ዴክ ጌማውሳ ጌርኮ ልሻንኩ

ንግስቴ ተስፋ

ይቶፒያው አቕቱ ሜብቱ ኮሚሽን ፌኔኬልጛንትካውሳ ዝኩዊኔ ካንትኹስ ፍሽኹ ሹኻንቲ ዙሪ ሪፖርትዳ 56 ታፋ ሊኽዴስ ያኻንኩ አጌር አቕ እምፕል አሜትስ፣ 23 ታፋ ሊኽዴስ 4 አሜታስ እንቲታኪ 11 ታፋሊኽዴስ 5 አሜታዴስ ጃላ ካሜንካማ አጌሉኑ ባድሚዴስ ፌኔኬልጜካማ አግስታንኩያኽ:: ሊሊትጙኽ አጌራው ቤንዳ ኬሴትስትኹ አይቶ ጉሽፃ ፄውኽ ፅካት፣ ምንግስቱስታ ዶንጌቱንኩ ኬችካው ክችዳ ፄውስታው ጋቻ እንቲታኪ ድንቤሩ ካሲ ምክንያታስ ፌቴርስታው ጋቻ 68 ታፋ ሊኽዴስ ያኻንኩ አጌር አቖ  ፌኔኬልጝፃንኩ ቹዋ ምክንያትካ አኽጝኪላ ቶኬምስታ::

አማኻሪ ክልልዳኪላ ጋቻው ምክንያቲስ ሚንችካ እሌቱሳ እርዳቴ ፋያንትካ ወጌንካ ዝኩⶓ አማኻሪ ክልል አዲጌ ካላካልጚስታ ምግብ ዋስትኒው ፕሮግራሙ ቴቤቤርጝፃንቲ ኮሚሽንዴስ አግፅንኹ ንቫር ካንትፄ:: አዊ ብሄረሰቡ ቺፅጝፂ አዩ ጉዋጉሲ ወረዳዳኪላ እንጚሱ ምክንያቲስ ፌኔኬልጙንኩ አምቢሊ ኬቤሊዳ እሌቱሳ እርዳቴ ፋያንትካ ወጌንካ ዝኩና:: እኒ ወጌንካዋ ዊዳፊስ ባድሚሾ ዙርፃማ ቲሪትጝፅጝስ 2016 ባጀት አሜትዳ ጉሽፃማ እንፅኺ ጄሜርስትጝ ታክስስታዊያኽ::

አሬሳ አሜሬታማ፣ ጊፅሳ ፊቲሳማ፣ ክንቲስ ኬፍናማ ጚጛርትጛሳ ምግብስ ጛሬ ካሊጝዴስ ፊታማ ጌቤል ሴሜትምባ ሴብሎ ጌቤልስ ዲግሳሺኹ አምቢሊው እዝብ አርቴን ናንቴስታ እሌቱሳ እርዳቴ እያንቴ ፋያንታ ፄውኽ ላጛሴንካው ጋቻ ኽይስታማ ሰላሙ ጊዝ ይንታይኒ ናው ትምኔትስ ጊዞ ፌይፃንታኪላ ፄዋ::

ጌፄሩ ኬቤሊው ኬቴምዳ ስልኼስታ አሪኬ ወይጝስ ሹኻ ጄርካዋ ሌጌፃንኩ አምቢሊ ኬቤሊው ቹትካዴስ ፌኔኬልጝጝስ ካሜንስቱኑ ይወትስ ካንትካ ያቔያሱሳ ቺጊርፄ ወክቶ ፌይፅካማጊ አግስቱንኩ ወጌንካዴስ እምፕላ ዊዛሩ እንዳሉሽ ቢሪስዊያኽ:: ዊዛሩ እንዳሉሽ ናኑውስታጊ 2016 ም/አሜታዳ እሺኹ ሰላሙ ችግር ጉንኪኒታ ጌፌፍስታማ ናኪኔ ወክቶ ካንትጝ ሼውሳ ፉሬ እይኹ ያኹኒኪላ እሌቱ ኬሌብስታ ስይ ሌግስ ድጙስትኹስታ ዜሬፍስታማ ናካዳ ታፎ ናኼስቴካማ ዝኩዊኒው ችግራኻዳ አግስታንኩ አኽⶓ ሰላሙ ወክትዳ እንፃኽስቴካማ አግፃኑ ሚፂስ ኬሻንቴ ዝኩዊኔ እሺንኩ ዊ/ሩ እንዳሉሽ ሰላሞ አቲጝ ኩፅኒ ስራስሪስስታ ቹትካስ አክምዴስ ጃላ ፍታና ያኻማ እርዳቴ ማንዲናታ ፄውⶓ ጉሽካ:: ወክትስ ባድሚሾ ዙራኒስ እሌትስ ፋይፃው ጉዳይጊ እሌትስ እይስቱኒውላ ዊዳፊስ ቲሪትጝጝስ ኩፅኒ ናካኪላ እርዳቴ ማንዲትጜካማጊ አኽⶓ ዙሜካ:: አምቢሊ ጚጛርትጛዴስ ፊቲሳማ ጌቤልስ ያኻውሳ ዲግሳው እዝብ አግስታው ኬቤሊ ያኹኒውላ ቲኾስ ካንትካያሱ ጋቻ እርዳቴ ፋያንትካ ያኻንታ ችግርሾ ሚፅⶓ ቶኬምካ::

ቹዋ አኪምስቴው  ካሜንታውስታ ወክትስ ስራስሬ ኪቲብፄው ቲኑ ኾት ዎዴምጝስ ችግር ኹንዳ ታምፅኹ ቤዴል ኬፍቲኒ አኽⶓ ዊ/ሩ እንዳሉሽ ቶኬምካ:: ባድሚሾ ዙራንታ አኮሜችስትኹ ቴግባርስ ናካዳ ዝኩኽ ሰላሙ አኺኒስስ ምስጋኔ ዲግሳንኩ ዊ/ሩ እንዳሉሽ እርዳቲዴስ ፋንታ ካብስ ሰላሙ ችግር ፌቴርስታቲታ ኩፅኒ ውላጊ ቲቪቪርጜ ፋይፃው አኽⶓ ታክስፅካ:: “እርዳቲዴስ ፌካማ ጛሬ ካላንታኪላ ጉሼ ብሮ አሜሜችጝፅጝዴስ ጉሽፃማ እሌቱሳ ኬለቦ እርዳትጝስ ትኩታኩ ቤንካ እንፃኽስቱኒጊ ችግርዴስ ፍናው ጊዝ ዴዴጚያኽ” ንካ::

እንፃኽስቴካማ አብትስ ሌጌስⶓ፣ አጌራዋ ቻቤላውሳ ክምንቶ ካሜናማ ክንትፅⶓ አጌራው ልማትዳ ፍንዳ ፊⶓ ኹሉ ቺፋሱ ቴግባር ፄዋማ ዝኩኽ  አምቢሊው እዝብ ባድሚዴስ ፌኔኬልጝጝ ይው ዝቤንዳ ያኻማ ካንትጝ አዜንፃው ታሪክያኽ ናኒስ 2016 ምሬት አሜታዳ እሺኹሳ ቺጊርፄ ጊዞ ታክሳንኩ ዴሜካ ኪሲ ተክሌ አበበኽ:: ጛ ናኑውስታጊ “ 2016 ም/አ ቺጊርፂ ዝቤን ፌያማ ናካካ ካንትጝስ ዴስቴንካ ያኹኒኪላ ውላ ፃንኹ ንብሬትጊ ዋኽስዋኾ ዎዴምኹስታ ዜሬፍስትኹ አኽጝታጊ ናካኪላ አሌቱሳ እርዳቴ ፋናናጊያኽ” ንካ::

እርሼ አሬሳማ ሴብሎ አሜሬትጝስ 2017 ም/አሜ ጄሜርስትኹ ቴግባር ዝኩኒውላ ዋኽስ ዋኾ ቲሪትጝጝስ ኩፅኒ ትኩታኩ ቤንካ ጉሼኪ ያኻ እርዳቴ እይኒ ጛሬ ካላኑሳ ዳዶ ሲፍጝስ ይስካማ እንፃኽስታንኩ አኽⶓ ኪሲ ተክሌ ዙሜካ:: ፌኔኬልጜካማ ዛኽዝሜድሊ ናቒካማ ፌይፁኑሳ ቺጊርፄ ጊዞ ታክስጝስ ፋያቲንኩ አኽⶓ ዲብሱንኩ ኪሲ ተክሌ ጝን ሌግስ ድጙስቱክስኪ ያኻ አብት ዜሬፍስቱክስ እንፃኽስትጝስ ካላኑሳ ጉሼ ጌንዜብኪ ያኻ እርዳቲ እይስቱኒ ቴስፊስ ቻስ እንፃኽስትጝስ ፋያንኩ አኽⶓ ታክስፅካ:: ጋያኪ ናካዳ ዜሩኑ ሴብል ሰላምስ ኩፕ ናታ፣ ሴብል ታምብባ ኺስታ ዴሜካ 2016 ምርቱ ዝቤንዳ አሜሬቱኑ ሴብል እላቲኩ አኽጝስ እርዳቲ ዲጋያታ ካሴ ዲግስካ::

አዩ ጉዋጉሲ ወረዳታጊ ፌዩንኩ አሜትካዳ ወረዳዳ አግስታንኩ ኬቤልካዴስ አምቢሊ፣ ኩፓር፣ እሁዲት፣ ኢናቫሪስታ አምቢሪ ኬቤልካዳ ሰላሙ ችግር ፌቴርስትጝ እምፕልታቖ እርዳቴ ፋያንትካ ያኻንታ ጌዴድፅⶓ ወረዳው ቹዋ ቺፅጝፃንቲ ገበየሁ በሪሁን ጌሌፅካ:: እንፃኽስታማ ኪስስትⶓ ፋያው ወረዳው እዝብ ችግሩ ምክንያቲስ እርዳቴ ማንዳንታ ፄውⶓ ጉሽካ:: 48 ሻይዴስ ጃላ ያኻንኩ ፌኔኬልጛንትካ ባድሚሾ ዙራንታ 2016 ም/አሜታዳ እንፃኽስስቱንኩ አቶ ገበየሁ አብትስ ቲሪትጝፅጝዳ ኩፅኒ ይሳማ እንፃኽስትጝ ፋይፃ አኽⶓ ቶኬምካ:: እንጚስኪላ ወክትስ ጉሺስ ኽብፂውሳ ማዳባሬስታ ጉላሌ ዜሮ ዲግስጙ ቴግባርኪላ ኬሽኹ ፊፂምጚ እሺኹ አኽⶓ እርዳትፅካ::

ፌኔኬልጛንትካዋ ቲሪትጝፅጝስ አመራሩኪ ያኻ ውማይቴንካው ድጋፍ ይስጛማ ሲፉታ አኽⶓ ጉሹንኩ ወረዳው ቹዋ ቺፅጝፃንቲ እንጚስኪላ ዙራሙሪው ሰላም ኬቤርስታማ እንፅኺሾ ቱዋንታ ፄውስትⶓ ቶኬምካ:: ፌይኹ አሜትዳ እርሼ አሬሴካማ አሜሬታኑላ ይጉንኩ እሌቱሳ እርዳቴ ፋያንኩ ወጌንካስ 5000 ሻይ ኩንታልዴስ ጃላ ሹምቤስታ ባኩኔ ቴግባሮ እንፃኽስታንኩ እምፕልታቕዴስ 450 ኩንታልዴስ ጃላ ሴብሎ እርዳቴ እይⶓ እርዳትፅካ::

ወረዳዳ ናኪኒ ወክትዳ ፌኔኬልጜካማ ባድሚሾ ዙርካያስኩ 10 ሻይዴስ ጃላ አጌር አቕ ዝኩⶓ ጉሽካ:: እንጚሳ ችግሮ ኽይጝስ ኩፅኒ ሰላሞ ኬቤርፃንቲ አይልሊ ይስካማ እንፃኽስቴካማጊ አኽⶓ ቼሜትጝፄካ:: ፍንሾስኪላ ትኩት እይስታው ሰላሞ ኬቤርፅጝስ፣ ፌኔኬልጛንትካዋ አብትስ ቲሪትጝፅጝ እንቲታኪ ችግርዴስ ፍሽጝስ ወረዳ ዋኒዴስኪ ጃላ እንፃኽስታው አኽⶓ አቶ ገበየሁ ኽይትጝፄካ:: እንጚሱ እንፅኺዳ ኩፅኒ ብሄረሰቡ እዝብ ወሌን ወረዳኩ አመራርካስታ ታምብዌን አካልካጊ ወረዳው ኬምፕዳ ያኼካማ እርዳቴ ይስጝፃንታ እቑዌ ዲግስካ::

አዊ ብሄ/ቺፅጝፂ አዲጌ ካላካልጚስታ ምግብ ዋስትኒ እቑስታንቲ ፅ/ጝናሱ አላፋ ስርካለም አያሌው ጛሾስ ብሄረሰብ ቺፅጝፂታጊ 79 ሻይዴስ ጃላ አጌር አቕ ባድሚዴስ ፌኔኬልጛሺንኩ አኽⶓ ቶኬምካማ እኒጛዴስ 67 ሻይዴስ ጃላ አጌር አቖ ባድሚሾ ዙርፃማ ቲሪትጝፅጙ ቴግባር አኮሜችስትⶓ ጌሌፅካ:: ዚጋሚስታ አዩ ጉዋጉሲ ወረዳዳ ፌቴርስትኹ ጋቻ አቒው ይወትዳስታ ንብሬትዳ ጉዳቶ ታምፃማ 25 ሻይዴስ ጃላ ጝን ሌግስ ድጙስትⶓ እርዳትፅካ::

2ሻይ ጝኖ ግቢትጝስ ካሊስቱኒውላ ዋኽስዋኾ ችግሮ ኽይጝስ ኩፂኒ ውላውሳጊ ቲቢቢርጜ ካሴው አኽⶓ ዊ/ሩ ሰርካለም ታክስፅካ::

እንፃኽስቴካማ ጛጛርትጛሳ ኪስጝስ ካላንኩስ 6ሊኻ ፌኔኬልጛንትካስ 15 ሻይ ብርዴስ ጄሜራማ ጉሼ እይጙ ቴግባርኪላ አኮሜችስትⶓ ቶኬምካ::

ብሄረሰቡ ቺፅጝፂው እዝብኪ ያኻ ቴቬቬርጛንትካ አካልካ ፄዋኑሳ እርዳቴ አሜስጌኑንኩ ዊ/ሩ ስርካለም ናካኪላ ያኹኒ ፌኔኬልጛንትካ ላጛ አሜታስ  ችግርስ ፂኪስትካማ ፌይፁንኩ አኽጝታጊ ዋሺኔኪ እርዳቴ እይጝዳ ቴቬቬርጛንታ እቑዌ ዲግስካ::