ክልሉ ሊሊቲ አብት

እምፕላ አጌራዉ ሚዲያ አጌራዉ ፖለቲካዊ፣ማቤራዊስታ ኢኮኖሚያዊ ቴግባርካዳ ዝኩዋዉ ፍሺ ኬፍቲኒያኽ::ይቶፒያዋ ኮንኩ ሌጌስጝዳ አግስታንኩ አጌርካስ ፌፄምስታንታ አኽጝስ ካላንኩ አጌራዉካ አላምካዋ አቕፅጝስስታ ክንትፅጝሾስ ዝኩዋዉ ፍሺኪላ ኬፍቲኒ አኽጝ ካሲትጝፃቲዊያኽ::አጌረዊ ሴላም ማንዲስታማ ልማት አሬኻታ ፄዉጝስ እምፕልታቖ ጉሽጝፅጝስስታ ሼዉቴ ፌቴርጝስኪላ ሚዲያዉ ፍሺ እንዙራ እስታቲዊያኽ::

አሚኮኪላ ክልልዳ እንፅኼ ላኹ ናማ ጄሜሩኒዴስ ጉሽፃማ እዝቦ ቴኬምስታንታ ፄዉጝስ እልስታ እንኩዋኺ ያኻማ እንፃኽስትጝስ 30 አሜታሳ ቼፍፃ::ክልልዳ እንዳርማኪ ሚዲያ ዝኩዋዉላ እንፅኺሾ ቱጝስ ክልሉ ልማት አሬኻታ፣ክርፂ ቺፅጝፂዉ ችግርካ ኽይስታንታ፣እዝብ ምንግስትስ ዲግሳኩ ካስካ ዙርሜ አግፃንታ፣ ኮንኪ ሌጌሳታ ባይልስታ ወግ አቕስታታስታ ማቤርአቑ እሴትካ ማንዲሰትካማ እጄንታ ፄዉጝስ እንፃኽስቱስ እጂኹ ቴግባር ዉንስኪላ እዝብስ ቲሪኹ ሚዲያ እስታታ ፄዋዊያኽ::

አሚኮ አባላምቲዳ ቲሪትጙስ ዋኽትጙኽ ቴክኖሎጂስ ያኻዉላ ይጉኒኪላ ሊሊትጙንኩ ሴልካዋ ቴኬምስትጝስ እትሜትስ ቢካታ ፄዉጝስ በኩር ጋዚቲስ እንፅኼ ጄሜርኹ ሚዲያኽ::ጊዝዴስ ጊዞ ክንትኹ አቒዉ አይልስስታ ቴክኖሎጂስ ሌጌሳማጊ ይንቱስ ኩፅኒ ሬዲዮንስስታ ቴሌቪዥንስ ንባርካዋ እዝብስ ታምፅጝስ ካሉኽ ሚዲያ አኽጝስ ካላ::ቻሼማጊ ካሱስ ኩፅኒ እዝብካዋ ፍታዉትስ ቴኬምስታንታ ፄዉጝስ ክልልዳ ዝኩንኩ ኮንክካስ ሬዲዮንዴስ ጄሜራማ ጋዚቲስስታ ቴሌቪዥንስ ንባርካዋ አግፃንታስታ ፋያኑዉስጊ ቴኬምስታንታ ያኻንታ ፄዋማጊ አግሰቴ::አሚኮ ክልሉ ታክስጚዴስ ፌይኹስ  እዝብዳ አጌራዊ እንኮኽስት ዝኩዋታ እንፃኽስታዉ ሚዲያኪላኽ::

አሚኮ እዝቡ ሚዲያ ያኻስኩስ ኩፅኒ እምፕልታቕዉላዳ እን ሚዲያ ይዊያኽ ናዉ እንኮኽስት ዝኩዋማ ቱስቲስ ሚዲያዋ ቴኬምስትጝዳስታ ጎንዳ ቲሪጝዳ ኩፅኒ ዳንጉዊኒ ካንትስቴ:: ዲጋማ ኬርቶ ካንትፅጝዴስ ኪቻ እቺዳ ያኻማ ቲቺጝ ሚንቼ::ዳንጉዊኔ ዋኽትጝፅጝዴስ ኪቻ ሰላሙ ዳንጉዊኒ ጌቴሙስ ቤዴርካማ ዋኽትጙንኩ እንፅኺኩሳ ሜሳርካዋ አቤሌሽጝስታ ጉሻማ ካፅጝስ እንፅኺ ፅንጋኽታታ ፄዉስቱስ ሼዉስቴ::አሚኮ እሚኹ ሜሳሪስ አሌምኩ ሚዲያኩ ኾትካሊጊ ልኺትጝጝስ ካሊፃዉ አኽጝስኪላ ሚዲያዋ ፖለቲካዉ ካንቲዴስ ሊሊትፃማ ካንትጝስ ጎንዳ አኽጝስ ይዉ አብትያኽ ናማ ፋይፃዉሳ ማንዲጜስታ ቲቪቪርጜ ፄዉጝስ አላፍቶ ፊትጝጝ ቱስቴ::ሚዲያዋ ጋቲታ ዋሺኒኪ ልግስ አንትጝስ ካላቲዉ፣ ክርፂ ቺፅጝፂ ሴፌናቲዉስታ ባይልስታ እሴት ማንዲስታቲዉ አኽⶓ እርዳትስታማ ዉላጊ ሚዲያዉ ጎንዳ ቲሪጝ ፋይፄ::ሚዲያዋ ቴኬምስትጙሳ ዴሶኪላ አድርፃማ ዝኩዊኒዳ ኬፍቲኔ ኪሴ ካንትፅጝኪላ ቱስቴ::