አይክ እስቲፋኖስ

ዘውዴ በካሉ

ይቶፒያኻዳ ሚንችካ ቱሪስቶ ጉሳንኩ ፍትሬትኩ፣ ባይልኩ፣ ታሪኩስታ አይማኖትኩ እንቲታኪ አቓ ግብሪ ማኼትካ አግስታና:: ሊሊትጙንኩ ብሄር ብሄረሰብካስታ ሊሊትጙንኩ እምኔቶ ሲፋንኩ አቕ ኬቬቬርጜካማስታ እምፕልትስ ዝኩዋንቲ አጌራኪላኽ ይቶፒያ:: ጋያኪ ይቶፒያ አቕስቴኩ ዜሚኩ አይኔትካ ባቲ፣ ትዝታ፣ አምባሳልስታ አንቺሆየ እስታንኩ ባይልኩ ሙዚኪት ጉሽፃ አጌራኽ:: ዝቤኑሳ እንፂውሳ ትቬቮ አሌምስ አቕትጝፅጝስ እንቲታኪ ጊቢትጝስ አቕት እይስታያስኩ ትቬቭኩ ዋይምካ ዝኩና:: ጌዳምካ፣ ምንግስት ጝናስታ መስጊድ፣ ብራኒስ ፃፊስቱንኩ ፁፍካ፣ ስልካስታ ማሌፋ ማሌፍካ፣ ንዋየ ክዱስካ፣ ስይካ፣ ታሪካውካ ስፍርካ፣ ብንካ፣ አይክካ፣ ካንካ፣ ብርክካ ንሴስካ፣ ካዌንካ፣ ግዴው ፍትሬቱ ብቲ ፍንታስታ ፓርክካ ሚንቺትስ አግስታንኩ ዙራሙርካዴስኪላ አማኻሪ ክልል ቶኬምስቴ:: አማኻሪ ክልልዳ ካንትስትካማ ዊድሳታቲንኩ ግንቢኒ ጊቢትኹዴስ ጃላ ግዴንኩስታ ዴኔክፃንኩ ፍትሬትኩ ቱሪስትኩ ጉስፅካ ስፍርካ አግስታኑ ዙራሙሪያኽ:: እኒጛ ቱሪስትኩ ጉሽፅካ ስፍርካዴስኪላ ናካስ አንቤብፅጝስ ፋኑኽ ይቶፒያው ኽታዊኒ ዩኒቨርስቲ እስታማ አቕስታው አይክ  አስቲፋኖስ አቡነ ኢየሱሰ ሞአ እምፕልቱ ጌዳሙሳ ታሪኮ ካንትኹስያኽ::

ይቶፒያዳ አባላምቲ “ስነ መለኮቱ ኾት” እስትጝስ አቕስታው አይክ እስቲፋኖስ አቡነ ኢየሱስ ሞአ እምፕልቱ ጌዳም ደቡብ ወሉ ዞን ደሴ ኬቴምዴስ ዲጊዳስታ ወልዲያ ኬቴም ክቻክቺዳ አይክ ኬቴምዴስ ሰሜን ምስራኩ ዳብዚሾ ላጛ ትኩሚ ላጜታ ኪሎ ሜትር እቺትዳ አግስቴ:: ጌዳም ይቶፒያው ታሪክዳ ኽታዌንካ ጌዳምካዳ ሜዴብስታው፣ አማኻሪ ክልላኻዳ ምስራኩ ዳብዚሾ አግስታንኩ ቱሪስታ ጉስፅካ ስፍርካዴስ እምፕሊያኽ:: አይክ እስቲፋኖስ አቡነ ኢየሱስ ሞአ ቲሪትጙኽ አኹኪ ጊቢትስትኹ ሴስታንቲ ሊኽ ዝቤን ቤናዳ አፄ ድልናኦዱ ምንግስቱ ዝቤንዳ አባ ሰላማ ዘአዜብ እስታው ታብሊስያኽ:: ያኼስጉ 13ንቲ ዝቤን ቤናዳ ኩፂ አይክ እስቲፋኖስ አቡነ ኢየሱስ ሞአ እምፕልቱ ጌዳም እስታማ ጌዴምስታ::

ሚንችካ አጌርኩ ምንግስትካስታ ንጉስካ አፄ ይኩኖ አምላኮስታ እሊኩጊ እንቲታኪ ኦርቶዳክስ ተዋህዶ አይማኖትሾስ ዴሜካ ኽሳንትካ አይማኖትኩ ታብል ክንቱኑ ጌዳም አኽጝኪላ ዙሚስቴ:: ጋያኪ ጌዳም ሜፃፍ ቅዱስካስ፣ ፁፍኩ ክንትካስስታ ማይቤራዊ ሞሌቔስቱ ይዎትስ አቺትጙኽ ስፍሪ አኽጝ ድኹስቴ::

አይክ እስቲፋኖስ አቡነ ኢየሱስ ሞአ እምፕልቱ ጌዳም ሊሊትጙንኩ አጌርኩ ቤንካዴስ ይንታንኩ ክንታንትካ፣ ሚንችስ ቼፍስታንኩ ሞሌቔስ አይማኖቱ ክንቲስ ሴሌቴንካማ “ንቡረ እድነት” እስታው ማሬግስ ዳቔርስትካማ አኹኪ ቢኬካማ ፋኑ ገዳም አኽⶓ ታሪክካ እርዳትፃና::

አባ ኢየሱስ ሞአ እስታንኩ ታብል አይክ እስቲፋኖስ ጌዳምዳ እጂኑ ጊዝዳ ሜፃፍካዋ ኩፕፅጝስ፣ ክንቲውሳ አችቶ ይስጝፅጝስስታ ቺፅጝፂውሳ ማይኬሎ ጄሜርፅጝስ ኽሳንቲ ፍሺ እሺኩ ታብል አኽጝ ቶኬምስቴ::  እኒ ታብል አባላምቲ ጊዝስ አይክ እስቲፋኖስዳ ኽሳንቴ ሜፃፍ ጝናሳ ቲሪትጝፅካማ ሚንችካ ሜፃፍካዋ ጌዳምስ እዩንኩ አኹኪ አቤሬኬቱንኩ አኽⶓ ታሪክዳ ፃፊስታማ አግፅኔ:: ጌዳምዳኪላ ንጉስካዋ፣ ሜሳፍንትካዋስታ አይማኖትኩሳ ታብሎ ክንትፅጝዴስ ድምክና ሚንችካ ሜፃፍካ ፃፊስቱኑ፣ ታፋ ውማይኩ ዋይምካ አሜሬትስቱኑውስታ ኬፍቲኒ ምርምሪ ፄውስትኹ ጌዳምያኽ:: እንስ ምክንያቲስኪላ አይክ እስቲፋኖስ አቡነ ኢየሱስ ሞአ እምፕልቱ ጌዳም ይቶፒያዳ አባላምቲ ስነ-መለኮቱ ማይኬል አኹኪ ክቻክቺ ዝቤኑ ዩኒቨርስቲ እስታማ እቑስታው አኽጝኪላ ዲብስስቴ:: እን ጌዳም ፍትሬትስ ፄጊ ዝኩኽ ኬድስስትኹ ስፍሪ አኽጝስ ካንትካማስታ ዴኔክፅካማ እንኮኽስቶ ጌሌፅጝስ ቼጌርስታኑ ዴስፃው ስፍሪ አኽጝስ አኽዳ ሚንችካ አሌሞ ባይካማ ንፍስስኪ እሺስኪ ሳሲታቲንኩ ሞሌቔስ ዝኩኑ ስፍሪ አኽጝስ ጌዳሙሳ ግዶስታ ፄጌ ኬፍፅጝስ ካላ:: አይክ እስቲፋኖስ አቡነ ኢየሱስ ሞአ እምፕልቱ ጌዳም ቲሪትጙኽ 842 ም/አሜትስያኽ:: ጌዳምኪላ ክቻክቺ ዩኒቨርስቲ እስታታ ፄውኽ አክሱምዴስ ሲፋማ ላጛንቲ አችዳ ግዙሳ ኮንኬ እሳንስ ክንትፅኹ፣ ፊደሉሳ እንክሬ፣ ማሊፌስታ ፁፎ ክንትፅጝስ ኽሳንቴ ታምቦ ፊትጙኽ ስፍሪያኽ::

ጌዳማኻዳ ንጉስካዴስ እይስቱንኩ ካቢ፣ ንዋየክዱስካ፣ ሚንችካ ብራኒኩ ሜፃፍካ፣ ጌድልካ፣ ኽታዊኒ ሚስኪሊ፣ ካርጝዴስስታ ካኒዴስ ማሌፍስቱንኩ ማሌፋ ማሌፍካስታ ማኼትካ አግስታና:: እኒ ጌዳማኻዳ ዝኩንኩ ማኼትካ ማንዲስትካማ ዝኩዋንታስታ ጐቤናንትካስ አሜቻው ዝቤናዊ ሙዚየምኪላ ጌዳምዳ ጊቢትስታ:: ጌዳሙ ዙሪዳኪላ ሎጐ አይኮ ዴሜካማ ሚንችካ ቱሪዝምኩ ጉስፅካ አብትካ ዝኩጝስ ሚንችስ ቼፍስታንኩ ቱሪስትካ ጌዳሞ ጐቤናና:: ጌዳማኻዳ ዝኩንኩ ሞሌቔስካ ጛውሳ ዝኩዊኔ ጉስጝስ ፁም ፆሌትዴስ ድምክና ትክልቴስታ ኩፓኩፔ አሜሬትጝስ፣ ዶርካዋ እሩብፅጝስስታ ቴጋንኩሳ ትክልትካዋ ሊሚፅጝስ ዝኩዋኑ አኽጝ ዙሚስቴ::

አይክ እስቲፋኖስ አቡነ ኢየሱስ ሞአ እምፕልቱ ጌዳምዳ አይማኖቱ እሴትዴስ ድምክና ዙራሙሪኩ እምፕልታቕዴስ ፌያማ አጌርስ ሚንችካ ክርፅካ እንፅኽካዋ እንፃኽስትጝስ ዙራሙሪዳ ዝኩንኩ እስልምኒ እምኔቱ ሲፋንትካሊ እንካንስስታ ኪቪቪርጚስ ዝኩዋኑ አኽጝስ አይክ ኬቴማስ ቱሪዝሙ ልግስስ ኽሳንቲ ፍሺ ዝኩኽ ጌዳም አኽጝኪላ ዲብስስቴ::

ንባሮ አግፅንኹኪ ማህበረ ክዱሳኑ ፍንዴስስታ አሚኮዴስያኽ: