ሰላሙ ችግር ኬሽጛማጊ አንትጝስ ክንትጝ ክንትፅጙ እንፅኺ ካስጛማጊያኽ

ንግስቴ ተስፋ

ሰላሙ ችግር ምክንያታስ ላጛ አሜታሳ ኬውጛማ እጂኹ ክንቲ ጝና ጄሜርስትጝስ ዴስቴንካ አኽⶓ ፋግቲ ለኮማ ወረዳው ክንታንትካስታ ካሜናንትካ ዙሙና::

ሚንችካ ክንታንትካ ክንቲ ጝንካ ክንትፅⶓ ጄሜራናይ ናው ቴስፊስ ማንዳኒስ እሺኑ ጊዝ ታምባማ ሜስኬሩም እንኩዋስ ክልልታ ክንቲ ጄሜርጝ አቕስቱኺያኽ:: ፋግቲ ለኮማ ወረዳ ቋራ እምፕላንቲስ ክቻክቺ አች ክንቲ ጝናሱ 8ንቲ ቤኑ ክንታንታ አገኘሁሽ አለማየሁ እንጚስ ምስክራኽ::

7ንቲ ቤንዳ ክንቲስ ጎቤዛ ክንታንታ እሺቲት አኽⶓ እንክርፂት ክንታንታ ላጛ አሜታስ ክንቴ አግፃኑላ ፌይፅጝ ክንቲዳ ቻኒስቶ ፌቴርⶓ ዙሜካ:: 2018 ክንቲው ዝቤንዳ ኩፅኒ ክንቲ ጄሜርጝስ ዴስቴና አኽⶓ ዲብስታ:: ይታላ እንፃኺታስ ክንትⶓ ፋዩስ ዝኩዊኒው ችግር ምክንያታስ ክንቴ ኬውጝፅጝስ ኮርኮርስታማ ዙሙስ ኹሉ ቺፋ ቹኒቴ ኒት ክንታንታ አንኪላ ካሉኽስ አክምስጊ ፋታውሳ ዋኽትጝፃማጊ ክንቴታ ኩሪፂፅ ናሺኾኽ ኔ:: ያኹኽ ያኻማ ናካኪላ ክንቲ ጄሜርጝ ዴስቴ ፌትሩት አኽⶓዙሜ ሰላሙ አኺኒ እንጚስ ሲፋማ ክንትጝስ ካሉኒጊ ቻ አጌራው ቻቤላንትካ አኽጝስ ካላንኩ አኽⶓ ዲብስታ::

አቡቺሪ ኬቤሊው ዝኩዋንቲ አቶ ሙሉነህ አምባው ኑኑውስታጊ ዲኪቲ ጊዝዳ አንኩዋ ጄርካዋ ክንትፄካማ አቾ ታምፅⶓ ድኹዌካ:: ናኪኒ ወክትስ ኩፅኒ እምፕላ ጄራዋ ክንትፃማ አሌድፅጝስ ሰላሙ ችግር ምክንያታስ ክንቲ ልምታኒ ክንፅፅጝስ ካሌካያስኩ አኽⶓ ዙሜካ::

ዋሺኒኪ ፖለቲካው ካንቲ ዝኩኒ ጄርካዋ ክንቴ ክንትፅጝ ኩፅኒ ውላውሳጊ ቲቪቪርጜ ካሴው አኽጝስ ቹዋ ታብልጊ ታምቦ ፊትጜካማ ላጛ አሜታስ እጄማ ክንቲ ጄሜርጝስ ዴስቴንካ አኽⶓ ድኹዌካ:: ቹዋ ታብል ሰላሞ ኬቤርፅካማ ክንቴ ሲፍፅጝስ ኩርፄንካ አኽⶓኪላ ዲብስካ::

ፋግቲ ለኮማ ወረዳ ክንቲ ፅ/ጝናሱ አላፊ ደሴ ነጋ ወረዳታጊ 2016 ም/አሜታዴስ ጄሜራማ ሰላሙ ችግር ምክንያታስ ወረዳታ ዋኽስዋኾ ክንቲ ኬውጛሺኹ አኽⶓ ጉሽካ:: ወረዳታ 81 ክንቲ ጝንካ ዝኩንኩ አኽⶓ ጌሌፁንኩ አላፊ 2017 ክንቲው ዝቤንዳ ሰላሙ ችግራኻዳኪላ ያኼካማ 18 ምንግስቱ ክንቲ ጝንካስታ አንኩዋ ጛርቱ ክንቲ ጝንካ 7 ሻይ ክንታንትካዋ ክንቴ ክንትፃኒስ እጂንኩ አኽⶓ እርዳትፅካ::

2018 ክንቲው ዝቤንዳ ወረዳታጊ ሰላሞ ኬቤርፅጝስ 81 ክንቲ ጝንካ ክንቴ ጄሜርፃንታ ዳብዜ እንኩርጝስ ላምቡሳ ኺስታ 48 ክንቲ ጝንካ ክንቴ ጄሜራንታ ፄውስትⶓ አላፊ ቶኬምካ:: እኒጛዴስኪላ 15 ሻይዴስ ጃላ ክንታንትካ ሜዜጌብስትካማ ክንቲ ጄሜርስትⶓ አቕፄካ:: እንጚስኪላ ወረዳታጊ ዝኩኽ ሰላሙ ልቕልቕቲስታ እምፕልታቕ ክንቲስ ካንትፁኑ ፋይ ክንቲ እሳንስ ጄሜርስታታ ካሊፅኹ አኽⶓ ጌሌፅካ::

አቶ ደሴ ነጋ ናኑውስታጊ ወረዳዳ  ውላ ክንቲ ጝንካጊ ክንቴ ጄሜራና ናው እክድ እሺⶓስታ ናካኪላ ፄትቲው ችግር ዝኩክ ኬቤልካዳ አግስታንኩ 31 ክንቲ ጝንካ  ክንቴ ጄሜርጝስ ካሌካያስኩ አኽⶓ አቕፄካ:: ፌዩንኩ ላጛ አሜታስ ጋቻው ምክንያቲስ 100 ሚሊዮንዴስ ጃላ ጌሜትስታው ክንቲው ሜሳሪ ዎዴምኹ አኽጝስ ሜሳሬ ዋኽትጝፅጝስ ክልሉ ቢሩስ ፅናቶ ዲግስካማ ዙርሜ ማንዲትጜካማጊ አኽⶓኪላ ቶኬምካ::

ክንትጝ ክንትፅጝ ሰላሙ ዳድስ ካስጛታ ወረዳው እምፕልታቕ ታምብ ፊትጛታኪላ አላፊ እቑዌ ዲግስካ