ባኩ ፋዩ አገልግሎቲ ባኩ ፄዋንትካ እሊኩሳ እርዳትጝሾስ ባኮ እንጐስታ ቴስፌ እሚጝስስታ እምፕልታቑ ኬምፕዳ አኽጝስ ያቓኑሳ ክንትፃኑውስታ እሊኩዴስ ኪላ ይወቱሳ ክሎቶ ቤንጛኑ ቹዋ ይወቱ ዳድ አኽጝ አምንስቴ:: አጌር አቕ ጛው ጁትጝጚስስታ ባኩ ፋይዳ ስርትካማ ማቤራዊስታ ይኮኖሚያዊ ልቕልቕታኻዳ አሴቴፍጝጝስ ዳሴስትካያስኩ እንፅኽካዋ ካንትጝስ ባኮ ፃይኑ ቴግባርኪላኽ::
ሼውፅንታው ማራማርጛንትካ ናኑውስታጊ ባኩ ፋዩሳ አገልግሎቴ ባኮ ፄዋንቲ አቕትዴስስታ ሌጌስጚዴስ ጁኽስ ሊሊትጙንኩ ትክምካዴስ ኔፃ ያኻማ እሊኒውሳስታ እምፕልታቑሳ ፉሬ እይጝስ አኮሜቻው ቴግባርያኽ:: እንቴግባርኪላ አጌር አቕ ውኒቲኒ ታክስጚስ ስብኔ አድርፃንታ ፍሼ ፄዌ:: እንታኮውስ ዳድስ ፌዩንኩ እምፕልታቑ ቤንካኪላ ኬሽኹ ስብኒ ዝኩዋማ አቒስስታ አጌርስ ታክሳንታኪላ ካሊፄ:: ባኩ ፋያው አገልግሎቲ አሜት ቺፋ ሴኒ አርፊዴስ ጄሜራማ እምፕልታቕስ ፄውስታው አገልግሎቲ ያኹስ እን ቴግባርስኪላ ዎታትካ እሳንስ አሴቴፍኒስጉ ኽሳንትካ አቕኪላ ታምቦጊ ፊትጝጝስ ካሊስታዊያኽ:: ፉሪው ጊዝ ዝኩክኪ ያኻ እሊውሳ ፊቴ ጊዞ ቴኬምስትጝስ እምፕልታቕስ ባኮቴግባሮ ፄውጝዳ አሴሜርጛንኩ እምፕልታቑ ቤንካው አገልግሎቲስ አጌርታ ሚንችካ እምፕልታቑ ዳንጉዌንካ ክቼንታ ፄውስቱስ ሼውስቴ:: እኒ ቴግባርካ ክቻዴስኪላ እሪሊ እምትጛማ አክማ ጋንኩሱ ጝን ፕሻኒ ፄጌንጝስ፣ እርሺ ብታሳ አሬሳማ ዜርጝስስታ ብኖ ካይጝስ ካሊፃውሳ ዳንቦ ግቢትጝስ ኬፍንኹሳ አገልግሎቴ እይጝስ ካሊስታዊያኽ:: እምፕልታቕ ማቤራዊስታ ኢኮኖሚያዊው ዜርፍዳጊ አሴቴፍጛማ ባኮ ቴግባሮ ፌፄምጝስኪላ እምፕልታቕ ናማኪ አጌራዋ ቴኬምጝዳ ቴሳትፎ ፄውጝኪላ ውላዴስጊ ማንዲስታው ቴግባርያኽ::
ባኩ ፋዩሳ አገልግሎቴ እይጜ ማቤራዊ አላፍትታ እርዳትስታው ማቤር አቑ ቼፍ ዜሬቕቲኒ አኽጝኪላ አገልግሎቴ እይጚዳ ካንትስታው ዳንጉዊኒያኽ:: እስጜ ካንቴ ኪስጝስኪላ ውላጊ ሼውቴ ፌቴርጝዴስ ጄሜራማ እንፃኽስትጝ ቱስቴ::
ባኩ ፋያው አገልግሎቲ እይስቱስ ዴሜካ ውላጊ ዝኩኽ ውማይዳ አሴሜርጛማ አገልግሎቴ እዩኒጊ ዋይሚስታ አኽጝስ ካሊስቴ:: ባኩ ፋዩሳ አገልግሎቴ እምፕልታቕስ እይጝ ዴሜካ ሼውሳስታ አንኩሊውሳ ፉሬ እያው አኽጝስ ዝኩዊኔ ዴስቴና ያኻማ ጉስጝስኪላ ፍሺ ዝኩኽያኽ:: እንሳ ታክሳማጊ ሚንች እምፕልታቑ ቤንኪላ ሰላሙ ዳንጉዊኒስ ዝኩዋው ዙራሙሪዴስ ፌኔኬልጙኽ አኽጝስ እንሳ አኺኔ ኪስጝስ ካሊፃው ባኩ ፋዩሳ አገልግሎቴ ጋቻስ ቤዴልስቱንኩ ዙራሙርካስ ፋይፃዊያኽ:: እን ያኹስ ኩፅኒ ካንትስታማጊ ጋቲው አኽጝስ እኒ ስፍርካዳስታ አካል ጉዳቴንካዳ ትኩታ ፄውኽሳ ባኩ ፋያው አገልግሎቲ ዝኩጝ ግዲያኽ:: ባኩ እንፅኻ ንፍሶ ዳዳ ኪላ