እልውኒው ጉዳይ

ባሩ ቤር ጋቲት አጌራ ንጝ ውክያኖስሊ አኹኪ ባርሊ ታምትጙኽ ክም እላቲት አጌራ አኽⶓ ብሪታኒካው ፍንዴስ አግስትኹ ንባር እርዳትፄ:: ባሩ ቤር እላቲው አኽጝ ዴሜካ ኬፍቲኒ ሜርኬቡሳ ፍሼስታ ውክያኖስዴስ ይንታንኩ ምግብ አብትካውሳ እንፂⶓ ሲፍፄ:: ንባር ቶኬማውስታጊ አፍሪካ፣ ኢስያ፣ አውሮፓስታ ደቡብ አሜሪካዳ 44 ባሩ ቤር አኹኪ ወዴብ እላቲኩ አጌርካ ዝኩና:: አኽጝስኪ ጛጂሱ ዝኩዊኒው አኺኒ ዎሌን አጌርካው ባኩ ፋይዳ ስርቱኺያኽ:: ጊፁሳ ልቕልቕቴስታ ባርኾቼውሳ ታምትጜ ይዝኩታታ ፄዋው አኽⶓ ምታኒ አብቱ ውማይቴንካ ጌሌፃና:: 44 ባሩ አብጂሊ እላቲኩ አጌርካ ክቻዴስ 16 ያኻንኩ አፍሪካው አጌርካ አኽⶓኪላ ቴቤቤርጙንኩ ምንግስትካ አችቱ ንባር ቶኬሜ::

ጊፁሳ ልቕልቕቴ ኬሌቴፍጝፅጝስ፣ ይኮኖሜ ዴጌፋንኩ እሊኩ ዜርፍካዋ ሌጌፅጝስስታ እዝቦ ቴኬምስታንታ ፄውጝስ ባሩ ቤር ወሴናንቲያኽ:: ወዴባ ጋው አጌራ አኽጝ ጌቢውስታ ፍሺው ጊፁሳ ልቕልቕቴ ኬሌቴፍጛቲታ ፄውጝዴስ ፌይኹስ ይኮኖሚዳ ታምፃው ቻኒስት ኬፍቲኒያኽ:: አይርስ አኹኪ ወዴቦ ክራይትጝስ አኮሜችስታው ጊፁ ልቕልቕቲ አጌርካዋ ኬፍቲኒ ፍሺስ ታምፄ:: ይኮኖሚኪላ ፋይስታው ሜቴንስ ሌጌፅጝስ ቼጌርፃያኼ:: ባሩ ቤር ጉዳይ እልውኒው ጉዳያኽ አኽጝስኪ አጌራኻዳኪ ያኻ ባርኾቼዳ ዝኩናኻ ይቶፒያውያንካ ወክትስ ዝኩኽሳ ፖለቲካዋ ፍቺጝስ ባሩ ቤር ይቶፒያስ ፋይፃቲው አኽⶓ ሊሊትጙኽ ሚዲያስ ዙማኒስ ቹኒትስትጝ ኬርት አኽⶓ ማሊጝ ቱስቴ::

ባሩሳ ቤሮ አግፅጝ ብሄራዊ ትክሞ ማንዲፅጝ አኽጝስ ፖለቲካስኪ ያኻ ሊሊትጙንኩ ምክንያትካስ ሊሊት ዝኩኒኪላ አጌራውሳ ብሄራዌ ትክሞ አግፅፃው ጉዳይዳ ኩፅኒ እምፕላ አኽጝ ፋይፄ:: አጌራውሳ ብሄራዌ ትክሞ ፌይፃማ እይጝስ ጛርቱሳ ፋዮ ዋኽትጝፅጝስ ሞኬርጝ ኩፅኒ አጌራውሳ እዝቦ ካዲጝታኪላ ቼፍስታው አኽⶓ ማሊጝ ቱስቴ:: ባሩ ቤር ዝኩዋኒ አጌራ ታንቤውሳ ልግስኔስታ እዝብ አግፃውሳ ትክሞ ማሊጝስ ካሊስታው አክምስጊ ጐንዳ ቲሪጝስ ይቶፒያ ባሩ ቤር ዌና ታኻታ ፄውጝስ ፅሬቶ ፄውጝ ቱስቴ::

ይቶፒያ ባሩ ቤር  ዌና ታኹኻ ንጝ ዴሜካ ካሜንስታንኩስስታ ሌጌስጝዳ ዝኩንኩ ጄርካስ ሌጌስቱትሳ አጌራዋ አሬኬብፅናኻ አኽጝስ ጄርካ ፍንሾሱሳ ዝኩዊኔ ሳኪትጙኽስታ ሌጌስቱት አጌራዳ ዝኩዋንታ ፄውጝስ ካሊስታውያኽ:: ባሩሳ ቤሮ አግፅጝ እልውኒው ጉዳይ ፄዋማ ካንትጝስ ፅንጋኽሳውሳ አሳቦ እይጝዴስ ክብስስትጝ ቱስቴ::