ቲኑሜድን ይዎቱ ዋስትኒ

ዘውዴ በካሉ

ቲን ሜድኑ አግልግሎቲ ንጝ ቤዴራማ ኬይስታው ብሩ ፍሺስ ቲን ሜድኑ አባል አኹኪ ጝን አቕዳ ቲኑ ችግር ጌቴማኒ እክምኒውሳ ፍሼ ሾፌናኑ ዳድያኽ:: እን እምፕልታቕ አቡቑ ቲን ሜድኑ ቴርት 22 ሚሊዮንዴስ ጃላ እምፕልታቖ እሚኹያኽ:: ጝን አቕዴስ እምፕል አቒ ቑንዳስታኒ አብት ንብሬቶ ዋይካማ፣ ጉሽትካማ አኪምስታሺኑ ናካ ቲን ሜድኑ ቴርት ይንቱኒዴስ ፋሌንጋ ኩፂ ዜሬቕቲኔ ጌንዜቦ ኬየካማ አሜትዴስ እምፕላኒ ኬዩኑ ፍሺስ አሜቶ ዋኾ አግልግሎቴ አግፃና:: ቲን ሜድኑ አግልግሎቶ እይስትጝጚስታ ቲን ሜድን እምፕልታቕስ እያውሳ ትክሞ እንቲታኪ እንፃኽስትጝጜ ካንትኹስ አዊ ብሄረሰቡ ቺፅጝፂ ዚጋሚ ወረዳሾ ስልኬ ታስናና ትኩታኩ አካልካዴስ ንባሮ ቴርስና::

ዚጋሚ ወረዳ ግምርስታ ዋግሳቲ ኬቤሊው ዝኩዋንቲ አቶ አስፈራው የኔአባት ቲን ሜድኑ አግልግሎቲው ቴኬምስታንትካኽ:: ቲን ሜድኑሳ አግልግሎቴ አግፅጝስ አባል ያኹኒዴስ ሲስቲ አሜታዴስ ጃላ አኽⶓ ድኹዌካ:: እምፕል ጝን አቕዳ ሹኻስታ አንዴስ ጃላ አባል ዝኩኒጊ አሜትስ ቲኑ ሜድንስ ኬይስታው ናካ 1200 ብር ያኹኻ ጃጊ ቤዴር ናማ ላጛ ሊኻስታ ሹኻ ሊኻ እሺኾ:: እን ዴሜካ ኬይጝስ ቼጌርፃቲው እምፕል አሜቱ ይዎቱ ዋስትኒ አኽⶓስታ ችኻ ሳኖ ዋሺኒኪ ጊዝስ እምፕል ቲን ሜድኑሳ አግልግሎቴ ቴኬምስታንቲ አቒ ቑንዳስቱኒጊ አሜቶ ዋኾ ኔፃስ አኬምስታው አኽⶓ ዙሜካ:: “ዚጋሚ ወረዳታጊ ቲን ሜድኑሳ አግልግሎቴ ቴኬምስታቲው አቒ ዝኩኽሳ ፄጌራላ” ኑንኩ አቶ አስፈራው ናካ ውላ አቕ ትክሞ ማሌካማ ዋሺኒኪ አቒ ጌዴድፃውላስ ጛው ፋይስ አባላ ያኼካማ ኬይስታውሳ ብሮኪላ ወክትስ ኬያንኩ አኽⶓ እንክርፄካ::

አቶ አስፈራው ቓ ዊዛሮ አታጂ ደፈርሻ  ጉርጉምዳ አንቓራው እንክርቲው ቑንዚስ ቑንዳስታኒ ቲኑ ሜድንስ እክምኔ ሲፋሲፍጛኒስ እጂካ:: እን ቑንዚ ባሳማስታ  ይሳማጊ ይንታኒ ዚጋሚ ቲኑ ጉትፕዴስ ሪፈርስ ቻግኒሾ ካስካ::

እጆ ጄውጝስ ፋው ፍሺ ልቓ ጋቲውያኽ ኑንኩ አቶ አስፈራው አሜትስ ሹኻ ሊኻ ብሩ ፍሺስ ቻግኒ ሆስፒታልሾ ካስካማ ቔድፃማ አኬምጙሳ ቴርቶ ካስጝፄካማ ናካ ዊዛሮ አታጂ ኬሽካማ ቲን ዌና አኽⶓ እንክርፄካ:: ጌንዜብ እምስትምባ አብት ንብሬት ዋይስትምባ ልሻውላስ እይሰትኹ ጊዝሰ እክምኔ አግፅⶓኪላ ድኹዌካ:: አቶ አስፈራው እንሳ ትክሞስታ አግልግሎቴ እሊኩጊ አግፃንታስታ ቴኬምስታንታ ሼውቴ ፌቴርካማጊ አኽⶓኪላ ዲብስካ:: ዚጋሚ ወረዳዳ አግስታው ቲኑ ጉትፕስታ ቴኬምስታንቲ አቒው አይል ሜቴቴንጛቲው አኽⶓ ጉሹንኩ አቶ አስፊራው ሚንች አቒው አይል እክምኔ ቴኬምስታው ያኹኒኪላ ካሊስታው አክምስጊ ቲን ሜድንኩ አባልካዋ አጌላጌልካማጊ አኽⶓኪላ ዙሜካ:: ቲኑ ሜድንስ ኬይስታው ፍሺስታ አግፃኑ አግልግሎቲ ኬያኑዴስ ጃላ አኽⶓ ዙሙንኩ አቶ አስፈራው ወክትስስታ ጊዝስ ብሮ ኬይካማ አግልግሎቴ አግፃንታኪላ እንፅኼንቶ ፌያፌይጝፅካ::

ዚጋሚ ወረዳዳ ቲኑ ውማይቲኒ ደሳለው ሙላት ዚጋሚ ቲኑ ጉትፕዳ ሊኻ ሻይዴስ ጃላ ያኻው እምፕልታቑ ቤን ቲን ሜድኑሳ አግልግሎቴ ቴኬምስታንትካ አኽⶓ እርዳትፅካ:: ዚጋሚ ወረዳታጊ ሹኻ ቲኑ ጉትፕ ዝኩⶓ ጉሹንኩ ቲኑ ውማይቲኒ ዝኩኽ ቲኑ ጉትፕስታ እክምኔ አግፃው አቒው ቼፍ ክችጛቲው አኽጝስ አግልግሎቴ እይጝስ ቼጌርስትⶓ ጌሌፅካ:: እምፕል ቑንዳስታንቲ አግልግሎቴ አግፅጝስ ላብራቶሪው፣ እጁስታ እሊኩኪላ ፋይፃንኩ ግብአትካው እንፂጝ ዝኩⶓ ቶኬሙንኩ ቲኑ ውማይቲኒ ቲኑ ኾትስ እጁ ጄውስታው ሹኻ አርፋዴስ እምፕላኒ ያኹኒኪላ እን እጁ ሹኻ አርፋሳ ታምፃቲው አኽጝስ ፋይፃው እጁ አርፊስኪያኻ አሌድስትኹ ሳትስ ወረዳው ቲን ፅፌት ጝና ቴቬቬርጝፅጝስ እጁ ዲጋማጊ አግልግሎቲ እይስታማጊ አኽⶓ እርዳትፅካ:: ዚጋሚ ቲኑ ጉትፕዳ ጌርክስ 400ዴስ 500 ያኻው ቑንዳስቲኒ ጌርክስ አግልግሎቴ አግፃንኩ አኽⶓ ጉሹንኩ ቲኑ ውማይቲኒ እክምኔ አግፃው አቒ ሚንች አኽጝስ ውማይቴንካው ቼፍ ዴሜካ ልቓ አኽጝስ አግልግሎቲ እይስቱስ ካርድ ቴርታማ ቤዴራ ሲፊስ አምሉ፣ ምሹስታ ድሚ ካርድ እይስታማ ድሜ እሚኹስ ቤዴራማ አግልግሎቲ እይስታው አኽⶓ ጌሌፅካ::

ብሪ ክቤው፣ አስሙ ቑንዚ ዝኩኽ፣ ብሪው ሺንኪ፣ ሼርካ፣ ታክሲልስታ እሊኩ ፄጌርጙንኩ እምቢትናማ አግልግሎቴ አግፅጝ ቱስታኩ አቕስኪላ ቤዴራማ እክምኒ እይስታው አኽⶓ  ቲኑ ውማይቲኒ እርዳትፅካ:: አግልግሎቴ እይስትጝጚዳ ዳንጉዊኒ ዝኩዋቲታስታ እምፕልታቕ አግልግሎቴ ቱስቲስ አግፃንታ ትኩትስ እንፃኽስቴካማጊ አኽⶓኪላ ውማይቲኒ ቶኬምካ:: አቑሳ ቼፎ ኔኬትጝስስታ እምፕልታቖ ቑንዚዴስ ቤዴራማ ካላካልጛንታ ፄውጝስ ታምቦጊ ፊትጜካማጊ አኽⶓ ድኹንኩ ቲኑ ውማይቲኒ እምፕልታቕ ፍንሾስ አግልግሎቴ አግፃንታ ፋይፃውሳጊ ግብአቶ ዋኽትጝፅጝስ ትኩታኩ አካልካ አላፍትስ እንፃኽስታንታኪላ ካሲካ::

ዚጋሚ ወረዳ ቲን ፅፌት ጝናሱ ትክትሊ አላፊ አቶ አብዬ ሽቱ ዚጋሚ ወረዳ ቲን ሜድኑ አግልግሎቲስ ዞንዴስኪ ያኻ ዎሌን ወረድካዴስጊ ኽስኹስ እንፃኽስታማጊ አኽⶓ ጌሌፅካ:: 2017 ምሬት አሜትዳ ቲን ሜድኑ አግልግሎቲስ 20 ኬቤልካዴስጊ አመራርካዋስታ ቲንኩሳ ውማይቴንካዋ አሴሜርጝፅካማ 14ሻይ 453 ቲን ሜድኑ አግልግሎቲው ቴኬምስታንትካ እሺንኩሳ አዴስጝስ፣ 7 ሊኻ 4 እስካውካ አባልካዋስታ እንዴስ ፍና እሺንኩሳ አክማ ጋቲንኩሳ ዴሜካ 6 ሻይ 7 ሊኻ 6 አቕስ ቲን ሜድኑሳ አግልግሎቴ አዴስካማ እንፅኺሾ ቱⶓ እርዳትፅካ::

ቲኑ ሜድንስ 1200 ብር ኬይስታው 1ዴስ 5 ኺስታ ጝን አቕ ዝኩክ አኽⶓ ቶኬሙንኩ ፅፌት ጝናሱ ትክትሊ አላፊ እምፕላኒ ኬይኑ ብርስ አሜቶ ዋኾ እክምኔ አግፃኑ ቴርት አኽⶓ ጌሌፅካ:: ዚጋሚ ወረዳዳ ፌይኹ አሜትዳ ፌቴርስትኹ ሰላሙ ችግርስ ፌኔኬልጜካማ እሺንኩ ወጌንካስ አግልግሎቲ ኔፃስ እይስታማጊ አኽⶓ ጉሹንኩ ትክትሊ አላፊ ዞንዴስ ክልሎ ኺስታ ዝኩንኩ አካልካው እርዳቲስስታ ቲን ሜድኑ ቴኬምስታንትካዴስ ኬይስታው ብርስ እንቲታኪ አብት ዌን ኬያኑ ግብርስ ኬይጝስ አክም እላቲኩ ቲን ሜድኑ አጌላጌልስታንትካስስታ ፌኔኬልጙንኩ ወጌንካስ እክምኒው አግልግሎቲ  እይስታማጊ አኽⶓ ቶኬምካ::

ቲኑ ሜድንስ ቴኬምስታኑ ቲኑ ጉትፕዴስ ኬፍቲኒ ቲኑሳ ኾቶ ኺስታ ሪፈርስኪ ያኻ ዝኩኽዳ ቲኑ ኾትዳ አግልግሎቴ አግፅጝስ እምፕላኒ ኬይኑ ብርስ አግልግሎቴ አግፃንታ ወረዳዴስ ክልሎኺስታ ዝኩኽ ቲኑ ኾት ውሎ  እሜማ እንፃኽስታማጊ አኽⶓ ድኹንኩ ትክትሊ አላፊ እምፕልታቕ አግልገሎቴ ቱስቲስ አግፃንታስታ ቴኬምስታንታ እንፃኽስቴካማጊ አኽⶓኪላ  ጌሌፅካ::

ዚጋሚ ወረዳታጊ ዚጋሚ ቲኑ ጉትፕ ቲሪትጙኽ ቤዴራማ አኽጝስ እዝቡሳ ፋዮ ዋኽትጝፅጝስ ቼጌርስትⶓ ጉሹንኩ ትክትሊ አላፊ ቲኑ ጉትፕዳ ቤን፣ ውማይቲኒስታ እጁ እንፂጝ ዝኩⶓ ጌሌፅካ:: እንሳ ችግሮ ጋማጋምካማጊ ዝኩኽ አክምስ ቲንኩ ውማይቴንካስታ አመራርካ እንፃኽስቴካማጊ አኽⶓኪላ እርዳትፅካ:: ዊዳፊ ኽይ እይስታታ ቴኬምስታንትካው ቼፍ ልክስ ሜዴብስትጝ ፋይፃው አኽጝስ ትኩታኩ አካልካ እንፃኽስታንታ እንፅኼንቶ ፌያፌይጝፅካ:: ፅሊ ብሩ ፍሺስ ሚንች አግልግሎቴ አግፅጝስ፣ አምፕል አቒ ቑንዳስታኒ አብት ንብሬቶ፣ ብቴ ዋይካማስታ ጉሽትካማ አቱኒ ዴሜካ ቑንዚስ ይወቶ አታቲንታ አግፁኑ ወክትዳ ብሮ ኬይካማ ቲን ሜድኑ አግልግሎቲው አባልካ ያኻንታኪላ ትክትሊ አላፊ እንፅኼንቶ ፌያፌይጝፅካ::