ኬሾ ካንትፃላ ንኹ ሜብራት ዲባ

ታደለ አጋጄ

ምንግስት እምፕልታቕ ካሴኑሳ ስሩሳ ልማቶ ዋኽትጝፅጝስ እንፃኽስስታማጊ ያኹኒውላ እምፕልካ እምፕልካ ዙራሙርካዳ ኩፅኒ ስሩ ልማት ቱስቲስ ማንዲስታውላስ ይጉዋማ አግልግሎቲዴስ ሴጋ ያኹስ ካንትስቴ:: “ታፍዳ ዝኩኽ ወርክ ናስታ ካንትስቴ” ናኒስታ ቹዋ ታብል ሴንሳኒስ ሜብራቱሳ አግልግሎቴ እያሺንኩ ጌፄርኩ ኬቤልካዳ ሜብራቱሳ ጌሚዶ ዳዴኽጙ ምክኒያቲስ አግልግሎቲዴስ ሴጋ አኽጝስ ቼጌርስታኒስ ካንትስቴ::

አንኪሺ ጉዋጉሲ ወረዳዳ አግስታንኩ ፅርባስታ ጊዊኒ ኬቤልካሾ ቱዋሺኹ ሜብራት ናካዳ እምፕልታቕ ልኻኻዳ አግስታና:: “ጊዊኒዴስ ፅርባዋኺስታ ቤቴርስትኹ ሜብራቱ ጌሜድ ዋኽስ ዋኾ ዳዴኽስታማ ፖል ይቪቺ  ቲሬማኽ ዝኩኽ” ናኒስ ኬቤሊኩ ዝኩዋንትካ ስልኪስ ዙሜካ::

ጊዊኒ ኬቤሊው ዝኩዋንቲ አቶ ገረመው በላይነህ ጊዊኒ ኬቤሊዳ ላጛ አሜትዴስ ፍና ሜብራቱ ጌሜድ ዳዴኽስትⶓ ድኹዌካ:: “ውራኒዴስ-ጊዊኔ-ፅርባዋኺስታ ፌያማ ካሳው ሜብራቱ ጌሜድ ዜሬፍስታማ እንዳርማኪ እላ:: ሜብራት ብብራማ አግልግሎቴ እያሺኹ ናካ ኩፅኒ ልኻኽዳኽ ዝኩንኹ” ናኒስ ካንቴ ታምፅካ::

እምፕልታቕ ሜብራቶ አሬ ፍችፅጝስ፣ ሞባይሎ ቻርጃ ፄውጝሰ፣ ሜብራቶ ቴኬምስትጝስ ሚንች እንፅኺው ድል ፌቴርስታሺኹ ጌሜድ ዳዴኽስታማ እምፕልታቕ ቴኬምስታቲንታ አኽⶓ ቶኬምካ::

እምፕልታቕ ስሩሳ ልማቶ ማንዲጝስ ኩርፄንካ አኽⶓ ዙሙንኩ አቶ ገረመው ሮንድ ማንዲስቱስ ኬምፕስ ሮንድ እላቲው ስፍሪስ ቱዌካማ ዳዴኹ ዎንጄል ፌፄምስትⶓ ዲብስካ::

ሜብራቱሳ ጌሜዶ ዳዴኽጝስ ካላንኩ ውማይ ዝኩክ አቕ አኽጝስ ካላንኩ አኽⶓ ዙሙንኩ አቶ ገረመው እንዴስ ጌና ዋሺኒኪ እምፕልታቕስ አገልግሎቴ እያውሳ ስሩሳ ልማቶ ቱስቲስ ማንዳንኩ አኽⶓ ዲብስካ::

ጊዋኒ ኬቤሊው ቺፅጝፃንቲ አልጋነህ ወርክነሀ ኬቤሊዳ ሮንድ ማንዲስቱስ ሮንድ እላቲው ስፍሪሾ ቱጝስ ሜብራቱ ጌሜድ ዳዴኽስትⶓ ዙሜካ:: ጊዊኒዴስ ጄሜራማ ፅርባ ዋኺስታ ታምባው ሜብራቱ ፖልዴስ ጌሜድ ዳዴኽስታማ ፖል ይቪቺ ቲሬማ ይጉዋ ኑንኩ ቹዋ ቺፅጝፃንቲ ምንግስት እምፕልትቖ ቴኬምስታንታ ሜንቾ ባጄቶ ሜዴባማ እንፃኽስትኹ ስሩ ልማት ጛርቱሳ ትክሞ ፋያንትካስ ዜሬፍስታማ እምፕልትቕ ልኻኽዳ ቱዋንታ ፄውⶓ እንክርፄካ:: አቶ ገረመው ዜሬፍስትኹሳ ሜብራቱሳ ጌማዶ ጉዳይ ካንታኩ አካልካስ አቕፅⶓ ዙሜካ::

ኬቤሊታ ዎንጄሎ ፌፄሙንኩሳ ታራታርስታንትካዋ እምፕልታቕ ፍሻኒ ዴሜካ   አጌሮ ባይፅካማ እሊው ስፍሪሾ ካስⶓኪላ ጉሽካ:: ቤዴራ እንታኮውሳ ዎንጄሎ ፌፄምኹ ጛርት አቒ ታፍስ ታፎ እምስታማ እግስ ካሲስታማጊ አግስታው አኽⶓ ዙሜካ::

ሜብራቱ ጌሜድ ዳዴኽስትጝ ምክንያቲስ እምፕልታቕ ማልጛ ቼጌርስትካማጊ አኽⶓ ዲብስካ:: ሜብራትስ እንፃኽስታሺንኩ ሚንችካ ዲብካ ኬቤሊዳ ጄሜርስታሺንኩ ያኹኒውላ ሜብራት አግልግሎቴ ቲሪፅጝስ ጄሜርስታሺንኩ ዲብካ ቲሪⶓ ዲብስካ::

አንኪሺ ጉዋጉሲ ወረዳው ቹዋ ቺፅጝፃንቲ ዳሳለው አምሳል ወረዳዳ ዝኩንኩ ሊሊትጙንኩ ኬቤልካዳ ሜብራት ቱዋማ አግልግሎቴ እያማጊ አኽⶓ ቶኬምካ:: ፅርባስታ ጊዊኒ ኬቤልካዳ ኩፅኒ ሜብራቱ ጌሜድ ዳዴኽስትጙ ምክንያቲስ አግልግሎቴ እይጝዴስ ሴጋ አኽⶓ ጌሌፅካ:: “ሜብራቱሳ ጌሜዶ ሌኬምካማ ዊድካ:: ጌሜድ ዳዴኽስታማ ፖል ይቪቺ ቲሬማኽ ዝኩኽ” ናኒስ ስሩ ልማትዳ ታምቡኽሳ ጉዳቶ ጌሌፅካ::

ዎንጄሎ ፌፄማንትካ ዎዴስኪ ይንቴካማ ዳዴኻላኽ፣ ዎንጄሎ ፌፄማንትካ እንጚ ዙራሙርካዳ ዝኩንኩ አኽጝስ እምፕልታቕ ዎንጄሌንካዋ ፌይፃማ እይጝስ ቴቤቤርጜካማጊ ጋቲንኩ አኽⶓ እርዳትፅካ::

ግምጃቤትዴስ ውራኔ-ቱልቴ ኺስታ ቤቴርስትኹሳ ሜብራቱሳ ጌሜዶ ዳዴኻኒስ እምስትካማ እግስ ካሲስትካማጊ አኽⶓ ዙሙንኩ ቹዋ ቺፅጝፃንቲ ታፍስ ታፎ እምስቱንኩ ዳዴኹኑሳ ሜብራቱ ጌሜዱ ብሩሳ ሜቴኖ ኬያንታ ፄውስትⶓ ጌሌፅካ::

ቱልቲ፣ ቤኬፍቲ፣ አቲቲስታ ቡይ ኬቤልካ ሜብራቱሳ አግልግሎቴ አግፄካማጊ አኽⶓ ቶኬምካማ እምፕልትቕ እንፃኽስቱንኩ ስርኩ ልማትካዋ ቱስቲስ ማንዲጝ ፋይፃው አኽⶓ እርዳትፅካ::

ቱልቲ ኬቤሊው እዝብ ሜብራቱ ጌሜድ ዳዴኽስታቲታ ማንዳንታ ኬፄርካማ እንፃኽፅካማጊ አኽⶓ ቶኬምካ::

ግምጃቤት ማይኬሉ ሜብራት አይሉ ሰራስኪያጅ ግርማ ገብሬ ፅርባስታ ጊዊኒ ኬቤልካዳ 2014 ም/አሜታዴስ ጄሜርካማ ሜብራቱ ጌሜድ ዳዴኽስትⶓ አቕፄካ::

ላንጊጊ ኬቤልካዳ ትክላሊስ 38 ሻይ ሜትር ሜብራቱ ጌሜድ ዳዴኽስትⶓ ቶኬምካ:: ጌንዜብስ ጌሜትስታኒ 9 ሚሊዮን ብሮ ፍሻው ጌሜድ ዳዴኽስትⶓ ጌሌፅካ:: ፅርባስታ ጊዊኒ ኬቤልካዳ እንዳርማኪ ሜብራቱ ጌሜድ እላቲው ፖል ይቪቺ ቲሬማ ዝኩኹ አኽⶓኪላ ጉሽካ::

ጌሜዶ ዳዴኼካማ ጝናኻዴስ አግስታማ ዳዴኻንቲ እግስ ካሲስትⶓ ጌሌፅካ:: ፌፄ ምስትኹሳ ዎንጄሎ ኬቴሙ ቺፅጝፂስ አቕፅጝስ ዎንጄሌንካ እግስ ካሲስታንታ ፄዋማጊ አኽⶓ እርዳትፅካ:: እምፕልታቕ ዎንጄሎ ፌፄማንትካዋ ፍሽካማ እይጝስ ቴቤቤርጜካማጊ ጋቲው አኽⶓኪላ ቶኬምካ::

አይኪ ዳዴኽስ አይ ዎንጄሎ ፌፄሙንኩሳ እግስ ካሲስታንታ ፄውጝስ እምፕልታቕዳ ችግር ዝኩⶓ ጉሽካ::

ቱልቲ ኬቤሊ እንታኮው ችግር ፌፄምስታቲታ ቱስቲስ ማንዴካማጊ አኽⶓ እርዳትፅካ:: እሊኩ ኬቤልካኪላ ቱልቲ ኬቤሊዴስ ዴሶ ካፅጝስ ማንዲጝ ፋይፃው አኽⶓ ቶኬምካ::

እንዴስ ጌናኪላ ምንግስት ዙርፃማ ጌሜዶ በቴሩኒጊ ጛውሳ ንብሬቶ ቱስቲስ ማንዲጝሰ ቴኬምስታንታ አኽጝ ፋይፃው አኽⶓ ጌሌፅካ::