አኹዋቲ ልማታ አሬሳቻንትካዋ ቴኬምስታንታ ፄዋማጊያኽ

ታደለ አጋጄ

አኹዋቲ ልማትስ ኬሽኹሳ ምርቶ አሜሬትጝስ ቴኬምስታንታ አኽⶓ ባንጂ ወረዳው አሬሳቻንትካ ዙሙና::

አኹዋቲ ልማት ሊሊትጙንኩ አኹኩሳ ጉላልካዋ ቴኬምስትጝስ ሴብሎ ሊሚፃኑ አሬሳቻንትካ ምግቡሳ ዋስትኔ ቼሜትጝፅጝስ አኹዋቲው ልማትስ ሊሊቴ ትኩቶ እይካማ እንፃኽስትካማጊ አግስታና::

አጌርታ ጄሜርስትኹ አኹዋቲ ልማቱ እንፅኺ ክርፄ ዋይሜ ሜዜጌብፃማጊ ያኹስ ሊሊትጙንኩ ዙራሙርካዳ ዝኩዋንኩ አሬሳቻንትካኪላ አኹዋቲ ልማትስ ኬሽኹሳ ምርቶ አሜሬትጝስ ቴኬምስታንታ አኽⶓ ዙሜካ::

አሬሳቻንቲ አዲሱ አለነ ሲንኪሲ ኬቤሊው አሬሳቻንትካኽ:: አኹዋቲው ልማትስ ሊሊትጙንኩሳ ሴብልካዋ ሊሚፅጝስ ትክሞ አግፅⶓ ዙሜካ:: ምንግስት አኹዋቲስ ሊሊቴ ትኩቶ እያማ እንፃኽስትጝስ አሬሳቻንትካዋ ቴኬምስታንታ ፄውጝስ ማልጛ ዴስቲኒ አኽⶓ ዲብስካ:: ፌይኹ አሜትዳ አኹዋቲ ልማትስ ኬሽኹሳ ምርቶ አሜሬትካማ ትክሞ አግፅⶓ ድኹዌካ:: ንጙዊኒ አኹዋቲው እንፅኺዳ ዜሮ ዜሬካማ አግስታንኩ አኽⶓ ቶኬምካ:: ስንዳዩሳ ክላስተሮ ሊሚፅጝስ ቤዴራ ቴርቶ ፄዌካማጊ አኽⶓ ኪላ ጉሽካ::

ጌቤልስ ማልጛ ፋይስታንታ ያኹንኩ ጉባሬ፣ አምሌስታ ፄጌርጙንኩሳ አሜሬትጝስ እንፃኽስትካማጊ አኽⶓ ዲብስካ:: አሬሳቻንቲ ኬቤሊታጊ ጉባሬ እሳንስ አሜሬትጝስ እንፃኽስትካማጊ አግስታንኩ አኽⶓ ዙሜካ::

አሬሳቻንትካ አዲሱ ፋያኑ ግባትስታ ዜርዳ እንዳርማኪ ችግር እላቲው አኽⶓስታ ዎክትስ ዲግⶓ ቶኬምካ::

ባይሉ ዳድስ ግቢትስትኹ አኹዋቲው ዴዴክ አኾ ቱስታ ጋቲው ዳድስ ባኬናታ ፄዋማጊ አኽⶓኪላ ዙሜካ::

ዊዛሩ ማናሉሽ ዘሩ ባንጂ ወረዳ ሲንኪሲ ኬቤሊዉ አሬሳቻንትካኽ::ሲዚ ዉጋባ ብቲዳ ሊሊትጙንኩሳ ሴብልካዋ ሊሚፅጝስ ትክሞ አግፄካማጊ አኽⶓ ዲብስካ::ቡኖ ፣ቢራዉሳ ፣ስምኬ፣ ጉባሬስታ እሊኩሳ ሴብልካዋ እሳንስ አሜሬትጝስ ቴኬምስታንታ ያኼካ:: ጌቤል ኹዋኩ  ሴብልካዳ ትኩቶ እይካማ እንፃኽስታንኩ አኽⶓ ቶኬምጝስ እምስትኹ ምርቱ ዝቤንዳ ኬሽኹሳ ሴብሎ አሜሬትጝስ እንፃኽስቴካማጊ አኽⶓ ዲብስካ:: ቢራዉ ስምኪዴስ ይቪቺ 12 ኩንታልዴስ ጃላ ሴብሎ አሜሬትጝስ ካላንኩ አኽⶓ ቶኬምካ::

ባንጂ ወረዳ ግብርኒ ፅፌት ጝናዳ ትክልቲውስታ ኩፓኩፒው ውማይቲኒ አዲስ ፍካዱ ወረዳታ አኬድስትኹ 3 ሻይ 7 ሊኻ 75 ሄክታር ብቴ አኹዋቲስ ሊሚፅጝስ ጐሌልስታማ 3 ሻይ 4 ሊኻ ላጚቲፅካ አንኩዋ ትኩሚ 75 ሄክታር ብቲ አኹዋቲስ ሊሚፅⶓ ጌሌፅካ:: እስካዊ አኹዋቲ ልማትስ ሊሚፅጝስ አኬድስትኹ 1 ሻይ 7 ሊኻ 53 ብቲዴስ 4 ሊኻ 75 ትኩሚ 3 ሄክታር ብቲዳ ዜርስትⶓ እርዳትፅካ::

አጌርታ ስንዳይስ ሊሊቲ ትኩት እይስታማ እንፃኽስስታማጊ አኽጝስ ወረዳታኪላ 80ዴስ 90 ታፋ ያኻው አኹዋቲስ ሊሙኽ ስንዳይ አኽⶓ ጌሌፅካ::

አሬሳቻንትካ አኹዋቲስ ስንዳዮ ሊሚፅጝዴስ ኬምፕስ ኬምፖ ጌቤል ኹዋኩ ሴብልካዋ ሊሚፅካማጊ አግስታንኩ አኽⶓ ቶኬምካ:: ፌሬንጅካ ጉባሬ ሊሊቴ ትኩቶ እይጝስ እንፃኽስትካማ ኬሽኹሳ ትክሞ አግፄካማጊ አኽⶓ እርዳትፅካ::

ስንዳዩሳ ዜሮ አሬሳቻንትካስ ዲግስጝስ ችግር ዝኩኒውላ ጛጂሱሳ ዜሮ ዜራንታ ፄውⶓ ጌሌፅካ::

አሬሳቻንትካ ፋያኑሳ ግባቶ ዎክትስ ዲግስጝስ ውማዩሳ እርዳቴ ግብርኒኩ ውማይቴንካ እይካማጊ አኽⶓኪላ ቶኬምካ::

አዊ ብሄረሰቡ ቺፅጝፂው ግብርኒ ሜምሪው አላፋ ዊዛሩ ቤዛዊት ጌታሁን አዊ ኮምኒኬሽንስ እዩኑ ንቫርስ አኹዋቲውሳ ምርቶ ሌጌፅጝስ ጊዞስታ ግርቦ ክብሳንኩ ቴክኖሎጅካዋ ትክምዳ እሽፅካማጊ አኽⶓኪላ ቶኬምካ::

እምስትኹ ምርቱ ዝቤንዳ 34 ሻይ ሄክታርዴስ ጃላ ብቲ አኹዋቲው ስንዳይስ ሾፌንስትጝስ እንፃኽስትካማጊ አኽⶓ ጌሌፅካ::