ኮንሶ እዝቡ ባይል

ዘውዴ በካሉ

ይቶፒያዊያ ግዲታው አይት ዝኩክ እምፕልታቕ ዝኩዋንቲያኽ:: ይቶፒያውሳ እዝቦ እሊውዴስ እዝብዴስ ሊሊታ ፄዋው ሚንችካ ባይልኩ እሴትካዋ እሚጝስታ ጛው ያኹኽሳ እሴቶ እሚጝያኽ:: ይቶፒያሾ ይንቱኽስታ አጌራውሳ አኺኔ እርዳትስትጝስ ፋይኹ አቒ እምፕልታቑ እምፕልትስ፣ ሚጊብጚስ፣ አብራ ዝኩጝስስታ ካሊትጚስ፣ ኮንኪስ፣ ሴይጝጚስ፣ እዝንስ፣ ዴስቲው ቴርትስስታ እሊኩስኪላ ዴኔክስታውላስ ፌያላ:: ውላዴስጊ ዴሜካ አይሎ ዴስፃንኩ ፌስቲባልካ፣ ፅምቕት፣ ሜስኬል፣ ቻምባላላስታ እሊኩኪላ ሊሊትካ ሊሊትካ ባይልኩስታ አይማኖትኩ ቴርትካ አጌራውሳ እዝቡሳ አኺኔ ካንትፃንኩ ቴርትካኽ:: እኒጛ አብትካዋ አምፕልታቕ ሚንችካ አሜትካዋ ባይሎስታ እሴቶ ማንዴካማ ድሳኑላስስታ ስንክርስታኑላስ ክምንትስ ፌያፌይጝፃና::

ባይሉ ፁፍዳ አሌሙ ማኺቲዳ ሜዜጌብስቱንኩ ማኼትካ ክቻዴስ እምፕል ያኹኽ ኮንሶ ባይሉሳ እሴቶ ካንትኹስ ንባሮ ኢትዮ ፕሬስ አችትዴስ ቴኬምስትናና አንቤብፅጝስ ፋኑኻ:: ኮንሶ ሴሰታ ጐሲስ ብሄርስ  ቲሪትጙኽ፣ ሹኻ ፍትሬቱ ብቲው እንጅኩዊስስታ ባይሉ ቴርትስ አቡቕስቱንኩ ንጝኪ ቲንባ ካራታ ከታና፣ ከና ኩፍስታ ቱሮታ ቲቲባ እስታማ ኽታዊኒ ባይሉ ቴርት ዌና ያኹኽ እዝብያኽ:: ኮንሶዳ ዋሺኒዳኪ አሌሙ ቤንዳ አግስታቲው ዴኔክፃው ፍትሬቶ ማንዲጙ ትቤብ፣ ዴስቲውስታ እዝኑ ቴርት አግስቴ:: ኮንሶ ባይላዊ፣ ፍትሬቱ አብት አሌሙ ማኺቲዳ ሜዜጌብስታንታ ካሊስትኹ ምክንያቲኪላ ኮንሶውሳ እሴቶስታ ባይሎ ኬፍፃማ ካንትፃው ታሪክስታ አብት ዝኩኽ አኽጝስያኽ::

ኮንሶው እምፕልታቕ ይቶፒያው ታሪካኻዳ እንፅኼ እንካናው እዝብ ዝኩኽ ዙራሙሪ አኽጝ ዙሚስቴ:: እን ባይልኪላ ዲጊ ጊዝስ ይንቱኽ ያኻውላስ ኽታዌን ታብልዴስ ዎሬሱኑ ፄጊኪላኽ እስቴ:: “ኮንሶው እዝብ እንፅኼ እንካኔ” ናው ካልስ ውላ አቕ አስሚምጛኑ አኽⶓኪላ ታሪክዳ ፃፊስታማ አግስቴ:: ይዝኩዊ እስታው እንፅኺ ኮንሶው ማቤር አቕስ ሳሴርያኽ:: ፆቲስ ቤንስትኹ እንፅኺው ታምብ ሚንቾኪላ ካንትስታላ:: ኹን ይኮኖሚው ኪሲስ ጝርጃሊ ክቻ እንፃኽስትጙ ባይል ኮንሶዳ ዴስስትኹያኽ::

ኮንሶው ብሄረስብ “አፋ ኾንሶ” እስታውሳ ኮንኬ ዙማንኩ ያኻኒስ ምስራኩ ኩሉ ኩሹ ኮንኪው ጝን አቕዳ ሜዴብስቴ:: ብሄረሰቡ ኮንኪ ኮንሰኛ “አፋኾንሶ” እምፕላንቲ አች ክንቲ ጝናዳ ክንቲስ ፁፍፅንታው ቴርትስስታ ኮንኪስ አጌላጌላማጊ አግስቴ::

ላጛ ሻይ 22 ስኩዌር ኪሎ ሜትርዴስ ጃላ ብቲው እሳንት ዝኩኽ ኮንሶ ዞን ብቲው እንጅኩዊ ጃላ ኩክሪስታ ካን ሚንቹኽ ያኹስ ካርጝስታ ካርጝ ስራዳ ዋጋንኩ ፅልካ ፅልካ ካናኻፅካው ፍትሬቱ እንጅኩዊ ፍትሬቱ ፄጊያኽ:: ኬፍቲኪላ ባሩ ወሌልዴስ ጃላ 570 ዴስ ላጛ ሻይ ሊኻ ሜትር ኬፍቲዳ አግስቴ:: እምፕልታቑ ይኮኖሚ ስርታውኪላ ፃምርትኹ ግብርኒዳ ያኹስ ንሴስካዋ እሩብፅጝስስታ ቡዚስጝ፣ ፅኻራዋ ስኹፅጝ፣ ታፍ ትቤብኩ ዋይምካ፣ ማዕድኖ ኩፕፅጝ፣ ጊፁስታ ቱሪዝሙ ሚፂ ይኮኖሜ ዴጌፋው ቴግባሪያኽ::

ኮንሶው ማቤር አቕ ቴቬቬርጙንኩ ምንግስትካው ክንቲው፣ ሳይንሱስታ ባይሉ አችት /ዩኒስኮዳ/ ሜዜጌብስቱንኩ አቓ ግብርካስታ ፍትሬትኩ ታሪክኩ ማኼትካዴስ ድምክና ኽሳንቲ እሴት ዝኩኽ እዝብያኽ:: ካንትስትካማስታ እንኩዋኽስትካማ ሼሌችስታቲንኩ ጅምካስታ ጉድብዌና ያኻኒስ ጛው አይቱ ጊሊፂ ያኹኽ ባይሉ ሴይጝጚ፣ ኹጙስታ ዝቒው ቴርት ዌናኽ:: ኮንሶዳ ዴስቲስታ ፌሽቲ ይጉዋማ እዝንኪላ ብሬ:: ኮሶው እምፕልታቕ አቒ ክራኒ ጅሚስስታ ጉድብስ ዴስቲስ ሲፋኑ ባይል ዝኮ:: እን ባይልኪላ “ሼሌታ” እስቴ:: ኮንሶው ማቤርአቕ እምፕልቶ ይስጝፃኑውስታ ይኮኖሚውሳ አክሞ ሌጌፃኑ ባይላዊ ቴርትዴስ እምፕል ሴንቲው ቴርት ቢዲሬ ስፍሬ እሚ::

ኮንሶው ማቤር አቑ ይዎት እርሺሊ እምትጙኽ አኽጝስ እርሺ አሬስስታው ዎክትዳ አቒ ክሩኒጊ ዴውፁ ቴርት አኮሜችስቱኒዴስ ፋሌንጋ ጅሚው ቴርት አሜቻው ዎክትዳ ሜሰኬሩምስታ ትክምቲ አርፊዳ ያኽስቴ::

እሊው ዴሜካ ኮንሶ ሚንች እሴት ዌና አኽጝስ እምፕልታቑላዳ ሊሊቲ ስፍሪ እይስታው ስፖርቱ እንክሪ አይሎ ጌሬምፃው፣ ታምብምባ ጐሜጅፃውስታ እንካንስታው ባይሉ፣ ታሪኩስታ ስፖርቱ እንክሪ ኮንሶው ብሄረሰብዳ አግስቴ:: ሶታ እስታው እንክሪ ጝርጃ ዎታትካስታ ሌጌሳታምብካ ጛው አፄብካሊ ጌቴምካማ ጛውሳ ዎኔ፣ ይሴንቶስታ ካላንኩ አኽⶓ ካንትፅጝስ ክማኒ 11 ሳታዴስ ፋሌንጋ እንክራኑ ባይሉ እንክሪ ሶታ እስቴ:: ሶታ ዎታትካስታ ሌጌሳታምብካ ክቻዳ ዝኩኽ ኽታዋ እሺኹ ናካኪላ ዝኩኽ ፍንሾስኪላ ዝኩዋው ኮንሶ ብሄረሰቡ ባይሉ ስፖርቱ እንክሪያኽ:: እሊው ዴሜካ ኩራይላ ስፖርቱ እንክሪያኽ::

ኩራይላ ስፖርቲ እንክሪ ኮንሶው ማቤር አቕ ሳኑ ዎክትዳ ትርዴስ ይካቲቱሳ አርፌ አሊዴኺስታ እንክራኑ እንክሪያኽ:: ኽሳንቲስታ ፅሊ ክቻዳ ካስጛው ልኻ ዊድፂ እንክሪ ዎክቶ ማንዱኽ ስፖርቱ እንክሪያኽ:: እንክሪኪላ ሼውንⶓ ፋያው፣ ባይሉ ኩፕፂ አደባባይዳ ይቢቺዳ አግስታው ኮንሶ ብሄረሰቡ ባይሉ እንክሪያኽ:: እሊው ዴሜካ “ታኬካ” እስታው እንክሪ ሼውንጝስስታ ትቤብስ እንክርስታው እንክሪ ያኹስ ታብልሊስታ ጐልማስካሊ ፌያፌያማኪ ዎታትካሊ እንክራና:: እን ባይሉ ስፖርቱ አይኔት ዝቤኑ እቑዊስ “ገበታ” ያኹስ ኮንሶው ማቤር አቑላዳ አቕስቴ::