ቤር ዜንጋ

ዘውዴ በካሉ

ፁፍፅንታው ቴርትዳ ግትም፣ ዴዴጝ ልብወለድ /ሼውፅንታ/ ሊጊሲሚ ልብወለድ፣ ታሪክ፣ ጛርቱ ታሪክስታ እሊኩኪላ አግስታና:: ልብወለድ ሊጊሲሚ ልብወለድስታ ዴዴጝ ልብወለድ እስታማ ላጛስ ቤንስቴ:: ዴዴጝ ልብወለድኪ ያኻ ሊጊሲሚ ልብወለድ ጚው ያኹኽ ፃፊጙ ዳድ አኹኪ ስልት ዝኩኽ ያኹስ ፃፋንቲ ጚውሳ ትቤቦ ቴኬምስታማ እምፕሎ ታሪኮ፣ ወጐስታ ባይሎ ጌሌፃው ዳድያኽ:: ዴዴጝ ልብወለድ ጉምጅኒስ ዴዴጝስ ፃፊስታው ያኹስ ሊጊሲሚ ልብወለድ ኩፂ ታሪኮ ዳሬ ኺስታ ዳሴሳማ፣ ጃላ ኩክራ ካንታማ ታሪኮ ዋኽስ ዋኾ ጌሌፅጝስ ቴኬሜ:: ፅኹር ምሳሊ ያኹክ ዴዴጝ ልብወለድስታ ሊጊሲማ ልብወለድ ጛው ያኹኽ ፃፊጙ ስልትስታ ጊዝ ዝኩዋ:: ታሪኮ እሚካማ አንቤባንቲውሳ አንኩሌ እሚካማ አንቤባንትካ አሊዴ አሳቦ አግፂኒምባኺስታ ጐሜጅካማጊ አንቤባንታ ታሪኮስታ ጌቴምኹሳ ዲቦ ዴሜክጝስ ታሪኮ ይስጝፅጝስ ካሌ:: ሜንችካ ትቤብኩ አቕ ጛውሳ ታሪኮ፣ ወጐ/ ባይሎስታ እሴቶ ልብወለድስ /ሼዋ ፊቲሪስ/ ጌሌፃና:: እንማቻ አባላምቲ ጊዝስ አውጚው ኮንኪስ ፃፊስትኹ “ቤር ዜንጋ” እስትኹ ሊጊሲሚ ልብወለድ ፃፊስታ:: እን ዴማካ ኮንኬ፣ ባይሎ፣ ታሪኮ፣ ወጐ ሌጌፅጝስ ቴኬሜ:: እኖጂኪላ ቤርዜንጋ ሼዋ ፊቲሪው ፃፋንቲ ሞገስ ፈተነ አውጚ ቴሌቤጅንሊ ፄውኽሳ እጂጜ አንቤብፅጝስ ፋኑኻ::

ቺርቤዋ፡- ዋዳይ ካሚኒስቲኑ?

ሞገስ፡- ካሜንስታታ ሌግስኹኪ አዊ ብሄረሰቡ ቺፅጝፂ አዮ ጉዋጉሲ ወረዳ ዊንዲጊ አቡ ኬቤሊዳኽ::

ቺርቤዋ፡- ፁፍፅንታሾ ቱጝዴስ ፍና እሺኹሳ እንፃኺቱሳ አኺኔስታ ዋትጛ ፁፍፅንታሾ ይንትጝስ ካሊኹ አኽⶓ አንቤባንትካስ እንክሪፅ?

ሞገስ፡- አን እንፃኺታስ እድሚ ክንቲስ ታምባኒ እምፕላንቲ ቤንዴስ ሴዛንቲ ቤኖኺስታ ሹማና ጉሲ እስታው ክንቲ ጝናዳ ክንቱኻ:: አንኩዋዴስ ሶኼታንቲ ቤኖኺስታ ዴሜካ ዋንቢሪ ማርያምዳ ክንቱኻ:: ላጛንቲ አች ክንቲ ጝናሳ ዴሜካ ሴስታዴስ 10ዋኺስታ አዚኒ ትክላሊ ላጛንቲ አች ክንቲ ጝናዳ ያኹስ 11ዴስ 12 ዋኺስታ ዴሜካ ድሙ ማርያምዳ ክንቱኻ:: 12ንቲ ቤኑሳ አጌር አቡቑሳ ፍታኔ ፌቴንስታታ ዳሜካ ሚዛንቴፒ ዩኒቨርስቲዳ ICT እስታው ክንቲው አይኔትስ አባላምቴ ዲግሬ ክንቱኻ:: እንዴስ ፋሌንጋኪ ደቡብ ክልልዳ ላጛ አሜታ ክንትፃንቲ አቓታ እንፃኽስቱኒዴስ ፋሌንጋ አዊ ብሄረሰቡ ቺፅጝፂሾ አንታታ ናካ አግስታው እንጃቢሪዳኽ::

ቺርቤዋ፡- ፁፍ ፅንታሳ ዋኒይ ጄሜርትኹ? ዋትጛስ ጄሜርጝስ ካሊኹ?

ሞገስ፡- ፁፍፅንታው ፋይ እንፃኺታስ ጄሜራማ እሺኾ:: ፁፍ ፋይ እንፃኺታስ ጄሜራማ እሺኒኪላ አባላምቴ 10ንቲ ቤኑ ክንታንቲ ዝኩዋስኩስ ሙዚኪውሳ ዙሜስታ ግትሞ ሴዛዋ አውጚስስታ ሴዛዋ አማኻርጚስ ፃፋኽ:: እንሳ ግትሞስታ ዜሜ ዴሜካ እንጃቢሪዳ አግስታው ባይሉ ኬችዳ እንፃኽስታው ጄር እርዳታዊያኽ ናኒ ካሳታ  ካስታኒ ኩው ድምፅ ጅሚስ ይጉዋማ ዲብስጝስኪላ ያኻላኽ ግዴላኪያኽ ናኒ ቴስፌ ኬውጝስ ሌግዳ ሚፃባትኾ:: እን ፋይዴስ ጁጝስ ዩኒቨርስቲዳ ክንታንቲ ዝኩዋስኩስ ዳቔርስታው አሜትዳ 2008 ም/አሜትዳ ዋኾ ፊልሞ አማኻርጚስ ፃፉኻ::

ቺርቤዋ፡- ጊዝዴስ ጊዞ ዴሜካማጊስታ ቴስፌ ኬውታውላስ ፃፊኹ ፁፍ ዋሳ ታምብኹ ?

ሞገስ፡- አማኻርጚስ ፃፉኽ ፊልም ዩንቨርስቲውሳ አኺኔ ካንትፃው ፁፍ እሺኾ:: እንኪላ እንጃቢሪ ዩኒቨርስቲ ጄሜራው አኽⶓ ንባር እሺኹ አኽጝስ ዩኒቨርስቲውሳ አኺኔ እንፃኽስትጝስ ፋይ እሺኾ::

ያኼስጉ እን ፊልምኪላ ሳኪትጛውላስ ይጉኻ:: አንዴስ ፋሌንጋኪ 2011 ምሬት አሜትዳ እንጃቢሪሾ አንትጝስ ክንታንትካ ክንቴ አውጚስ ክንታኒስ ካንትኾ:: ዩኒቨርስቲዳ፣ ኮሌጅዳ፣ እምፕላንቲስታ ላጛንቲ አች ክንቲ ጝንካዳ አውጚስ ክንቲ እይስትⶓ ማሉኻ:: እንዴስኪ ክንታንትካስ ያኻው እርዳታው ሜፃፍ እላቲው አኽጝስ ዳማይ ኬሼ? ይዴስ ዳርማ ማንዲስቴ ናውሳ አሳቦ ጉሽጝስ ታክስኾ:: ክንትፃንትካኪላ አማኻርጚውዴስ ልብወለድዴሰ አኹኪ ሼዋ ፊቲሪዴስ አውጚሾ ኽይጝስ ክንትፃና:: አውጚው ዴዴጝኪ ያኻ ሊጊሲሚ ሼዎ ፊቲሪ እላቲው አኽጝስያኽ:: እንሳ ችግሮ ኽይጝስ እዝብ ጚውስ ኮንኪስ ባይሎ፣ ታሪኮ፣ ዎጐስታ እሴቶ አንቤብካማስታ እርዳትስትካማ ክንታንታ ንጝስ ክንትፅጝስኪላ ቴኬምስታንታ ንጝስ “ቤር ዜንጋ” ናውሳ ሼዋ ፊቲሬ ፃፊጝስ ታክስኾ::

ቺርቤዋ፡- ቤርዜንጋ ናውሳ ስም እይጝስ ካሊኹ ዳርማዴስ ጁጝሲ? እንዳርማ ኽይ ዝኮ?

ሞገስ፡- ቤርዜንጋ ንጝ ዱንታቲው ንጝያኽ:: ቤርዜንጋ እስታው ታብል እሜኑ ቤሩ ዜንግ ዱንፅጝስ ፋይስቱኒ አፄፄፍስቴጉ ዱንታላኽ:: ዱንታያሱ ዲብ ዴሜካ ዙራማ ክቼማ እንፅኺዳ እሺ:: ቤርዜንጋ ናው ሊጊሲሚ ልብወለድኪላ እንሳ ስሞ እሚኹያኽ:: እን ሜፃፍ አዊውሳ ኻሱሳኪ ያኻ ሲንቲውሳ እንቲታኪ እሊኩሳጊ ባይልካዋ ቱስቲስ ክምንትስ ፌያፌይጝፃው ሜፃፍያኽ:: ጋያኪ እምፕል አቒ ቴስፌ ኬዋውላስ እንፃኽስቱኒጊ ፋይኹሳ ታምብጝስ ካላው አኽⶓ ካንትፃውያኽ::

ቺርቤዋ፡- ቤርዜንጋ ናውሳ ሊጊሲሜ ሼዋ ፊቲሬ ፃፊጝስ እንዳርማይ ጉሽጝፁኽ?

ሞገሰ፡- ቤርዜንጋ ናው ሊጊሲሚ ሼዋ ፊቲሪ አውጚስ ፃፊስቱስ አበላምቲ ጊዝስያኽ:: እንፁፍ እንዴስ ፍና ዴስስታያሱስታ አባላምቲ አኽጝስ እሊኩስኪላ ዳዶ ብሳውያኽ:: አን እንሳ ፃፊጝስ ካሉኽ ዲብሳንታ ጋቲታ ኮንኪ ድሴ:: ኮንኪ ድሳቲታ ዴሜካ ዲብስስትጝ፣ ጅምስትጝ፣ ፃፊስትጝ፣ ፊልም እንፃኽስትጝ ፋይፄ:: ጋፋቱ ኮንኪ ድስኹ ዙማው አቒ ድስጝስያኽ:: አንኪላ ኮንኬ፣ ወጐ፣ ባይሎ፣ ታሪኮስታ እሴቶ እስካዊ ክምንት ፌይኹሳ ታብሉሳ ታሪኮ አንቤባማ እርዳትስታታ ታክስጝስ እንሳ ሜፃፎ ፃፊጝስ ካሉኻ::

ቺርቤዋ፡- ቤርዜንጋ ናው ሊጊሲሚ ሼዋ ፊቲሪ አኽዳ እንዳርካ እንዳርካ ጉዳይካዋ እሜ?

ፃፋንቲ፡- አበላምቲዳኪ ሼዋ ፊቲሪ አኹኪ ልብወለድ ንጝ እምፕል አካሉሳ አኹኪ ታሪኩሳ አኺኔ ውኖ ፄጌርሳማ ፃፋማ ካንትፅጝስያኽ:: እን ፁፍኪላ ውላዋጊ አዊውሳ ታሪኮ ኔክፃው ፁፍያኽ:: ጋያኪ ውፍቺውሳ፣ ሲንቲውሳ፣ እንካኑውሳስታ እሊኩሳኪላ ግትምካዋኪላ እሚኹያኽ:: እምፕሎ ሼዋ ፊቲሬ  ፃፊጝስ ሊጊሲሜ ጊዞ ካሴውያኽ:: ኻርጌርክ ጊዞ እያማ ፅንኩት አንኩሊስ አሳቦ ዙራዙርፃማ ታክስጝስ ቱስቲስ ፃፊጝ ፋይፄ::

አይ ቲሪፄ ይውሳ እንካኖ

እንቓሳማ ፍኽሳ ሌጐ ካኖ

ብርኔታ አዋላይ ዛግሪ ደፊስ ጐኺታ

ይቢቺ አቓውዴስ አንክርኔስ አብርታ

እንካን ወሬራማ ልኩዴስ ጛሬ

አዋላይ ሚፄታ ጉርጉምዳ ዲሬ

ባኹስቴ ፄጌርታኻ ፃይማ ጐፋሬ

አንኪላ  ኩዋ አኽጝስ ሌጌፃኽ ጛሬ…. ንጝስ እንካኖ ካንትኹስ ቤርዜንጋ ሊጊሲሚ ሼዋ ፊቲሪዳ ፃፊስታ::

ቺርቤዋ፡- ፍንሾስ እንዴስ ጃላ እንፃኽስትጝስ እንዳራይ አኬድታ፤ ኮንኪ ሌጌሳታሳ አዴስ እንዳርማ ማንዲስቴ ኒ?

ሞገስ፡- ኮንኪ ሌጌሳታ እንፃኽስትጝስ እን ሼው ፊቲሪ አባላምቲ አኽጝስ ዞኑ ክንቲው ሜምሪሊ አኽጝስ አንኩዋንቲ ቤንዴስ ጉሽፃማ ዝኩኽ ክንቲ ጝናዳ ላይብራሪዳ ሜፃፍ እንኩርስታማ ክንታንትካ አውጚስ አንቤብካማ ታሪኮ ያቓንታ፣ አንቤባንታ ፄውጝስ ታክስስታ::

እን ሜፃፍ ዴሜካ ታሪኩሳ ጁፄ ፃልፃል ቑማዴስ ፄውኹ ቹዋ አሊሚ ምርምሪስ ያኻታኽ:: ጉሽፂ ፃልፃል ቑማው ካንዴስ ያኹኒኪላ ውላ አዊ ብሄረሰቡ ቺፅጝፂዳ ዝኩንኩ ስፍርካዋ ዳሴስኹ ሜፃፍ አኽጝስ ምርምሪስ ቴኬምስትጝስ ካሊስቴ:: እን ቤርዜንጋ ሊጊሲሚ ሼዋ ፊቲሪው ፁፍ ሊጊሲሚ ታሪክ ዝኩኹ አኽጝስ ፍንሾስ ድራማዋ እንፃኽስትጝስ ጋያኪ ላጛንቲ ቤን ቤርዜንጋ ሜፃፍ ዲጊስ አንቤባንትካስ ታምባታ እንፃኽስታታጊያኽ:: ኮንኪ ሌጌሳታ ዴሜካ ውላጊ ካሊናው አክምስ እንፃኽስትጝ ቱስቴ::

ቺርቤዋ፡- አሜሴጌኔ::