕ እዩኑ ካንቲስ “አቕጝስኪ ያኻ ያቓናዉላ ይጉጝስ እኑስ እኖ ጉዲስትና:: ናካ ችግርዴስ ክንትና፣ እርክስ ሰላሞ ሴፌንፅጝ ቱስቴ” ንካ::

“ታክስጚስ ሴሌቴንጝጉ ዎሬምስ ይንታው ኪሲ እላኽ” ኑንኩ ዝኩዋንትካ እርግ እናና ዝኩንኹ እሺንኹ ዙራሙሪዳ ዝኩጝስ ዎሴንና፣ ቤዴራ እሺኹሳ እምፕልቶ ይስጝፅጝ ቱስቴ ንካ::

“ፌይንፅንኹ ድኪ ጊዝ ዙራማ አንትጝ ፋይፃላ፤ እምፕልትስስታ ሰላምስ ዝኩጝስ ቱስቴ፤” ናኒስ ዙሜካ::

ኬርትኹ ዳድስ ካዌና ቱንኩ አይልካ ሰላሙሳ ጉላሌ ቻቤልካማ ዙርጝ ፋይፄ ንካ::

አዩ ጉዋጉሲ ወረዳው ቹዋ ቺፅጝፃንቲ አቶ ገበየሁ በሪሁን ኬቴኒዳ ላጛ አሜትካስ እሺኹሳ ችግሮ ኽይጝስ ካቢትጝጚስ እምፕልታቕሊ ኩስጝጚ ፄውስትⶓ ጌሌፅካ::

ናካ አግስትኹሳ ሰላሞ ሲፍፅጝስ ባይሉ ዳድስ አምኽጚው ቴርት ፌፄምስትጝ ዊዳፊ ሰላሞ ይስጝፃው አኽⶓ ቶኬምካ:: እምፕልታቕ እንዴስ ቤዴራ እሺኑውስታ እምፕልትስ አምኽጜካማ ዝኩዋንታኪላ ታክስፅካ::

አዊ ብሄረሰቡ ቺፅጝፂው ቹዋ ቺፅጝፃንቲ አቶ ቴዎድሮስ እንዳለው ፅንፌንት ክልሉሳ ሰላሞ አዌካማጊ አኽⶓ ጌሌፅካ:: ብሄረሰቡ ቺፅጝፂዳ ኬፍቲኒ ያኹኽ አቕቱ፣ ማይቤራዊውስታ ይኮኖሚውሳ ጉዳቶ ሲፍፅⶓ ቶኬምካማ እንሳ ሰላሙሳ ችግሮ ዊዳፊስ ኽይጝስ ይስጙኽ እጎ ኬቤርፅጙ እንፅኺ እንፃኽስስቱስ እጂⶓ ጌሌፅካ::

ፌዩንኩ አሜትካ ፅንፌንትስ ፌቴርስትኹ ፄትቲው ችግርስ እምፕልታቕ ክቻዳ ሊጊሲሜ ጊዞ እጂኹ እምፕልቱ እሴትዳ ቻኒስቶ ፌቴርⶓ ጉሹንኩ ቹዋ ቺፅጝፃንቲ እንሳ ችግሮ ኽይጝስ አጌር ሹማጌልካ ሰላሞ ሴፌንፅጝስ ፅሬቶ ፄዋኒስ እጂⶓ እርዳትፅካ::

ዙራሙሪው ሰላም ሴፌናታ ጉዋኻስታ አምቢሊ ኬቤሊው ፃምሪ አይል ቲሪትጛማ ዙራሙሪ ማንዲስታታ ፄውስታማጊ አኽⶓ ኽይትጝፅካ::

ፌኔኬልጛንትካ ቲሪትጝፃንቲ ኮሚቴ ፌኔኬልጛንትካዋ ዙርፃማ ቲሪትጝፅጝስ እንፃኽስስታማጊ አኽⶓ ጌሌፅካ::