ግብር ወክትስ ኩፕናታ አሚኮ ታምቦ ፊትጛማጊያኽ

ንግስቴ ተስፋ

አሚኮ ግብር ወክትስ ኩፕናታ ታምቦ  ፊትጛማጊያኽ  ናኒስ አዊ ብሄረሰብ ቺፅጝፂዴስ  ትኩታኩ  ቤንካ ዙሙና::

ይትዮፒያዊያንካው  ግብሮ ኬይጙ  ጉሽፂ  ምንግስት                    ፂፅስትጝሊ   ይሴን  ታምትጚ  ዝኩኽ አኽⶓ ታሪክ እርዳትፄ። ኽታዊኒ ጊዝዳ ግብር ኬይስታውኪላ ግርብስ ፌያ ፌያማ ዴሜካ ጌንዜብስ እሺኹ አኽⶓ ታሪክ ካንትፄ።

አማኻሪ ክልልዳ ግብሮ ኩፕፅጝ ክራፊትጚው ጉዳይ አኽጝታጊ አጌር አቕ ግዴቴ ማሌካማ ወክትስ ግብሮ ኬያንታ ፄውጝዳ አሚኮው ታምብ ኬፍቲኒያኽ። አቶ ትላሁን ሞላ እንጃቢሪ ኬቴምዳ ውፍቺ ጝናሳ ብሳማ እዝቦ አጌላጌላማጊ አግስታዊያኽ።አግፃው ሚፂዴስ ኩፅኒ ግብሮ ኬይጝስ አሜት ቺፋ ታምቦ ፊትጜ።

ግብሮ ኬያንትካው ካንቲ ሌጌሳታ ፋይፃውሳ ንቫሮ ታምፅጝስ አቕስታው አሚኮ አቶ ትላሁንኪላ ግብሮ ወክትስ ኬየካማ ጋሺስቱንኩ ግብሮ ኬይጝስ ግዴቴ ፊትጛንቲ እስትጝስ ካሊፅኹ ሚዲያ አኽⶓ ድኹዌካ።

አቶ ትላሁን ግብር ወክትስስታ ቱስቲስ ኩፓውላ ይጉኒጊ እስካዊስ ጄሜርስታውስታ አሌድስታያሱ ልማቱ እንፅኺ ዝኩዋኒ ግብራ ጋቲታ ልማት አንታቲዉ አኽⶓ አሚኮ ሼዉቴ  ፌቴራማጊ አኽⶓ ዲብስካ። “ ግብር ዋኒኪ ይጉዋቲውስታ ወክትስ ኬይስታውላ ይጉኒውላ እዳ ያኻማ ሲፋዊያኽ” ናኒስ ዙሜካ።

አሚኮ እምፕልታቑሳ ልማቱሳ ካሴ ዙርፅጝስስታ ስሩሳ ልማቶ ዋኽትጝፅጝስ ግብሮ ኬይጝ ቢዲሪ ቴግባር አኽጝ ቱስታው አኽⶓ አጌር  አቕ ቱስቲስ ማላንታ ፌይንኩ ጊዝካዳ እንፃኽስቱኽ ዜጌቢኪላ ጋሺስታው አኽⶓ አቶ ትላሁን ጉሽካ።

“አን ግብሮ ኬታው አግፃው አግልግሎቲ ዋኽትጛታስታ ልማት እሳንጛማ እንይሪ ሌጌስቱት አጌራዳ ዝኩዋንታ ታምቦ ፊትጝጝስያኽ” ናውሳ ቴግባርስ እሽፃታ አሚኮ ዜጌቢስ ሼውቴ  ፌቴራ::ግብሮ ኩፕፅጙ ዳድ ፍታዊስታ ዝቤናዊ ያኻታ አሚኮ ዜጌቤ እንፃኽስታማጊ ግብሮ ኬይጙ ዴስ ጊዝዴስ ጊዞ ኬሽጛታ ካሊፅጝዳ አሚኮው ታምብ ኬፍቲኒ አሺⶓኪላ አቶ ትላሁን ዙሜካ። ፍንሾስኪላ ግብሮ ኬያንትካ ግዴቴስታ ሜብቶ አቕናታ ፣ ግብሮ ኬይፅጝዳ ዝኩኽ እንፃኽስትጚስታ ፅናትዳ ስራ ያኻያሱሳ ግብሮ ኬይፅጝዳ ዝኩኽ ዳንጉዊኒ ክቼታ፣ግብሮ ኬያንትካውሳ ክሬቴ ኽይጝስ ካሊስታውሳ ዳዶስታ ንቫሮ እያውሳ ዜጌቤ ታምፅጝዳ አሚኮ ይሳማ ሲፍጝ ቱስታዉ አኽⶓ ቶኬምካ።

አዊ ብሄረሰቡ ቺፅጝፂ ሚፂው ሜምሪው አላፊ አቶ  ፈተነ ትላሁን ጌሌፁኑዉስታጊ ሚፄ ኩፕፅጙሳ ሴሎ ኬሽኹ ፄውጝስ፣ እንፃኽስትጜ ዝቤናዋ ፄውጝ፣ ውማይቴንካዋ  ሴሌቴንፅጝ ፣ደረሰኞ ቱስቲስ ኬውስታታ ፄውጝ፣ ታክሶ ኬይፄ ሜቴኖ ኬሽጝፅጝ፣ ጊፂኒ ዋሺኒዳኪ ብቲዳ ያኻማ ግብሮ ኬያታ ፄውጙ እንፅኺ ሚፄ ኩፕፅጙ ሜምሪውስታ ፅፌት ጝናሱ ቴግባር ያኹኒኪላ እንፃኽስትጜ አቕፅጝዳ ዴሜካ አሚኮ ሚንቾ እንፃኽስታ ።

ክልልዳ ፌቴርስትኹ ሰላሙ ችግር ጊፁ ልቕልቕቲዳ ቻኒስቶ ፌቴርጝ ፣ ግብሮ ኬያንትካ ፋይንታ ብቲዴስ ብቴ ልቕልቕ ንካማ እንፃኽስትⶓ ካላኑላስ ይጉጝ፣ ግብሮ ኬያንትካ ዋያኑውስኪ ያኻ አግልግሎቴ እያኑውሳ ደረሰኞ እያኑላ ይጉጝ፣እምፕልታቕ ጄዋንኩ አክኽካስኪ ያኻ አግፃኑ አግልግሎቲስ ደረሰኞ ካሲጙ ዴስ ዜሬቕቲኒ አኽጝስታ ታክሶ ቤፍፅጝ ሚፄ ኩፕፅጙ ፍታንካ አኽጝታጊ እኒጛ ጉዳይካ ክቼንታ አሚኮ ወክት ቺፋ እንፃኽስቱኽ ዜጌቢስ እምፕልታቑ ካንቲ ኬሽጛማጊ ይንታ። ናካኪላ ያኹኒ ፋይስታውሳ አቾ ታምባያሱ አኽጝስ እኒጛ ጉዳይካዳ አሚኮ ዜጌቤ እንፃኽስታታ አቶ ፈተነ ታክስፅካ።

አሚኮ ፍንሾስኪላ ዝማቺውሳ እንፅኼ ፄጌራውሳ ያኻውላ ኪሴ ያጋውሳስታ ግብሮ ኬይⶓ ካንትኹስ ቱስቲስ ሼውቴ ፌቴራውሳ ዋልቲ አርፋ ቺፋ ያኻውላ  ጊዝ ቺፋ አጌርካውሳ ዴሶስታ ግብሩሳ ትክሞ ግልፅስ ካንትፃውሳ ዜጌቤ እንፃኽስታታ አቶ ፈተነ እንፅኼንቶ ፌይጝፅካ። ግብሮ ኬያንትካኪላ ግብሮ ኬይጙሳ ትክሞ ማሌካማ አጌራው ልግስኒዳ ታምቦ ፊትጛንታ እቑዌ ዲግስካ።

አሚኮ “30 አሜታሱ ይሴንትስ “ ናው እንፅኼንትስ ናሲ 1 ዴስ 30 ጌርክ 2017 ምሬት አሜታሳ ኺስታ ስፓርቱ ልኺትጚስ ፣ 30 አሜታሳ ዴሬታኑላ እንፃኽስቱንኩ አሚኮክ ጝን አቕስ አቕስቴ እይጝስ ፣ አሚኮ ፌይኹ 30 አሜታኻዳ አብርታ እንፃኽስቱንኩ ኾትካስ ምስጋኔ እይጝስ አሚኮው 30ንቲ አሜቱ ቲክሊልፂ ቴርት ካስጛዊያኽ ።