ታሪክቴና ኹና

አለሚቱ የኔት

እን አጌራው እገ ምንግስት አይኹ ሜብት ስሬታስ ኹን ሚንችካ አመራርቱ ስፍሪዳ አሴሜርጝጙሳ ድሎ አግፄካ:: አኽጝስኪ ናኺሲ እሺኹ ሚኒስቴርካው አላፍትዳኪላ ኹን ሜዴብስትካማ ዋይሚስታ ያኻኒስ ሼውስታ:: ውላጊ ዜርፍስ ቤዴራንትካ ያኹንኩስታ ሌጌሱንኩ አጌርካ ክቻዳ ቶኬምስታው ዮናይትድኪንግደምኪላ ዩናይትድ ኪንግደሙ ስላሊው አችት ኤም አይሲስ (M16)116 አሜትካው ታሪካኻዳ ጂሚሪ ጊዝስ ኹና አላፋስ ጉስስታው አኽⶓ ቢቢሲ ዜጌባ::

አውሮፖው ዝቤን ቼፋታጊ 1991ስ ስርኩኒው ዴክቱ ሜስሪ ጝናሳ አሌቔትጝቱት ብሌዝ ሜትሬሊ፣ አችቱ 18ንቲ አላፋ ታኻታ እን አሜቱ አሊዲዳ ካስር ሪቻርድ ሙሪዴስ አላፍቶ አሪኪብስቲ:: ጝሺሱ ወከትዳ ሜስሪጝና ቴክኖሎጂስታ ፌቴው ቢሩ ዋኻዳ አላፍትስ እንፃኽስቴታጊ አግስቴት ሜትሬሊ ኾቶ ጉስጝስ ካሲስቲስ ኩራትስታ ክብር እንኮኽስቱት አኽⶓ ዙሜካ::

ተክላይ ሚኒስትር ስር ኬር ስታመር ሹሜቶ “ታሪካዊ” ኑኒዴስ ፋሌንጋ ሰላሊው ኾትካስ ዋኒኪ ጊዝዴስ ጃላ ፋይፃንቲ ያኹኽ ወክትስ ሹሚስቲት አኽⶓ ጌሌፅካ::

ኤም አይ ሲክስ ዮናይትድ ኪንግደሙሳ ዴክቶ ቼሜትጝፅጝስ እሊው አጌሩ ስላሊው እንፅኽካዋ ካስጝፅጙ አላፍት እይስታው:: ቹዋ አላሚኪላ ሽብርቴንቶ ቲሪፅጝ ፅላት አጌርካውሳ ልቕልቕቴ አዌክጝስስታ ሳይበሩሳ ዴክቶ ይስጝፅጚያኽ::

47 አሜታ ሜትሬሊ ጝሺሱ ጊዝስ “Q” ቹዋ ዳይሬክተራ ኪላኽ ኪው “Q” ስርኩኒው ስላሊው አባልካውሳ አይቶ ማንዲጝስ አሌምኹ ወሴናንቲ ቴክኖሎጂውስታ ፌቴሪው ቤንኪላኽ::

ካምብሪጅ ዩኒቨርስቲዳ አንትሮፖሎጄ ክንቲት ሜትሬሊ፣ ቤዴርኑስ ኤም አይ ፋይቭ፣ ኤም አይሲክሱ ሴንካ ኩባንያኻዳ አጌራኻሱ ዴክቱ ኤጀንሲ አኽጝስ ዳይሬክተራ ታኻታ እንፃኽስቴት ታኹስ ሜንቾጊዞ ፌይፂኹኪላ ክቻክቺ ምስራክስታ አውሮፓዳኽ::

አዝቼ 2024ስ ንጉስዴስ እንግሊዙ ባርኾቼው ፖሊሲስ ፄውትኹ ፍሺስ ሜዳሊያዋ ቻቤልታ::