ክንቴ ቴግባርሾ ኪሱንኩ

ንግስቴ ተስፋ

አጌራታ እንፅኺው ባይሉ ልግስኒ ጊዝዴስ ጊዞ ኬሽጛማጊ ይንቲኒውላ ፋይስታው አችዳ ኩፅኒ ታምባያ:: ሚንችካ እንፃኽስትጝስ ካላንኩ አጌር አቕ ዝኩኑ አጌርዳ እንፅኼ ፌቴርጙሳ ባይሎ ሌጌፅጝ ትኩትስ እንፃኽስስታው ጉዳያኽ:: አማኻሪ ክልልዳ 2017 ባጄት አሜትዳ እምፕል ትኩሚ 3 ሚሊዮንዴስ ጃላ ያኻንኩ ዎታትካሰ እንፅኺውሳ ድሎ ፌቴርጝስ ካሊⶓ ክልሉ እንፅኺስታ ስልታኒው ቢሩዴስ አግፅኑኽ ንቫር ካንትፄ::

አዊ ብሄረሰቡ ቺፅጝፂታኪላ 70 ሻይዴሰ ጃላ ዎታትካስ እንፅኺው እድል ፌቴርስታማ 82 ታፋ ሊኽዴስ ያኻንኩ ዎታትካ ቲሬንቲስ እንፅኼ አግፅⶓ ንቫር ቶኬሜ::

እንፅኺው ድልስ ቴኬምስቱንኩዴስ ጉዋንጉዊ ወረዳ አቫቪ ኬቤሊው ዝኩዋንታ ዎታታ አያልነሽ ስለሺ እምፕላኽ:: ዎታታ አያልነሽ ሹኻ አሜታዴስ ቤዴራ ወለጋ ዩኒቨርስቲዳ ዳቔርስትⶓ ስልኪስ ዙሜ:: ወክትስ ዩኒቨርስቲዴስ ዳቔርስቲስ እሺኹ ፋይ ጛርቱዳ አኹኪ ምንግስቱዳ አችትዳ ኬፄርስቴታ እንፃኽስትጝስ እንጉስቴሽቴ:: እንጎ ሳኪትጝፅጝስ እምፕሎ አሜቶ እንፅኺ ፋያ እንዜጝቱኒላ ኬፄርስትጝስ ኩፅኒ ካሊያስቲ አኽⶓ ድኹታ:: ክንታማ እንፅኻ ጋቲታ እንጅኩጝ ጝን አቑ፣ ዛኽ ዝሜዱ ናማኪ አጌራው እዳ /ዳንቴና/ አኽጝ ሳቔናዋ አቲሳሺኾ ኒት ዎታታ አያልነሽ ጛሬ ካሊጝስስታ እንፅኼ ጎሌልⶓ ባታታ ዋሺኔኪ እንፅኼ እንፃኽስትጝስ ዎሴንታ:: እንጚ ጉዝማ ኩፅኒ ኬቤሊ ቺፋ ስልታኔ ካፅካማ እንፅኼ ፌቴርጝስ ካሌንኻጊ ሜዜጌብስታን ናውሳ አቕፄ ካንትⶓ ዙሜ:: ቻ ናካ ኔታ ጊዞ ይታውላ ሚዚጊብስቴ ስልታኔ ካፄታ እንፅኼ ፌቴርጝስ ኩርፄና ታኻ::

እንጚስኪላ 250ሻይ ብር ጉሺ ፌኬድስታታ እዌ ዲጊስ እስቲት አያልነሽ እንጚስ ያኻውሳ ኩፅኒ አቲጝስ ዜሬቕ ኔታ 80 ሻያስ እዊ ያኻውሳ አቔ ዲግስጝስ ታይካዋሰታ ፍያልካዋ ቡዚስጙ እንፅኺዳ አሴሜርጝታ:: እን ጉዝማይኪላ ዴስቴና እሽⶓ ዙሚት አያልነሽ ዝኪኹ ዙራሙሪ ኩፅኒ ታይካዋስታ ፍያልካዋ ቡዚሱስ ዳዴኽስትጝስ ካሌ ናው ስጋት ቻኒ ጉሼ አሜሜችጝፅኹሳ ኾቶ ዲብስጝፅጝስ እንፅኺውሳ ዜርፎ ኪስጝስ ጊዲድስቴ::

እንጚስኪላ እንፅኺስታ ስልታኒው ፅ/ጝና ዎታትካውሳ እንፅኺውሳ ፋዬስታ ኩርፄንቶ ግምትዳ ሚፅጝስ እሊው እንፅኺስ ኪስታታ ፍካዶ አግፄታ ናካዳ ሱኮ ብስጝስ ኬሽኹሳ ሚፄ አግፄታጊ አኽⶓ እንክርፄ::

ዋታትኔቱ ግርብስ ጊጝትጝናና እንፃኽስትናውላ ይጉኒኒጊ “ጝን አቑ ዳንቴና አኽናናኽ ይጉናው” ኒት አያልነሽ አንኩዋ አሜታስ እይስትኹሳ ጉሼ ወክትስ ዙርፄታጊ ናካዳ ጛሬ ካሊጝስ ይስታታ እንፃኽስቴት አኽⶓ ድኹታ:: ፍንሾስኪላ ካፒታሎ እሳንጝፅጝስ ናኪኒ ሱክዴስ ኬፍፄታ ኽሳንቴ ቢንጝፄ  ብስጝስ እክዶ እሚⶓ ዲብስታ::

ዋሺኒኪ ቲን ዌና እንፅኻ ፋይካ ዎታትካጊ ጉሼ ጅፊስታኑላ ጉሽትካማ ቱስቲስ እንፃኽስቴካማ ዙርፁኒጊ ብር ብሮ አፌራማጊ ካሳው አኽጝስ ፋያኑሳ አቾ ታምብጝስ ዳድ ብስቲ አኽⶓ ዲብስታ::

ዎታታ አያልነሽ ናካኑላ እንፅኼ ፌቴራማ እንፃኽስትጝ ኩፂ ውላ ይጉኒ ኬሴርፃላ፤ ሳቔናዋ አቲሳላ፤ አንኩሊውሳ ፉሬ አግፅጝስ ሰላማዌ ዝኩዋኔ ዝኩጝስ ካሊስቴ ኒስ ዋታትካስ ጚውሳ ዴሶ ቤንጝፄ::

9ንቲ ቤንዴስ ጄሜራማ ግብርኒው እንፅኺሾ ትኩቶ ፄውኽ እሊው ጉዋንጉዊ ወረዳ ዋይኬላ ኬቤሊው ዝኩዋንቲ ዎታት አበረ የሻለምኪላ እንፅኺስ ጚጛርትጛሳ ኬፍፅጝስ እንፃኽስታማጊ አግስታው ዎታትያኽ:: ዎታት ናውስታጊ ዎታትኔቱሳ ዝቤኖ እንፅኺስ ፌይፁኒውላ ዋይሚስታ አኽጝዳ ኩፅኒ ዳንጉኒ እሺኾ:: ያኼስጉ ናካ ዋልቲ አሜትዴስ ናቴ ኩፅኒ ይንቱኽሳ ድሎ ቱስቲስ ቴኬምስታታ ስልታኔ ካፅጝስ አፄብካሊ አንኩዋ አኽጝስ 150 ሻያ ብሮ ጉሼ ካፅጝስ 60 ታይካዋ ቡዚስጙ እንፅኺዳ አሴሜርጜካማ ዋይሚስታ አኽጝስ ካሊፃውሳ ዳዶ ጄሜርⶓ እንክርፃ:: እምፕላኒስ ጄውንኩ ታይካዴሰ ጉሼ ዙርፅካማ 40 ሻይ ብሮ ካፒታሎ እንኩርጝስ ካሊⶓ ዲብሳ:: ወረዳዴሰኪላ ኬሻንቴ እንፃኽስቱንኩ ዎታትካ እሰትጝስ ጉሼ ወክትስ ዙርፅካማ ናካዳ አንኩዋጊ ዎታትካ ጛሬ ካሌካማ እሳንስ ክምካዋ ቡዚስጙ  ቴግባርዳ አሴሜርጜካማ ክርፂ አችዳ አግስታንኩ አኽⶓ ዎታት አበራ ድኹዋ::

ዎታትካ ካንትካያሱሳ ዲብስጝዴስ፤ እንኩሬካያሱሳ ጉሽጝዴስ፤ ጛጛርትጛሳ ዋሺኒኪ ሱስዴስ ማንዴካማ እንፅኼ ፌቴርጝሾ ዙሩኒጊ ጛጛርትጛዴሰ ፌቴካማ ጝን አቕስ ፊታንኩ አኽⶓ ዎታት አበራ ዲብሳ::

ዎታትካ ዋዚታ ጊዞ ፌይፅጝዴስ፤ ዎንጄሉ ፂዊዳ አግስትጝዴስ ጛጛርትጛሳ ክብስካማ እንፅኼ ፌቴርጝዳ አሴማርጛንታ እቑዌ ዲግሳ:: አሴማርጙኽ እንፅኺስ ዋይሚስታ ያኻማ ጝኖ ግቢትጝስ ካሊⶓ እንክርፁኽ ዎታት አበራ ኬቤሊኩ ዋታትካስጊ ጉሽፃ ዴሳ አቓታ ሚንችካ ዎታትካ ኪስስትጝስ ቢኪጝስ፤ እንጚሰኪላ ዴስቲኒ አኽⶓ ቤንጝፃ::  ፍንሾስኪላ ክምካዋ ቡዚስጙ እንፅኺስ ዋይሚስታ ያኻማ ኬፍ ንኹ አችዳ ታምብጝስ ሼውዴስ አኬድⶓ እንክርፃ:: እንፅኼ ጄማራታ ቢኪፅኹ ወረዳው እንፅኺውስታ ስልታኒው ፅ/ጝናስኪላ ምስጋኔ ዲግሳ::

ጉዋንጉዊ ወረዳው እንፅኺስታ ስልታኒ ፅ/ጝናሱ አላፊ እሱባለው ይሁን ወረዳታ 2017 ባጄት አሜትዳ 6 ሻይዴስ ጃላ እንፅኻ ፋይካዋ ሜዜጌብጝስ አኬድስታማ 7 ሻይዴስ ጀላ ዋታትካ ሜዜጌብስትካማ ዜርፍ ቺፋ ስልታኒ እይስታማ እንፅኺሾ ቱዋንታ ፄውስትⶓ ጌሌፅካ:: እንፅኺውሳ ድሎ ፌቴርጙ ቴግባር ፍታዋስታ ውላዋ አሴቴፍጝፁኽ ያኻታ ትኩትስ እንፃኽስትⶓ እርዳትፅካ:: እንጚስኪላ 49 ታፋ ሊኽዴስ ኹን እንፅኺ ድሉ ቴኬምስታንትካ አኽⶓ ቶኬምካ:: አካል ጉዳቴንስታ ስዴትዴስ ዙሩኑንኩኪላ እንፅኼ ፌቴርካማ እንፃኽስታንታ ፄውጝስ ካሊስታ ንካ::

ወረዳታ 20 ኬቤሊዳጊ ቱስቲስ እንፅኼ ፋያንኩ ዎታትካዋ ጎሌሉኒዴስ ፋሌንጋ እንፅኺ ፌቴርስቱስ ኬቤሊታ አሜቻው ፍትሬቱኪ ያኻ አቓ ግብሪ አብት ዳማይ ዝኮ ናውሳ ጎሌልጝስ ዎታትካዋ እንፅኺሾ ቱዋንታ ፄውⶓ ቴግባር አኮሜችስትⶓ ጌሌፅካ::

እንፅኺ ዜርፉ አይኔታጊ ስልታኔ ካፅካማ ዎታትካ እንፅኺሾ ቱዋንታ ፄውስትⶓኪላ ጉሽካ:: ወረዳታ ትክላሊስ 7 ሻይዴስ ጃላ ዎታትካሰ ጊዙስስታ ቲሬንቲስ እንፅኼ ፌቴርጝስ ካሊⶓ ጌሌፅካ:: ዎታትካ አሴሜርጙኑ እንፅኺው ዜርፍኪላ ግብርኒስ፣ እንሴስካዋ እሩብፅጝስስታ ቡዚስጝስ፣ ዴኑ ልማትስ፣ ትክልቴስታ ኩፓኩፔ ሊሚፅጝስ፣ አግልግሎቴ እይጙ /ሻይ ጝናዳ፣ ምግብ ጝናዳ፣ ጛሬ ክችስጛዳ፣ ሼኬቶ ዋይጝዳ/፣ ኢንዱሰትሪው፣ ማአድኑ ዜርፍዳ ባይላዊስ ወርኮ አሜሬትጝ፣ ፃርኬ ካርⶓ ፍሽጝዳ፣ ግንባቲው ዜርፍዳስታ ምንግስት እንፃኽስታኩ ልማቱ ፕሮጀክቱ እንፅኽካዳጊ አሴሜርጙንኩ አኽⶓ አቕፄካ::

ወረዳታጊ ዎታትካ አሴሜርጙኑ እንፅኺዳ ዋይማስታ ያኻንታ ትኩትስ ዴጌፍናናጊያኽ ኑንኩ ፅ/ጝናሱ አላፊ እሱባለው ጌቤሉሳ ታምትጜ ፌቴርጝ፣ እንፃኽስታኑሳ ብቴ  ቴርስጝ ጉሼ ዎክትስ ካፅጝስ ካላንታስታ እንፃኽስቴካ ፊቴስካማ ጉሼ ዙርፃንታ ትኩትስ ሲፍጜካማጊ አኽⶓ ጌሌፅካ:: ዎታታካ እንፅኺውሳ ድሎ ፌቴርጝስ ካላኑሳ ብቴ ቴርስጝዴስ ፌይኹስ ሹኻ አይኔትስ ጉሼ ብሮ ቴርስጝስ እንፃኽስታንታ ፄውሰታማጊ አኽⶓኪላ ቶኬምካ::

እንፅኺውሳ ድሎ ፌቴርጝስ እንቲታኪ ፌቴርካማ እንፃኽሰቴካማጊ አግስታንኩ ዎታታካዋ ውማይስ ዴጌፍጝስ እሊኩ ሜስሪ ጝንካታጊ እይስትኹ ትኩት ዜሬቕቲኒ ያኹኒውላ ችግሮ ብሄረሰብ ቺፅጝፂስ ዲግስⶓ ኽይትጝፄካ:: ዎታታካ እሳንስ ወክታጊ እንፃኽስትጝስ ካላኑ ጉሺው ብር ዜሬቕቲኒ አኽጝ ዜርፉ ፍታኒ አኽጝታጊ ችግር ኽይሰትምባ ኩፅኒ እምንኹሳ እምናና እንፃኽስትጝ ማንዲስቴ ንካ:: አቶ እሱባለው 2018 ባጄት አሜትዳኪላ ፌይንኩ አሜትካዳ እሺንኩ ዳንጉንካዋ ክችስጝስ ዎታታካዋ ቴኬማውሳ እንፅኼ አኮሜችጝስ ፅ/ጝና እክዶ እሚⶓ ቶኬምካ::