አሌም አቡቑ አኽጝሾ ታምቡኽ ባይል

አገው ፌሪሲው ባይል ጄግንካ ቹትካስታ ታብል አጌራዋ ወሬርጛ ይንቱኽሳ ባርኾቼውሳ ፅላቶ ሴብትጜካማ አጌራዋ ካይ ክማዴስ ይጉፅጝስ ካሉኑሳ ስታ ሜስዋትቶ ኬዩንኩ ፌሬስቴንካዋ ዜኬርጝስ ታክስስታማ ትር 23ስ አሜት ቺፋ ኬቤርስታው ባልያኽ::

ፊሪሲ አገው እዝብሊ ይስጙኽ ታምትጚ ዝኩኽያኽ:: አገው እዝብኪላ አጌሩሳ ክብሮ፣ እምፕልቶስታ ማቤራዊ አይቶ ውላቱዊ ጀግንትስ ፂኒስፃማ ሴጙኽያኽ::

አገው ፊሪሲው ባይል 1933 ም/አ ፌሬስቴንካው ማቢሪው አችስ ልቓ ማቢሪው አባልካስ ቲሪትጛማ ኬቤርስትⶓ ጄሜርኹ ያኹስ ናካዳ ኩፅኒ 62ሻይዴስ ጃላ አባልካዋ አፌራ:: እን ማቢሪ አችትጛማ ባሎ አሜትቺፋ ኬቤርፅⶓ ጄሜሩኒዴስኪላ 86ንቴ አሜቶ እሜ:: አገው ፊሪሲው ባይል ማቢሪስ አችትጝጝ ባይል፣ ወግ፣ እሴትስስታ አይት ማንዲስትኹ ዳድድ ኬቤርስታታ ፄውስ  ሴጙኽ ኽሳንቲ ማቢሪያኽ::

አገው ፌሪሲውሳ ባይሎኪላ ዩኒስኮዳ ዳሴስታቲው አቒ ይሪሶ ወኬላው ባይላዊ ማኺታ ያኻማ ሜዜጌብስታታ ብሄረሰቡ ቺፅጝፂሾስ ሚንችካ እንፅኽካዋ እንፃኽስስታኒስ እጂካማ ፌዴራሉ ማኺቲው ስልታንስ ሜዜጌብስታ:: እስጜ ድንጉሌ ማኺቴ ዩኒስኮዳ ሜዜጌብፅጝስስታ ክምንትስ ፌያፈይጝፅጝስኪላ ሚንችካ እንፅኽካ እንፃኽስስትካማ አሊዲ ፅናቱ ግምጋሚ ካስጛ::

ይቶፒያ ላጛ አሜትቺፋ ዳሴስታቲንኩስታ ዳሴስታንኩ፣ ታሪካውካስታ ባይላውካ ባልካዋ ዩኒስኮስ ሚዚጊብፄት አኽⶓኪላ ፌዴራል ቫይልስታ ቱሪዝሙ ንባር ቶኬሜ::

አገው ፌሪሲውሳ ባይሉ ዩኒስኮስ ሜዜጌብፅጝስ ካስጙኽ አልዲ ፅናቱ ግምጋሚኪላ ስንብቶ ባህርዳር ኬቴምዳ ካስጛማ ሳኪትጚስ አኬድስታ:: እን አጌራ ላጛ አሜታዴስ እምፕላኒ ዳሴስታቲውሳ ማኺቴ ዲግስጙ ድል ዝኩት ያኹስ ኬፄላንቴ ቻይናዳ ካስጛው ጉባዩሳ ድሎኪላ አገው ፊሪሲው ባይል አግፃ::

እን ፊሪሲው ባይል ዩኒስኮስ ሜዜጌብስትጝ ዴሜካ ብሄረሰብ ቺፅጝፂውሳ ባይሉ አሌምስ አችትጝፅጝስ፣ ሚፄ አግፅፅጝስ፣ ፊሪሲ አዊው እዝብ ውላዳ ዝኩኽሳ ክብሮ አሌምስ አቕትጝፅጝስ፣ እንፅኺ ድላሳ ፌቴርጝስ አሌሙ ማኺቲው ፈንድዴስስታ እሊኩ አሌም አቩቑ እርዳታንትካዴስ እርዳቴ አግፅጝስ ድሎ ፌቴሬ፣ ትክላሊስ አዊ እዝቡሳ አይቶ ሌጌፅጝስጊ ቴኬሜ:: እንጚ ባይሉ ምዝጋቢ ሳኪትጛታኪላ እዝብዴስ ጉሽፃማ ውላ ትኩታኩ ቤንካጊ ማንዲስታውሳ አላፍቶ ፊትጝጝ ቱስቴ::

ካሊስታው አክምስጊ ኬምፕዳ አኽጝስ ምዝጋቢ ሳኪትጛታ ፄውጝኪላ ውላዴስጊ ማንዲስታው ቴግባርያኽ:: ዝኩኽ ካንቲው ኬርትስ ፅንጋኽስጝስ ሞኬርጝ ኩፅኒ ቱስታላኪ:: ብሄረሰቡ ቺፅጝፂው ካሜንስታንቲዴስኪላ ማንዲስታቲው ዴስ አኽⶓ ማላማ እን ጉዳጋቲው ፂዊዴስ ክብስስትጝ ቱስቴ::