ቲኪስታውሳ እያማ ቲኪስታቲውሳ ፊቲስጝ

አለሚቱ የኔት

ብሪ ድሚ ኬሌም ዝኩኽ ክቤንቲ ያኹሰ ሊሊትጙንኩ አካሉ ቤንካዳ ታምብጝስ እንኪቴንካስ ምግቦስታ ኦክስጅኖ ታምፄ:: ብራኻዳ አግስታንኩ ፉቺስታ ድሚ ብሪው ሴልካ ዝኩንኩ ያኹሰ ድሚ ብሪው ሴል ኦክስጅኖ አካላቱ እንኪቴንካስ ታምፁስ ፉቺ ብሪው ሴል ዴሜካ ያጋንኩ እንኪቴንካ አካላትሾ ቱዌካማ አካላት ቑንዚስ ፂኪስታቲታ ካላካልጛና:: እን ብሪ አቒያሱ ዝኩዊኒሰ ፋይፃንቲ አኽጝስኪላ ብሪ እንፂጛ ጌቴማው ጊዝስ ብሬ ሌጌስጝስ አኹኪ እይጝስ ችግሮ ጌጌውጝስ ካሊስቴ::

አምፕል አቒ ብሬ እያው አቔ ኬሽፅጝስ ፄውስታው ካስጚያኽ:: አንዴስኪላ ብሪ ዳላው አኺኒስ ብሪው ባንካኻዳ እንኩርስታማ ፋይፃንታ ያኹሰ ብሬ ካፅጝስ አጌላጌሌ::

ታክሲል ቤናኻዳኪያኻ፣ ፂኑኽ ቑንዳስቴንካው ብሬ እይጙ ቴርት ይወቶ ኬፄላዊያኽ:: አሌምዳ ሊኽዴስ እምፕል አቒ ይቪቻ ብሬ ሌጌሳው አኹኪ እያው አኽⶓ አሌሙ ቲን አችቱ ንባር ቶኬሜ:: ብሬ እይጝ ባኩ ፋያስ ይቪቻ ፄውስታው ቲኑ ካስጚያኽ:: እምፕላኒስ ፄውስታው ብሬ እይጚሰኪላ ሹኻ አቑሳ ይወቶ ኬሽፅጝስ ካሊስቴ:: ውማይቴንካ ሊሊትኑስኪላ ሚንችካ አፍሪካው አጌርካ ብሪውሳ ባንኮ አድርፅጝ ቱስታው አኽጝ ቶኬምስታ:: ብሬ እያንትካዴስ ዳንጉዋውላ ክብራ ያኹኽሳ አቒያሱሳ ይወቶ ፊቲስጝስ ካላው “ብሪ” ሊሊቲ እይስቱያኽ:: ብሬ እይጝ እንካኑ ጊሊፂያኽኪላ እስቴ::

አሌም አቩቑ ብሬ እያንትካው ጌርክ 21ንቲ ጊዝስ ኬቤርስቱስኪላ ብሬ ካቢትጚሰ እይጝስ አቕስቱንኩ አቕስ አማኻሪ ክልልታ ባርዳር ኬቴምዳ አቕስቲው ቴርት ካስጛ:: እን ቴርትዳ አግስቱንኩ አቕሊ አውጚው ቴርት ቤናኪላ እጂጜ ፄውኽሳ ንባሮ አንቤብፅናኻኽ::

አቶ አዲሱ አየለ አገው ምድር ክንቲ ጝናሱ ጛሪ ብሬ ሌጌስጙሳ ቴርቶ አሴቴፍጛንኩ አኽⶓ ዙሜካ:: ብሬ እያንቲ እያንቲዳ ፌቴራው ችግር እላቲው አኽⶓ ካቢትጚስ ቼሜትጝፅⶓስታ እንዳራኪ ኮውሳ ችግሮ ሲፍፃቲው አኽⶓ ዲብስካ:: ብሬ እይጝ ብሪ እንፂጙ ምክንያታስ ይወቶ አታንኩሳ ይጉፅጝዴስ ፌይኹሰ ጛርቱ ቲንዳ ጌቴማንኩ ቲንኩ ዳንጉንካዋ ማሊጝስኪላ ቴኬማው አኽⶓ ቶኬምካ:: ክንቲ ጝናዳኪላ ሚንችካ ክንታንትካስታ ክንትፃንትካ ብሬ ካቪትጚስ እይካማጊ አኽⶓ ዲብስካ:: ፍንሾስኪላ ሚንችካ እስጜ ፕሮግራሞ አሴቴፍጛንታ ፄዋንኩ አኽⶓኪላ ታክስፅካ::

ዊ/ሩ ፍሬህይወት ሙስቶፋ 41ኒ ብሬ እይⶓ ዲብስቱት እሊት ባኮ ፋያንታኽ:: እንሳ ፄውጝስኪላ ይወትዳ ዴስቴና አኽⶓስታ ምክንያቲ ዴሜካ ድባንዴስ ኩክራ ጚውሳ ብሬ እይጝስ አቒውሳ ይወቶ ክርጝዴስ ፊትስጝስ አኽⶓ ጉሽታ:: ብሬ እይጝ ዴሜካ እይስትኹ ብሪስ አቑ ይወት ፊቱስ ካንትጝስ አንኩሊውሳ ፉሬኪላ አግፃው አኽⶓ ዙሜ::

አቶ አስራት ሰማነ ቻግኒ ላጛንቲ አች ክንቲጝናሱ ትክትሊ አላፊ ዴሜካ ብሬ እይጝስ ሊሊትጙንኩ ኬሴትካው ምክንያቲስ ብሪ ክቤኩ አቑሳ ይወቶ ፊቲስጝስ አንኩሊውሳ ፉሬ አግፅጝስ ኬፍንኹ ቴግባር አኽⶓ ዙሜካ::

እስጜ ፄውጝስኪላ ባኩ ፋይስ ኔፃ ያኼካማ ብሬ እዩኒ ጛው ቲንዳ ችግር ጌቴማቲኩ አኽጝስ አሴቴፍጝጝ ቱስታኩ አኽⶓ ዲብስካ::

ዛጉዌ ክንቲ ጝናሱ ጛሪ አቶ ሀብታሙ ካሳሁንኪላ ዙሙኑውስታጊ ብሬ እይⶓ ካንትኹስ ዙራሙሪው እምፕልታቕውላዳ ሼውቲ እላቲኩ እሺⶓ ጉሽካ:: ክንቲ ጝናዳ ውማይቴንካ ይንቴካማ ካቢትጚስ እያኑ ክንቲስስታ እምፃኑ ሼውቲስ ሚንችካ ክንቲ ጝናሱ ክንታንትካስታ ክንትፃንትካ እይጙ ቴርትሾ ቱⶓ ዲብስካ:: አቶ ሀብታሙ ብሬ እይⶓ ጄሜሩኒዴሰ እምፕላ ካሜናንታ ቹዋውሳስታ አንኩዋ አቑሳ ይወቶ ብሪ እንፂጛ ምክንያታስ ክራንኩስ  ይጉፅጝስ ካሊⶓ እንክርፄካ:: እይስታውሳ ብሬ ቲኪጝስ ባኩሳ እንፅኼ እንፃኽስትጝ ፋይፃንቲ አኽⶓኪላ አቶ ሀብታሙ ታክስፅካ:: ብሬ ዋዴስኪ ሼኬትታ ጄውጝስ ካሊስታቲው አኽጝስ ውላጊ ብሬ እይጝስ ክራንኩ አቑሳ ይወቶ ፊቲስጝ ቱስታው አኽⶓኪላ እንፅኼንቶ ፌያፌይጝፅካ::

አዲስ አበባ ኬቴምዳ ይቢቻ 2 ቲሬንቲስታ 10 ልቕልቓንቲ ብሬ ኩፕፃንኩ ክሊኒክካ ቲሬንቲስ አገልግሎቴ እያንኩ አኽⶓ ቲን ሚንስቴሩ ንባር ቶኬሜ::

ባርዳር ኬቴምዳኪላ 2017 ም/አ ባኩ ፋያንትካዋ ቴቬቬርጝፅጝስ 21 ሻይ ኪሪፂቴ ብሬ ኩፕፅጝስ አኬድስታማ 21 ሻይ 100 ኪሪፂቴ ብሬ ኩፕፅጝስ ካሊⶓ ባ/ዳሩ ብሪ ባንኩ ንባር ቶኬሜ::

አማኻሪ ክልልዳኪላ 10 ብሪውሳ ባንኮ ብስካማ አገልግሎቴ እይካማጊ አኽⶓ ጌሌፁንኩ አማኻሪ ክልሉ ቲኑ ቢሩ አላፊ አብዱልከሪም መንግስቱ ያኻኒስ 2017 ም/አሜታስኪላ 71 ሻይዴስ ጃላ ዩኒቶ ብሬ ኩፕፅጝስ ካሊስታ:: እንዴስኪላ ባርዳር ብሪ ባንኩ ታምብ 29 ታፋ ያኻውሳ ሾፌንኹ አኽጝስ ኬፍቲኔ ታፎ ካፃው አኽⶓ ቶኬምካ::

ዋሺኒኪ ብሬ እያንቲ አቒ ዙራሙሪዳ አግስታው ብሪው ባንክሾ ብሬ እይጛ ካሱስ ጅሚሪዳ ሊሊትጙንኩ ቲንኩ ካስካስታ ምርማርካ ፄውስትካያና:: ብሬ እይጝስ ቢኩንኩ አኽጝ ቼሜትጛኒ ዴሜካ 450 ሚሊ ሊትርዴስ ኽሳያሱሳ እምፕሎ ኪሪፂቴ ብሬ እያና:: እስጜ ፄውጝስኪላ ኬፍንኹሳ አንኩሊውሳ ፉሬ አግፅጝስ ካሊስታውያኽ::