ድሩፃን

ታደለ አጋጄ

ሜስኬሉ ባል አዊ ብሄረሰቡ ቺፅጝፂዳ ሊሊቲ አኺኒስ ኬቤርስታው ባልያኽ:: እምፕልታቕ ባሎ ውታኺዳ ፌካማ እምፕልትስ ኬቤርፃኑ ባልያኽ::

ሜስኬሉ ባል አይማኖቱስታ ባይሉ እሚ ዝኩኽያኽ:: አይማኖቱ እሚ ድባን /እየሱስ ክርስቶስ ሳንክስታሺኹ ሚስኪሊ ሚንች ዝቤንካስ ፃሚ ስፍሪዳ ዴውስታማ እጂኒዴስ ፋሌንጋ አግስትⶓ ታክስጝስ ኬቤርስቴ:: አይሁድካስ 302 ም/አታዳ ዴውስትኹሳ ሚስኪሌ ንግስት ኢሌኒስ ሚስኪሌ ዴውስትኹ ስፍሪዴስ ግሽፅጝስ ሚስኪሊ አግስትⶓ አይማኖትኩ ታብል ዙማና:: ንግስት ኢሌኒ ሚስኪሊ ዴውሰትኹሳ ስፍሬ ኬርኮስ እስታው ታሪኮ ማሉኽ ሹማጊሊው ትኮሚስ ሚስኪሊ ዴውስትኹሳ ስፍሬ ማሊኒዴስ ፋሌንጋ ዲሚሬ ዴሜርፅጝስ ዲሚሪዳ እታኖ ዴሜክታታ ሌግስ ታንኬናታ ፄውጝስ ዲሚሪው ትሺ ሊጊሲሜ እቺቶ ድባን አምፓሾ ካሱኒዴስ ፋሌንጋ ብቲሾ ዙራማ ትሺ ምልኻትኹሳ ስፍሬ ግሽፄታ ሚስኪሊ ዴውስትኹ ስፍሪዴስ ፋታ ፄውስትⶓ ኦርቶዶክስ ብሽታናው ሊካውንትካ ቼሜትጝፃና::

ንግስት ኢሌኒ ሚስኪሊ ዴውስትኹ ስፍሪዴስ ፍሽጝስ ሜስኬሩም 16 ጌርካስ ግሽፅⶓ ጄሜርታታ ሜጋቢት 10 ጌርክስ ሚስኪሊ አግስትጝ ዙሚስቴ::ሜስኬሉ ዋዚሚዳ ዲሚሪ ዴሜርስታውኪላ እንጚሶ ታክስጝስያኽ::

ባይሉ እሚ ዴሜካ ሊሊትጙንኩ ዙራሙርካዳ ሊሊትጙንኩ ቴርትካስ ኬቤርስቴ:: ሜስኬል ባሉ ዋዚሚታዋ ባላፉቼ ኬውጝስ ዲሚሪዳስታ ሙሲሲኒዳ እንፄውስቴ:: ኬውስትኹሳ ባላፉቼ ጝኑ አብጂሊዳ ቲሪፃና::  ሲዌስታ ባለፉቼ ኬውካማ ዱሩፃ ንጝስ ጝኑ ሙሲሲኒዳኪላ እንፄዋና::

ሜስኬሉ ባል ብሩኽ ዳድስ ኬቤርስታው ዙራሙሪ ክቻዴስ ጉዋንጊ ወረዳ እምፕልያኽ:: ጉዋንጊ ወረዳ አቢቒ ኬቤሊው ዝኩዋንቲ  መረጌታ ልዑል ሀይሉ ሜስኬሉሳ ባሎ ኬቤርፅጝስ ጝንቺፋ ስልኺ ዜኬትስታው አኽⶓ ዙሜካ:: ዲሚሪስ ያኻውሳ ሜብራቶ ቴርስⶓ ጄሜራኑ ሶኼቶ ቤዴርካማ አኽⶓ ቶኬሙንኩ መረጌታ ልኡል ሜስኬል ባሉ ዊዚሚዳ ጄሜርስታማ ስራስሪ ሶኼኖ ሲዌ ያጌካማ ድሩፃ ንካማ ጝኑ ሙሲሲኒዳ እንፄዋና፤ ስራስሪስ ዳሜካ ዝክቲ እይስታው አኽⶓ ቶኬምካ:: ሜስኬሉ ባልዳ  ቢሬ እምፕልትስ ጄዌካማ ባሎ ኬቤርፃንኩ አኽⶓ ዲብስካ:: ባል እምፕልትስ ኬቤርስታው አኽጝታጊ ጌዌስጙንኩሳ ሜስኬል ታምብጝዴስ ቤዴርካማ አጌር ሹማጌልካስ አሬክጛንታ ፄውስታው አኽⶓ ዙሜካ::

ሜስኬል ኬቤርስቱኒዴስ ፋሌንጋ  ዛኽ ዝሜድካ ታምትጛኑ ጊዝ አኽⶓ ቶኬሙንኩ መሪጌታ ልዑል እቑትጜካማ ኹስታውስታ ዝቕስታውሳ ኹዌካማጊ እምፕልትስ ኬቤርፃኑ አኽⶓ ጉሽካ::

“ስራስሪ  ኬውስትኹሳ ባላፉቼ ካፅካማ አዝሜር ክቻዳ ቲሪፃና:: ኹስታውሳስታ ዝቕስታውሳ እሚካማ ሴብልዳ ዋሻና:: ድሩፅስ ካፃኑሳ ስልኼስታ አብዜኪላ ጛጂ ኬሜስጝዴስ ቤዴርካማ አብዚዴስ ልቓ ዱንፅካማ ሴብልዳ እንኩራና :: ስልኺዴስ ዴሜካ ልቓዋ ችምብቕፅካማ ክብፃና” ናኒስ ባሉሳ ኬቤርጝጜ እንክክርፄካ::

ሴብልዳ ዋሼ ዋሻኑ ምክንያቱኪላ ሴብል ታምባው ጊዝ አኽጝስስታ ዎክት ጉድ ያኻያታ እንጉስትጝስያኽ::

መረጌታ ልዑል ዙሙኑውስታጊ እምፕል ዙራሙሪዳ ዝኩዋንኩ እምፕልታቕ ሊሊትጙኽ ቴክልዴስ ዲሚሬ ግቢትጝስ ጝን ቺፋ ዴሜካ ሜሴኬልታዋ እሜኑሳ ሜብራቶ ጄርካው ቼፍስ ቴርስካማ እንፄዋና:: ብቲ ክማኒ ዴሜካ ጉሚቴ ሚፃና:: ጉሚቲ ዴዴጝስ ዴዴጝስ ኬውስታማ ዊዚሚታዋ ሌግዳ ቱዋታ ፄዉስታዉ አኽⶓ  ዙሜካ:: ጝን ጝና ባኔ ባንቶ እንዜጜካማጊ አብዜ ኹዋና:: ስልኼ ዝቓና ኬውስትኹሳ ጉሚቴ ድሩፃ ንካማጊ ሌግዳ ቱዋታ ፄዋና:: ጝን ዌንካኪላ “ሊኻ ሻያ አሜታ ታምፕ” ንጝስ ቻቤላና ::እንታ እስታውኪላ ሊጊሲሜ አሜቶ ታምባንታ እንጉስትጝስያኽ::

ሜስኬልታዋ ጉሪጛስ ውላ እስካዌ ስዮ ሴያና:: ሜስኬልታዋ አይኪ አቒ ሜስኬልስ እስታማ እንኩርስትኹሳ እስካዌ /ፅንኩቶ/ ስዮ ሴዬ::

እስካዊ ስይስ ግዲትካማ እዩሄውሳ ሜብራቶ እሚካማ ዋዚሚታዋ ቴርትኹ ዲሚሪሾ እምፕልትስ እንዜጛንኩ አኽⶓኪላ መረጌታ ልዑል ዲብስኮ:: “እዮሄ እዮሃ!” ንካማጊ ዲሚሪሾ እንዝጜ ፄዋና:: “ዲሚሪዳ ታምባኒስኪላ ዲሚሪዳ ሹኺኒ ዙሩኒዴስ ፋሌንጋ ኽሳንቲ ሹማጊሊስ ድቕር ፄውስታማ ዲሚሪዳ ሜብራቶ ሚፃና” ንካ::

ድሚሬ እምትጝፅካማ ሌግስ ድጙፁኒዴስ ፋሌንጋ ዲሚሪው ናቕትዳ እምፕልትስ ኩፕንካማ እንጅኩዋንኪ አኽⶓ ቶኬምካ:: ጝን ጝናዴስ ዲሚሪስ ቴርትኹሳ አብዜስታ ስልኼ ቡዌካማ ካፃና:: አብዜ ኹዋና፣ ስልኼስታ አሪኬ ዝቓና:: ኩሉ ዙራሙሪዳ ዳሜካ ሹምቢኪላ ጌሽስታማ ኩስታው አኽⶓ መረጌታ ልዑል  ዙሜካ::

ሜስኬልታዋ እምፕልትስ ያኼካማ  ክሜ ቺፊጝስ እምፕልትስ ያኼካማ ሜጌብስታና:: ቴርት አሌድስቱኒዴስ ፋሌንጋኪላ ድቕር አኮሜችስታማ::  ስሌቶኪላ ሳሊስታና:: “ናካ አሜታ ክሚሊ አቒሊ ዴክስ ታምኑኒጊ” ንካማ አክም ፌኬዳውሳ ስሌቶ ሳሊስታና ንካ::

ሜስኬሉ ባል ሜስኬልታዋ ይቪቺ ኬቤርስታማ አሌድታው ጋቲዊ አኽⶓ ዙሙንኩ መረጌታ ልዑል ሜስኬል እሺኒዴስ ፋሌንጋ ላጛ ሶኼታሳ ኺስታ ዛኽ ዝሜድካ ታምትጛኑስታ እቑትጛኑ ጊዝያኽ:: እቑስቱንኩኪላ አሪኬ እሚካማ ካሳና:: እቑስቱኑ ጝንዳ ቺፊንቲ ፄውስታማ ኹስቴ:: ስልኺስታ አሪኪ ዝቕስቴ:: እቑስቲዳ ካሱንኩኪላ ቼካማ ካሳንኩ አኽⶓ ድኹዌካ::

አሜት ቺፋ ሜስኬሩም 17 ጌርካስ ኬቤርስታው ሜስኬሉ ባል ይቶፒያዳ ብሩኽ ቴርትስ ኬቤርስታዊያኽ:: ሜስኬሉ ባል ዴሴስታቲው ማኺቲ ያኻማ ዩኒስኮዳ ሜዜጌብስታስኩኽ አኽጝስ ሊሊትጙንኩ ዙራሙርካዳ ቱሪስትካ ይንቴካማ ጐቤናና::

ጉዋንጊ ወረዳ አምቢቒ ኬቤሊው ዝኩዋንታ ዊዛሩ ታሪክ ብርሃን ሜስኬሉ ባል ታምብጝዴስ ቤዴራ ኹስታውሳስታ ዝቕስታውሳ ቴርስጝስ ቤዴራ ቴርቴ ፄዌካማጊ አኽⶓ ዙሜካ::

ሜስኬሉ ባል ጛው ዙራሙሪዳ ብሩኹስ ኬቤርፃኑ ባል አኽⶓ ቶኬምካማ ሜስኬሉ ባል ታምባኒ ኹን ጃኖ ሴይካማ፣ ዲሬ፣ እርባኖስታ ባይሉሳ ስዮ ሴይካማ ኬቤርፃኑ ባል አኽⶓ ዙሜካ::

ስራስሪ ጋሜ ፍሽስትካ ኩንቾ ግቢስትካማ ባሎ ሊሊቲ አኺኒ ኬቤርፃኑ አኽⶓ ቶኬምካማ ባይል ድሳቲታ ፄውጝስ ሊሊቲ አኺኒስ ኬቤርስታው ባል አኽⶓ ጉሽካ::

ሜስኬል ባል ኬቤርስቱኒዴስ ፋሌንጋ “እቑስቲ” እስታው ዛኽ ዝሜድካ እምፕልትስ ታምትጜካማ ኬቤርፃንኩ አኽⶓ ዙሜካ::

ኹናኹን  ጉዝጉዞ ቴርሴካማ ዲሚሪዳ ካፃና:: ዲሚሪዉ ስፍሪዳኪላ ኹስታውሳስታ ዝቕስታውሳ ኹዌካማጊ እምፕልትስ ኬቤርፃኑ አኽⶓ ቶኬምካ:: ባይል ድሳቲታ ውላጊ ታምቦ ፊትጝጝ ቱስታው አኽⶓ ጉሽካ:: ባል ታምብጝዴስ ቤዴራኪላ አጌር ሹማጌልካ ጌውስጙንኩሳ አሬኬጝፅጝስ ውላጊ እምፕልትስ ኬቤርፃኑ አኽⶓ ጉሽካ::