“እንዳር ዝኩዌናይ”

ታደለ አጋጄ

ጃዊ ወረዳ ሚንችትስ ምርት አሜሬትስታውስታ እሳን እርሺው ብቲ ዝኩኽ ዙራሙሪያኽ:: እንዱስትሪስ ያኻንኩ ግብርኒኩ ምርትካ እሳንስ ወረዳዳ አሜሬትስታና:: ያኼስጉ ዲጊ ጊዝዴስ ናቴ ኬሴትስትኹ ሰላሙስታ ፄትቲው ችግር ወረዳዳ ኬፍቲኔ ቻኒስቶ ታምፃ:: ጋያኪ ግብርኒው እንፅኺዳ ታምፅኹ ጉዳት ልቓ ጋቲዊያኽ:: ጃዊ ወረዳው አሬሳቻንትካሊ ስልኪስ ፄውንኹ እጂጚዳ አሬሳቻንትካ ግብርኒውሳ እንፅኼ ዎክትስ አኮሜችጝስ ካሌካያስኩ አኽⶓ ዲብስካ::

አቶ አሰፋ አስረስ ጃዊ ወረዳ ዐ6 ኬቤሊው አሬሳቻንቲያኽ:: ችኹ እርሺስ ቤዴራ ቴርቶ ፄዌካማጊያኽ:: አሬሳቻንቲ አሰፋ ሰሊቶ፣ አኩሪ አቲሬ፣ ሹምቤ፣ ሩዞስታ እሊኩሳ ሴብልካዋጊ አሜሬታና:: ናካዳ እሪ እሉዋማጊ አኽጝስ ችኽዳ ዜርስታንኩ ሴብልካስ ብቴ አሬሴካማ ላሳላስፅካማጊ አኽⶓ እንክርፄካ:: ኢንዱስትሪስ  ኩፓ አክኻ ያኻንኩ ምርትካ እሳንስ አሜሬትስታው ወረዳ አኽⶓ ቶኬሙንኩ አሬሳቻንቲ ክልልታ ኬሴትስትኹ ሰላሙስታ ፄትቲው ችግር ግብርኒው እንፅኺዳ ቻኒስቶ ታምፅⶓ ዲብስካ::

አሬሳቻንቲ አሰፋ ዙሙኑውሰታጊ ግብርኒውሳ ምርቶ አሜሬታኑ ብቲ ቤሬኺዳ ዝኩኽ አኽጝስ ሰላሙስታ ፄትቲው ችግርስ ቤሬኺዳ ዝኩኽሳ ብቴ አሬስካማ አሜሬታቲንታ ፄዋ::

ሚንችካ አሬሳቻንትካ ቤሬኺዳ ዝኩኽሳ አርሺውሳ ብቴ አሬስⶓ ባይካማ ፌኔኬልጜካማ ዝኩንኩ አኽⶓ ዙሜካ:: ፌይኹ አሜትዴስ ጄሜራማ አሬሳቻንትካ አሜሬታሺኑ ምርቱ ሜቴን ኔኬትⶓ ቶኬምካማ እንጚስታ ሲፉኒጊ እምፕልታቕዳ ምርኪ ኬሴትስታማ ምንግስቱሳ እርዳቴ ፋይጛ ቱጝስ ካላንኩ አኽⶓ ስጋቶ  ዙሜካ:: ንጙዊኒ ምርቱ ዝቤንዳ አሬሳቻንትካስ ዳላው ግባት ዎክትስ ዲጉኒውላ ግባትዳ ዴሜክስትኹ ዋይሚ አሬሳቻንትካ ፋያኑሳ ላካሳ ግባቶ ጄዌካማ ቴኬምሰታቲንታ ፄውኽ አኽⶓ ዲብስካ:: ፌይኹ አሜትዳ እሺኹ ግባቱ ዋይሚዴስ ንⶓ ድምክኔ ካንትፅⶓ ቶኬምካማ አሬሳቻንትካ ዝኩኽ ብቲዳ ምርቶ አሜሬታቲንታ ቻኒስቶ ቺፅⶓ ቶኬምካ::

ሰላሙስታ ፄትቲው ችግርሊ እምትጛማ ግባትዳ ዋይሚ ዴሜክጝ ችግሮ ባስጝፃው አኽⶓ ዙሜካ:: ሰላም አሺኹ ጊዝዳ ሚንቾ ብቴ አሬሴካማ ቴኬምስታሺኑ ጊዝዳ ሚንች ኩንታሎ ግባቶ ካፅካማ ቴኬምስታሺንኩ አኽⶓ ቶኬምካ:: ናካዳ ልቓ ብቲዳ ቴኬምስታኑሳ ግባቶ ክብሪስ ጄውጝስ ቴኬምስትጝስ ፋዩኒውላ ዶንጌቱንኩ አይልካ  ማዳባሬ ውታኺዳ ክብፅጝስ ችግሮ ፌቴርⶓ ዲብስፅካ:: “ንጙዊኒ ዎክትዳ አሬሳማ ችኻው አሬሳቻንቲ አግስታላ” ኑንኩ አሬሳቻንቲ ዳድ ልምታማ ስፍሪዴስ ስፍሬ ልቕልቕ ንጝስ ግብርኒውሳ እንፅኼ እንፃኽስታቲንታ ቻኒስት ታምባማጊ አኽⶓ እንክርፄካ:: ፌይካ ፌይካማ ግብርኒኩ ውማይቴንካ ውማዩሳ እርዳቴ ፄዌካማጊ አኽⶓ ቶኬምካ::

ግባትዳ ፄውስትኹ ዋይሚው ድምከኒ ክቼያታኪላ ካሲካ:: እሊው ጃዊ ወረዳ አሉኩራንድ 06 ኬቤሊው ዝኩዋንቲ አለሙ ካሴ አሬሴካማ ቴኬምስታሺኑሳ ብቴ ሽኩዋሩ ፕሮጄክትስ እይጝስ እርሺው ብቲ ቤሬኺዳ አኽጝስ ሰላሙስታ ፄትቲው ችግርስ እርሺውሳ እንፅኼ እንፃኽስትጝስ ካሌካያስኩ አኽⶓ ድኹዌካ::

ፌይኹ አሜትዳ ጄሜራማ ዝኩኽሳ ብቴ አሬሴካማ ቴኬምስትጝስ ካሌካያስኩ አኽⶓ ቶኬምካ:: “እንዳር ዝኩዊናይ ኔታይ ዝኩዊኒ እላ ጋማ” ናኒስ ዝኩኽሳ ችግሮ ሜሬርፅካማ ዲብስካ:: እንዴስ ቤዴራ ሰላም እሺኹ ጊዝዳ አሬሳቻንትካ እሳንስ ምርቶ አሜሬታሺንኩ አኽⶓ ዙሙንኩ አሬሳቻንቲ ልቓ ብቲዳ ምርቶ አሜሬትጝስ ፋዩኒውላ ግባቱ ኬቤርጝ ችግሮ ባስጝፅኹ አኽⶓ ድኹዌካ:: ክብሪሰውላ ያኹኒ አሬሳቻንትካ ጄዌካማ ቴኬምስትጝስ ፋዩኒውላ ዶንግቱንኩ አይልካ አሬሳቻንትካ ጄውኑሳ ማዳባሬ “እንዳርማይ ጄውታኑ ንጝስ” ፍሽካማ ክብስፅካማጊ ቼጌርፅⶓ ድኹዌካ:: “እንዴስ ጌና ውላ ችግም እናና እንጀኩናናኽ ዝኩንኹ” ናኒስ አሬሳቻንትካዳ ታምባማጊ ዝኩኽሳ ችግሮ ዙሜካ::

አሬሳቻንቲ አለሙ  ሰላምሰታ ፄትቲው ችግር ኬሴትስትጝዴስ ቤዴራ አኩሪ አቲሬ፣ ሹምቤ፣ ሩዞስታ እሊኩሳ ሴብልካዋ እሳንስ አማሬታሺንኩ አኽⶓ ዙሜካ:: “ብቲ እይንኹሳጊ ዋግፃው እሺኾ፤ ያኼስጉ ናካዳ ግብርኒውሳ እንፅኼ እንፃኽስታቲታ ፄውስትⶓ ዲብስካ:: ሩዝ እሳንስ አሜሬትስታው ዙራሙሪ አኽጝስ አሬሳቻንትካ ሚንቾ ግባቶ ቴኬምስታሺንኩ አኽⶓ ድኹዌካ::

ጃዊ ወረዳ ግብርኒ ፅፌት ጝናሱ አላፊ አበራ ባዘዘው እምስትኹ ምርቱ ዝቤንዳ አሬስስትጝስ አኬድስትኹ 131 ሻይ 830 ሄክታር ብቲ ያኹስ ላንቡሳ ኺስታ 72.ሻይ 545 ሄክታር ብቲ አሬስስትⶓ ጌሌፅካ:: እምስትኹ ምርቱ ዝቤንዳ 7 ሻይ 2 ሊኻ ሄክታር ብቴ ትራክተርስ አሬስጝስ እክድስ እምስትⶓ እርዳትፅካ:: ጃዊ ወረዳዳ 4 ትራክተር ዝኩⶓ ቶኬሙንኩ አላፊ ናካዳ አሬሳቻንትካ ዋሺኒኪ ጊዝዴስ ጃላ ማሴ ፃንኩፅጝስ እርሼ አሬሴካማጊ አኽⶓ ቶኬምካ::

ችኹ እርሺስ ያኻው 110 ሻይ ኩንታል ግባት ወረዳሾ ቱዋው አኽⶓ ቶኬሙንኩ አላፊ ላንቡሳ ኺስታ ወረዳሾ ቱኽ 16 ሻይ 285 ኩንታል ግባት አኽⶓ ጌሌፅካ::

ወረዳሾ ታምብኹሳ ግባቶ አሬሳቻንትካ ዎክትስ ካፅካማ ቴኬምስትጝሰ ፅሬቶ ፄዌካማጊ አኽⶓ ጌሌፅካ:: እንዴስ ድምክና እን አሜትስ ሹምቢው ጉልሊ ዜር አሬሳቻንትካስ እይስታማጊ አኽⶓ ጉሽካ::

አሬሳቻንትካ ግባቶ ፍሽካማ ጝና ካፁኒዴስ ፋሌንጋ ዶንጌቱንኩ አይልካ ካፁኑሳ ማዳባሬ ኪሚጝስ ዳድዳ ክብፅጝስ አሬሳቻንትካዳ ኬፍቲኒ ያኹኽሳ ቤዴሎ ታምፅካማጊ አኽⶓ እርዳትፅካ:: ግባቶ ቻኔካማ ካፃንኩ ሹፌርካዳ ጉዳቶ ታምፅካማጊ አኽⶓኪላ ቶኬምካ::

አሬሳቻንትካ ግባት ዝኩኽ ስፍሪዴስ ጝንሾ ካፅጝስ ቼግርስትካማጊ አኽⶓ ቶኬሙንኩ አላፊ ምንግስት ሰላሞ ማንዲፅጝስ እጎ ኬቤርፅጙሳ እንፅኼ እንፃኽስታማጊ አኽⶓኪላ እርዳትፅካ:: ግባቶ ፍሽታንኻ አሬሳቻንትካዳ እርምጂ ካፅናኻኽ ንጝስ ዶንጌቱንኩ አይልካ አሬሳቻንትካዳስታ ግብርኒኩ ውማይቴንካዳ ቤዴሎ ታምፅካማጊ አኽⶓኪላ አላፊ ጌሌፅካ::

ሚንችካ አሬሳቻንትካ ቤሬኺው ዙሪሙሪዴስ ፌኔኬልጜካማ ሰላም ዝኩኽ ዙራሙሪዳ ዝኩⶓ ዙሙንኩ ግብርኒው አላፊ ፄትቲው አይል ሰላሞ ማንዲፅጝስ እንፃኽስታማጊ አኽⶓ እርዳትፅካ::