ቴጋንስ ቴኬምስቱንኩ

ታደለ አጋጄ

ይቶፒያ ዲጊ ጊዝዴስ ናቴ ግብርኒው ዜርፍስ ሊሊቴ ትኩቶ እይጝስ እንፃኽስቴታጊ አግስቲ:: አጌራው ይኮኖሚው ስር ያኹኽሳ ግብርኒውሳ ዜርፎ ዝቤንፅጝስ ሊሊቲስ እንፃኽስስታማጊ ያኹስ አሬሳቻንትካ ሜካናይዜሸነ እንፃኽስትጝስ ዝኩዊኒ ኪሳንታ ፄውስታው ፅሬት ጋሺፃዊያኽ:: እሳን እርሺው ብቲዳ ብቲ ብታስ ጌማንኩሳ ብንካዋ ቴኬምስትጝስ ምርቶስታ ምርታምቶ ሌጌፅጝስስታ ድኽትዴስ ፊጝስ ግብርኒውሳ ዜርፎ ኬሽኹ ዳድስ እንፃኽስትጝ ፋይፃንቲያኽ::

ባርኾቼ አጌርካውሳ እርዳቴ ማንዲጝስ ኪቻ ዝክኹሳ አቒውሳ አይሎ ዋሺኒኪ ሴብልስ አሴሜምጛው  ብቲዳ ግብርኒዉ ውማይቴንካው እርዳቴ ቴኬምስትጝስ ኬሽኹሳ ምርቶ አሜሬትጝ ቱስቴ:: ብሄረሰቡ ቺፅጝፂዳኪላ ዎሺኒኪ ሴብልስ አስሜምጛው እሳን እርሺው ብቲ ዝኮ:: አሬሳቻንካ ዲጊዴስ ናቴ አኾቲስ ሊሊትጙንኩ ሴብልካዋ ዜርጝስ ኪሴ ካንትፅካማጊ አግስታና:: አውጚ ቴለቭዥንሊ እጂጜ ፄውንኩ ባንጂ ወረዳው አሬሳቻንትካኪላ አኾቲስ ሊሊትጙንኩሳ ትክልትካዋ ሊሚፅጝስ ኬሽኹሳ ትክሞ አግፄካማጊ አኽⶓ ዙሜካ::

አስረስ ደረስ ባንጂ ወረዳ አስቑኒ አቡ ኬቤሊው አሬሳቻንቲያኽ:: ጛው ጎርዳ ሊሊትጙንኩሳ ትክልትካዋ ሊሚፅⶓ ድኹዌካማ:: ግብርኒዉ ውማይቴንካውሳ ኩስጜ ቻቤልካማ ፌይኹ አሜትዳ ጉባሬ ቴኬልካማ ኬሽኹስ ዋግፅጝስ ትክሞ አግፅⶓ ዲብስካ:: ልቓ ብቲዳ ሊሚፅጝስ 60 ሻይዴስ ጃላ ጌንዜቦ አግፅⶓ ኽይትጝፄካ::

ጉባሪዴስ ድምክና ትክልሌ አምሌስታ እሊኩ ቴጋንኩ ትክልትካዋ ጛው ጎርዳ ሊሚፅካማጊ አግስታና:: ልቓ ብቲዳ ዜሩኑ ጉባሪስ ትክሞ አግፅⶓ ቶኬምካማ ንጙዊኒ ምርቱ ዝቤንዳ ጉባሬ እሳንስ ዜርጝስ ሊሚፅካማ አኽⶓ ዙሜካ::  ቤዴር ኑስ ጉሽፅካማ ሊሊትጙንኩሳ ትክልትካዋ ሊሚፅካማጊ ያኹኒውላ ግብርኒው ውማይቴንካዉ እርዳታ ጋቲታ ዴስስ ሊሚፃኑ አኽጝስ ትክሞ አግፃቲንኩ እሺⶓ ዙሜካ:: ግብርኒዉ ውማይቴንካ እያኑሳ ኩስጜ ቻቤልካማ ሊሊትጙንኩሳ  ትክልትካዋ ሊሚፅጝስ ኬሽኹሳ ትክሞ አግፃንታ እርዳትⶓ ድኹዌካ:: ግብርኒዉ ውማይቴንካ አሬሳቻንትካስ እያኑ ኩስጚ ኬሽኹሳ ምርቶ ሊሚፃንታ ፄውⶓ እርዳትፅካ::

እንዴስ ቤዴራ እንኮጛስታ እንፅኼ እንፃኽስታስኩኒ  አሬሳቻንትካው ዝኩዊኒ ኪስስታው አኽⶓ ቶኬሙንኩ አሬሳቻንቲ እሊኩ አሬሳቻንትካስጊ ዴስ ቤንጝፃንኩ አኽⶓ ጉሽካ::

ጛው ቴጋንዳ አሜሬቱኑሳ ሊሊትጙንኩሳ ቴከልካዋ ጌፄንስ እምፕላኒስ አሬኬብፅጝስ ዋያና:: ጌቤልዳኪላ ካፅካማ ዋያና:: ንጙዊኑ አሜትዳ ልቓ ብቲዳ ሊሚፁኑ ጉባሪዴስ ኬሽኹሳ ትክሞ አግፅⶓ ዙሙንኩ አሬሳቻንቲ ንⶓ ዜሩኑዳ ዴሜካ 70 ሻይዴስ 80 ሻዮኺስታ ጌንዜቦ አግፅጝስ አኬድⶓ ዙሜካ:: አኾቲስ ሊሊትጙንኩሳ ቴክልካዋስታ ኩፓኩፕካዋ ሊሚፅጝስ ኬሽኹሳ ሚፄ አግፅጝስ እንፃኽስታንኩ አኽⶓ ዙሜካ::

እሊው አስቑኒ አቡ ኬቤሊው አሬሳቻንቲ አንሙት አባዬ ጛው ቴጋንዳ ጉባሬ፣ ሽንጉርቼ፣ ዱኒዜ፣ ካሮቶ፣ ቲማቲሞስታ እሊኩሳ ቴክልካዋ ሊሚፃና:: ኤስ አን ቪ እስታው ፕሮጄክትስ አቡቕስትጝስ ሊሊትጛንኩሳ ትክልትካዋ ሊሚፅጝስ ትክሞ አግፄካማጊ አኽⶓ ዙሜካ:: ልቓ ብቲዳ ሊሚፃኑ ቴክልስ ኬሽኹሳ ሚፄ አግፄካማጊ አኽⶓ ጉሽካ:: አኾቲስ ሊሚፃኑ ቴክልስ ጛውሳ ዝኩዊኔ ኬሽጝፅጝዴስ ፌይኹስ ጄርካዋ ክንትፃንኩ አኽⶓ ዙሜካ::

ግብርኒዉ ውማይቴንካው እርዳቲ ዴሜካ አሬሳቻንትካ ኬሽኹሳ ትክሞ አግፃንታ እርዳትⶓ ዙሜካ::

ጉችቕፂ እስታው ብንዴስ አኾ ቴኬምስትጝስ ዙራሙሪኩ አሬሳቻንትካጊ ኬሽኹሳ ሴብሎ አሜሬትካማጊ አኽⶓ እርዳትፅካ::

አሜሬቱኑሳ ትክልትካዋስታ ኩፓኩፕካዋ ዋይጝስ  ጌቤሉ ታምትጚው ችግር ዝኩⶓ ድኹዌካ::

ባንጂ ወረዳው ግብርኒው ፅፌት ጝናዳ ቴክልካውስታ ኩፓኩፕካው አኾቴ ቴኬምስትጝጚው ኬቹ ጉሳንቲ አምሳሉ አንተነህ ወረዳታጊ 2017 ም/አታዳ  3 ሻይ 792 ሄክታር ብቲ አኾቲስ ሊማማጊ አኽⶓ ዙሜካ:: አኾቲስ እንፃኽስስታው እንፅኺስ ውላ ታምብዌንካ አካልካሊ ፃምርትጚስ እንፃኽስታንኩ አኽⶓ ዲብስካ::

ቴጋንኩ ቴክልካዳ እሳንስ ሊማማጊ ዝኩኹ አምሊ፣ ጉባሪ፣ ካሮቶ፣ ቲማቲምስታ እሊኩ ትክልትካ ወረዳታጊ  እሳንስ ሊሜካማጊ አግስታንኩ አኽⶓ ዙሜካ:: 400 ሄክታር ብቲዴስ ጃላ ቴጋንኩ ትክልካስ ሾፌንስትⶓ ቶኬምካማ ልቓ ብቲዳ ሚንች ትክም አግስትጝስ ካላው ጐርኩ ትክልትካዳ አኽⶓ ጌሌፅካ::  200 ካሬ ሜትር ብቲዳ ትክልሌ አምሌስታ ጉባሪዴስ 60 ሻይዴስ 70 ሻዮ ብሮኺስታ  አግፅጝስ ቴኬምስታንታ አኽⶓ እርዳትፅካ::

ቴጋንኩ ትክልትካስ ያኻውሳ ጉልሌ ዜሮ ግብርኒዉ ውማይቴንካ ዲግሳንኩ አኽⶓ ቶኬምካማ ግባት ዳላው ሜቴንስ ቴኬምስትጝስ ኬሽኹሳ ምርቶ አግፃንታ ካሊፅⶓ ዙሜካ::

አሬሳቻንትካ ቹዋስ አሜሬቱኑሳ ትክልትካዋ ምግብስ ቴኬምስታንታ ፄውጝስስታ ጛጂዴስ ፊታውሳ ዴሜካ ጌቤልስ ዲግሳንታ ፄውስታው አኽⶓ ዙሜካ::

አሬሳቻንትካ አሜሬታኑሳ ሴብሎ ዋይጝዳ እንዳርማኪ ችግር እላቲው አኽⶓ ጌሌፅካ::

ቴጋንኪ ቴክልካዳ ኬሴትስታው ቑንዚስ እጆ ጄዌካማ ቴኬምስትጝ ቱስታው አኽⶓ እርዳትፅካ::

አኾቴ ቴኬምስትጝዳ አሬሳቻንትካዳ ጉድ ዴስ ዝኩⶓ ጉሹንኩ አቶ አምሳሉ አኾ ዝቤናዊ ዳድስ ቴኬምስታንታ ፅሬት ፄውስታማጊ አኽⶓ ጉሽካ::

አዊ ብሄረሰቡ ቺፅጝፂው ትክልትካውስታ ኩፓኩፒው አኹ ቴኬምስትጝጚው ኬቹ ጉሳንቲ አዲሱ አለሙ አኾቲዉ ልማት ብሄረሰቡ ቺፅጝፂታ ቤዴራ ጄሜርካማ አኾ ቴኬምስትጝስ ሊሊትጙንኩ ጐርኩ ቴክልካዋ ሊሚፃንኩ አኽⶓ ዙሜካ::

አሬሳቻንትካ ምንጊዴስ ጄሜርካማ አኾቴ ቴኬምስታንኩ  አኽⶓ ጉሽንኩ አላፊ ዞንታጊ እክድስ እምስትኹ 39 ሻይ 522 ሄክታር ብቲዴስ  36 ሻይ 633 ሄክታር ብቴ አባላምቲ ዙሪስ ሊሚፅⶓ ጌሌፅካ::

እን አሜትዳ አኾቲስ ሊማው ሴብልዴስ 5 ትኩሚ 85 ሚሊዮን ኩንታል ምርቶ አግፅጝስ አኬድⶓ ዙሜካ:: ቴጋንኩ ቴክልካ ልቓ ብቲዴስ ሚንች ትክሞ አግፅጝስ አሬሳቻንትካ ትክሞ አግፄካማጊ አኽⶓ ቶኬምካ:: ግብርኒዉ ውማይቴንካ አሬሳቻንትካው ማሲዳ አግስትጝስ ፋይፃውሳ ግባቶስታ ጉልሊ ዜሮ ቴኬምስትካማ   ምርቶ ሊሚፃንታ ፄውⶓ ጌሌፅካ::