ስር ልማቱ ዳንጉዊኒስ ቼጌርስትናናጊያኽ ዝኩዋንትካ ዳንጉዊኔ ዋኽትጝፅጝስ እንፃኽስትናናጊያኽ ትክትሊ ከንቲባ

አለሚቱ የኔት

አዊ ብሄረሰቡ ቺፅጝፂ አገው ግምጃቤት ኬቴሙ ቺፅጝፂው ዝኩዋንትካ ስርኩ ልማትካው ዳንጉዊኒስ ቼጌርስትካማጊ አኽⶓ ዙሙና:: ዝኩንኩ ዳንጉዌንካዋ ዋኽትጝፅጝስ እንፃኽስስታማጊ አኽⶓ ዴሜካ ኬቴሙ ቺፅጝፂው ትክትሊ ከንቲባ ጌሌፅካ::

አዊ ብሄረሰቡ ቺፅጝፂዳ አግስታንኩ ኬቴምካ ክቻዴስ አገው ግምጃቤት ኬቴም 2013 ም/አ ኬቴሙ ቺፅጝፂሾ ሌጌስቱት ኬቴማኽ:: ኬቴሙ ዝኩዋንትካኪላ ኬቴሙ ቺፅጝፂው አችስ ስሩ ልማት ዋኽትጛውላ ይጉጝስ ቼጌርስትካማጊ አኽⶓ ስልኪስ ድኹዌካ::

ዊዛሩ አልጋነሽ አሰፋው አገው ግ/ቤት ኬቴሙ ዝኩዋንታኽ:: ዝኩዋኑ ኬቴምዳ ፅንኩት ዝቒ አኹው ችግር ዝኩጝስ ዳንቴንካው ቑንዚስ ቲንዳ አዌክስትጝ ጌቴማማጊ አኽⶓ ዙሜካ:: ይዝኩዊ እሪ እሉስ ዴሜካ ኬቴምዳ ግቢትስትኹሳ ዳዶጊ ፄሬሬጋማ ካሳውስታ ካያማ ካስጝስ ቼጌርስታንኩ ዙራሙርካኪላ ዝኩⶓ ዲብስካማ ቱስቲ ዝኩኽ አኺኒስ ባይ ግቢትስታያታ ካሴ ዲግስካ:: ባይ ኬውስታታ እስታማ እምፕልታቕ ካላኑሳጊ አሴቴፍጜካማጊ ያኹኒኪላ ምንግስትሾስ ትኩት እንፃው አኽⶓኪላ ቶኬምካ:: ካያማ ካስጝስ ኩሪ ቼጌርፃንኩ ዙራሙርካሊ ታምትጚስኪላ ኬቴሙ ቺፅጝፂ ዳንቦ ግቢትፃማጊ ያኹኒኪላ ችኽ ይሳማጊ ካሳውላ እምቢታማ አሌድስታያታ አሳቦ እይካ::

እሊው ኬቴሙ ቺፅጝፂው ዝኩዋንቲ አቶ የሽዋስ አረጋኪላ ኬቴምዳ ጌቴምኹ ሜብራቱ ኬውጝጚስ እንፅኺ ጝናዳ እሌቱሳ እንፅኼ እንፃኽስትጝስ ቼጌርስትⶓ ዲብስካ:: ቹትካ አሬ ፍችፅጝስስታ ታውሊስታ ቤር እንፅኻዳ አሴሜርጙንኩ ዎታትካኪላ አይሉ ኬውጝጚስ ቦዜኖ ጊዞ ፌይፃንታ ጌዴድስትካማጊ አኽⶓኪላ ድኹዌካ:: ዝኩንኩ ስር ልማትኩ ችግርካስ እምፕልታቕ ማልጜ ቼጌርስትካማጊ አኽጝስ እምቢትንኹ ኽይ ፋይፃው አኽⶓኪላ አቶ የሽዋስ ካንቴ እይካ::

አንኪሺ ጉዋጉሲ ወረዳ አገው ግ/ቤት ኬቴሙ ቺፅጝፂው ትክትሊ ከንቲባ ወርካየው አስረስ ጌሌፁኑውስታጊ ፅንኩት ዝቒ አኹሳ ችግሮ ኽይጝስ ክልሉ አኹሰታ ኢነርጂ ቢሩ ፄውኽ 27 ትኩሚ 5 ሚሊየን ብሮ ፍሻ ፄዋማ ሴኮንድስ ሶኼታ ሊትሮ ፍልቕፃሺኹሳ ሴኮንድስ 20 ሊትርሾ ፍልቕፅጙሳ አክሞ ሌጌፅጝስ እንፃኽስስታማጊያኽ::

ሜብራቱ ኬውጝጙሳ ችግሮ ዴሜካ አቒውስስታ ፍትሬቱውስ ችግርስ ጌቴማው አኽⶓስታ ትኩታው ኾትሊ ዲግጛማ ዙሚትጚስ ኩፅኒ ችግሮ ኽይጝስ እንፃኽስትካማጊ አኽⶓ እርዳትፅካ::

ኬቴማዋ ቼግርፃውሳ ኩሬኪላ ባዬ ግሽፅጝስስታ 70 ሜትር ዲች ባዬ፣ ኩሪውሳ ዙርፄ 2 ኪሎሜትሮ ብስጙ ቴርት ካስጝⶓኪላ እርዳትፅካ፡፡ ዳድ ክቻዳ እምፕልታቕ ክብፃኑሳ ካኔስታ አሻዌ ጉሻንታ ፄውጝስ ውላጊ ዝኩዋንቲ አችትጚስ ባዬ ግሻማ ክቤውሾ ኬቤታ ፄውጝስ ግቢትስታው ዳድ ፌሬሳቲታ ፄውጝዳ ቴቬቬርጛንታ ፄውጙሳ ቴግባሮ ካስጝፅካማጊ አኽⶓኪላ አቶ ወርካየሁ ጌሌፅካ:: ዳምብ ፋይፃኩ ዙራሙርካስኪላ ሹኻ ዳምብካ ጄሜርስትⶓ ቶኬምካማ እምፕል አሌድስትⶓስታ ላጛ ኩፅኒ ግቢትስትካማጊ አኽⶓ ጉሽካ:: ፍንሾስኪላ ዝኩዋንኩ ችግርካዋጊ እምፕልታቐሊ ይጋሪሰ ኽይጝስ እንፃኽስታንኩ አኽⶓ ቶኬምካ::