አለሚቱ የኔት
አዊ ብሄረሰብ ቺፅጝፂ ኩስጚ ጝናሱ አባልካ ሰላሙ ዙሪዳ ትኩቶ እያማ እንፃኽስትጝስ ክንቲው እንፅኺ ኬሻንቲ አኺኒስ ካስጛታ ፄውጝ ቱስታው አኽⶓ ዙሙና::
ዋሺኒኪ አጌራውካ ጉዳይካዋ ዋይሚስታ ያኹኽ ዳድስ ካስጝፅጝስ ሰላሞ ቤዴራው እላቲው ጉዳያኽ::ክልልታ ጌቴሙኽ ሰላሙ ዳንጉዊኒስኪላ አባላምቲዳ ጉዲስትኹ ዜርፍ ክንቲ እሺኾ::ኩስጚ ጝናሱ አባላ ዊዛሩ አስናከች ዘላለም ኑኑውስታጊ ዋሺኔኪ እንፅኼ አኮሜችጝስ ሰላሙ ጉዳይዳ ትኩትስ እንፃኽስትናኒያኽ::ጄርኪኪላ ፋያኑሳ ክንቴ ሼውታ ቱዌካ ፌካማ ክንትጝስ ካላንታ ሰላሙ ጉዳይዳ ውላጊ ትኩቶ እይጝስ እንፃኽስትጝ ፋይፃንቲ አኽⶓ ዊዛሮ አስናከች ዲብስካ::
አቶ ደሴ ምናየሁ እሊው ኩስጚ ጝናሱ አባልኪላ ብሄረሰሱ ቺፅጝፂታጊ ሰላም ዙራያስኩ ወረድካስታ ኬቤልካ ዝኩንኩ አኽጝስ አኒ ዙራሙርካውሳ ሰላም ዙርፅጝስ እምፕልታቕ ሼውታ ልቕልቔካማ ፋይፃንቴ ቴግባሮጊ ካስጝፅጝስ ካላንታ እንፃኽስትጝ ውላውጊ ታምብ አኽⶓ ጉሽካ::ዙራሙሪ ሰላማ ያኻውላ ይጉጝስ ክንቲ እይስታቲኩ ዝኩጝስ ክንቴካያስኩ ጄርካ ዴሜካ አጌራዳ ቼካማጊ ፅንጋኻ አኽጝ ይጉዋቲው አኽⶓ ማላማ ሰላም ማንዲስታማ ጄርኪ ቱስቲስ ክንታንታ ፄውጝዳኪላ እንፃኽስትጝ ፋይፃንቲ አኽⶓ ዙሜካ::
እሊው ኩስጚ ጝናሱ አባል አቶ አለሙ ገበየሁ ኪላ ሰላሙ ጉዳይስ ትኩቶ እይጝ ቹዋ ጉዳይ ያኻስኩስ ሰላሞ አቲⶓ ምክንያታ ፄውጝስ ሰላም ዝኩክ ዙራሙርካዳኪላ ክንቴ ቱስቲስ ክንትፃቲንኩ ክንትፃንትካኪላ ዝኩንኩ አኽጝ ትኩቶ እያማ ሲፋሲፍጜ ፄውጝ ፋይፃው አኽⶓ ቶኬምካ::ክንታንትካ ቤና ቱዌካማ ክንትⶓ፣ ክንትፃንትካ ቱስቲስ ክንትፅⶓጊ ቹዋ ታብልኪላ ቱስቲስ ክንትጝ ክንትፅጙሳ ቴርቶ ሲፋሲፍጝጝስ ኬሻንቴ ሼውቴ እሚጝስ ቤንዴስ ቤንሾ ፌያንኩ ክንታንትካዋ አፌርጝ ቱስታው አኽⶓኪላ አቶ አለሙ ታክስፅካ::
አዊ ብሄረሰብ ቺፅጝፂው ክንቲ ሜምሪው አላፊ አቶ ደስታው አለሙ ጛሾስ 2017 ም/አ ክንቲው ዝቤንዳ ክንቲው ዜርፍዳ ሚንቾ እንፅኼ እንፃኽስትⶓ ጌሌፅካ::ላጛ አሜታዴስ ቤዴራማ ጄሜርኹ ፄትቲው ዳንጉዊኒኪላ ክንቲው ዜርፍዳ ቻኒስቶ ፌቴራማጊ አኽⶓ ጉሽካማ ሚንችካ ክንታንትካኪላ ክንቲዴስ ሴጋ አኽⶓ ቶኬምካ::ልምትካማ እጂንኩ 104 ክንቲ ጝንካዋኪላ ፄውስትኹ ፅሬትስ ብስስትካማ ክንቴ ጄሜራንታ ፄውጝስ ካሊⶓ አቶ ደስታው 63 ሻይዴስ ጃላ ክንታንትካዋ 2017 ም/አ ክንቲው ዝቤንስ ክንታኒስ ሳኑስታንታ ፄውስትኹ ክንቲው ዜርፍስ እይስትኹ ትኩትስ አኽⶓ ጌሌፅካ::ይሳማ እንፃኽስትጝስስታ ልቓስኪላ ሰላም ዙራታ ፄውጙ እንፅኺስ ክንቲው ቴግባር እንግራ ኬፄላታ ፄውጙ እንፅኺ እንፃኽስስትጝስ ችግምስታማ እንጅኩስታስኩኒ እንጊ ኪሲ አንትጝ ይጉዋማ ብስስቱንኩ ክንቲ ጝንካኪላ ዙርካማ ልምትጙ ድል ጌቴማኩ እሺⶓ አቶ ደስታው ቼሜትጝፄካ::
2018 ም/አ ክንቲው ዝቤንስኪላ ብሄረሰቡ ቺፅጝፂዳ አግስታንኩ ውላ ክንቲ ጝንካዋ ብስፅጝስ እክድ እምስትⶓ ጉሽካማ 658 ያኻንኩ ክንቲ ጝንካዴስ ላንቡሳኺስታ 425 ያኻንኩ ክንቲ ጝንካ ብስስትካማ ክንትጝ ክንትፅጙ ቴርት ካስጛማጊ አኽⶓ አቶ ደስታው እርዳትፅካ::239ዴስ ጃላ ያኻንኩ ክንቲ ጝንካ ኩፅኒ ናካኪላ እንፅኼ ጄሜርካያስኩስታ ዙራሙሪው ሰላም ማንዲስታያታ ፋያንኩ ዝኩንኩ አኽጝስ ጝሺኪላ ትኩቶ እይጝስ ውላ ካንታው ቤንጊ ኩስጜ እይጝስ ክንቲው ቴርት ካስጛታ ፄውⶓ ካሴው አኽⶓኪላ አቶ ደስታው ታክስፅካ::