እንጃቢሪ ክንትፃንትካው ኮሌጅ ስልታኒስ፣ ምርምሪስስታ ኮንኪው ልግስስ ዝኩኽ ፍሺ ኬፍቲኒያኽ

ንግስቴ ተስፋ

ኮሌጅ ስልታኒስ ምርምሪስስታ እምፕልታቕ አቡቑ አግልግሎቲስ እያው ፍሺ ኬፍቲኒ አኽⶓ እንጃቪሪ ክንትፃንትካው ክንቲ ካሌጁ ሴሌቴናንትካሰታ ክንትፃንትካ ዲብሱና::

1999 ምሬት አሜታዳ ደብረማርኮስ ክንትፃንትካው ክንቲው ኮሌጅዳ 120 ሰርቲፊኬትኩ ክንትፃንትካዋ ዩኒትስ አቺትጝፃማ ሴሌቴንፅⶓ ጄሜርኹ ናኪኒ እንጃቪሪ ክንትፃንትካው ክንቲው ኮሌጅ 2003 ም/አሜታዳ ታሜትስታንትካ ክንትፃንትካዋ ዳቔፃ:: ላምቡሳ ኺስታ 30 ሻይዴስ ጃላ ክንትፃንትካዋ ዳቔርፅጝስ ካሊⶓ ኮሌጅዴስ አግፅኑኽ ንቫር ካንትፄ::

እንሳ ድሎ ቴኬምስቱንኩ ሴሌቴናንትካ ክንትፃንትካዴስ ደስታዬ ገናነው ኮሌጅ አውጚ ኮንኪስ ክንትፃንትካዋ ሴሌቴንፅጙ ግዴቲ ዝኩኽ አኽጝታጊ አውጚ ኮንኪስ ሴሌቴናማ ክንትፃንታ አኽጝ ክንቴ ሳሴርስ እርዳትፅጝስ እርዳታው አኽⶓ ዲብስታ:: ኽምቤ ኽዩኑ ኮንኪስ ክንትጝ ሳይንሶ ሳሴርስ እርዳትስትጝዴስ ጉሽፃማ ኮንኪስ ማራማርጛንታ ጉሽፃ ያኻው አኽⶓ ቶኬምስታ::

ኽምቤ ኽዩኑ ኮንኪስ ክንቲ ዲግሬ ኺስታ እይስትጝኪላ ኮንኪው ልግስኒስ ኬፍቲኒ ፍሺ ዝኩኽ አኽጝስ ኮሌጅ ታሪኮ እንፃኽስታማጊ አኽⶓ ዙሜ:: እቺካ ካስካማ ክንትጝስ ፋያንኩ፣ ጌንዜቡኪ ያኻ ሰላሙ ችግርስ ድሎ አግፃኑላ ይጉንኩስጊ ክንቲውሳ ድሎ አግፃንታ እንጃቪሪ ክንትፃንትካ ክንቲው ኮሌጅ እርዳታማጊ አኽⶓ ቶኬምካ::

እሊው ኮሌጁ ክንታንቲ ሙሉሰው መለስ ጚሾስ አውጚ ኮንኪስ ሴሌቴንካማ አውጚስ ክንትፃንታ አኽጝ ክንታንትካ ሳሴርስ ክንቴ እርዳትስትጝስ ካላንታ ፍሺ ዝኩኽ አኽⶓ ዙማ:: ኽምቤ ኽዩኑ ኮንኪስ ክንታንትካ ክንቴ አግፃንታ ፄውጝስ አኮሜችስታው ቴግባር ክንቲው ፃንኩትዳስታ ክንቴ ሳሴርስ እርዳትስታማ ዙራሙሪዳ ዝኩኽሳ እይስቴ ማራማርጝጝስስታ እምፕልታቖ አጌላገልጝስ ኬፍቲኒ ታምብ ዝኩኹ አኽⶓ ጉሹኽ ክንታንቲ ሙሉሰው ኮሌጅ አውጚ ኮንኪው ልግስዳ ፊትጛውሳ ታምቦ ይስጝፃማ ሲፍፃታ ካንቲ ዲግሳ::

ሙሉሰው ናውስታጊ አውጚ ኮንኪ ሌጌሳማ አሌድስታያሱስታ ፁፍ ፅንታው ዜርፍዳ ሚንቾ ቴግባሮ ካሴው ኮንኪ አኽⶓ ጉሻ::  ክንታኑ ሞጁልዴስ ጄሜራማ ፅናትስ እርዳታው ሜፃፍ እንፂጝ፣ ኢንተርኔቱስታ እንዴስ ቤዴራ አውጚስ እንፃኽስስቱኽ ምርምሪው ፁፍ እላቲው አኽጝስ ቼጌርስትⶓስታ ኮሌጅኪ ያኻ ትኩታኩ ቤንካ ችግሮ ኽዩኒ ቴኬምስትጝስ ካላንኩ አኽⶓ ዲብስካ:: ድምክኒስኪ ኮሌጁሳ ፃንኩቶ ማንዲጝስ እንፃኽስስትኹ ቴግባርስኪላ ዴስቲኒ አኽⶓ ቶኬማ::

ኮሌጁ ክንትፃንቲ አምናዬ ካሳሁን ቲሪትጙኽሳ አላሜ ቱስቲስ ፊትጝጝስ ኮሌጅ ናካዳ አውጚስ፣ አማኻርጚስስታ እንግሊዝጚስ ክንትፃማጊ አግስታው አኽⶓ ጉሽካ::

አውጚ ኮንኪስ ክንትፃንትካዋ ሴሌቴንጝፅጝዳኪላ እይስትኹ ትኩት ልቓ ጋቲዊያኽ ንካ:: እንጚኪላ አውጚ ኮንኪስ ክንቴ ፋያንኩ ክምንትካዋ ክችክቺስ ሳይንሶኪ ያኻ ታሪኮ ሼውናማ እርዳትስታውሳ ክምንቶ ፍሽጝዴስ ድምክና ኮንኪው ልግስዳ አሻሬ እንኩራው አኽⶓ ኽይትጝፄካ::

ክንትፃንቲ አምናዬ ናኑውስታጊ ናካ ዝቤን ታምቡኽሳ አቾ ቴኬምስትጝስ ኮሌጅዳ  ኮምፒውተር ዋኽትጛውላ ይጉጝ፣ ዳላው ኢንተርኔቱ ታምብስታንቱ ችግርስታ  አውጚስ ፃፊስትኹ እርዳታንቲ ሜፃፍ እንፂጝ ክንትፅጝስ ፅንጋኻ አኽጝስ ትኩታኩ ቤንካስታ ምሁራንካ ችግሮ ኽያንታ አሳቦ ዲግስካ::

እንጃቢሪ ክንትፃንትካ ክንቲ ኮሌጁ ዲን አቶ ጌታቸው አድማሱ ኮሌጅ አዋጅስ ቲሪትጙስ እሚኩ ሹኻ አላምካዴስ ክንትጝ ክንትፅጙሳ ቴግባሮ አኮሜችጝ፣ ችግሮ ኽያውሳ ፅናቶስታ ምርምሬ ፄውጝ እንቲታኪ እምፕልታቕ አቡቑሳ አግልግሎቴ እይጝ አኽⶓ ኽይትጝፄካ::

ኮሌጅዳ 91 ክንትፃንትካ አግስታንኩ ያኻኒስ ሴሌቴናንትካ ክንትፃንትካ ዝቤን ካሴውሳ ካሌቕቶ አግፄካማ እንፅኺሾ ቱዋንታ ቢኪፅኹ ቴግባር ትኩትስ እንፃኽስስታማጊ አኽⶓ ቶኬምካ:: ኮሌጅ እምፕላንቲ አች ክንቲ ጝናዳ ፅናቶ ካስጝፅጝ፣ ክንትፃንትካስ ቴግባሩሳ ስልታኔ እይጙ ቴግባር አኮሜችስታማጊ አኽⶓ ቶኬምካ::

እምፕልታቕ አቡቑ አግልግሎቲስኪላ ቤዴራ ሚዲቢኒ ክንቲ ጝናሳ ብስጝስ ዙራሙሪኩ አቕ ሜቴንጙኽ ጌንዜብስ ጄርካዋ ክንትፅጝስ ካላንታ አኽⶓ እርዳትፅካ::

42 ሄክታርዴስ ጃላ ብቴ እሜማ ቲሪትጙኽ እንጃቢሪ ክንትፃንትካው ክንቲው ኮሌጅ ይንታንኩ አንኩዋ አሜትካውሳ እክዶ ፍሽጝስ ውላቱዌ ኪሴ ሜዜጌብፅጝስ እንፃኽስስታማጊ አኽⶓ አቶ ጌታቸው ኽይትጝፄካ::

ኮሌጅኩ ክንትፃንትካኪ ያኻ ሴሌቴናንትካ ክንትፃንትካ ዲግሳኑሳ ካሴ ዙርፅጝስኪ ያኻ ችግሮ ኽይጝስ ኮሌጅ ትኩትስ እንፃኽስታው አኽⶓኪላ ቶኬምካ:: ታምብዌን አመራርካኪ ያኻ ዜርፉ ምሁራንካ ኮሌጅስ ዋሺኔኪ ድጋፎ ፄዋንታ እንፅኼንቶ ፌይጝፄካ ኑስ ኮሚኒኬሽኑ ሜምሪ ዜጌባ::