ቴስፌ እይስትኹ ሌጌሳታንቢ

ታደለ አጋጄ

ባርዳር ዩንቨርሲቲ ስፖርቱ አካዳሚ እምፕልታቖ አጌላጌላንኩ ዳድካዴስ እምፕል ስፖርቱ እይስቲ ዝኩክ ዎታትካስ ስልታኔ እይጝስ ሴሌቴንፁኒዴስ ፋሌንጋ ዎታትካዋ ፋያንትካ ኬችካ ይንታኒ ጌንዜባ ጋቲታ አሬኬብፄ::

2011 ም/አሜታሱ ችኹ አርፊዳ ባርዳር ዩንቨርሲቲው ስፖርቱ አካዳሚ ካሌቕት ዝኩክ 13 ሌጌሳታምብካዋ ጎሌልጝስ ሴሌቴንፁክ ዎታትካዴስ ባ/ዳርዳ ካሜንስታማ ሌጌስኹ ዳዊት ካሳው እምፕልያኽ::

ዳዊት ካሳው ስፖርቱ አካዳሚስ ጎሌልስቱስ ጎላ ማንዳ አኽጝስ እሺኾ:: ያኼስጉ ዎክቱ ሴለቴንፃንቲ ዳንኤል ጌትነት (ዶ/ር) ጌሬምፃው እይስት ዌና ያኹኽሳ ዳዊት ካሰዋ ጎላ ማንዳ ያኻማ እንክራውዴስ እሊው ስፍሪዳ እንክሩኒ ዋይሚስታ ያኻው አኽⶓ አምንጝስ ዩንቨርሲቲው አካዳሚዳ አቡቕስታማ እንክራታ ፄውⶓ ጌሌፅካ::

ባርዳር ዩንቨርስቲዳ አንኩዋ አሜታስ ስልታኔ ኬሽኹሳ  ካፅጝስ ካሌቕቶ እሜማ ፊⶓ ጉሽካ::

2014 ዩንቨርስቴ ዎኬልጝስ አርባ ምንችዳ ካስጙኽ ልኺትጚዳ ኬሽኹሳ ልኺትጚውሳ ዝቤኖ ፌይፅⶓ ቶኬምካ::

2015 ይርጋለምዳ ካስጙኽ ሌጌሳ ታምብካው ልኺትጚዳ ዳዊት ካሳው ኬሽኹሳ ቴኬምስታንታ አኽጙሳ ድሎ አግፁኻ:: እን ልኺትጚዴስ ፋሌንጋ ዴሜካ ዳዊት ካሳው 3 ፓይንት አካዳሚዳ ስልታኔ ሲፍጝጛማጊ አግስቴ::

ሴካፋ 17 አሜትዴስ ኩክራ ብሄራዊ ኬችዳ 8 ጎልካዋ ቼፍፅጝስ ካላ:: ጌና ናካዳ ሚንችካዋ ጌሬምፃውሳ ልኩ ኩታውሳ እንክሬ ካንትፅⶓ ጄሜራ::

10 አጌርካ አሴቴፍጙኑ ምስራክስታ ክችክቺ አፍሪካ ሴካፋው ዞኑ ልኺትጚዳ ኪንዲ ፍፃሚዳ ታምብጝስ እንክሬ ካስጝፅኹ ብሄራዊ ኬች ዩጋንዳው ብሄራዊ ኬችስ ዊፅስትጝስ ፍፃሚሾ ፌያውላስ ይጉዋ::

17 አሜትዴስ ኩክራ ይቶፒያው ብሄራዊ ኬች ሹኻንቴ አቾ እሜማ አሌድጝስ አፍሪካው ዋንቺው ልኺትጚዳ አሴቴፍጜ፡፡

ንቫሮ አግፅንኹኪ ኢቢሲ ስፖርትዴስያኽ