“ዴስቲ ቲኹዋዋ ፄጌሬ”

አለሚቱ የኔት

ጌቤላ፣ ዛኽ ዝሜዶ ካሲጛ፣ ሴንታ፣ ውፍቺ ጝናስታ ሊሊትጙንኩ እንፅኽካስ ብኖ ካይካማ ካሱኒዴስ ፋሌንጋ ድባን ፃርክታማ ጉርምርምቲ እንኮኽስታኒ ሼው ችንክቶ ጄሜሬ:: እሪ እሉዋማ ብን ዋኻኒ ዋታ አኽናናይ ካይኔ ናው አሳብስ ክምንቱ ጌርክ ታንቡት ቹዋኪላ ምሳሊስ ጝሺማ ጝሺይ ምፃ ቲንቴ ንጝስ ዋታኮው አኺኒስ ካይቴታ ቲኑ ኾትሾ ካስጝስ ዴክስ አግሌልጝታታ ጄሮ ዳጉልታታ ኩፅጝጝስ ካሌት አኽⶓ ታክስጝስ ቼኔክስትጝ ችኽቱኽ ፌምባኺስታ ዙራሙሪዳ ዝኩንኩ እምፕልታቕውላዳ ዴስስትኹ ጉዳይ ያኻማ ሴጛ::

ካሜና እሉዋ ሙሴ ባታታ ብኖ ካይቴታ ጌርኮ ዋኾ ክዩ ኹይስ እሽቴታ ሳት ታንባማ ክማኒ ጚ አድራስ ኹዋሼ አርስታታ አግሌልጝታታ እሽቲኹስ ኔዎ አግፄታ ፃኹፅጝስ ሙሪሾ እንዜጝቱስ ክችዳ ቤቴርስትኹሳ ብኖ ካይቴታ ካስጝስ ድልዌና አኽⶓ ካሲ:: ዳንዲኒ ዋኻማ ጃሎ ኑስ እጄኒ  ካይጝስ ካሊስታቲው ያኻማ ብኑ ኾቼስታ ኖቼዳ አኽጝስ ኮይጛኒስ ቺጝኪላ ዙራሙሪው ዝኩዋንትካውላዳ ችኽቱኽ ቺፋሱ ሲኪኪኒ እሺኾ:: ጅማንትካኪላ “ኽቴናቴ  ካይጝናዊ ዳምብ እላማ ኮይጝናዊ” ናኒስ ታምትጜ አቱኑውሳ ጅማኑውስታጊ እንጊ ዙሚስታይኹ አንኪሺ ጉዋጉሲ ወረዳ ግ/ቤት ኬቴምዴስ ድማሚ፣ አይሲ፣ አርሺስታ እሊኩ ኬቤልካሾጊ ፌያማ ካስጝስ እምፕልታቕ ሼውታ እንዜጛቲንታ ቼጌርፁስ ሴጙኽ ዳንዲኒው ብንያኽ:: እን ብንኪላ እምፕልታቕውላዳ ሚንቾ ችግሮ ታምፁስ ሴጙኽ አኽⶓ ስልኪስ እጂጜ ፄውንኩ ድማሚ ኬቤሊው ዝኩዋንትካ እንከርፄካ::

አቶ ነጋ እንዳለው ድማሚ ኬቤሊው ዝኩዋንቲ ዳንዳኒው ብን ሴኒዴስ ጄሜራማ ዋኽጝስ ስግላ  ሰላምስ ፌካማ ጌቤላኪያኻ ዛኽዝሜዶ ካሲጛ ካይካማ ካሱኒዴስ ፋሌንጋ ክማኒ ዙራኒስ ዋኻማ እጂጝስ ዴክስ ጝናቕሊ አሌቔትጝጝስ ሚንቾ ተግባሮ ፌይፁንኩ አኽⶓ ዙሜካ::

ስግላ ዴክስ ካይፁንኩ ክምካዋ ክማኒ ሙሪሾ ዙርፅጝስ ፋያኒኪላ ካይፃማ ካፅጝስ ማልጜ ቼጌርስታሺንኩስታ ዴፌርካማ ካኒው ዳንብስ ካይፅጝስ  ሞኬሩኒውላ ችክካማ አኹስ ኹስታኒስ ቺጊርፄ ጊዞ ፌይፅⶓ ዲብስካ:: እሪ ብሲ እሼማ ክምካዋ ካይፅጝስ አኹሾ ቱኒዴስ ፋሌንጋ ዴሜካ ታክሲሎ ዋኻማ ክምካዋኪ ያኻ ጜዋናሳ ካፅጝስ ሚንቾ ጝኖ ታብላስታ ቹዋ ጋቲታ ይጉፅኹ አኽⶓኪላ ዳንዲኒ ብን ታምፁስ እጂኹሳ ጉዳቶ እንክርፄካ:: ናካዳ እምፕልታቕ ካቪትጚስ ጉሻኒስ እሺኑሳ ካሴ ምንግስት ዙርሜ እይጝስኪላ እን ዳንብ ግቢትስትጝ “አቒስ ይቪቻ ያኻውላ እንሴስካስጊ ዴስቲያኽ” ናኒስ እንኮኽስትኹሳ ዴስቴ ዲብስካ::

ዊዛሩ ትክደም ተገኜ ድማሚ ኬቤሊው ዝኩዋንታ ያኻኒስ ዳንዲኒው ብን አቾ ማንዱኽ ዳንብ እላቲው አኽጝሊ እምትጛማ ኹን ሼውታ ፋያኑሳ አሬ ውፍቺጝና ካፅካማ ፍችፅጝስስታ ጌቤልዴስ ሌቤቶ ጄዌካማ አግጝስ ቼጌርስታኒስ ሴጝⶓ ዝኩዊኒ “ኬንዳጉ” ናኒስ እሺኹሳ ችግሮ እንክርፄካ:: እምፕላ ቹዋ ሼርቱስኪላ ካሜንታታ ጄሮ ዳጉልትምባኺስታ ዳንዲኔ ብኖ ዋትጛ ካይታታይ ዴክስ ካሜናው ናው አሳብስ ሲኪኪኒስ ሼርቱሳ ጊዞ ፌይፃኒስ ሴጝⶓ ዲብስካ:: ጄርካ ክንቲ ጝና ካሳኒስስታ ዙራኒስ እንቲታኪ ኬቴማ ታምብካማ ዙርጝስ ፋያኒስኪላ ካስካማ ዙሪኒምባኺስታ ዴክስ ዙርⶓ ሲኪኪኒስ ልሻንኩ አኽⶓኪላ ፌይፁኑሳ ታክስጜ ድኹዌካ::

አቶ በላይነህ ሸፈራው ድማሚ ኬቤሊው ቹዋ ቺፅጝፃንቲ ዳንዲኒው ብንዳ አቾ ማንዱኽ ዳምብ እላ አኽጝስ ምርቶ አሜሬትጝስ እሼውሳ ማዳባሬኪ ያኻ ጉልሌ ዜሮ ሼውታ ጋሪስኪያኻ እንሴስካስ እንዜጝትጝፅጝስ ማልጜ ቼጌርስታኒስ ሴጝⶓ ዲብስካ::

ሊፌካማ አሜሬቱኑሳ ምርቶኪላ ጌቤላ ካፅካማ ፋያኑውስ ዋይሚስ ዋይጝስ እንጉስታኒ ዳንዲኒው ብን ክችዳ ቤቴርስታማ ፅንጋኻ አኽጝስስታ ቴስፌ ኬውጝስ ቕፂስ ሙሪዳ ዋይጝዳ አሳላካ እሺⶓ እንክርፄካ::

ሼርካ ቹትካዋ ክምንቱ ጌርክ ታንባኒ ሜሜሪ አዜዛው ስሬታስ ቲኑ ጉትፕሾ ካስካማ ካሜናንታ ፄውጝስኪላ ብን ዋኻማጊ ሚንቾ ችግሮ ፌይፅⶓስታ ቲኑ ጉትፕሾ ታንባኑውላ ይጉጝስ ይወቶ አቱንኩ አኽⶓኪላ ቶኬምካ::

እምፕልታቕ ሊሊትጙንኩ ሜንድሬኽካዳጊ ካቢትጚስ ጉሻኒስ እሺኑ ዳንዲኒ ብን ችግር ኽዬ አግፅጝ ዴሜካ “ዴሰቲስ ኪስስታማ ቲኹዋዋ ፄጌሬ” ናኒስኪላ አቶ በላይነህ አሳቦ እይካ::

አግሌልጜካማ እሺንኩ አሉዋስታ ኔዋሪ ብን ዋኻኒ ኽቴናቴ ካይጛኒስ ቻሺኑ ችግር ኽዬ አግፅጝስታ ቹዋ ጄራ ፋይታ ታምትጛኒስ ካንትጝዴስ ጃላ ዴስቲ እላቲው አኽⶓኪላ ዲብስካ::

ዳንብ ግቢትስትⶓ ጄሜሩስኪላ ኬቤሊው ዝኩዋንትካ ውላጊ ካላኑሳስታ አክም ፌኬዳውስጊ ጌንዜቡሳ እርዳቴ ፄውንኩ አኽⶓኪላ አቶ በላይነህ ዙሜካ:: ግቢትስትኹሳ ዳንቦኪላ ፋይፃውሳጊ ማንዲጜ ፄውጝስ ውላጊ ካሎ ቱንኩ አኽⶓ ቶኬምካ::

አንኪሺ ጉዋጉሲ ወረዳው ዳድስታ ትራንስፖርት ፅ/ጝናሱ አላፊ አቶ ቢያድግልኝ ብርሃኑ ጌሌፁኑውስታጊ ሚንቾ ጊዞ አቒዳ፣ እንሴስካዳ እንቲታኪ ንብሬትዳ ጉዳቶ ታምፁስ ሴጛ:: እን ዳንብ ግቢትስትጝ ሹኻ ወረዳውሳስታ ሴስታ ኬቤሊውሳ እምፕልታቑሳ ችግሮ ይጉፅጝስ ካላው አኽⶓኪላ እርዳትፅካ::

2012 ም/አሜታዴስ ጄሜራማ ዳንቡ ዲዛይን ግቢትስትⶓ ቶኬምካማ ባጄት እንፂጝ ምክንያታስ እጂኒውላ ወረዳዳ አግስታው ኤፍ ኤስ አርፒ እስታው ፕሮጀክት ጌንዜቦ እይጝስ 2015 ም/አሜታዳ ክልልዳ ዝኩኽ ኤፍ ኤስ አርፒው ፕሮጀክት አምናማ 2017 ም/አ ግቢትስትⶓ ጌሌፅካ::

ዳንዲኒ ብንዳ 24 ሜትር ሌጌሴምትስታ ሶኼታ ሜትር እሳንት ዝኩኽ ዳንብ 23 ሚሊዮን ብርዴስ ጃላ ፍሺስ ግቢትስትⶓኪላ አቶ ቢያድግልኝ እርዳትፅካ:: እን ዳንብ ግቢትስትጝስኪላ እምፕልታቕ እሺኹ ችግር ጌጌውስታይጝስ ምንግስትስ ምስጋኔ ዲግስካማጊ አኽⶓ ቶኬምካ:: እምፕልታቕ ኪላ ማቤራዌኪ ያኻ ኢኮኖሚያዌ አገልግሎቴ ሼውዴስ አግፅጝስ ካሊፃኩ አኽⶓ እርዳትፅካ::

ፍንሾስኪላ ዳንዲኒዴስ ፌይኹስ ሺማ እስታው ብን እምፕልታቕዳ ኬፍቲኔ ችግሮ ታምፃማጊ አኽጝስ ዳንብ ግቢትስታማ ሼውዴስ ቴኬምስታንታ ያኻንታ ካሊፅጝስ ብሄረሰቡ ቺፅጝፂስ ካሴ ዲግስካማጊ አኽጝስ ፍንሾስ እምፕልታቑሳ ችግሮ ኽይጝስ እንፃኽስታንኩ አኽⶓኪላ ጌሌፅካ::