ኡስማን ዴምቤሌው ኽሳንት

ደመላሽ መለሰ

28 አሚቲ ፒኤስጂው እንክራንቲ ኡስማን ዴምቤሌ 2025 ባሎንዶሩ ዊፃንታ አኽጝስ ዎርኩሳ ኩታዋ ጛርቱ ፄዉኻ።

ዴምቤሌ ካሜንስትኹ 1997 ፈረንጅካው ዝቤኑ ቼፍታ ሰሜን ምራብ ፈረንሳይ ኖርማንዲ ክም ኢብሪው ኬቴምዳ አግስቴት ላማዴሊን ሙሪዳኽ ።

እንክራንቲውሳ ታሪኮ ፍሽኹ ዘ አትሌቲክሱ ዜጌቢታ ዴምቤሌ ዴቢድ ቤካም፣ሊዮኔል ሜሲ ስታ ስቴበን ጄራርዶ ፄጌርጛንኩ ልኩ ኩታኩሳ ትቬቬንካዋ ሲፋማ ሌጌስጞ አቕፄካ።

እንክራንቲ 7 አሚቲ ዝኩዋማ ኤ ኤል ኤም ኢብሪው እስታው ሌጌሳ ታምብካው ኬችሊ አሌቔትጛ።አንጚ ጉዝማ ካንትፅኹ ካሌቕትስ ሚንችካ ዴኔክፅጝዴስ ፌይኹስ ሴሌቴንፃንቲስ ጋሺስቱንኩ እንክራትካዴስ እምፕል አኽጝ አቕስታ።ኽሳንትካ ኬችካሊ አሴቴፍጝስ ሚንቾ ጊዞ ዊዳያሱ ዴምቤሌ 12 አሚቲ ዝኮስኩስ ሬን ኬችስ ጎሌልስትጝስ አካዳሜ አሴቴፍጙኻ።18 አሜታስኪላ ቹዋ ኬችሾ አሌቔትጙኻ።

እሺኹዳ ቲሬያሱ እንክራንቲ ፈረንሳዩ ኬች ሊግ እምፕልዴስ ቡንደስሊጋሾ ካስጝስ ቦሩሽያ ዶርትመንዶ አሌቔትጙኻ።እምፕል አሜቱ እጂጚዴስ ፋሌንጋኪላ ባርሴሎናሾ ዜዌዌርጛ።

105 ሚሊዮን ዮሮስ ባርሴሎና አሌቔትጙኒዴስ ፋሌንጋ አንጚ ጉዝማ ኔይማር ጁኒየርዴስ ሲፋማ ኬሽኹ ኬይስታንቲ እሺኾ።

እንክራንቲ ባርሴሎናው እጂጚዳ ኬፍ ንኹ ጉዳት ታምብጝስ 780 ጌርክካ እንክሪዴስ ሴጋ እጂጝዴስ ድምክና ዲስፕሊኑ ምክንያታስ ኪፂስታሺኹ አኽጞ ቢቢሲ ስፖርቱ ፃፊ ጉሌም ባሌግ ንባሮ ፍሻ።

ዴምቤሌ ፈረንሳዮ ኬች ፒኤስጂሾ አሌቔትጙኒዴስ ፋሌንጋ ኬች ሻምፕዮን ሊጉሳ ዋንቼ ጉሻታ ፄውንኩ እንክራትካዴስ እምፕሌኽ።

ፌይኹ ልኺትጚው ጊዝዳ 54 እንክሬ ፄውጝስ 33 ጎሎ ቼፍፃማ 15 ጎልስ ያኻንኩሳ ኩትካዋ ኬችኩ እንክራትካስ አሜሜችጝፃማ እይጝስ ካላ።እንሳ ሲፋማ 2025 ባሎንዶሩሳ ሽልማቴ ዊፅጝስ ካላ።