ቱሪዝሙ ዜርፍዳ ሰላሙ ዳንጉዊኒ ፅንጋኻ አኽጝ ጌሌፅስቱኻ

ንግስቴ ተስፋ

ቱሪዝሙ ታምብፅካ ስፍርካዋ አቕትጝፅጝስ ክልልታ ፌቴርስትኹ ሰላሙ ችግር ፅንጋኻ አኽⶓ አዊ ብሄረሰቡ ቺፅጝፂ ባይልስታ ቱሪዝሙ ሜምሪ ጌሌፅኾ::

ቱሪዝሙ ዜርፍዳ አሴሜርጙንኩ ውማይቴንካኪላ አግፃኑ ኢኮኖሚዳ ቻኒስቶ ፌቴርⶓ ዚንጊኒ አይኩ ጎቤንፃንትካ ዲብስካ::

ቱሪዝሙ ኢንዱስትሪው ዜርፍ ሚንችካ አጌር አቕ ኢኮኖሚው አግፅፂ ዜርፍያኽ::አዊ ብሄረሰቡ ቺፅጝፂዳ ዜርፍስ ኢኮኖሚው አላ አኽጝስ ካላንኩ ሚንችካ ፍትሬትኩ፣ አቓ ግብርካስታ ባይላውካ እንቲታኪ ታሪካውካ ቱሪስትስ ጎቤንስታንኩ ዙራሙርካ አግስታኑ ያኼስጉ ላጛ አሜታዴስ ናቴ ኬሴትስትኹ ሰላሞ አቲጙ ችግር ኩፅኒ ቻኒስቶ ፌቴርⶓ ንቫርካ ካንትፃና::

ወታት አይማኖት ፈንታሁን ባንጂ ወረዳ አካይቲ ኬቤሊዳ አግስታው ዚንጊኒ አይክዳ ዎታትካሊ አችትጝጚስ ጎቤንፅጙ እንፅኺዳ አሴሜርጜካማ ጛጛርትጛዴስ ፌይካማ ጝን አቖ ቺፅጝፃኒስ እጂካ::ዙራሙሪዳ ፌቴርስትኹ ፄትቲው ችግርስ ናካዳ እንፅኼ ኬውጝፅጝስ ጌዴድስትካ::

እንፅኼ ኬውጝፅጝስኪላ ታምብኹሳ ችግሮ ዎታት አይማኖት ዙሙስ “ናካዳ ፍሽናና እንፃኽስትናሽኑኽሳ ይጉዋማ አካይቲው ናማኪ እንጃቪሪ ኬቴሙ እዝብስ እሌቱ ጌንዜባ አግፅፃ ያኻማ ኬሻንቴ ዝኩዊኔ ዝኩጝስ እንፅኼ ፌቴርናና እንፃኽስትጝስ ዴስቴንካ እሽኑኻ::ጋቻ ፌቴርስቱኒዴስ ጉሽፃማ ኩፅኒ እሌቱሳ ኬሌቦውላ ቼግርስትናታ ፄዋ” ኑስ ዎሬም ዝኩዊኒዳ ፌቴርኹሳ ቻኒስቶ ድኹዋ::

“ሰላም ዝኩዋስኩሰ ጌርክ ቺፋ ዚንጊኔ ጎቤንጛ እንፁኒ 70 አቒዴስ ጃላ ሌንጌድካ አግስታሺና” ንኹ ዎታት አይማኖት ናኪኒ ወክትዳ ኩፅኒ ዋሺኒኪ ልቕልቕቲ እላቲው፤ እሺንኩ ካዌንኩ እንሴስካውላ ትይቱሳ ድምፆ እንኩዋኻኒ ሴደድስትካማጊ አኽⶓ ዙማ::

ሰላሙ ችግር ኽይስታታኪላ ምንግስትስታ ዶንጌቱንኩ አይልካ ሌዋ ፃንጌኻ ታምባውሳ እዝቡሳ ቤዴሎ አሬኬዝካ ሼውንካ ካንትካማ ኽቴናቴ ዎሬምስ ሴብትጚስ ያኻውላ ዙሚትጚስ ችግሮ ኽይካማ ዋሺኒኪ አቒ አሴሜርጙኽ ዜርፍዳ እንፃኽስታማ ሌጌስጝስ ካላውሳ ሰላም ኬቤርስትኹሳ ዎክቶ አግጝ ቱስታው አኽⶓ ዎታት አይማኖት ፈንታሁን ካሴ ዲግሳ::

ባንጂ ወረዳው ባይልስታ ቱሪዝም ፅ/ጝናሱ አላፋ ዊ/ሩ አለሚቱ ቢተው ዎታትካ ሰላሙ ችግር ምክንያታስ ዚንጊኒ አይክዳ እንፃኽስታሺኑሳ እንፅኼ ዙርካማ እንፃኽስትጝስ ካላኑሳ ቴግባሮ አኮሜችካማጊ አኽⶓ ጌሌፅካ::ዚንጊኒ አይክዳ እንፅኼ ፌቴሩንኩ ዎታትካስ ፋይፃውሳ ሜሳሬ ዋኽትጝፅጝዴስ ፌይኹስ ዜርፍዳ ዝኩንኩ ችግርካዋጊ ኽይጝስ እንፅኼ ጄሜርⶓ ኽይትጝፄካ::

አዊ ብሄረሰቡ ቺፅጝፂ ባይልስታ ቱሪዝም ሜምሪው ዎኬልስታንቲ አቶ ወለሊ ጌቴ ጛሾሰ ሰላም ዝኩዋውላ ይጉጝ ቱሪዝሙ ዜርፍስ ኬሻንቲ ልቕልቕቲዳ እሺኹሳ ብሄረሰቡሳ ቺፅጝፄ እንግርግራ ይጉፅⶓ ጉሽካ::ዜርፍዴስ አግስታሺኹ ኢኮኖሚ ዜሬቕ ናታ ቻኒስቶ ፌቴርⶓ ጌሌፅካ::

2016ስታ 2017 ም/አሜታዳ ቱሪዝሙ ዜርፍዴስ አግፅጝስ አኬዱኑ እክድ ሳኪትጛያሱ አኽⶓ እርዳትፅካ::እንጚስኪላ ባርኾቼው ጎቤናንትካዴስ ዐ ትኩሚ 5ስታ አጌራኻሱ ጎቤናንትካዴስ 35 ታፋ ሊኽዴስ ይቪቻ አኽጝስ ዜሬቕቲኒ ፊፂምጚዳ አግስታው አኽⶓ ኽይትጝፄካ::

ዚንጊኔስታ ዙራሙሬ ጎቤንፃው ማቢሪዴስ ዲግኹ ካሲስኪላ ዙርሜ እይጝስ እንጃቪሪ ዩኒቨርስቲሊ ቲቪቪርጚስ ፅናትስ እንፅኺ አኮሜችስታማጊ አኽⶓ እርዳትፅካ::