“ቑፂ እምፕልታኒ…”

ይቶፒያ 2011 ም/አሜታዴስ ጄሜራማ አምሉ አሻሪው ሜርሃ ግብሮ ቴግባራዋ ፄውታታጊ አግስቲ:: ግብርኒ ሚኒስቴሩ ንቫር ቶኬማውስታጊ ፌዩንኩ ዋልቲ አሜትካዳ 40 ቢሊዮን ችግኝካዋ ቴኬልታ:: እኒ ቴኬልስቱንኩዴሰ ዴሜካ ሊኽዴስ 63 ታፋ ያኻው ምግብኔትስ እሺንኩ አኽጝ ምግብስ ጛሬ ካሊጝስ ፅሬቶ ፄውታት አጌራስ ኽሳንቲ ኽይ ዝኩኽያኽ:: 2017 ችኹ ወክትስኪላ ላጜታ ትኩሚ አንኩዋ ችግኝካዋ ቴኬልጝስ እክዶ እምቴታ እክድዴስ ጃላ ቴግባራዋ ፄውታ:: እምስትኹ 700 ሚሊዮን ችግኝዴስኪላ 714 ትኩሚ 7 ሚሊዮን ችግኝካዋ ቴኬልጝስ ካሊስታ:: እንሳ ሳኪትጝፅጝስ ካሊስትኹ ዴሜካ ውላጊ እምፕላ አይኒቲ ታክስጚስ ጁዋማ ችግኞ ቴኬልጝዳ ፄውስትኹ ልቕልቕቲስያኽ:: ቴኬልጝዳ ካንትስትኹሳ አሪባሪበጜ ዴሜካ ፄዴካታ ፄውጝስ አሪባሪብጚዳኪላ ካቢጝ ቱስቴ:: ችግኞ ቴኬልጝዳ ብሄሮ፣ ዜሮስታ እምኔቶ ጐሌላኑውላስ አሴቴፍጝጝስ እክድዴስ ጃላ ሳኪትጝፅጝስ ካሊስትኹሳ እምፕልቶስታ ይቶፒያውያንካስ አጌርታ 10 አሜታዴስ ጃላ ጄሜርስትኹ ኽሳንቲ እዳሲ ዴዴኩሳ ግንባቴ ግቢትጝስ ካንትፁኑ አጌራዊ አሪባሪብጚስ ናካዳ ግንባቲ አሌድስታማ ዋይሚዳ ታምብጝስስታ ይፋስ ዳቔርስትጝስኪለ ዱሚዳ  ታምብስታ::

እንዳ ችግኝ ትክላዳስታ ዴዴኩ ግንባቲዳ ፄውስትኹሳ አረባሪብጜ ዴሜካ አማኻሪ ክልልታ ላጛ አሜታዴስ ጃላ እጂኹሳ ሰላም ዳንጉዊጛሳ ክችስጝስ ውላውሳጊ አሪባሪብጜ ፄውጝ ቱስቴ:: ክልልዳ ፌቴርሰታማ እጂኹ ሰላሙ ዳንጉዊኒ ምክንያታስኪላ እምፕልታቕ ሼውታ ስፍሪዴስ ስፍሬ ልቕልቓቲንታ ፄዋማ ሳኑስታ:: ስሪስሪ ፋይታ ፌካማ ፒንትቕትካማ ክንታኑሳ ክንቴ አግፃቲንታ ፄዋማ እጄ:: እስጜ ሰላም ዳንጉዊጛሳኪላ ዙሚትጚስስታ ኩስጚስ ኽይጝስ ውላጊ ታምቦ ፊትጝጝ ቱስቴ::

ጋቻው ምክንያታስ ጉዲስቱንኩ ክንቲ ጝንካዋ ፄጌንጝስስታ ዳንጉኽሳ ክንቲውሳ ሜሳሬ ዋኽትጝፅጝስ ውላውሳጊ አሪባሪብጜ ፋያዊያኽ:: ውላጊ ክንቲ ጝንካ ወክትስ ክንቴ ጄሜርጝስ ካላንታስታ ፃንኩቶ ማንዱኽሳ ክንትጝ ክንትፅጙሳ ቴግባሮ አኮሜችጝስ ካሊስታታኪላ ጊዞ ማንዳማ ክንትጝ ቱስታኩ ጄርካዋጊ አላፍቶ ካፃማ ሜዜጌብፅጝ ቱስቴ:: አክማ ጋንኩ ስራስሪዋኪላ ክንቲውሳ ሜሳሬ ዋኽትጝፅጝስ ክንቲ ጝና ካሳንታ ፄውጝስ ታምቦጊ ፊትጝጝ ፋይፄ::