ባይሉ ጊሊፅፂ

ታደለ አጋጄ

ጃኑ አዊው እዝብ ሊሊትጙንኩ ክብርኩ ባልካዳ ሴያኑ ባይሉ ስያኽ:: እምፕልታቕ ሊሊትጙንኩ ባልካዳ ባይሉ ስይስ ግዲትካማ ካንትስጝ ዴስስታማጊ ይንታ:: ሊሊትጙንኩሳ ክብሩ ባልካዳ ድሚስታ ፉቺ ኬሌምዴስ ግቢትስታው ጃኑ ስይስ ሴይካማ ኬቤርፃና:: ባይሉሳ ስዮ እንፃኽስታንትካኪላ ሊሊትጙኽ ዲዛይንስ ግቢትጝስ ባይሉሳ ስዮ ፋያንትካስ ዲግሳና:: ጋያኪ አዊ እዝቡ ባይሉ ስይ ያኹኽ ጃኑ ባይሉሳ እሜ ባይፃውላስ ዋታኮው ዳድስ ግቢትስታማጊ አኽⶓ ባይሉሳ ስዮ ግቢትካማ ዋያንኩሊ ስልኪስ እጂጜ ፄውና::

አቶ መንግስቱ ምትኩ እንጃቢሪ ኬቴምዳ ባይሉሳ ስዮ ዋይጝስ ቺትጛና:: 2010 ም/አታዳ ጄሜራማ ባይሉሳ ስዮ ግቢታማ ዋይⶓ ጄሜርካ:: እን እንፅኺሾ ቱኑሳ አኺኔ እንክርፃኒስኪላ ጝናአቕ ባይሉሳ ስዮ እንፃኽስታንኩ አኽጝስ ቹዋ ታብልዴስ ካንትጝስ ክንትⶓ ዙሜካ:: ጋቤ፣ ክቢሶ፣ ዱንጌ፣ ጃኖስታ ፄጌርጛንኩ ባይልኩሳ ስይካዋ ግቢትጝስ ዋያና::

እንፅኼ ጄሜሩኑ ጊዝዳ ባይሉሳ ስዮ ግቢታንኩ ያኻ ባይሉሳ ስዮ ፋያንትካ ልቓ እሺⶓ እንክርፁንኩ አቶ መንግስቱ ናካ ኩፅኒ ባይሉሳ ስዮ ፋያንትካኪ ያኻ ዋያንኩ አቑ ቼፍ ዴሜካማጊ አንትⶓ እንክርፄካ::

ባይሉ ስይ፣ ኻስስ፣ ክስታንትስ፣ ልዴትስስታ ሊሊትጙንኩ ክብርኩ ባልካስ ሴይስታው ክብሩ ስይ አኽጝስ እምፕልታቕ እኒጛ አኼንካዳ ሴያኑሳ ባይሉሳ ስዮ ማልጛ ፋያንኩ አኽⶓ እንክርፄካ::

ቤዴርንኹ ጊዝዳ ምንጊ ድስጝዳ እሺኹ ባይሉ ስይ ናካ ኩፅኒ እንግራ እሳንጛማጊ አኽⶓ ቶኬምካ::

አገው ፌሬስቴንካው ማቢሪ አሜት ቺፋ ኬቤርስታማጊ አንትጝ ዴሜካ ጃኖ እሳንስ አቕትጝፅጙሳ ድሎ ፌቴርኹ አኽⶓ ዙሜካ:: አቶ መንግስቱ ባይሉሳ እሜ ባይፃውላ ጃኖ ዝቤናዊ ዳድስ ግቢትጝስ ስዮ ፋያንትካስ ታምፃማጊ አኽⶓ ዲብስካ:: “እንጃቢሪዴስ ፌያማ እሊኩ ኬቴምካዳ ዝኩንኩ ጛርት አቕ ጃኖ እንፃኽስትናያታ ካሲካማጊ አኽስ እንፃኽስትናናጊ እንፃኽኔ” ኑንኩ አቶ መንግስቱ ባይሉሳ ስዮ ፋያንትካ ጊዝዴስ ጊዞ ዴሜክካማጊ አኽⶓ ቶኬምካ::

ባይሉ ስይ ጝንካዋ ዝቤናዊ ዳድስ ግቢትጝስ ስዮ ፋያንትካስ ታምፅካማጊ አኽⶓ ጉሽካ:: “ባይሉሳ ስዮ ግቢታንኩ ባይሉሳ እሜ ባይፃውላስ ግቢስትጝ ቱስቴ ኪላ” ንካ:: ጃኑ ስይ እስታኒ አዊ እዝቡ ባይሉ ስይ አኽⶓ ሴይጝጚዴስ ካንትካማ እሊኩ እምፕልታቕ እርዳትስታንኩ አኽⶓ ጉሽካ:: አቶ መንግስቱ እሊኩ እምፕልታቕ ስዮ ሴይጝስ ጁትጛንታ ቴሌቭጅኑ ፕሮግራም እንፃኽስቱስስታ አብን ዲጉስ ጃኑ ሴይስታማ ያኹኒ ጉዲያኽ ናውሳ እንፅኼንቶ ታምፅካ::

ባይሉሳ ስዮ ፋያንትካው ቼፍ ዴሜካማጊ አንትጝ ባይሉሳ ስዮ ግቢቴካማጊ ዋያንኩስ እንፅኺው ድል ፌቴርስታታ ፄዋው አኽⶓ ድኹዌካ::

አቶ መንግስቱ እን እንፅኺሾ ቱኒዴስ ናቴ ባይሉሳ ስዮ ዋይጝስ ቴኬምስታንታ አኽⶓ ዙሜካ::

እሊት እንጃቢሪ ኬቴምዳ ጃኖ ዝቤናዊስስታ ባይላዊ ዳድስ ግቢትጝስ ቴኬምስታንትካስ ዋይታት ሰላማዊት ሙሉነህ ጃኖ ሊሊትጙኽ ዲዛይንስ ግቢትጝስ  ዋይቴ:: 2016 ም/አታዳ ጄማርታታ ጃኖ ባይሉሰታ ዝቤናዊ ዳድስ ግቢትጝስ ስዮ ፋያንትካስ ታምፄታጊ አኽⶓ እንክርፄ:: ሊሊትጙኽ ዲዛይንስ ግቢትጝ ዴሜካ ስዮ ፋያንትካው ቼፍ ዴሜካታ ምክንያታ አኽⶓ ዙሜ:: አገው ፌሬስቴንካው ማቢሪ ኬቤርስታው ጊዝዳ እንፃኽስቲኹሳ ስዮ ካንትፅጙሳ ድሎ አግፅⶓ ዲብስታ:: አጌራኻዳስታ ባርኾቼዳ  ዝኩንኩ ስዮ ፋያንትካስ ታምፄታጊ አኽⶓ ዙሜ::

አዊ ብሄረሰቡ ቺፅጝፂው ባይሉስታ ቱሪዝሙ ዎኬልስታንቲ አላፊ አቶ ወለሊ ጌቴ አዊ እዝብ ባይሉ ስይ /ጃኑ/ ዝኒስ ባል ጌርካስ ሊሊትጙንኩ ባልኩ አኼንካዳ ሴይስታው ክብሩ ስይ አኽⶓ ጌሌፅካ:: ቤዴርንኹ ጊዝዳ እምፕልታቕ ዝቤናዊ ስይዳ ትኩቶ ፄዋሺንኩ ያኹኒውላ ዲጊ ጊዝዴስ ናቴ ኩፅኒ ባይሉ ስይስ ሊሊቲ ትኩት እይስታማ እንፃኽስትጝስ ባይሉ ስይ ሴይስታማጊ አኽⶓ እርዳትፅካ::

ባይሉስታ ቱሪዝሙ ሜምሪ ጃኑ ሊሊትጙኽ ኩችቲዳ ስይስታታ ፄውጝስ ስዮ ሴያማ ካንትስትጝስ ባይሉ ስይ እሳንስ ሴይስታታስታ አቕትጛታ ፄውⶓ ጉሽካ::

ጃኑ ሴይስታማ ካንትስታኒ አዊ እዝቡ ሴይጝጚ አኽⶓ አይኪ  ካንታማ እርዳትስቴ ኑንኩ አቶ ወለሊ ባይሉሳ ስዮ ሊሊትጙንኩ አኼንካዳ ሽልማቲስ እይጝስ አቕትጝፅጙሳ እንፅኼ እንፃኽስትካማጊ አኽⶓ እርዳትፅካ::

ባይሉ ስይዳ እንፃኽስታንኩ ጛርት አቕ ስዮ ሊሊትጙኽ ዲዛይንስ ግቢቴካማጊ ስዮ ፋያንትካስ ታምፅካማጊ አኽⶓ ቶኬምካ:: ጃኑ ሊሊትጙኽ ዲዛይንስ ግቢትስትጝ ዴሜካ ጌቤሉ ታምትጚ እሳንጛታስታ ስዮ ፋያንትካው ቼፍ ዴሜካታ ፄውⶓ ኽይትጝፅካ::

ባይሉ ሴይጝጚ ጛው አይት አኽጝስ ጛውሳ አይቶ አቕትጝፅጝ፣ ባይሉሳ ስዮ ሴይጝስ ጛጛርትጛሳ ጌሌፅጝስታ ጛጂሱ አብት አኽⶓ እርዳትስትጝስ ሴይጝ ቱስታው አኽⶓ ቶኬምካ::

ባይሉ ስይ  እኖጂስ አቕትስ ግቢትስትኹ እኖጂሱ ምርት አኽጝስ እንሳ ምርቶ ሌጌፅጝስታ ኬፍፅጝ ሚንች ትክም ዝኩኽ አኽⶓ እርዳትፅካ: