ውንስቲ ቤዋ

ንግስቴ ተስፋ

አሌሙ ታሪክዳ አቒ ይሪ ንቫሮኪ ያኻ አብኖ አግፃኑስታ አሳቦ ኪስጛሺኑ ቤዴራስኩ ሴልካዴስ ጋዚቲ እምፕልያኽ::

አሌምዳ ጋዚቴ ቴርስⶓ ጄሜሩንኩ አጌርካዴስ አውሮፓውያንካ አኽⶓ ፅናት ካንትፄ:: ጋዚቲ አቲምፂ ጝናዳ ማሽንስ አቴምስትምባ ኺስታ ዝኩኽ ዝቤንዳ ታፍስ እሺኾ ፃፊስታሺኹዊ::

ዎሬሙ አብንዴስ ኢኮኖሚውሳ ጉዳዮ፣ ባይላዊ ኩምችንካዴስ ማቤራዌ ዎጎ፣ ዲኒክፂ ታሪክዴስ ፍትኽፄ ስፖርቶኺስታ ታፍስ ፃፊስታማጊ ጌፄንካሾስ አንቤባንትካውላ ታምባሺኾ:: 14ንቲ ዝቤን ቤናዳ ኩፅኒ ጋዚቴ አቫላምቲ ጊዝስ ማሽንስ አቲምፂት አጌራ ጀርመን አኽጝ ሜዜጌብስታ ኑስ አዲስ አድማስ ጋዚቲዳ አቴምስቱኽ ፁፍዴስ አግፅኑኽ ንቫር ካንትፄ::

ዝቤናዊ ሚንችትካ ታምትጝፂው ጉላሊ አንትጝዴስ ፍና ጋዚቲ አቒይሪሱ ሊሊትጙኽ ዳድስ ክንትፂስታ ንቫራ አግፅፂ እሺኾ::

ጋዚቴ አንቤባው እምፕልታቕ ጋቻስ፣ ዎሬምስስታ እጋፌ ቴግባሮ እንፃኽስትጝስ ጋቻስ ጁትጛላ:: ጋዚቲ አጌሮ ጉሰጝስ ምንግስትሊ ልኺትጛኑ ሴዛንቲ ምንግስት አኽጙ ስልታን ዝኩኪያኽ::

አማኻሪ ሚዲያ ኮርፖሬሽንዳ 2003 ምሬት አሜታዳ ጄሜርታታ አውጚ ኮንኪስ አቴምስትⶓ ጄሜርቱት ቺርቤዋ ጋዜታ አንቤባንትካስ  ንቫሮ ታምፄታጊ 15 አሜታሳ ቺፍፄ:: ጊዝዴስ ጊዞ ዝቤን ካሴውሳ ጉላሌጊ ዋኽትጝፅጝስ ጋዜትካ ዝቤንሊ ካስካማጊ አኽጝታጊ ቺርቤዋ ጋዜታኪላ ዲግስታው ንቫርስ እምፕልታቖ እጉ፣ ፍቱ፣ ዲሞክራሲውስታ ጉድ ቺፅጝፂው እንቲታኪ ጊዝቺፋ ኬሽጜካማጊ ፋንኩ ሜሜርካዋስታ አዋጅካዋ ካንትኹስ ፁፎ ታምፄታጊ አግስቲ:: ቺርቤዋ 15 አሜታሱ እንዝጚዳ እትሚስ ቢኩንኩ ፍቱስታ ቺፅጝፂው ጉዳይካዋ ዜጌብቱስ እጂቲኹ አኽⶓ አንቤባንትካሊ ስልኪ ፄውንኹሳ ንባሮ ቴርስናኽ::

ጉዋንጉዊ ወረዳ ምንግስት ኮሚኒኬሽን ፅ/ጝናዳ እዝቡስታ ሚዲያው ታምትጝፂው ኬቹ ጉሳንቲ የኔጌት ካሴ ባህርዳር ዩኒቨርስቲዳ ክንታንቲ እሺኹ ጊዝዳ ሜፃፍ ጝናዳ እሊኩ ጋዜትካሊ አብራ እንኩርስቴታ ካንታኒ ዴስናማ አንቤብⶓ ላኹ ንጝስ ቺርቤዋ ጋዜታሊ ዴምቤና አኽⶓ ጄሜራ::

ጄሜርኹ 15 አሜታሱ ወክትዴስ ናካሳ ኺስታ ኻታታ ዲግታኩ ፁፍካዴስ ድምክና “ቺርቤዋ” ናውሳ እቑፄ ስሞ እይኹሳ አሜሴጌንⶓ ፋያው አኽⶓ ዲብሳ::

ምክንያትኪላ ኔ “አዊው እዝብ ቺርቤዋ ካንትስቲታ ኬፄሮ እሚኹ ብቲሾ እንዝጜ ጄሜራው፣ አሬሳቻንቲ ቢሬ ፄሜዳማ እርሺሾ እንዜጛው፣ እምፕልታቑሳ ሼውፅንታውሳ እጎ ኬቤርፅኹ ጋዚቲው እቑፂ ስም አኽⶓ ሼውፃው አኽጝስያኽ” ኑስ ኽይትጝፃ::

ጊዝዴስ ጊዞ አንቤባንትካውሳ ፋዮ ዋኽትጝፅጝስ ቺርቤዋ ጋዜታዳ ዲጋውሳ ፁፎ እሚስ፣ ማሊፊስ፣ ፎቱ እንኩሪስስታ ኬሌምስ ግዲትፃማ ዲግስጝዳ ዝኩኽሳ ፅሬቶኪላ ይስጛማ ሲፋታ እንጉስታ::

ምንግስት ኮማኒኬሸኑ ኾትታጊ ቺርቤዋ ጋዜታ ወረዳሾ እንፃኽስታኒ አላፍትስ ክንቲ ጝናስስታ እሊኩ ምንግስቱ ኾትካስ ጋዜቴ ቤንጝፅጙሳ ቴግባሮ አኮሜቻንኩ አኽⶓ ጌሌፃ::

ንቫብስ ዲጋው ጋዜታው እትሚዴስኪላ ፍቱስታ ቺፅጝፂው አምድዳ ሊሊትጙኽሳ እጉሳ ኽዮ፣ አዋጆ፣ ሜሜሬስታ አግልግሎቴ እይጚዳ ዝኩኽሳ ክሬቴጊ ውማይቴንካስስታ ታምብዌን አካልካስ ኽይትጝፄ እይፄታ ዱግስታው ፁፍዴስ ንቫሮ አግፅጝስ ካሊⶓ ዙማ:: ፅፌት ጝናዳኪላ ጊዝቺፋ እትሚስ ቢኬፃ ቺርቤዋ ጋዜታዋ ሺሽፄ ኮዶ እይጝስ ታሪክስ ንቫሮ እንኩሬካማጊ አኽⶓ ቶኬማ::

አማኻሪ ክልልዳ ላጛ አሜታዴስ ናቴ ፌቴርስትኹ ሰላሙ ችግር ኩፅኒ ቺርቤዋሊ እሺኹሳ ፁፍ ፅንታውሳ ዴንቤንቶ ኬውጝፅⶓ ቶኬማ:: ቺርቤዋ እትሚስ ቢኬታ እዝብስ ታምብስታንታ ታኻውሳ እክዶ ፍሽጝስ ታምብዌን አካልካ እንፃኽስታንታ ካንቴ እያ::

ባንጂ ወረዳ ኩስጚ ጝናሱ ጉባይ ኽምባ አቶ ቢረሰው በየነ ጛሾስ እገ ምንግስት እይኹሳ ኮንኬ ፁፍ ፅንታስ ሌጌፅጙሳ ሜብቶ ቴኬምስትጝስ ቺርቤዋ ጋዜታ እዝብስ 15 አሜታሳ ታምቤታ ታሪኮ እንፃኽስትጝ እምፕል እዝቡ ስልታኒው ጊሊፂያኽ ንካ::

ሊሊትጙኽ ዳድስ ብሄረሰቡ ቺፅጝፂ እጎስታ አዋጆ ቴግባርዳ እሽፅጝስ አኮሜቻውሳ ቴግባሮ ካንትኹስ ዳንጉዊኔስታ ይሴንቶ ካንትኹስ ቺርቤዋ ኽይትጝፄ እይፄታጊ አንቤባንትካስ ታምፄውስታ ታሪክስ እንኩርስታታ ፄውስታው ቴግባር ቻሱ ክምንትስ ኽሳንቲ ላሚ አኽⶓ አቶ ቢረሰው ጉሽካ::

ቺርቤዋ ጋዜታ እምፕልታቕ ጉሹኑሳ አግልግሎቴ እይጙሳ ችግሮ ካንትኹስ ዲግስታውሳ ንቫሮ ጉሽፃ ፄውጝስ እዝቡ ችግርካዋ ጎሌላማ ሺሽጝስ እንቲታኪ ችግሮ ፌቴራው አካልዳ እርምጄ ካፅጝስ ንቫሩ ጉሽፃ አኽጝስ አጌላጌልታታጊ አኽⶓ ኽይትጝፄካ::

ጉባይ ኽምባ አቶ ቢረሰው በየነ ናኑውስታጊ ፍንሾስኪላ ቺርቤዋ ጋዜታ ኬሽጝታታ እትሚስ ቢኬው ፍን ኬፍናማ ሶኼት ቺፋ እትሚስ ቢኬው እክድ እምስታማ እንፅኺሾ ቱስቱኒ እዝቡሳ ፋዮ ኬቤርፅጝስ ካሊስታው አኽⶓ ጉሽካ:: ጋያኪ ዲጋው ፁፍ ታሪክስ እንኩርስታው አኽጝታጊ ትኩቶ ካሴንኩስታ እዝቦ ቴኬምስታንታ ፄዋንኩ ጉዳይካዳ ትኩቶ ፄውጝ ቱስቴኪላ ንካ::

ክልል ሰላማ ያኻማ ጋዜታ እትሚስ ካብስ ቢኬታ ፋያንኩ አኽⶓኪላ ቶኬምካ:: ጋዜታ ምንግስቶኪ ያኻ አላፍቶ ክችክቺስ ፊትጛያሱሳጊ ካሲስታንታ ፄውጝስ፣ ሙስኒውሳ እንፃኽስትጜ ክቼታ ንቫሮ ፍሽጝስ እንቲታኪ አጌር አቑ ድምፃ አኽጝስ ሴዛንቲ ምንግስትታ አጌላጌልጝ እንቲታኪ ዲሞክራሲ ቼሜትጛታ ታምቦ ፊትጝጝ ማንዲስቴ ናኒስ አሳቦ እይካ::

አማኻሪ ሚዲያ ኮርፖሬሽን አውጚ ኮንኪ ቴርት ቤናሱ ዳይሬክተራ ይፍቱስራ ፈንታሁን ቺርቤዋ ጋዜታ  ሶኼታ ፍንስስታ ቹዋቹዋ እስታንኩ አምድካስ እትሚስ ትክምቲ አርፊዳ 2003 ም/አሜታዳ ጄሜርⶓ ጊሊፄ:: ቺርቤዋ ጋዜታ እትሚስ ቢኬታ ጌዴድፅኹኪላ አውጚስ ፃፊስትኹ ጋዚቲ እላቲው እሺኹ አኽጝስ ኮንኪስታ አውጚው ፁፍ ፅንታው እንዝጚ ሌጌሳታ እምፕልታቕ ዲግሱኑ ካሲስ አኽⶓ ኽይትጝፄ:: ናካስታ አቒው አይልስኪ ያኻ ሊሊትጙኽ ፁፉ ሜሳሪ ዋኽትጛያሱ ጊዝዳ ጋዜቴንካ እንፃኽስታኑ ኩርፄንትስ ጋዜታዋ ቴርሳሺንኩ አኽⶓ ጋዜቴና ይፍቱስራ ኽይትጝፄ::

ወክትስኪላ 1 ሻይስ ጋዜታው ፁፍ አቴምስታማ አንቤባንትካስ ታምባታ ያኽስታ:: አርፊዴስ ላጚኒ እትሚስ ቢኬት ቺርቤዋ ጋዜታ አንቤባንትካውሳ ፋዬ ዋኽትጝፅጝስ እንቲታኪ ሊሊትጙንኩ ጉዳይካዳ ዜጌቤ እንፃኽስትጝስ ኮንኪው ልግስስታ እምፕልታቑ ድምፃ አኽጝስ ታምቦ ፊትጝⶓ እርዳትፄ::

ጊዝዴስ ፋሌንጋ ቺርቤዋ ጋዜታዋ ሹኺኒ ኬሽጝፅጝስ ዝቤንሊ ካሳውሳ ጋዚቴ እምፕልታቕ አግፃንታ ካሊፅጝስ አሚኮ እንፃኽስቱኽ እንፅኺስ በኩርዴስ ሲፍታታ 5 ሻይ ጋዜታዋ አቴምፅጝስ አንቤባንትካስ ታምባታ ፄውስትⶓ ጋዜቴና ይፍቱስራ ጊሊፄ::ጋዜታዋ ካንትኹስ ፄውስትኹ ፅናትዳ ቺርቤዋ ጋዜታዋ ፋያንኩ አንቤባንትካው ቼፍኪላ ኬፍቲኒ አኽⶓ ጊሊፂት ጋዜቴና ይፍቱስራ ፍንሾስኪላ ጋዜታዋ ሶኼት ቺፋ እትሚስ ቢኬታ ፄውጝስ እክድ እምስትⶓ ጉሽታ:: ጋያኪ አማኻሪ ክልልዳ ፌቴርስትኹ ሰላሙ ችግር ጋዜታዋ አቴምፃማ አንቤባንትካስ ታምፅጝስ ፅንጋኻ ያኹኒውላ ዝቤን ያጉኽ ቴክኖሎጂስ ንጝኪ ዌብሳይትስስታ አውጚው ፌስቡኩ ፍንስ ንቫር አንቤባንትካስ ታምባታ ፄውስታማጊ አኽⶓ ኽይትጝፄ:: ክልሉ ሰላም ዙሩታ ኩፅኒ ቺርቤዋዋ እትሚስ ቢኪፅጝስ አንቤባንትካስ ታምፅጝስ ካሊሰታው አኽⶓ ጋዜቴና ይፍቱስራ ቺሚትጝፄ:: ቺርቤዋ ጋዜታ አቴምስትⶓ ጄሜርትኹ 15ንቲ አሜትስኪላ ውላዋ አንቤባንትካዋስታ አውጚኩ ጋዜቴንካዋ እንኩዋን ታምፁናሱሳ እንፅኼንቶ ዲግስታ::