ሰላም ኬቤርፅጝስ አሬሳቻንትካ ቴኬምስታንታ ያኻንታ ካሲስቱኻ

ግስቴ ተስፋ

ወረዳውሳ ሰላሞስታ እጎ ኬቤርፅጝስ አሬሳቻንትካ ልማትስ ቴኬምስታንትካ ያኻንታ  ምንግስት ኩርፄንትስ እንፃኽስታታ ፋግቲ ለኮማ ወረዳው አሬሳቻንትካ ካሲና::

ፋግቲ ለኮማ ወረዳ ቛሪ ጊዊኒ ኬቤሊው ዝኩዋንቲ አሬሳቻንቲ ወርክነው በከለ ላጛ አሜታዴስ ጃላ ሲፉኽ ሰላሙ ዳንጉዊኒ  አሬሳቻንትካው ውላቱዊ ልቕልቕቲዳ ቻኒስቶ ፌቴርⶓ ዙሜካ:: “አሬሳቻንትካ አሜሬቱኑሳ ምርቶ ጌቤልስ ዲግስካማ ፋይስታውሳ ሚፄ አግፅጝስ ካላቲንታ ጉዳቶ ታምፃ ንካ::

ወክትስ ግብርኒው እንፅኺስ ያኻውሳ ግባቶ አግፅጝስ ፅንጋኻ አኽⶓ ጉሽካ:: ፍትሬት አብቱ ልማትስኪ ያኻ አኹዋቲ ልማቱ እንፅኺስ ክርፂ አችዳ እሺንኩ አሬሳቻንትካ ሰላሙ ችግር ምክንያታስ እንፅኺዳ ትኩቶ ፄዋቲንታ ሼውፅንታዳ ጉዳቶ ታምፅⶓ አሬሳቻንቲ ወርክነው ጉሽካ::

ምንግስት ኩፅኒ ወረዳው እዝቡሳ ሰላሞ ኬቤርፅጝስ እግ ቼሜትጛማ አሬሳቻንትካ ልማትስ ኪስስታንታ ኩርፄንትስ አላፍቶ ፊትጝጝ ፋይፃው አኽⶓ ዲብስካ:: አሬሳቻንቲው ይኮኖሚ ሰላሙ ችግር ምክንያታስ ጉዲስታቲታ ምንግስት አኮሜቻው ሰላሞ ኬቤርፅጙ ቴግባርዳ ታምቦ ፊትጝጝ ማንዲስታኩ አኽⶓ ጉሽካ::

ዊዛሩ ወርክነሽ በላይ ኪላ ቛሪ ጊዊኒ ኬቤሊው ዝኩዋንትካኽ:: ላጛ አሜታዴስ ጃላ ሲፉኽ ሰላም አቲጝ ኹኑ ይኮኖሚው ቴኬምስታንትዳ ቻኒስቶ ፌቴርⶓ ጉሽካ:: እንጚስኪላ ኹን እንሴስካዋ እሩብፅጝስስታ ስኔ ጌቤልስ ዲግስጝስ ኬሻንቴ ዝኩዊኔ እሺንኩ ያኹኒውላ ሰላም አቲጙ ምክንያታስ ኩፅኒ ታፎ ናኼስካ ይጉዋንታ ቻኒስቶ ፌቴርⶓ ዲብስካ::

ሰላሙ ዳንጉኒ ኽታዋስታ ቹትካ ጝንዳ ካሜንካማ ጉዲስታንታስታ ካሜናንትካ ክምንቱ ምክንያቲስ ክታታ ፄዋው ጋቻ ኽዮ አግፁኒ ኹኑ ጉዳት ኔኬታው አኽⶓኪላ ቶኬምካ::

ጋያኪ ኬቤሊታ ይስጛማ ሲፍሺኹ ፍትሬት አብት ልማቱ እንፅኺ ቱስታ ጋቲታ ዶንጌቱንኩ አይልካስ 1 ትኩማ 5 ሚሊዮንዴስ ጃላ ጌሜትስታው ዴኑ ልማት እጋፊ ዳድስ ወይስታማ እዝቡ አብት ዳዴኽስታማጊ አኽⶓ ጉሽካ:: ዎታታካኪላ አጌሮ ባይፅካማ ስዴታ ፌⶓ ዊዛሩ ወርክነሽ ዙሜካ::

“አቒ እንኪስ እጂኒዴስ ኬሻንቲ ጌርክ ይንታው አኽⶓ ቴስፊስ ማንዲትጝናናጊያኽ” ናንኩ ዊዛሩ ወርክነሽ ናካዳ ኩፅኒ ልቓሱላ ያኹኒ ሰላም ዙራማ እንፅኺዳ ትኩቶ ፄዋንታ ፉሬ እይⶓ ድኹዌካ::

አሬሳቻንቲ አልማው ታመነኪላ ፌዩንኩ አሜትካዳ ጛው ዙራሙሪ ሰላም ያኻውላ ይጉጝ ታምፅኹ ጉዳት ሊኪስታቲው አኽⶓ ዙሜካ:: ክንታንኩ ክንታንትካ ቴስፌ ኬውካማ ፋይስታያሱ አላሚሾ ካሳንታ ፄውⶓ ዲብስካ::

ወክትስ እሺኹ ጋቻው አላሚ ፃንጌኽፃሺኩ ያኹኒውላ ጊዝዴስ ፋሌንጋ ኩፅኒ ጋቻው ጉዳት ሊኪስታቲው አኽⶓ እርዳትስትጝስ ኩስጚስ ጉዳዮ ኽይጝ ውላስጊ ፍሽጝፃው ዳድ አኽጝስ ሰላም ኬቤርስታታ ሹማጌላ ያኼካማ ታምቦ ፊትጜካማጊ አኽⶓ ቶኬምካ::

አሬሳቻንቲ አልማው “አሬሳቻንትካው ትክምስ ታክሳው አካልጊ ሰላምስ ቢዲሬ እይጝስ ልማቱ እንፂኺዳስታ ፍታዊ ቴኬምስታንትዳ ታምቦ ፊትጙኒ ኬሼ” ናኒስ ካንቴ እይካ::

ሰላሙሳ ችግሮ ፌቴራንኩሳ ኩስጝፅጝስ ሰላምሾ ዙራንታ፣ እግዴስ ጃላ ያኻንኩሳ ዴሜካ ካሲስታንታ ፄውጝስ ታምቦጊ ፊትጛንኩ አኽⶓኪላ ዲብስካ::

ፋግቲ ለኮማ ወረዳ ብልፅግኒ ፓርቲ ቻፊ ፅ/ጝናሱ አችትጚ ዜርፉ አላፊ አቶ አይተነው አለምነው ምንግስት ሰላሞ ኬቤርፅጙ ግዴቲስታ አላፍት ዝኩኽ ያኹኒውላ እምፕልታቑ ቴቬቬርጛ ጋቲታ ኩፅኒ እክዶ ሳኪትጝፅጝስ ቼግርፃው አኽⶓ ጌሌፅካ::

እዝብስታ ምንግስት  ቹኒትጛኒ ፋይስታውሳ አላሜ ሳኪትጝፅጝስ ፅንጋኻ ያኻው ጉዳይ እላቲው አኽጝስ ፌቴርሰትኹሳ ጋቻዋ ኽይጝስ ኩስጚስ ቢዲሬ እይጝ ማንዲስታው አኽⶓ ጉሽካ::

ሰላም ኬቤርስታውላ ይጉጝ ዎታትካው እንፅኺው ድልዳስታ አሬሳቻንትካው ልማቱ ቴኬምስታንትዳ ታምፃውሳ ጉዳቶ ካላካልጝስ   ምንግስት ኩርፄንትስ እንፃኽስትካማጊ አኽⶓ ቼሜትጝፄካ:: ላጛ አሜታስ ጉዲስትኹሳ አሬሳቻንትካውሳስታ ዎታትካውሳ ይኮኖሚውሳ ልቕልቕቴ ካሲትጝፅጝስ ምንግስት አላፍቶ ፊትጛው አኽⶓ ቶኬምካ::

ወረዳው ቹዋ ቺፅጝፃንቲ አቶ ታገል እጅጉ ጛሾስ ሰላም ዊዳፊስ ኬቤርፅጝስ አይማኖቱ ታብል፣ አጌሩ ሹማጌልካስታ ውላጊ እምፕልታቕ ታምቦ ፊትጛንታ ቶኬምካ:: ሰላም ኬቤርስታኒ ወረዳው ዝኩዋንትካው ካሲ ዙርሜ አግፃው አኽⶓ ጉሽካ:: ወረዳው አሬሳቻንትካው ልማቱ ልቕልቕቲዳ ቻኒስቶ ፌቴርኹሳ ሰላሙሳ ችግሮ ኽይጝስ ምንግስት ትኩትስ እንፃኽስታው አኽⶓ ጌሌፅካ:: እንጚስኪላ ምንግስት ኬቤሌኺስታ እንፅኺውሳ ማይኬሎ ፄውጝስ እዝቦ ዙሚትጝፅጝስ ክልሉሳ ካይፃንቴ እክዶ ቴግባርዳ እሽፅጝስ እዝቡ ቴኬምስታንትስ እንፃኽስትጝስ ፅሬቶ ፄዋማጊ አኽⶓ ኽይትጝፄካ::

አቶ ታገል ናኑውሰታጊ ሰላሙ ችግር ዝኮ ንጝስ ይቪቺስ ኽይ አንታቲው አኽጝስ ኩስጜ ጉላላ ፄውጝስ ምንግስት  ልማቱ እንፅኺዳ ትኩቶ ፄዋው አኽⶓ ጌሌፅካ::

ጋያኪ ግብርኒው ዜርፍዳስታ ዎታትካስ እንፅኼ ፌቴርጝዳ ሰላሙ ችግር ቻኒስቶ ፌቴራቲታ ትኩትስ እንፃኽስታው እክድ ዝኩⶓ ጉሽካ::

ወረዳው እዝብ ልማቱ ፅንጋኻ ያኻውሳ ሰላሙሳ ስጋቶ ካላካልጝጝስስታ ችግሮ ፌቴራንኩሳ እግስ ፌይፃማ እይጝስ ፄትቲው ኬቤርፃንትካው ኬምፕዳ ቲሬታንታ አቶ ታገል እቑዌ ዲግስካ::