ካንቴ ክችስⶓ ፋያው አካል ጉዳቴንት

ታደለ አጋጄ

አካል ጉዳቴንት ዋሺኒኪ አካሉ፣ አንኩሊውስታ ፄጌርጙንኩዳ ታምባው አካሉ ዳንጉዊኒ ያኹስ ካሜንስቱኒዴስ ጄሜርካማ ታክሲልስ ጌቴማው ኬሴትስ አኹኪ ቑንዚስ ኬሴትስትጝስ ካሌ:: ትክላሊ አሌሙ እዝብዴስ ሊኽዴስ 16 ታፋ ያኻንኩ አቕ አካል ጉዳቴንካ አኽⶓ ቴቤቤርጙንኩ ምንግስትካው አችቱ ንቫር ቶኬሜ::

ይቶፒያዳ አካል ጉዳቴንካውሳ ቼፎ ክችክቺስ እርዳትስትጝስ ዎክታዊ ሰላሙ አኺኒ ቼጌርፁኒውላ አሌሙ ቲኑ አችትስታ አሌሙ ባንክ ዲጊስ ፍሽኹ ንባር ቶኬማውስታጊ ዝኩኽ ትክላሊ እዝቡ ቼፍዴስ 17 ትኩሚ 6 ታፋ ያኻንኩ አካል ጉዳቴንካኽ:: አማኻሪ ክልልታ ካንትስታኒ ዴሜካ 40 ሻይዴስ ጃላ ያኻንኩ አቕዳ አካሉ ጉዳት ዝኩክ አኽⶓ ክልሉ ኹኑስታ ስራስሪው ቢሩ ንቫር ቶኬሜ::

እንዴስ ፌይኹስ አዊ ብሄረሰቡ ቺፅጝፂታ ዴሜካ 2017 ም/አታዳ ፉኹ ንቫር ቶኬማውስታጊ 3ሻይ 7 ሊኻዴስ ጃላ ያኻንኩ ጛርት አቕ አካል ጉዳቴንካ አኽⶓ ብሄረሰቡ ቺፅጝፂው ኹኑ ስራስሪውስታ ማይቤራዊ ጉዳይ ሜምሪዴስ አግፅና::

አካል ጉዳቴንካ አካሉ ዳንጉዊኒዴስ ኪቻ ዋሺኒኪ አካል ጉዳቴና ያኻያሱ አቒ እንፃኽስትጝስ ካላውሳ እንፅኼ አኮሜችጝስ ካላንኩዊያኽ:: ሚንችካ አካል ጉዳቴንካ እሊኩስ ምሳላ ያኹንኩ ዝኩና:: አሜት ቺፋ  ቴሳስ ሹኻስ አካል ጉዳቴንካው ጌርክ ኬቤርስቴ:: አውጚው ሬዲዮንሊ ስልኪስ እጂጜ ፄውንኩ አካል ጉዳቴንካ ማቢሪስ አችትጜካማ ጛውሳ ሜብቶ ኬቤርፅጝ ቱስታው አኽⶓ ዙሜካ:: ሞላ ጌታሁን እንጃቢሪ ኬቴሙ ቺፅጝፂዳ ምንግስቱ እንፅኺዳ እንፃኽስታው አካሉ ጉዳቴኒያኽ::

አካል ጉዳቴንካ ክንቴ ክንታንታ ማቢሪስ እምፕልዳ አችትጜካማ ጛጛርትጛሱሳ ሜብቶ ማንዲፃንታ፣ ኢኮኖሚስኪ ያኻ ማይቤራዊ ዝኩዊኒስ ጛጛርትጛሳ ቴኬምስታንታ ያኻንታ እንቲታኪ አካል ጉዳቴንካው ሜብት ማንዲስታታ ምንግስት ሊሊቴ ትኩቶ እያማ እንፃኽስትጝ ቱስታው አኽⶓ ጉሽካ::

አካል ጉዳቴንካስ ሊሊትጙንኩ ጊዝካዳ እግካስታ ሜሜርካ ፋና:: ፋችኹኒኪላ ክችክቺስ ቴግባርዳ እሺካማጊ ጋቲው አኽⶓ ኩፅኒ አቶ ሞላ ዙሜካ:: ምንግስት እንፃኽስትጝ ቱስታው ሚንችካ ዳንጉንካ ዝኩⶓ ቶኬምካ:: አቶ ሞላ ምንግስት ቴርስኹ እግስታ ፖሊሲ አካል ጉዳቴንካዋ ኢኮኖሚስ ቴኬምስታንታ ፄዋማጊ ጋቲው አኽⶓ ዲብስካካ::

እምፕልታቕ አካል ጉዳቴንካስ ዝኩኽ ካንቲ ማልጛ ዜሬቕቲኒ አኽⶓ ዙሜካ:: አቶ ሞላ እንፃኽስትካማ ኪስስትጝስ ካላቲንኩ ፄዌካማ ካንታንኩ አኽⶓ ዲብስካ:: “አጌራውሳ ኢኮኖሜ ሌጌፅጝስ፣ ፖለቲካዳ አሰቴፍጝስ ካላው ዋኽ አካል ዝኩኹጉ አካል ጉዳቴንካ ካላቲንኩዊያኽ” ናውሳ ካንቴ እሜንኩ አኽⶓ ድኹዌካ:: አካል ጉዳቴንካ እንፃኽስቴካማ ኪስስታቲንታ ፄዋው ጉዳ ጋቲው ካንቲ ክቺጝ ቱስታው አኽⶓ ጉሽካ::

እምፕልታቕ አካል ጉዳቴንካዳ ዝኩኽ ካንቲዴስ ድምክና አካል ጉዳቴንካ ጛጛርትጛሳ ዝክፅካማ ካንትጙ አኺኒ ዝኩⶓ ቶኬምካ:: “እያዋ ዋታይናኑ፣ እያዋሳ እንታናንኩ ጋማ፣ ንጝስ እንጛርትጛሳ ዜሬቕፅናና ካንትኔ” ናኒስ አካል ጉዳቴንካ ጛጛርትጛዳ ዝኩኽሳ ካንቴ ቶኬምካ:: እንሱ ካንቲው ምክኒያቲኪላ ሚንችካ አካል ጉዳቴንካ ጝናኻዳ ዝኩንኩ አኽⶓ ጉሽካ::

አሜት ቺፋ አካል ጉዳቴንካው ጌርክ ኬቤርስትጝ ጛጛርትጛስ ክብሮ እያንታ፣ ችግርካዋ እምፕልትስ ካሴንታ አካል ጉዳቴንካስ ሊሊቲ ትኩት እይስታማ እርዳቲ ፄውስታታ ቴኬማው አኽⶓዙሜካ::ድምክኒስኪላ አካል ጉዳቴንካዋ ካንታው ምንግስት ፍሻው እግስታ ፖሊሲ ክቼታ ፄውጝ፣ አካል ጉዳቴንካ ጛውሳ ሜብቶ ሺሻካማ ካሴንታ፣ አካል ጉዳቴንካስ እንፅኺው ድል ፌቴርስታታ ፄዋው አኽⶓ ድኹዌካ::

አካል ጉዳቴንካ ፖለቲካው፣ ማይቤራዊውስታ ኢኮኖሚው አኺኒዳ አሴቴፍጝጝስ ቴኬምስታንታ ያኻንታ አካል ጉዳቴንካ ማቢሪስ አችትጝጝ ቱስታው አኽⶓ  አቶ ሞላ ታክስፅካ:: ጛውሳ ሜብቶ ኬቤርፅጝስ እምፕልትጝ ቱስታው አኽⶓ ጉሽካ:: ሊሊትጙንኩ ማቤርካዳ አካል ጉዳቴንካዋ አሴቴፍጝፅጝ ቱስታው አኽⶓ ቶኬምካ::

አካል ጉዳቴንካው ሜብት ኬቤርስታማ ማይቤራዊውስታ ኢኮኖሚውሳ ቴኬምስታንቶ ቼሜትጝፅጝስ ፖሊሴ ኬሽጝፅጝ ፋይፃው አኽⶓኪላ ዲብስካ::

ጝናኻዴስ ፌካያስኩ ሊሊትጙንኩ አካሉ ጉዳት ዝኩክስ እምፕልታቕስ ሼውቲ ፌቴርስታማ እክምኔ አግፃንታ ፄውጝ ቱስታው አኽⶓ ድኹዌካ::

እሊት አካል ጉዳቴና አለሚቱ አማረ አካል ጉዳቴንካ እምፕልታቕስ ሊሊትጙኽ እርዳቲ ፄውስታማጊ አኽⶓ ዙሜ:: እምፕልታቕ አካል ጉዳቴንካስ ዝኩኽ ካንቲ ማልጛ ዜሬቕቲኒ አኽⶓ ቶኬምጝስ እንታኮው ካንቲ ክቺጝ ቱስታው አኽⶓ ጉሽታ:: አካል ጉዳቴንካ ጛጛርትጛሳ ካላቲንኩ ፄዌካማ ካንትጙ ካንቲ ዝኩⶓ ዲብስታ:: እኖጂስ ሜብት ኬቤርስታታ ፄውጝስ ምንግስት ሚንችካ ቴግባርካዋ እንፃኽስትጝ ቱስታው አኽⶓኪላ ዙሜ::

አዊ ብሄረሰቡ ቺፅጝፂው ኹኑ ስራስሪውስታ ማይቤራዊ ጉዳይ ሜምሪዳ ኬቾ ጉሳንቲ አቶ ባይነሳኝ ካሳሁን ብሄረሰቡ ቺፅጝፂታ 3ሻይ  7 ሊኻዴስ ጃላ አካል ጉዳቴንካ ዝኩⶓ ቶኬምካ:: አካሉ ጉዳት ታምቡክ ሚንች አይኔት አካል ጉዳቴንካ ዝኩⶓ ጌሌፅካ:: ምንግስት ጌምፅኹ ሜሜሪ ስሬታስ ሚንችካ አካል ጉዳቴንካ እንፅኺዳ ኬፄርስታንታ ፄውስትⶓ እርዳትፅካ:: አካል ጉዳቴንካዳ ዝኩኽ ካንቲ ክቼታ አመራርካስስታ ውማይቴንካስ ሼውቴ ፌቴርⶓ ጉሽካ:: አካል ጉዳቴንካዳ ካንትስታው ችግር ኽይስታታ ውላጊ ጛውሳ ታምቦ ፊትጛንታ ፄውⶓ ቶኬምካ::

አካል ጉዳቴንካውሳ ችግሮ ኽይጝዳ ሚንችካ ዳንጉንካ ዝኩⶓኪላ ቶኬምካ አቶ ባይነሳኝ አካል ጉዳቴንካስ ዝኩኽ ካንቲዴስ ጄሜርካማ “ክችክቺስ እንፃኽስትጝስ ካላና” ናውሳ ካንቴ እሚጝ ዝኮ ንካ:: ሊሊቲ ፋይ ዝኩክ ስራስሪስ ክንትጝ ክንትፅጝስ ያኻው ሜሳሪ ሊሊትጙንኩ ክንቲ ጝንካዳ እላቲው አኽⶓ ቼሜትጝፅጝስ እንታኮንኩ ችግርካ ኽይስታንታ እንፃኽስስታማጊ አኽⶓ ጌሌፅካ::

ጌፄሩ ዙራሙሪዳ ዝኩንኩ አካል ጉዳቴንካ እክምኔ አግፃንታ ፄውጝስ እምፕልታቕስ ሼውቴ ፌቴርጝ ቱስታው አኽⶓኪላ ጉሽካ:: አካል ጉዳቴንካው ጌርክ ኬቤርስትጝ ዴሜካ ጛጂዳ ዝኩኽሳ ካንቴ ክችሳንታ ፄዋው አኽⶓስታ ችግርካ ኽይስታኑሳ ዳዶ ካንትፅጝስታ ችግርካዋ ዲግስካማ ችግርካ ኽይስታንታ ፄውጙ ትክም ዝኩኽ አኽⶓ ጌሌፅካ::

አካል ጉዳቴንካ አችትጜካማ ጛጛርትጛሱሳ ሜብቶ ካሲጝ፣ ሜብት ማንዲስታታ ፄውጝ፣ ካንቲዳ ዝኩኽ ችግር ኽይስታታ ፄውጝስ ውላጊ እምፕልታቕ አካል ጉዳቴንካዉሳ ችግሮ ጛጂሱ ችግርታ ፄዋማ ካንትጝ ቱስታው አኽⶓኪላ ታክስፅካ::