አምሉ አሻሪው ሜርሃ ግብርዳ ኹኑ ቴሳትፉ ኬፍ ንኹዊያኽ

ንግስቴ ተስፋ

አምሉ አሻሪው ቴግባርዳ ኬፍንኹስ ቴሳትፎ ፄውንኩ አኽⶓ አዊ ብሄረሰቡ ቺፅጝፂዳ አግስታንኩ ኹን ዙሙና::

ይቶፒያ 2011 ም/አሜታዴስ ጉሽፃማ አምሉ አሻሪውሳ ቴግባሮ አኩሜቼታጊ አግስቲ:: ፌይንኩ ዋልታ አሜትካዳኪላ 40 ቢሊዬን ችግኞ ቴኬልታ::

አምሉ አሻሪው ቴግባር ሚንቾ እንፅኺውሳ አድሎ ፌቴርጝስኪላ አሜቻውሳ አኺኔ ፌቴርኹ ያኹስ ጋያኪ ኹን ችግኞ ፌልስጝዴስ ጉሽፃማ ቴኬላማ አንኬባኬብጝስ ሚፂው አግፃ ፄዌካማጊያኽ::

ዊዛሩ ትሩነሽ አገኘሁ ባንጂ ወረዳ ቢዲ ጁጊሊ ኬቤሊው ዝኩዋንታ ስልኪስ ዙሙኑውስታጊ ትክልቴስታ ኩፓኩፔ ቴኬልጝስስታ ፌሎ ፌልፅጝስ ዝኪዊኔ ኬሽጝፅጝስ ኻር ጌርክ ናኑላ እንፃኽስታንኩ ጄግና ኹናኽ::

“አቒ ይሪሶ አንኬባኬብጝ ፋይፃውስታጊ ችግኞ ኪላ ቱስቲስ ፌልፅናናስታ ኬሽጙኽሳ ዜሮ ቴኬልናና አንኬባኬብጝስ ኬሌብዴስ ፊትስናና ጌቤልስ ዲግስናናጊያኽ” ኑንኩ ዊዛሩ ትሩነሽ ኽብፂው አሉምትጉ ዙራማ ኬሽኹሳ ምርቶ አግፄካማ ዝኩኒዳ ልግሰኔ ሜዜጌብፅⶓ ድኹዌካ:: ምሽታሩ ኢኮኖሚው ዳንቴና አኽጝዴስኪላ ፌⶓ ቶኬምካ::

“ቴኬልናው ምግቡዋኽ፣ ዙራሙሪውሳ ግዶኽ፣ ቴኬልናው ፅንኩቶ ንፋሶ አግፅናውሳኽ፣ ቴኬልናው ድኽቶ ድፅናና ኹን ኢኮኖሚስ ጛሬ ካሊናውሳኽ፣ ጄርካ ምርክትካ ፃንቑንታኑላ ቲንስ ሌጌፅናና ወግ ማሬግስ ታምፅናውሳኽ” ንካማ ሼውዴስ ጛ ያጉኑሳ ኪሴ ዙሙንኩ ኬቤሊት ጄግና አሬሳቻንታ እስቱንኩ ዴሜካ አንኪሺ ጉዋጉሲ ወረዳ ሚስሊ ኬቤሊው ዝኩዋንት ዊዛሩ ተጄ ካሳውንያኽ:: ዊዛሩ ተጄ ችግኞ ቴኬልካማ አግፃኑ ሚፂስኪላ ዴስቴንካ አኽጝስ ዙራሙሪኩ አቕጊ ጛውሳ ዴሶ ካፅካማ እንፃኽስታንታ ታምቦ ፊትጜካማጊ አኽⶓ እንክርፄካ::

ችግኞ ትክልቴስታ ኩፓኩፔ ቴኬልናናስታ ፌልፅናና ኢኮኖሚውሳ ኪሴ አግናታ ካሊፃንኩ ግብርኒው ውማይቴንካው ታምብኪላ ዋዚታ ካንትስታቲው አኽⶓ ዲብስካ::

ብሄረሰቡ ቺፅጝፂዳ አግሰታው ችግኞ ፌልፂ ኾትዳ 40 ታፋ ሊኽዴስ ያኻንኩ ኹን እንፅኺውሳ እድሎ አግፄካማ እንፃኽስቴካማጊያኽ:: እሊውስ ዴሜካ ኹኖ ግብርኒው ልማቱ ኬችስ አችትጝፅጝስ ምግብስ ያኻውሳ ኬሽጙኽሳ ፌሎ ዲግስጝስ ኹን ኢኮኖሚስ ሌጌሳንታ እንፃኽስስታማጊ አኽⶓ ግብርኒ ማምሪው አላፋ ዋዛሩ ቤዛዊት ጌታሁን ጌሌፅካ::

ብሄረሰቡ ቺፅጝፂዳ አግስታንኩ ውላጊ ወረድካዳ ሞዴል ሙሪ ቲሪትጛማ ኹን አችትጜካማኪ ያኻ ጛርትስ ቡኖ፣ አፕሎ፣ ማንጎ፣ ፓፓያዋ፣ አቮካዶስታ ቴጋኑሳ ትክልቴ ዙራሙሪው አይር እግልታው አኺኒታ ፌልፅካማስታ ቴኬልካማ ኢካኖሚስ ሌጌሳንታ ኬሽጙኽሳ ፌሉሳ ዜሮስታ ችግኝስ ፋይፃውሳ ግባቶ ግብርኒው ሜምሪ ድጋፍ ፄውጙሳ ቴግባሮ አኮሜቻማጊ አኽⶓ ዊዛሩ ቤዛዊት ኽይትጝፄካ::

ማንጉስታ ብርቱካኑ ችግኝዳ ኩፂ ቑንዚ ኬሴትስትጝስ 2017/18 ምርቱ ዝቤንዳ ሚንቾላ ፌል ቴርታያሱ አኽⶓ ጌሌፁንኩ ዊዛሩ ቤዛዊት ችግሮ ኽይጝስስታ ኹኑሳ ፋዩ ዋኽትጝፅጝስ ክልሉ ግብርኒው ቢሩስ አቕፅⶓ እርዳትፅካ:: ብሄረሰቡ ቺፅጝፂዳ ኹን አምሉ አሻሪው ቴግባርስ ቴኬምስታንታ ፍንሾስ ይስጙኽ ዳድስስታ እክድስ አኮሜችስታው አኽⶓ ዊዛሩ ቤዛዊት አቕፄካ::

አዊ ብሄረሰቡ ቺፅጝፂታኪላ ፌይንኩ አሜትካዳ አምሉ አሻሪው ቴግባር ይሴንስ አኮሜችስቱስ እጂጝ ታክስስታዊያኽ:: 2017/18 ምርቱ ዝቤንዳኪላ “ቴኬልጝስ ሌጌስጝ” ናው ቹዋ እንፅኼንትስ አምሉ አሻሪው ቴግባርስ 98 ሚሊዬንዴስ ጃላ ኢኮኖሚው ትክም ዝኩኽሳ ችግኞ ቴኬልጝስ አኬድስታማ እንፃኽስስታማጊ አኽⶓ ሜምሪዴስ አግፅኑኽ ንቫር ካንትፄ::