ግብር አጌር ልማታስ

ታደለ አጋጄ

ምንግስት አጌር አቑ ይኮኖሚው፣ ማይቤራዊዉስታ ፖለቲካውሳ ልግስኔ አሬኽፅጝስ ሊሊትጙንኩ እምፕልታቕኩ ቤንካ እንፃኽስቴካማ አግፃኑ ሚፂዴስ ግብሮ ኬይፄ:: ግብር ምንግስቱ ቹዋ ፋይናንሱ አሊ ያኹስ እምፕላ አጌራው ይኮኖሚስታ ልማቱ ልግስኒ ቼሜትጛው እዝብ ግብሮ ኬያኒስታ ምንግስት ዴሜካ እምፕልታቕዴስ ዎክትስ ግብሮ ኩፕፃኒያኽ:: ግብር እምፕላ አጌራው ይኮኖሚው፣ ፖለቲካውስታ ማይቤራዊው ልግስስ ቹዋ ሜሳሪ አኽⶓ ዜርፍኩ ምሁራንካ ጌሌፃና:: ምንግስት እምፕልታቕዴስ ኩፕፃውሳ ግብሮ ሊሊትጙንኩ ስርኩ ልማትኩ እንፅኽካዳ እሽፄ::

አማኻሪ ክልልዳ ዲጊ ጊዝዴስ ናቴ ኬሴትስትኹ ሰላሙሰታ ፄትቲው ችግርስ እምፕልታቕዴስ ፋይስታውሳ ላካ ሚፄ ኩፕፃማጊ ጋቲዊያኽ:: ክልልኩ ሊሊትጙንኩ ዙራሙርካዳ አግስታንኩ እምፕልታቕዴስ አች “ሐ” ግብሮ ኬያንትካዴስ ግብሮ ኩፕፅጝስ ፅሬት ፄውስታማጊያኽ::

አዊ ብሄረሰቡ ቺፅጝፂ ቻግኒ ኬቴሙ ቺፅጝፂዳ አች “ሐ” ግብሮ ኬያንትካ ግብሮ ኬየካማጊ አኽⶓ ስልኪስ ዙሜካ::

ሼህ ሙሀመድ ዘይን ቻግኒ ኬቴሙ ቺፅጝፂ 03 ኬቤሊው ዝኩዋንትካኽ:: ጊፁ እንፅኺዳ አሴሜርጜካማ ዝኩዊኔ ጉሳና:: እንፃኽስቴካማ አግፃኑ ሚፂዴስ  ምንግስትስ አሜት ቺፋ ግብሮ ኬያና:: ሼህ ሙሀመድ እንዝርናንትካውሳስታ ጝኖ ክራይፃንትካውሳ ግብሮ ኬየካ:: ግብሮ ኬይጙ ትክም እንጛርትጛስያኽ ኑንኩ ሼህ ሙሀመድ ግብር ዎክትስ ኬይስታውላስ ልማቶ እንፃኽስትጝስ ካሊስታቲው አኽⶓ ዙሜካ:: ቻግኒ ኬቴሙ ቺፅጝፂዳ ልማቱ እንፅኺ እንፃኽስስታማ ዳቔርስታው እምፕልታቕዴስ ኩፕናው ሚፂስ አኽⶓ ቶኬምካማ “ግብሮ ኬይጝ አጌራዊ ግዴቲያኽ” ንካ::

እምፕልታቕ እንፃኽስቴካማ አግፃኑ ሚፂዴስ ግብሮ ኬይጝ ፋይፃው አኽⶓ ጉሹንኩ ሼህ ሙሀመድ ቻግኒ ኬቴሙ ቺፅጝፂዳ አምሊ እምፕልዴስ ጄሜራማ አች “ሐ” ግብሮ ኬያንትካ ግብሮ ኬይካማጊ አኽⶓ ዙሜካ:: ሚፂ ፅፌት ጝና ግብሮ ኬያንትካዋ ቱስታው ዳድስ ሌንጌድፅካማጊ አኽⶓኪላ ዲብስካ::

“ግብርሊ እምትጙኽስ አሱ ንባር ዙሚስቴ” ኑንኩ ሼህ ሙሀመድ እምፕልታቕ ካሴኑሳ ልማቱሳ እንፅኼ እንፃኽስትጝስ ግብሮ ዎክትስ ኬይጝስ አጌራዊ ግዴቲ ፊትጝጝ ቱስታው አኽⶓ ጉሽካ::

ፌያ ፌያማ ግብሮ አክምዴስ ጃላ ኬያንታ ፄውስቱንኩ ግብሮ ኬያንትካስ ምንግስት ኬሽጝፃያታኪላ ካሲካ:: ሰላሞ ሴፌንፅጝስ ካሊስታው ግብር ኬይስታኒ አኽⶓ ጉሹንኩ ሼህ ሙሀመድ ውላ ግብሮ ኬያንትካ ግብሮ ዎክትስ ኬይጝ ቱስታው አኽⶓ ዲብስካ::

እሊው ቻግኒ ኬቴሙ ቺፅጝፂዳ ትክላሊ ቤሩ እንፅኺዳ አሴሜርጝጝስ እንፃኽስስታው አቶ ያረጋል አድማስ አውጚው ኦንላይንስ እዩኑ ካንቲስ አሴሜርጙኑ እንፅኺው ዜርፍ አጌራው ልግስኒስ ቴኬማው አኽጝስ ግብሮ ኬይጝ ክብር አኽⶓ ዙሜካ:: ሚፂ ፅፌት ጝናስኩ ውማይቴንካ ግብሮ ኬያንትካስ እያኑ አገልግሎቲ ክርፂ አኽⶓ ጉሽካ:: እንዴስ ቤዴራ ግብሮ ኬይጛ ካሳኒ ቼጌርስታሺንኩ አኽⶓ ቶኬሙንኩ አቶ ያረጋል ንጙዋኒ አሜትዳ ኩፅኒ እንዳርማኪ አገልግሎቴ እይጙ ችግር እላቲው አኽⶓ ድኹዌካ:: ግብሮ ኬያንትካዋ እምቢቴካማ ሌንጌድፅጝስ ፌይኹ አሜትዴስ ጉድ ኬሽጝጚ ዝኩⶓ ዲብስካ::

ቻግኒ ኬቴሙ ቺፅጝፂው ሚፂ ፅፌት ጝናሱ አላፊ አቶ ሙሉሰው ልኡል ቻግኒ ኬቴሙ ቺፅጝፂ ትክላሊስ 2ሻይ 853 አች “ሐ” ግብሮ ኬያንትካዋ ጎሌልጝስ እንፅኺሾ ቱⶓ ጌሌፅካ:: እንዴስኪላ 50 ሚሊዮንዴስ ጃላ ጌንዜቦ ኩፕፅጝስ አኬድስትⶓ ጉሽካ::

ግብሮ ኬያንትካ ግብሮ ኬይጛ ካሳኑ ጊዛይ ባንክኩሳ ውማይቴንካ አግጝስ አሬኽኹሳ አግልግሎቴ እይጝስ እንፃኽስቴካማጊ አኽⶓ ቶኬምካ:: ሚንችካ ግብሮ ኬያንትካ ሊሊትጙንኩ ምክንያትካስ እሊው ዙራሙሪሾ ካስⶓ ቶከሙንኩ አላፊ እንኮጚኒ አሜትሊ ካንትጛኒ ኽስት ዝኩኽ ግብር ኩፒጝስ ካሊስታው አኽⶓ ጌሌፅካ::

አባላምቲ ጌርክስ ፄውስትኹ ግብሮ ኬይፅጙ እንፅኺስ ሊኽዴስ 70 ታፋዴስ ጃላ ፊፂምጚ ካንትስትⶓ ጉሽካ:: ዴዴጝ ጊዛኻዳ ውላ ግብሮ ኬያንትካዴስ ሚፄ ኩፕፅጝስ ፅሬት ፄውስታማጊ አኽⶓ ቶኬምካ::

ኬቴሙ ቺፅጝፂዳ አች “ለ”ስታ አች “ሀ” 120 ግብሮ ኬያንትካ ዝኩⶓ ጉሹንኩ አላፊ እኒ ግብሮ ኬያንትካ ዴሜካ ይንታው አርፊዴስ ጄሜርካማ ግብሮ ኬይⶓ ጄሜራንኩ አኽⶓ ጌሌፅካ::

ውላ ግብሮ ኬያንትካ ግብሮ ኬይጙሳ አጌራዌ ግዴቴ ፊትጝጝስ እምፕልታቕ ካሴኑ ልማቱ ካሲስ ዙርሜ እይጝስ ጛጂዴስ ማንዲስታውሳ ግብሮ ዎክትስ ኬይጝስ ፋይስታያሱ ክፃትዴስ ፋንታ ታክስፅካ::

አማኻሪ ክልሉ ሚፂ ቢሩ አላፊ አቶ ክብረት ሙሀመድ 2017 ባጄት አሜትስ ክልል 2016ዳ እሺኹ ፄትቲው ችግርዴስ ፋማጊ አንትጝስ ሚፄ ኩፕፅጝዳ ፌይኹ አሜትዴስ ኬሽኹ ፊፂምጚ ካንትስትኹ አኽⶓ እርዳትፅካ::

2017 ባጄት አሜትዳ ሚፂው ኾት ኩክሪኔ አቾኺስታ አመራርሊ ይስጙኽ ፃምርትጚስ እንፃኽስትጝስ ኬሽኹ ሚፂው እንፅኺ አኮሜችስታታ እርዳትⶓ ቶኬምካ::

ትክላሊስ ክልሉ ፌፄምጚ ኬሽኹ ያኼስጉ ናካኪላ ከልል ፋያው ትክላሊ ፋይናንስ አክሙ ፋይሊ ካንትጛኒ እምፕልታቕ ፋያኑ ማይቤራዊስታ ኢኮኖሚው ልማቱ ካስካስ ዙርሜ እይጝስ ኩፓው ፋይናንሱ ግባት ክልልስ ሜቴናው እስታማ ካፅስታላኽ ንካ::

“ሚፄ ከፕፅጙሳ እንፅኼ ሳኪትጝፅጝስ ኾትታ ሪፎርሙሳ እንፅኼ አኮሜችጝ ቱስቴ” ኑንኩ አላፊ ግብሮ ኬያንትካስ አሜችኹ ያኻታ ፄውጝስ ቴርትስ አሜቻቲንታ ፅንጋኽሳንኩ ሜሜርካዋ ፌቴሻማ ክችስጝስስታ ሚፄ ኩፕፅጙ እንፅኺ ዝቤናዊ ቴርትስ ኩፓታ ፄውስታው አኽⶓ ጌሌፅካ::

ዝቤናዊ ታክሱ ቺፅጝፂው ቴርት ዝኩዋታ ፄውጝስ ግብሮ ኬያንትካውሳ አንጌሌትስትⶓ ኔኬታውላስ፣ ዳድ ቺፋ ይጉዋውላ ምንግስቱ ሚፂ ምንግስቱ ካዝኒሾ ቱዋታ፣ ግብሮ ዳዴኽⶓ፣ ታክሶ ቤፍፅⶓ ካላካላንኩ ቴክኖሎጅካዋ ዲጂታላይዜሽንስ እንፃኽስትጝስ ጄሜርⶓ ቶኬምካ:: ዝቤናዊ ቴርትስ ወረድካሾስታ ኬቴምካሾ እሳናታ ፄውጝስ ኬሽኹ ሚፄ ኩፕፅጝስ እንፃኽስታንኩ አኽⶓ ጌሌፅካ::