እንጃቢሪ ኬቴምዳ ኮሪደሩ ልማት ጄሜራታ ካሲስታ

ታደለ አጋጄ

እንጃቢሪ ኬቴምዳ ኮሪደሩ ልማት እምቢታማ ጄሜራታ እንጃቢሪ ኬቴምኩ ዝኩዋንትካ ካሲና::

ኮሪደሩ ልማት ኬቴሙሳ ፍንቶ ኬሽጝፅጝስ፣ እምፕልታቕስ አሜቻውሳ ዙራሙሬ ፌቴርጝስ ኬቴሞ ግዲፅጙ ቴግባርያኽ::

ፃንኩቶ ማንዱኽስታ አሜቻው ዙራሙሪዳ እምፕልታቕ ዝኩዋታ ፄውጝስ ኬቴምዳ ያኻ ጌፄሩ ዙራሙሪዳ እንፃኽስስታው ልማቱ እንፅኺያኽ::

አጌር አቡቑ አችስ አዲስ አበባ ኬቴምዳ እንፅኺ ጄሜርስትኹ ኮሪደሩ ልማት አዲስ አበባዋ ግዲፅጝስ እሊኩስ ምሳላ አኽጝስ እሊኩ ክልሉ፣ ዞኑስታ ወረዳው ኬቴምሾ እሳንጛታ ፄውጝስ ኮሪደሩ ልማት እንፃኽስስታማጊያኽ::

አዲስ አበባዳ እንፃኽስስትኹ ኮረደሩ ልማትዳ ክርፂ ዋይሚ ካንትስታ:: አዲስ አበባዋ ምሳላ ፄውጝስ እሊኩ ኬቴምካዳኪላ ልማቱ እንፅኺ አኮሜችስታማጊያኽ::

አማኻሪ ክልልዳ ሊሊትጙንኩ ኬቴምካዳ ኮሪደር ልማቱ እንፅኺ እንፃኽስስታማጊ አግስቴ::

አዊ ብሄረሰቡ ቺፅጝፂዳ አግስታንኩ ሊሊትጙንኩ ኬቴምካዳ ኩፅኒ ላንቡሳኺስታ ኮሪደር ልማቱ እንፅኺ ጄሜርስታያ::

አውጚው ቴሌቭጅንሊ እጂጜ ፄውንኩ እንጃቢሪ ኬቴሙ ዝኩዋንትካ ኮሪደር ልማቱ እንፅኺ እምቢታማ ጄሜራያታ ካሲካ::

እንጃቢሪ ኬቴሙ ዝኩዋንቲ ግርማው ጌታሁን ዙሙኑውስታጊ ይቶፒያዳ ሊሊትጙንኩ ዙራሙርካዳ ኮሪደሩ ልማት ጄሜሩኒዴስ እጄ:: ኬቴምዴስ ፌያማውላ ጌፄርዳጊ ኮሪደሩ ልማት እንፃኽስስታማጊያኽ:: አዊ ብሄረሰቡ ቺፅጝፂዳ ኩፅኒ ጄሜርስታያ:: ኮሪደሩ ልማት  ጄሜራያሱሳ ምክንያቴ እምፕልታቕ ካሲካማጊ አኽⶓ ጉሽካ::

“ኮሪደሩ ልማት ዙራሙሬ ግዲፅጝስ ናኪኒ ክምንትስ ያኻ ቻሱ ክምንትስ ቴኬማዊያኽ:: ኬቴሙ ፃንኩት ማንዲስታኒ እምፕልታቑ ቲን ማንዲስታማ አንኩሊ ዴሳታ ፄዌ:: ኬቴሙ ፃንኩት ማንዲስታኒ ቱሪስቱ ጉስፂ አኽጝስ ሚፄ አግፅፄ” ናኒስ ኮሪደሩ ልማት እምፕልታቕስ እያውሳ ትክሞ ዙሜካ::

እሊው እንጃቢሪ ኬቴሙ ዝኩዋንቲ ወርክነህ ታምር ኮሪደሩ ልማት እሊኩ ኬቴምካዳ እንፃኽስስቱስ እንጃቢሪዳ ኩፅኒ እንፃኽስስታማጊ ጋቲው አኽⶓ ዲብስካ::

እንጃቢሪ ኬቴምዳ ኮሪደሩ ልማት እንፃኽስስታዊያኽ እስታማ ኮንቲነር ፌሬሱኒዴስ ፋሌንጋ ቓቔፅⶓ ቶኬምካ:: ኮሪደሩ ልማት ግቢትስትጝ እምፕልታቕስ ሚንቾ ትክሞ እያው አኽⶓ ጉሹንኩ ኬቴሙ ዝኩዋንቲ ላንቡሳኺስታ ልማት እንግርትጝስ ማልጛ አዜንⶓ ዙሜካ::

ዎታትካስ እንፅኺው ድል ፌቴርስታታ ፄውጝስ ኬቴሙ ልግስስታ ቱሪዝምዴስ ሚፄ አግፅጝስ ሚንች ትክም ዝኩኽ አኽⶓ ድኹዌካ::

ኮሪደሩ ልማት ምንግስትስ ይቪቺስ እንፃኽስስታው ያኺትየስ እምፕልታቑሳ ቴሳትፎ ካሴው አኽⶓ ቶኬምካ::

ጉዳይ ትኩታኩ አካልካ ሊሊቴ ትኩቶ እይጝስ ልማቱ እንፅኺ እምቢታማ ጄሜርጝ ቱስታው አኽⶓ ጉሽካ::

አዊ ብሄረሰብ ቺፅጝፂው ትክትሊ ቺፅጝፃንቲስታ ስር ልማቱ ሜምሪው አላፊ አይተነው ታዴ ኮሪደሩሳ ልማቶ አክም ፌኬዳውሳ እንፃኽስትጝስ ቴርትካማጊ አግስታንኩ አኽⶓ ኽይትጝፅካ::

እንጃቢሪ ኬቴምዳ ኩፅኒ ፅናቱ ዶክሜንት አሌድስታማ አመራርስስታ እዝብስ ጋማጋምስቱኒዴስ ፋሌንጋ ዳንጉንካዋ ክችስጝስ እንፅኺሾ ቱስታው አኽⶓ ጉሽካ::

ዲዛይኑ እንፅኺ አሌድስታማ ሳይት ጎሌልስትⶓ ቶኬምካ:: ምንግስትዴስ ማንዲስታው ባጄት ሜዴብስትⶓ ጌሌፅካ::

አኽጝስኪላ ኮንትራክተርካስ አሬኬብፅጝስ ዲጊስ እንፅኺሾ ቱስታው አኽⶓኪላ ኽይትጝፅካ::

እንጃቢሪ ኬቴምኩ ዝኩዋንትካ ልማት ኔክፃውሳ ስፍሬ ጛ ታፋስ ፌሬስፅጝስ ካንትፁኑ ቴግባር ጋሺፃው አኽⶓ ቶኬምካማ እሊኩ እምፕልታቕኪላ ልማትስ ቲቪቪርጜ ፋይፃው አኽⶓ እርዳትፅካ::

እንጃቢሪ ኬቴሙ ካሜንስታንትካ አብት ዌንስታ ዲያስፖራ ልማትስ ቴቬቬርጝስ አመራሩ ኬምፕዳ ያኻንታ እቑዌ ፌያፌይጝፄካ::

ኬቴሙስታ ስር ልማቱ ሚኒስትራ ቻልቱ ሳኒ አጌር አቡቑ አችስ 70ዴስ ጃላ ኬቴምካዳ ኮሪደር ልማቱ እንፅኺ እንፃኽስስታማጊ አኽⶓ አቕፅካ::