አሪምፂማ ክንትፂይ?

ታደለ አጋጄ

አሪምፂ ጝንካ ፍርድ ጝናዴስ ውሳኔ አግፅጝስ ማንዲትጛንኩ እግኩ አሬምስታንትካዋ ቻቤልጝስ ዴክት ማንዲስታማ፣ አቕቱ ሜብት ኬቤርስታማ፣ ስርኩ ፋይካ አክም ፌኬዳውስጊ ዋኽትጜካማ፣ ሊሊትጙንኩ ሼው ፅንታው፣ እጉ ክንቲ፣ ምግባር ፅንታውስስታ እሊኩስጊ ክንቲው አይኔትካዋ አግፅጝስ ሚዲቢኒ ክንቲስ፣ ቴክኒኩስታ ውማዩ ስልታኒስ አቕቶስታ ካሌቕቶ አግፃኑ፣ ኢንዱስትሪውስታ ግብርኒ ምርትስ እንፅኽካዳ አሴሜርጜካማ ሚፄ አግፃኑ አሬምስታኑ፣ አሜሬታንትካስታ እጎ ኬቤርፃንትካ ጛርት አቕ ያኻንታ ፄውጝስ እምፕልታቕሾ አሌቔትጛንታ ፄውጝስ ኬፍንኹሳ ፍሼ ፊትጛንኩስታ ትክላሊስ ፍቱ ዜርፍዳ ኽሳንቴ ታምቦ ፊትጙንኩ ኾትካኽ::

አሪምፂ ጝንካ ፍቱ ዜርፍዳ ሊሊትጙንኩሳ ዎንጄልካዋ ፌፄሙንኩ ዎንጄሌንካ ፍርድ ጝናሱሳ ውሳኔ ቻቤልጝስ ሊጊሲሜ ጊዞ እጄኑስታ ሳሴርዴስ ድሜልኩሳ እንፂዌኺስታ ፌሬድስትካማ አሌም አቡቑ ስታንዳርድ አጌራውሳ እጎ ስራ ፄዋማ ዎንጄሌንካ አሬምስታኑ ኾትያኽ::

እንጃቢሪ አሪምፂ ጝናዳ አግስታው አሬምስታንቲ መሉከን በላይ እንጃቢሪ አሪምፂ ጝና ሊሊትጙንኩ ዎንጄልካስ ፌሬድስቱንኩ አሬምስታንትካ እምፕልትስ ዝኩዋኑስታ ፋይፃንኩ ዲብካጊ ዋኽትጜካማ አግስታኑ አኽⶓ ዙሜካ::

አሪምፂ ጝናሾ ቱኒዴስ ሚንችካ ጊዝካዋ እጂⶓ ቶኬሙንኩ አሬምስታንቲ ሙሉከን አሪምፂ ጝናዳ ሚንችካ ባይሪኩሳ ኪስካዋ አግጝስ ካሊፃንኩ ዲብካ ዝኩⶓ ድኹዌካ::

አሬምስታንትካ አሪምፂ ጝናዳ እጂኑ ጊዝስ አንኩሌ ጋምባንኩ ክንትካ እይስታና፣ ኬሌሙሳ ክንቴ አግፃና፣ ውማዩጊስ ክንቴጊ አግፃና:: ክንቴካያስኩ አሬምስታንትካ  ዴሜካ 1ዴስ 8ንቴ ቤኖኺስታ ክንቴ ክንታና:: እጉ ክንቲጉ እይስታው”  አሬምስታንትካ አሪምፂ ጝናዳ ሊሊትጙኽሳ ክንቴ አግፅጝስ አቕቶስታ ካሌቕቶ አግፄካማ ፋኑ አኽⶓ አሬምስታንቲ ሙሉከን ዙሜካ::

አሬምስታንትካ ታፍ ትቤቡ እንፅኺስ ሴሌቴንካማ እንፃኽስታኑ ጋራጅስታ ታውሊ ጝናሱ እንፅኺዳ አሴሜርጜካማ ጛጛርትጛሱሳ ኢኮኖሜ አፌራኑስታ እንፂዊዴስ ፉኒዴስ ዴሜካ እንፅኼ ፌቴርካማ እንፃኽስትጝስ ካላንኩ አኽⶓ ዲብስካ:: አሬምስታንትካ ፌፄሙኑ ዎንጄልስ ፅፂስትካማ እምፕልታቕ ካሴኑ፣ ሊሊትጙንኩሳ ውማይካዋ ዴስጝስ ጛጛርትጛሳ ካሌካማ እንፃኽስታንታ ካሊፃውሳ ካሌቕቶስታ አቕቶ አግፃኑ አኽⶓ ድኹዌካ::

“አሬምስታንትካ ባይሪውሳ ኪሴ ካንትንኩዴስ እምፕል እንጃቢሪ አሬምፂ ጝናኽ” ኑንኩ አሬምስታንቲ ሙሉከን ምንግስቱ ኬምፕዳ ያኼካማ ኽሳንቲ ይቶፒያው እዳሲው ዴዴከስ ጛው ምግብዴስ ኔኬትካማ ፍሽጝፅጝስ እርዳቴ ፄውⶓ ጉሽካ::

እንጃቢሪ አሪምፂ ጝና አሪምፂ ጝና ያኻውላስ ግብርኒ ምርምሪውሳ ኾቶ ፄጌራው አኽⶓኪላ ቶኬምካ:: አሪምፂ ጝናስኩ አመራርካ አሪምፂ ጝና ዎክቶ ማንዱኽ ያኻታ ሚንችካ እንፅኽካዋ እንፃኽስትⶓ ዲብስካ:: አሬምስታንትካኪላ ጛው ፋይስ ካቫኻሱ ሊሊትጙንኩ እንፅኽካዳ አሴቴፍጜካማ እንፃኽስታንኩ አኽⶓ ድኹዌካ::

አሬምስታንትካ ጛውሳ ሜብቶ ቴኬምስታቲንታ ፄውስታማጊ አኽⶓ ጉሹንኩ አሬምስታንቲ ሙሉከን ይክርቲስ (ይጉዊስ)  ኽይስትጝ ቱስታንኩ አሬምስታንትካ ይክርቲውሳ ጊዞ ታምፁኒውላ ኽይስ ትካማጊ ጋቲው አኽⶓኪላ ካንቴ እይካ::

አይኪ አቒ ዎንጄሎ ፌፄምጝዴስ ፍና ጌውስጙንኩ አቕሊ ሹማጌልካስ አሬክስትጝስ ችግር ኽይስታታ ፄውጝ ቱስታው አኽⶓኪላ ዲብስካ:: አሬምስታንቲ ዋሺኒኪ ዎንጄሎ ፌፄምጝዴስኪቻ ሼዎ እሳናማ ይክር ይጉዌ ንጝስ ጌውስጝጝዴስ ክብስስትጝ ቱስታው አኽⶓ ታክስፅካ::

እሊት አሬምስታንታ ወለላ ጓዴ አሪምፂ ጝና አሬምስታንትካስ ፋይፃንኩሳ ዲብካዋ ዋኽትጝፃማ አግስታው አኽⶓ ዙሜካ:: ጛኪላ ፍርዶ አግፂኒምባ ኺስታ ኬፄሩስ ፍርድ ጝና ዙራዙርካማጊ አኽⶓ ድኹዌካ:: አሪምፂ ጝናሾ ቱኒዴስ ላጛ አርፋ አኽⶓ ዙሙንኩ አሬምስታንታ ዎንጄልስ ታራታርስትካማ ፍርዶ ማንዳንኩ አኽⶓ ዲብስካ:: ሚንችካ አቕ ዎንጀልስ ታራታርስትካማ እንፂዊ ጝናዳ አግስቱኑ ክልላኻዳ ጁኽ ጋቻው ምክኒያቲስ አኽⶓ ጉሹንኩ አሬምስታንታ ወለላ ክልሉ ሰላሙ አኺኒ ኬሽጛታ እንጉስታንኩ አኽⶓ ቶኬምካ:: ኹን አሪምፂ ጝናዳ ዝኪት ኹኑሳ ጉዳዮ ሲፍጝታት ውማይቴናስ ሚንችካ ያቒንኩ ጉዳይካዋ አግፄካማጊ አኽⶓ ኪላ ዙሜካ:: እሊው አሬምስታንቲ ነጋ መኮንን ዴሜካ አሪምፂ ጝና አሬምስታንትካዋ ምግባር ፅንታ ዝኩዋታ ፄዋማጊ አኽⶓ ዲብስካ::

አሬምስታንቲ ፅክራ አንኩዋ አሜታሳ አሪምፂ ጝናዳ ፌይፅⶓ ጉሹንኩ አሬምስታንቲ አሪምፂ ጝናዳ ምግቡስታ እሊው ችግር ዝኩዋኒ ክቼታ ካሴኒ እምቢታማ ክቼታ ፄዋንኩ አኽⶓ ድኹዌካ::

አሬምስታንቲ ነጋ ኑኑውስታጊ ሚንችካ አሬምስታንትካ ዎንጄሎ ፌፄማኑላስ አሱስ ፌሬድስትካማ እንፂዊዳስታ ሚንችካ ዴሜካ ዎንጀሎ ፌፄምካማ ኔፃስ ፌሬድስትካማ ካስንኩ ዝኩና:: ፍርድ ጝንካዳ ጉዳጋቲው እንፃኽስትጝጚ ዝኩⶓ ቶኬምካማ ክቼታኪላ ካሲካ::

ሚንችካ አሬምስታንትካ ሊሊትጙኽ ውማይስ ስልታኔ ካፅጝሰ ቴኬምስታንታ አኽⶓ ዲብስካ:: አይኪ ዎታት ሊሊትጙኽ ሱስዴስ ኔፃ አኽጝስ ዋሺኔኪ ዎንጀሎ እንፃኽስትጝዴስ ክብስስትጝ ፋይፃው አኽⶓኪላ እንፅኼንቶ ፌያፌይጝፅካ::

አዊ ብሄረሰቡ ቺፅጝፂ እንጃቢሪ አሪምፂ ጝናዳ ቹዋ ኢንስፔክተር ንብረት ተገኘ አሪምፂ ጝናዳ አሬምስታንትካዋ ሜዜጌባንቲስታ ቻቤላንቲ ያኻኒስ አሪምፂ ጝናሾ አሬምስታንትካ ይንታኒስ ኩስጜ እይጝስስታ ቲኑሳ ጉዳዮ ሲፋጛንታ ፄውጝስ አሬምስታንትካዋ ቱስቲስ እሜንኩ አኽⶓ እርዳትፅካ::

አሪምፂ ጝናዳ ፍርድስ ዎሴንስቱንኩስታ ፍርዱሳ ኬፄሮ ማንዳንኩ አሬምስታንትካ ዝኩⶓ ቶኬሙንኩ ቹዋ ኢንስፔክተር አሬምስታንትካ አሪምስትካማ ሊሊትጙንኩ ውማይካስ ስልታኔ ካፅጝስ አሬምስትካማ ፉኒዴስ ፋሌንጋ ካፁኒ ውማዩ ስልታኒስ ጝንአቖ ቺፅጝፃንታ ፄዋንኩ አኽⶓ ጌሌፅካ::

ሚንችካ አሬምስታንትካ አሪምፂ ጝናዳ ሚንቾ አብቶ አግፄካማ ፉንኩ አሬምስታንትካ ዝኩⶓ ቶኬምካማ ሚንችካ ዴሜካ ክንቴ አግፅጝስ ጛጛርትጛሳ ኬሽጝፁንኩ ዝኩⶓ እርዳትፅካ::

ይክርቲስ (ይጉዊስ) ባይስታና እስታንኩ አሬምስታንትካ ፌይኹ ማንዚ አርፊዳ ፋንኩ እሺንኩ ላንቡሳኺስታ ዝኩⶓ ጉሽንኩ ቹዋ ኢንስፔክተር ሚንችካ ይክርቲስ ባይስታንኩሳ አሬምስታንትካዋ ክልልሾ እንፃኽⶓስታ ክልልዳ ጉዳይ ካንትስታማ ባይስትጝስ ካላንኩ አኽⶓስታ ክልልዴስ ባይፃን እስታኑሳ አኺኔ ማንዲትጛንኩ አኽⶓ ጌሌፅካ::

አዊ ብሄረሰቡ ቺፅጝፂዳ አሪምፂ ጝናሱ አላፊ ኮማንደር ሹመት ሞላ ብሄረሰቡ ቺፅጝፂዳ ሹኻ አሪምፂ ጝናዳጊ እንዳርማኪ አቕቱ ሜብት ታሲስትጝ እላቲውስታ አሬምስታንትካ እያኑ ካንቲስ ኬሽጛማጊ አግስታው አሬምስታንትካዋ እሚጙ ዳድ ዝኩⶓ ቶኬምካ::

አሬምስታንትካ ሚንችካ ውማዩ ስልታኒስ ሴሌቴንካማ አሪምፂ ጝናዴስ ፉኒዴስ ፋሌንጋ ዋይሚስታ ያኻንኩ አሬምስታንትካ ዝኩⶓ ቶኬምካ:: ችግር ፌፄምስታኒኪላ እምቢታማ ችግርካ ጋማጋምስትካማ ክቼንታ ፄውስታው አኽⶓ እርዳትፅካ::