ምንድራሺ ዎክቶ ማንዳው ቑንዚ

ታደለ አጋጄ

ምንድራሺው ቑንዚ ፌያፌይጛንትካ ቑንዝካዴስ እምፕል ያኹስ ፕላዝሞዲየም እስቴት ኹና አኖፊለስ ሚቓያስ አቒዴስ አቒሾ ፌፌይጛው ቑንዚያኽ:: ምድራሺት ሚቓያ ጅቕጅቒ ብቲዳ እሳንስ እሩብቴ:: ምድራሺውሳ ቑንዜ ያጋው እንኪቲኒ ሚንች አኽጝስ አቕዳ ታምፃው ችግርኪላ አቒዴስ አቔ ሊሊትጜ:: ምድራሺው ቑንዚ ክርⶓኺስታ ታምፅጝስ ካላው ቑንዚያኽ::

ይቶፒያዳ ኩልስታ ኩላ ዲሪኺ አየር እግልታ ዝኩኽ ዙራሙሪዳ ምንድራሺው ቑንዚ እሳንስ ኬሴትስታው ስፍሪያኽ:: ሚንችካ አፍሪካኩ አጌርካዳኪላ እሳንስ ኬሴትስታው ቑንዚ ያኹስ ኩጝስኪላ ሚንቾ ታምቦ ካፄ::

ምድራሺት ሚቓያ እሳንስ አግስቴውሳ ዙራሙሬ ኪሚካሎ አሬችጝስ፣ አጎበሮ ቱስታው ዳድስ ቴኬምስትጝስ፣ ሚቓያውሳ እሩብፄ ስፍሬ ፃንኩፅጝስ ምድራሺውሳ ቑንዜ ካላካልጝስ ካሊሰቴ::

አማኻሪ ክልልዳ ምድራሺው ቑንዚ ማልጛ ኬፍንኹ አችዳ ታምብⶓ ቲኑ ቢሩ ንባር ቶኬሜ:: ክልላኻዳ ኬፍቲኒ አችስ ምድራሺው ቑንዚ እሳንጛማጊ ዝኩንኩ ወረድካ ጎሌልስትካማ ካላካልጝጙ እንፅኺ እንፃኽስስታማጊ አኽⶓ ቲኑ ቢሩ ዲጊስ እይኹ ጊሊፂዳ አቕፃ::

ምድራሺው ቑንዚ እሳንስ ኬሴትስትኹ ዙራሙሪዴስ አዊ ብሄረሰቡ ቺፅጝፂ አባላምቲዳ ቶኬምስታ:: ብሄረሰቡ ቺፅጝፂዴስ ቻግኒ ኬቴሙ ቺፅጝፂ፣ አዮ ጉዋጉሲ፣ ዚጋሚስታ ጃዊ ወረዳ ምድራሺው ቑንዚ እሳንጙክ ዙራሙርካኽ::

ሃምሳ አለካ አበበ ወርክነህ ቻግኒ ኬቴሙ ቺፅጝፂ 01 ኬቤሊው ዝኩዋንትካኽ:: ምድራሺው ቑንዚስ ቑንዳስትካማ ሚንቺኒ አኪም ጝና ዙራዙርካ:: ምድራሺው ቑንዚ ኬቴምዳ አክምዴስ ጃላ እሳንጛማ እምፕልታቕ ቑንዚስ ማልጛ ጉዲስትካማጊ አኽⶓ ዙሜካ::

ዶርምዳ ክራይትካማ ዝኩዋንኩ አቕዳ ምድራሺው ቑንዚስ እምስትⶓ ዙሙንኩ ሃምሳ አለካ አበበ ሚንችካ አቕ አኪም ጝና ካስካማ ማራማርስታኒስ ምድራሺው ቑንዚስ እምስትⶓ ጉሽካ::

“ቻግኒ ኬቴሙ ቺፅጝፂዳ ምድራሺው ቑንዚ ወረርሽኝ ያኻ” ኑንኩ ሃምሳ አለካ አበበ ጝንቺፋ ቑንዳስታያሱ አቒ እላቲው አኽⶓ እንክርፄካ::

ሶኼት ቺፋ ጛውሳ ዙራሙሬ ፃንኩፅጝስስታ አጐበሮ ቴኬምስቱኒውላ ቑንዚው እሳንጝጚ ኔኬታያሱ አኽⶓ ቶኬምካ:: እንዴስ ቤዴራ ቑንዜ ካላካልጝጝስ ኬሚካል አሬችስታሺኹ ያኹኒውላ ኬሚካል አሬችስታውላስ ይጉጝ ምድራሺው ቑንዚ እሳንጛታ ምክንያታ አኽⶓ ስጋትስ ዙሜካ::

“ላጛ አሜትዴሰ ናቴ ምድራሺው ቑንዚስ ሹኺኒሳኺስታ አኪም ጝና ካሳያሱ አቒ እላ ኑንኩ ሃምሳ አለካ እጆ ካፁኒውላ እንግራ ቑንዳፅጝስ እምፕልታቖ ቼጌርፅⶓ ጉሽካ::

እሊው ቻግኒ ኬቴሙ ቺፅጝፂ 03 ኬቤሊው ዝኩዋንትካ ሀጂ መሃመድ ቤንቱሃ   አንኩዋ ጄርካጊ ምድራሺው ቑንዚስ ቑንዳስትካማ አኪም ጝና ካሳሺⶓ ዙሜካ:: ምድራሺው ቑንዚ ማልጛ ቺጊርፂ አኺኒዳ አግስታው አኽⶓ ቶኬምካማ ቑንዚ እጁሊ ዴስጝጝስ አቕ ካብስ ቑንዳስትካማጊ አግስታንኩ አኽⶓ ቶኬምካ::

ሚንችካ አኪም ጝና ካስካማ ማራማርስታኒስ ምድራሺው ቑንዚስ ቑንዳስቱንኩ አኽⶓ ቶኬምካ:: ሃጂ መሀመድ ዙራሙሪውሳ ፃንኩቶ ማንዳኒስታ አጐበሮ ቱስቲስ ቴኬምስቱኒውላ ቑንዚው እሳንጝጚ ኔኬትጝስ ካሊስታያሱ አኽⶓ ዙሜካ::

ሚንችካ ቑንዳስቴንካዳ አካላቶ እንኩዊንስጙ፣ ምግቡሳ ፋዩ ኔኬትጙስታ ትራኹፅጙ ምልኻት ካንትስታው አኽⶓ ቶኬሙንኩ ሀጂ መሀመድ እጆ ካፃኒ ኩፅኒ ኬሽጝስ ካላንኩ አኽⶓ ዲብስካ::

ዙራሙሪዳ ግንባቲስ ያኻንኩ ዲብካ ኩፑንክ ስፍርካዴስስታ ኬቴሙ ናቕትዳ ብን ዝኩኽ አኽጝስ እሬ ብሳው ዎክትዳ አኹ ኩፕናማጊ ሚቓያዋ እሩብፃው አኽጝስ ቑንዚ እሳንጛታ ምክንያታ አኽⶓ ቶኬምካማ ኬማካል አሬችስታታኪላ ካሲካ::

ቻግኒ አባላምቲ አች ሆስፒታሉ ስራስኪያጅ አዳነ ገበየሁ ሆስፒታላ ቑንዳስትካማ ይንታንኩ ቑንዳስቴንካዴስ ሚንችትስ ምድራሺው ቑንዚስ ቑንዳስቴንካ አኽⶓ ጌሌፅካ:: ችኽ ቲሬው ዎክትዳ ምድራሺው ቑንዚ እሳንጛው ዎክት አኽⶓ ቶኬሙንኩ ስራስኪያጅ ጌርክስ 200ዴስ ጃላ ቑንዳስቴንካ እክምኔ አግፃንኩ አኽⶓ ጉሽካ::

ኬቴሙ ቺፅጝፂዳ ምድራሺው ቑንዚ ማልጛ እሳንጝⶓስታ ዙራሙሪ ምድራሺው ቑንዚስ አሜቻው አኽጝስ እምፕልታቕ ምድራሺው ቑንዚስ ቼጌርስትካማጊ አኽⶓ ጌሌፅካ::

ምድራሺው ቑንዚ ብሬ ቺንችጙዋው አኽጝስ ሆስፒታልዳ ብሪ እንፂጛ ጌቴማ ንካማ ስጋቶ እንኩርⶓ ጉሸካ::

“ምድራሺውሳ ቑንዜ ካላካልጝጝስ ዙራሙሬ ፃንኩፅጝስስታ አጐበሮ ቱስቲስ ቴኬምስትጝ ቑንዜ ካላካልጝጝ ቱስቴ” ንካ:: ምድራሺስ ቑንዳስቱንኩ እምቢት ንካማ አኪም ጝና ካስጝ ቱስታው አኽⶓኪላ ታክስፅካ::

ቑንዳስቴንካ እጆ ቱስቲስ ካፃኑላ ይጉጝ ዴሜካ ቑንዚስታ እጁ ዴስጝጝ ምንድራሺው ቑንዚ እሳንጝጝስ ምክንያታ አኽⶓ ጌሌፅካ::

እሊው አቒስ እይስትኹሳ እጆ አኪም ጝና ካሳኑላስ እጆ ካፅጝ ቱስታቲው አኽⶓ ቶኬምካ:: ኬሚካሎ አሬችጙ አኺኒ ክልሉ ምንግስትስ እንፃኽስስታው ቴግባር አኽⶓኪላ እርዳትፅካ::

ቻግኒ ኬቴሙ ቺፅጝፂዳ ቲን ፅፌት ጝናሱ አላፋ ሲሲተር ተስፋ ሽባባው ቻግኒ ኬቴሙ ቺፅጝፂዳ ምድራሺው ቑንዚ እሳንስ ኬሴትስቱንኩ ዙራሙርካዴስ እምፕል አኽⶓ ቶኬምካ:: ኩርማን አሜትዳ ምድራሺ ቑንዚው ምርማሪ ፄውስታይኩ 38 ሻይ 5 ሊኻ አንኩዋፅካ ቑንዳስቴንካዴስ 19 ሻይ 9 ሊኻ ሹኻፅካ እምፕላ ምድራሺው ቑንዚ አግስታማ አኬምስቱንኩ አኽⶓ ጌሌፅካ::

31 ሻይ 4 ሊኻ አንኩዋፅካ አጐበሮ እምፕልታቕስ ታምፅጝስ ካሊⶓ ጉሽካ::

ዙራሙሬ ፃንኩፃንታስታ አጐበሮ ቱስቲስ ቴኬምስታንታ ዴሜካ ሼውቴ ፌቴርⶓ እንፅኺ እንፃኽስስትⶓ ቶኬምካ::

እይስትኹሳ አጐበሮ እምፕልታቕ ቱስቲስ ቴኬምስትጝዳ ችግር ዝኩⶓ ጉሽካ::

ሶኼት ቺፋ አርብስ ዙራሙሬ ፃንኩፅጙ እንፅኺ እንፃኽስስታማጊ አኽⶓኪላ እርዳትፅካ::

ምንድራሺው ቑንዚስ ቑንዳስታንኩ እምፕልታቕስ እጁ እንፂጛ ጌቴማቲታ እንፃኽስስታማጊ አኽⶓኪላ ጌሌፅካ::