እሌታ እርባቲዴስ ፍሽፃው ዳድ

ንግስቴ ተስፋ

ምግብስ ጛሬ ካሊጝ ዳንቴና አኽጝዴስስታ ይምዴሰ ፊጚያኽ:: ምግቡ ዳንቴንትዴስ ፊጝ ንጝ ዴሜካ ኩቲስኪያኻ ኩታ ጋው ዳድስ አጌራውሳ ክብሮ ዴፌርፃውላ ይጉጝያኽ:: አኽጝስኪ ግብርኒው እንፅኺ ዝኩዊኒውሳ ችግሮ ኽያው ይቪቺ ያኻውላ ይኮኖሚው፣ ክብሩስታ ሉዋላውቱ እዊያኽ:: እንጚስኪላ አማኻሪ ክልሉ ግብርኒው ቢሩ ግብርኒው ዜርፍስ ኬፍቲኔ ትኩቶ እይጝስ ምግቡሳ ፋዮ ዋኽትጝፅጝስስታ እርዳቲዴስ ፊጝስ ካሊፃዊያኽ:: አግሮ ኢንዱስትሪው ዜርፍስ ያኻውሳ ምርቶ ዲግስጝስ እንቲታኪ ባርኾቼሾ እንፃኽስታውሳ ሴብሎ አሜሬትጝስ ኬሻንቴ ሚፂ አግፅጝስ ድኽትዴስስታ ይምዴስ ፊጝስ ዳብዜ እንኩራማ እንፃኽስታማጊ አግስታው አኽⶓ ቢሩዴስ አግፅኑኽ ንቫር ቶኬሜ::

ይቶፒያው ናማኪ አማኻሪ ክልሉ ብቲፍንታ፣ አይር እግልታው አኺኒ፣ ኽብፂውስታ አኹ እንኩሪታጊ ሊሊትጛው ያኼስጉ አሜትዴስ ሹኺኒ አሜሬትጝስ ካሊስታው ሴልኪላ ዝኮ:: እንጚስኪላ አማኻሪ ክልልዳ ዝኩኽሳ አኹሳ እይስቴ ቱስቲስ ትክምዳ እሽፅጝስ 2018 ምርቱ ዝቤንዳ ኬሻንቴ ምርቶ አግፅጝስ ቤዴራ ቴርቱ እንፅኺ ይስጛማ ካስጛማጊያኽ::

አዊ ብሄረሰቡ ቺፅጝፂ አንኪሺ ጉዋጉሲ ወረዳዳኪላ እሳንስ አኹዋቲስ ሊማማ ምርቶ እያው ብቲ እሳን ያኽ:: አኹዋቲ ልማቱ እንፅኺሳ ኬሽጙኽሳ እንፃኽስትጜ ቴግባርዳ እሽፅጝስ አግስታው ምርት ኬፍ ናታ ትኩትስ እንፃኽስስታማጊ አግስቴ::

አቶ ካኘው መኮነን ቱልቲ ኬቤሊው ዝኩዋንቲ ናካዳ ሹኺኒ አሬሴካማ ቑትሰኑዳ 4 ኩፃ ምካፂ እምፕልስታ ኪንዲ ኩፅ ብቲዳ አኹዋቲስ ሴብሎ ትክልቴስታ ኩፓክፔ አሜሬትጝስ ቴርቴካማጊ አኽⶓ ዲብስካ::

ሹኻ ኩፃ ብቲዳ ክላስተርስ ስንዳዮ ዜርጝስ፣ እምፕል ኩፅ ብቲዳ ስምኬ፣ እምፕል ኩፅ ብቲዳ ዱኒዜ እንቲታኪ ዐ ትኩሚ 5 ኩፃ ብቲዳ ዴሜካ ጉባሬ፣ ካሮቶ፣ ድሜ ስሮ፣ ኮስታዋሰታ አምሌ ቤንጝፄካማ ዜርጝስ አይር እግልታ ክቺምባ ኺስታ ማንዲትጜካማጊ አግስታንኩ አኽⶓ ስልኪስ ድኹዌካ::

ላጛ አሜታዴስ ቤዴራ ኬሽጙኽሳ ስንዳዩሳ ምርቶ ዜርጝስ አግፁኑሳ ኬሻንቴ ሚፄ ጉሽፃ ፄውጝስ ንጙዊኒ አሜትዳኪላ ትኩትስ እንፃኽስቴካማጊ አኽⶓ አቶ ካኘው  ዙሜካ:: ጋያኪ ኬሽጙኽሳ ዜሮስታ ኽብፂውሳ ማዳባሬ ቱስቲስ ቴኬምስትካማ እምፕል ውጋቢ ብቲዴስ  ቤዴራ ላጛ ኩንታሎ አግፃሺንኩ ናካዳ እፅፍስ ዴሜክካማ ዋልታ ኩንታልዴስ ጃላ አግፅጝስ ካሊⶓ ድኹዌካ::

አሬሳቻንቲ ካኘው ናኑውስታጊ ናካዳ እይስታውሳ ውማዩሳ ኩስጜ ቴግባርሾ ኪስጝስ ፁሞ ቻሺኹ ብቲዳጊ አኹዋቲስ ሊሚፅጝስ ካላኑውሳ ሴሎ ፌቴርጝስ ዝኩዊኒ ኬሽጛታ ፄውጝስ ካሌካ:: እንጚስኪላ ግብርኒው ውማይቴንካው ድርትኒ ዋይሜ አፌራማጊ አኽⶓ ዙሜካ:: ኬሌብዴስ ፊቲስካማ ጌቤልስ ዲጋማ ኬሻንቴ ጌንዜቦ አግፃኑሳ ሴብሎ አኹዋቲስ ሊሚፅካማጊ አግስታንኩ አኽⶓ ጉሽካ::

ናኪኒ ዎክትስ ኽብፂ ማዳባሪው ዋይሚስታ ጉልሊ ዜሩ ዋይሚ ዴሜክጝ ስጋታ ያኹኒውላ ኮንፖስቶ /ፍትሬቱሳ ማዳባሬ/ ቴርስጝስስታ ኬሻንቲ ዜር ዝኩኽዴስ አሬሳቻንትካሊ ኽቴ ናቴ ኪስጝጝስ ችግሮ ኽይጝስ ቴርቴካማጊ አኽⶓ አቶ ካኘው ዙሜካ::

ዙራሙሪዳ ግቢትስቱኽ አኹዋቲው ዴዴክ አኾ ቼጌርስታኑላ ዎክትስ ሴብሎ ሊሚፅጝስ ካላኑሳ ሴሎ ብሳይኹ አኽⶓ ዲብስካ:: እን ያኼስጉ ኬቤሊዳ ግቢትስቱኽ አኹዋቲው ዴዴክ ኩፅኒ ዋኽስ ዋኾ ግቢትስታማ አሌድስታውላ ይጉጝ አኹዋቲው እንፅኺዳ ቻኒስቶ ፌቴሬ ናውሳ ስጋቶ ቺፃንታስታ ብቲ ፁሞ ቻታ ፄዋው አኽⶓ ቶኬምካ::

እሊው አሬሳቻንቲ አስፋው ዘገየ ቱልቲዳ አግስታንኩ ጎትካዴስ ሚንችካ አሬሳቻንትካ ባድሜ ባይካ ሴዴድስትካማ ይምዳስታ እርዳቲዳ አሴሜርጛሺንኩ ዝኩንኩ አኽⶓ ታክስፅጝስ ናኪኒ ወክትዳ ኩፅኒ ይምጝዴስ ኪቻ እንፃኽስታማ ኪሴ ሜዜጌብፅጝ፣ ኬሌብስ ጛሬ ካሊጝ ቱስቴ ናው ኩርፄንትስ አሜትዴስ ሹኺኒ አሜሬትጝስ ዝኩዊኒዳ ኪሴ ሜዜጌብፅጝስ ካሊⶓ ድኹዌካ::

አሬሳቻንቲ አስፋው አኹዋቲ ልማቱ እንፅኺስ አግፁኑ ኪሲስኪላ ዴስቴንካ አኽⶓ እንክርፄካ:: ጋያኪ ጌቤል ፋያቲውሳ ምርቶ አሜሬትጝስ ዝኩዊኔ ኪስጝስ ቼጌርስታሺንኩ አኽⶓ ጉሹንኩ አቶ አስፋው ናካዳ ኩፅኒ ሴብል ኬሻንቴ ምርቶ እይጝስ ካላውሳ ሴሎ ውማይቴንካዴስ ክንቴ አግፄካማ አሜሬትጝስ ቲንዌናስታ ጌንዜብስ ቼጌርስታቲንኩ አኽጝስ ቢኪⶓ ዲብስካ::

አሬሳቻንቲ አሰፋው ዘገየ ናኑውስታጊ ቱልቲ ኬቤሊው አሬሳቻንትካ አኹዋቲ ልማቱሳ ዝቤናዌ እንፃኽስትጜ ቴግባርዳ እሽፅካማጊ ያኹኒውላ ጉልሊ ዜሩ ክብርናቲስታ ኽብፂ ማዳባሪው ኬቤርጝ ኩፅኒ ምርቱ ሜቴንዳ ቻኒስቶ ፌቴርጝስ ካላው ናው ስጋት ዝኩⶓ ዙሜካ::

ቱልቲ ኬቤሊው ግብርኒ ፅ/ጝናሱ አላፊ አቶ አዲሱ ምትክ ቱልቲ ኬቤሊዳ 365 ሄክታር ብቲ አኹዋቲስ ሊማው ያኹስ 160 ሄክታር ብቲ ሰንዳይስስታ ይጉዋንቲ ብቲ ጌቤሎ ትኩታ ፄውንኩ ሴብልካስስታ ቴጋኑ ትክልቲስስታ ኩፓኪፒስ ሾፎንስታታ ቤዴራ ቴርት አሌድስታማ ትክምቲ አሊዲዴስ ጉሽፃማ ዜርስ ሾፌንጙ ቴግባር አኮሜችስታው አኽⶓ ጌሌፅካ::

አሬሳቻንትካው ሹኻ ክላስተርስ አችትጝፄካማ ወክትስ እርሼ ቴርሳንታ ግባቶ ቴኬምስታንታ፣ ፍትሬቱሳ ማዳባሬ ቴርሳንታ ውማዩሳ ድጋፎ እይⶓ ጉሽካ:: ቱልቲ ኬቤሊዳ ላጛ ዝቤናዊ አኹዋቲው ዴዴክ ዝኩⶓ ቶኬሙንኩ አቶ አዲሱ ቤዴራ እሺኹ እንግራ ይጉዊ እንፃኽስትጚዴስ ፌካማ አሬሳቻንትካ ይኮኖሚውሳ ኪሴ ሜዜጌብፅጝስ ካላኑ አኹዋቲ ልማቱ ዜርፍዳ ትኩትስ እንፃኽስቴካማጊ አኽⶓ እርዳትፅካ:: ኬቤሊታ ጉልሊ ዜርዳ ጌቴምኹሳ ኬቤርጙሳ ችግሮ ኽይጝስ እንዴስ ቤዴራ አሬሳቻንትካ ትንካኪስ አሜሬቱኑሳ ዜሮጚስ ጜዋ ኪስጜካማጊ ዜራንታ ፄውስታማጊ አኽⶓ ጌሌፅካ::

አንኪሺ ጉዋጉሲ ወረዳ ግብርኒ ፅ/ጝናዳ ትክልቲስታ ኩፓኩፒ አኹዋቲ ልማቱ ቴቤቤርጝፃንቲ አቶ ደረጀ የሁዋላ ጛሾስ ወረዳታ አኹዋቲስ 5 ሻይ ሄክታርዴስ ጃላ እጂኹስታ 5 ሊኻዴስ ጃላ ሄክታር ብቲ እስካዊስ ሊማታ ወረዳ ቤዴራ ቴርቶ አሌድⶓ ጌሌፅካ:: 2018 በጀት አሜትዳ እስካዊስ ዴዴክስታማ አግልግሎቲስ ቢኩኽ ላጛ አኹዋቲው ዴዴክ ዝኩኽ ንጙዊኔ አኹዋቲ ልማቱሳ እንፅኼ ዋይሚስታ ፄዌ እስታማ እክድ እምስትⶓኪላ አቶ ደረጀ ኽይትጝፄካ::

ወረዳታ ኽብፂው ማዳባሪ ፋይስታው ሜቴንስ ዲጋማጊ አኽጝስ አሬሳቻንትካ ዎክትስ ካፅካማ ትክምዳ እሽፃንታ ፄውስታማጊ አኽⶓኪላ ቶኬምካ:: ያኼስጉ ኽብፂ ማዳባሪው ዋይሚ ኬቤርጝ አሌም አቡቑ ጌቤሉ ቻኒስት አኽጝስ ወረዳታ ችግሮ ኽይጝስ ትኩታኩ ቤንካሊ ኩስጝጝስ አሬሳቸንትካ ኽብፂ ማዳባሪውሳ ጌንዜቦ ሴብል ታምባኒ ኬይጝስ ካላኑሳ ዳዶ አሜሜችጝፅⶓ ቼሜትጝፄካ::

አሌድስታያሱሳ ዴዴኮ ካንትኹስ ዴሜካ  ክልል በጀቶ ሜዴባማ ዴዴኮ አሌድጝስ አሬሳቻንትካውሳ ቴኬምስታንቶ ቼሜትጝፅጝስ ክልልስ ካሴ ዲግስካማ ዙርሜ ማንዲትጜካማጊ አኽⶓ ቼሜትጝፄካ::

ወረዳዳ አግስታንኩ 16 ኬቤልካዳጊ አኹዋቲስ ሊሚጝስ ካላው ኽብፂውስታ አኹ ዝኩኽ አኽⶓ አቶ ደረጀ ጉሽካ ሰላሙ ችግር ዝኩክ ሹኻ ኬቤልካዳጊ አኹዋቲው እንፅኺ ይስጛማ ሲፋታ ፅሬቶ ፄዌካማጊ አኽⶓኪላ ቶኬምካ::