ፖለቲካዋ አይማኖትሊ አሌቔትጝፅናውላስ ሰላምስ ዜቦ ቲሪጝ ቱስቴ እስትኾ

ታደለ አጋጄ

ሹኻንቲ አይማኖቱ ጉባይስታ አጌር አቡቕ ኮንፈረንስ “አይማኖትካ ሰላምስ፣ ኬበቤርጝጚስስታ አብርትስ” ናው ቹዋ እንፅኼንትስ ባርዳር ኬቴምዳ ስንብቶ ካስጛ::

ኮንፈረንስዳ እንፅኼንቶ ፌያፌይጝፁንኩ ይቶፒያው እስልምኒ ጉዳይካው ትክላይ ኩስጚ ጝናሱ ፕሬዝዳንት ሼህ ሐጂ ኢብራሂም ቱፋ ሹኻንቲ ስላሙ ጉባዬ ግዲቴት ባርዳር ኬቴማዳ ካሰጝጝስ ካሉኹ ሰላም ዝኩጝስያኽ ንካ::

ሰላሙ ዋይሚ ዙሚስታማ ድኻቲው አኽⶓ ቶኬሙንኩ ሼህ ሐጂ ኢብራሂም ካልስ ሰላም እናናጊ ዙሚኔ፤ ቴግባርስ ዴሜካ ሰላምስ ዝኩኹሳ አኺኔ ፌቴሽንስ” ናኒስ ዙሜካ:: ችግርካ ድባን አምፓዴስ ይንታቲንኩስታ ብቲዳ ዋጋቲንኩ አኽⶓ ዙሙንኩ ሼህ ሐጂ ኢብራሂም ችግርካ ይንታኑ እኖጂዴሲያኽ ንካ::

ውላ አቒ ድባኑሳ ዳዶ ሲፉኒጊ ችግርካ ኬሴትስትጝስ ካላቲንኩ አኽⶓ እርዳትፅካ::

አጌራዋ ላጛ ዲብካ ጉዴካ ኑንክ ሼህ ሐጂ ኢብራሂም እኒጛኪላ ድክትስታ ሰላሞ አቲጝ አኽⶓ ቶኬምካ:: ቱትጝ አቲጝ ሰላሞ አቲጝስ ቹዋ ችግር አኽⶓ ቶኬምካማ ሰላም ሴፌንጝስ ጌምጝስ ካሊስታው ሜሳሪስ ያኻውላስ ዙሚትጚስ አኽⶓ ቶኬምካ:: ችግርካ ኹሉቺፋ ኽይስታኑ ዙሚትጚስስታ  ኩስጝጚስ አኽጝስ ውላጊ አጌራዊ ኩስጝጚዳ አሴቴፍጝጝስ ችግርካ ኽይስታንታ ታክስፅካ::

ይቶፒያ ኹሉ ቺፋ ድኻ አጌራ እስቴታ እቑስታቲታ ዳሌስ ንጝ ቱስታው አኽⶓስታ ችግሮ ዲግጛማ ኽይጝስ ልማትሾስታ ልግስኒሾ እንዜጝጝ ቱስቴ ንካ::

ይቶፒያ ኦርቶዶክስ ብሽታና (ቤተ ክርስቲያን) ባርዳሩስታ ሰሜን ጎጃም አህጉር ስብከት ሊከ ፓፓስስታ ክዱስ ሲኖደሱ አባል ብፁእ አቡነ አብርሃም ፌያፌይጝፁኑ እንፅኼንትስ “ብቲ ክማውላስ አይማኖቶ ፖለቲካሊ፣ ፖለቲካዋ አይማኖትሊ አሌቔትጝፅናውላስ ሰላምስ ቲሪንስ” ንካ::

አጌራ ሰላሞ አቲጝስ እምፕል ምክኒያት  ዙሚስታው ፍችትጚዉ ዙሚትጚ አኽⶓ ቶኬምካ:: እኖጂዴስ ማንዲስታው ድኪ እንፅኺዴስ እቺጝስ ድባን ናውሳ ዳዶ ሲፍጝስ አኽⶓ ዙሜካ:: ሼው ዴስቲ ሰላምዴስ ይጎ አግስታው ድልስታ ዴስቲ ፅፄት አኽጝስ ታሪክስ ዎኬስስትጝዴስስታ ክምንትስ ካሲስታንታ አኽጝዴስ ውላጊ ጌራታ አኽጝ ቱስቴ ንካ::

“እን ዝቤን እኖጂስ አይማኖትኩ ታብልስ ጛሪ ቑንዛኽ፣ ሼው ድንታኽ፤ ምክኒያትኪ እዝን ክቶ አቱኺያኽ” ናኒስ እርዳትፅካ::

ኩዋንትካ፣ ክራንትካ፣ ፌኔኬልጛንትካ፣ ፌኔኬልጝፃንትካ እኖጂስኩ ጄርካኽ ኑኑ:: እኖጂ ታብል እንፃኽስትጝ ቱስታውሳ እንፃኽስትናውላ ይጉጝስ ዎጌንካ ቼጌርስትካማ አግስታና ንካ:: አኽጝስኪ ብቲ ክማውላስ አይማኖቶ ፖለቲካሊ፣ ፖለቲካዋ አይማኖትሊ አሌቔትጝፅናውላስ ሰላምስ ቲሪፅንስ ንካ::

ይቶፒያው ሰላም ሚኒስቴር ሚኒስትር ዴኤታ ከይረድን ተዘራ  (ዶ/ር) ሹኻንቲ አይማኖቱ ጉባዬዳ ፌያፌይጝፁኑ እንፅኼንትዳ እምኔትኩ ኾትካ አይትኩ ጌሌፅካኽ:: ብሽታና ይቶፒያ ቢዲልስቴኒ ቢዲልስቴት፣ ታቡቶ እሚጝስ አጌራዋ ማንዴታ እጂⶓ ዙሜካ::

እሰልምኒው አይማኖትኪ ያኻ እሊኩ እምኔትካ ይቶፒያስታ ይቶፒያውት ፂናታ እጂፁንኩ አኽⶓ ቶኬምካ::

ኮንፈረንስዳ እንፅኼንቶ ፌያፌይጝፁንኩ አማኻሪ ክልሉ ቺፅጝፂ ጛራ አረጋ ከበደ ሰላሙ ኮንፈረንስ አማኻሪ ክልልዳ ካስጝጝ አማኻሪ ክልሉ እዝብስ ኽይ ኽሳንቲያኽ ንካ:: ኮንፈረንስ ሰላምዳስታ አብርትዳ ኩስጚ ፄውስታውስታ ሰላም ስሮ ሚፃታ ፄውጝስ አኽⶓ ጌሌፅካ::