ዝቤናዊ ቴክኖሎጂ ምርታምትስ

ንግስቴ ተስፋ

ችኽዴስ ሳኖ ኺስታ ስንፍኒስ ማሴ ቱስቲስ አሬሳማ ዜራውላስታ ዳላውሳ ምርቶ አሜሬታውላ ይጉኽሳ አሬሳቻንቴ ያቑንኩ አቕ ምሳሊ ዙማስ፡-

“ችኻ አሬሳቲታ እሬ ጅፊስታማ፣

ሳኖ አሬሳቲታ አዌ ጅፊስታማ፣

ጄር ምርክትኾ ናኒ ችግምፃው እኹዊ ይንቱኻ ናማ”

ናኒስ ሴባስ ድኹዋና:: ይሴንትስ እሬ፣ እኹሜስታ አዌ ጅፊስታውላ አሜሬትኹሳ አሬሳቻንቴ ዴሜካ፡-

“አሬሱስ ብላፅ እርፎ ፉሪፃያሱ፣

እሬዛ ዋኽታስኪኹ ሜስኬሩሞ ኺስታ ፍችፃውሳ አታያሱ፤”

ናኒስ ኩሚቺ አሬሳቻንቲ ቼጌርስታቲው አኽⶓ ጌሌፃና::

ባንጂ ወረዳ ሲንኪሲ ኬቤሊዴስ  ስልኪስ ዙሚትጝፅኑክ አሬሳቻንትካ ክቻዴስ አቶ ጌትነት መኮነን ዙራሙሪዳ አግስታውሳ ብኖ ባይላዊ ዳድስ አኾ ዙርፅካማ አኹዋቲስ ሊሊትጙኽሳ ሴብሎ ሊሚፅካማጊ አግስታና::

አቶ ጌትነት 2014 ምሬት አሜታዳ ጄሜርካማ ጉልሌ ስንዳዩሳ ዜሮ ዜርጝስስታ ግብርኒውሳ እንፅኼ ሳሴርፃውሳስታ ኬሻንቴ ምርቶ አግፅጝስ ካሊፃውሳ ሴሎ ሲፍጝስ ዝኩዊኔ ኬሽጝፅጝስ ፅሬቶ ፄዋንኩ አኽⶓ ዙሜካ:: እንጚስኪላ ጝን አቖስታ ጄርካዋ ቺፅጝፅጝስስታ ክንትፅጝስ ካሊፃውሳ ሚፄ አግፅካማጊ አኽⶓ ጉሽካ::

ጛጛርትጛሳ ዴሜካማ ሚንችካ አሬሳቻንትካ ችኹ እሪው ዳንቴና አኽጝዴስ ፌካማ ጊዝዴስ ጊዞ አኹዋቲስ ሊሚፅጙ ዴስ ኬሽጛማጊ አኽⶓ ድኹዌካ:: ዝቤናዌ ምርቶ ዴሜክጝስ ካሊፃውሳ ግብአቶ ቴኬምስትካማ ሊሚፅጝስ ኬሻንቴ ምርቶ አሜሬትጝስ ምንግስትስታ ውማይቴንካ እያኑ ኩስጚ ፍሺ ዝኩኽ አኽጝስ ቴግባርዳ እሽፅካማጊ አኽⶓ ዙሜካ::

ወክት ቺፋ ዴሜካማጊ ይንቱኽ ግባቱስታ ጉልሊ ዜሩ ዋይሚው ክብርናቲ ኩፅኒ ስንዳዩ ምርትዳ ቻኒስቶ ቺፄ ናው ስጋት ዝኩክ አኽⶓ ቶኬምካ:: እንጚስኪላ ኽይ እይስቱኒ አሬሳቻንቲ ዝማቺው እንፅኺዴስ ፋማ ዊዳፊስ ቴኬምስትጝስ ካላው አኽⶓ ጉሽካ::

ሚንችካዋ ቴኬምስታንታ ፄዋው አሊስታ ብንኪላ ዝቤናዊ ዴዴክስ ግቢትስታታ አሬሳቻንትካ ዲግሳኑ ካሲስ ዙርሚ እይስታታ አሬሳቻንቲ ጌትነት ካንቴ እይካ:: ሚንችካ አሬሳቻንትካ ግርቦስታ አሬሳውሳ ቢሬ /ፊሪሴ/ አቲጝስ ብቴ ፁሞ ቺፃንኩ አኽⶓ ጉሽካ:: እንሳ ችግሮ ኽይጝስ ኩፅኒ አሬሳቻንትካ ማቢሪስ አችትጜካማ ትራክተሮ ጄውጝስ  ፅሬቶ ፄዌካማጊ አኽⶓ ቶኬምካ:: ዝቤናዊ ዳድስ አሜሬትጙሳ እንፃኽስትጜ ቴግባርዳ እሼታ ኩፅኒ ዋኒዴስኪ ጃላ ውማይቴንካውስታ ምንግስቱ ድጋፍ አግሌልጛቲታ አሳቦ ዲግስካ::

ዊዛሩ አስማረች ትሩነህኪላ 10 አሜታዴስ ቤዴራ ባይላዊ ዳድስ ስንዳዮ አሜሬትⶓ ጉሽፃ ፄውጝስ ናካዳ ይስጝፄካማ ኬሻንቴ ምርቶ አግፃኑ ዳድስ እንፃኽስስቴካማጊ አኽⶓ ድኹዌካ::

ንጙዊኒ አሜትዳ እምፕል ሄክታር ብቲዳ ስንዳዮ ዜርⶓ ጉሽካ:: እንጚኪላ ጝን አቑሳ ምግቡሳ ዋስትኔ ዋኽትጝፄ ንካማ አኬድካ::

እንዴስ ቤዴራ ኬሽጙኽ ስንዳዩ ጉልሊ ዜር ዲጋማ ኬሻንቴ ምርቶ አግፃሺንኩ አኽⶓ ዙሜካ:: ናኪኒ ወክትዳ ኩፅኒ ላጛንቲ አች ስንዳዩሳ ዜሮ ዜራኒ አግፃሺኑ ምርት እፅፋስ ኔኬትⶓ ዲብስካ:: እንሱ ምክንያቲኪላ ዲጋው ጉልሊ ዜሩስታ ኽብፂ ማዳሪው ኬቤርጝ እምፕላንቴ አቾ ዜሮ ቴኬምስትጝስ ቼግርስትⶓ ቶኬምካ::

አኹዋቲስ ሊሚፃኒስ አኾ ቴኬምስታኑ ባይላዊ ሴልስ አኽጝስ አኹ ባኬናማጊስታ ፋይስታውስታጊ ታምባውላ ይጉጝስ ሴብል አኾ አቲጝስ ፋይስታውሳ ኩፔ አፌራውላ ይጉጝስ ምርትዳ ቻኒስቶ ፌቴርⶓ ጉሽካ:: ዝቤናዊ ዳድስ አኹዋቲው ዴዴክ ግቢትስታታ ካሴ ዲግሱኒውላ ዙርሜ አግፃውላ እጂጝ ክሬቴ ፌቴርⶓ ዙሜካ::

ባንጂ ወረዳ ሲንኪሲ ኬቤልዳ አኹዋቲ አብት ልማቱ ውማይቲኒ መስረት ብሩ ጛሾስ ቤዴራ ሊሊትጙኽ ሴብል አሜሬትስታሺኹ፤ ዜሬቕቲኔ ምርቶ እያሽኹሳ ብቴ ጎሌልጝስ 310 ሄክታር ብቲዳ ምስሊስ አሬስስታማ ምስሊስ ስንዳይ ዜርስታታ ፄውስትⶓ ጉሽካ:: እንጚኪላ ዝቤናዌ እንፃኽስትጜ ቴግባርዳ እሽፅጝዴስ ጃላ ሴብልዳ ታምባውሳ ዋሺኔኪ ጉዳቶ ካላካልጝስስ ካሊስታው እስታማ ሳይንስስ ቼሜትጙኽ አኽⶓ ኽይትጝፄካ::

ዋይሚው ክብርናቲ ዝኩኽ ያኹኒውላ ግባቶ ቴኬምስትጝ ኬሻንቴ ምርቶ አግፅጝስ ካሊፃው አኽጝስ ቴግባርዳ እሼታ ፄዋንኩ አኽⶓ ጌሌፅካ:: እንጚ ኩፅኒ አግሰታው ምርትዳ ቻኒስቶ ፌቴሬ ናው ስጋት ዝኩⶓ ቶኬምካ:: አሬሳቻንትካው ውማዩሳ ኩስጜ ቻቤልጙ ዴስኪላ ጊዝዴስ ጊዞ ኬሽጛማጊ አኽⶓ ጌሌፅካ::

ኬቤሊታ ባይላዊ ዳድስ አኹዋቲስ ሊማው 5 ሊኻ 22 ሄክታር ብቲ ያኹኒውላ ዝቤናዊ አኹዊቲው ዴዴክ ቴግባርዳ እሺኒ ፁሞ ቻውሳ 200 ሄክታር ዴስ ጃላ ብቴ ሊሚፅጙ አክም ዝኩዌ:: አኽጝስኪ 50 ታፋዴስ ጃላ ቴኬምስታንቶ ዴሜክጝስ ካላው አኽጝስ አሬሳቻንትካው ካሲ ዙርሜ አግፃታ ትኩታው ቤን ኩርፄንትስ እንፃኽስትጝ ፋይፃው አኽⶓ አሳቦ እይካ::

ባንጂ ወረዳ ግብርኒ ፅ/ጝናዳ አኹዋቲ ትክልቲስታ ኩፓኩፕካው ልማቱ ኬቹ ጉሳንቲ አቶ አምሳሉ አንተነህ 3ሻይ 700 ሄክታር ብቲዳ ስንዳዬ አኹዋቲስ ሊሚፅጝስ እክድ እምስትⶓ ጌሌፅካ:: እንጚስኪላ እሳ ዜጌቤ ቴርስንኹሳ ጊዞ ኺስታ 3ሻይ 600 ሄክታርዴስ ጃላ ብቲ ዜርስ ሾፌንስትⶓ ቶኬምካ::

2018 ምርቱ ዝቤንዳ ስንዳዩ ምርትዳ ትኩት እይስታማ እንፃኽስስቱኽ እንፅኺ ቤዴራ እሺያሱ ምስሌ ሴብሎ ቴርቴራ ሊሚፅጙሳ ዴሶ ቴግባርዳ እሺⶓ ጉሽካ:: 5ሻይ 400 ኩንታል ዴስ ጃላ ላጛንቲ አች ጎሌልስትኹ ስንዳዩ ዜር ቴኬምስታንትካ አሬሳቻንትካስ ዲግⶓ ጌለፅካ::

እሊው እይስትኹ ትኩትዴስ ቤዴራ ወረዳታጊ እሺያሱ እንፃኽስትጚሾ ቱጝስ ሼውቴ ፌቴርጝስታ ማቢሪው ስምስ ትራክተር ጄውስታታ ፅ/ጝና እንፃኽስስታማጊ አኽⶓ ኽይትጝፅካ:: “ባንጂ ወረዳዳ 10ዴስ ጀላ ዝቤናዊ አኹዋቲው ዴዴክ አግስቴ” ንካ:: ኬቤሊ ቺፋ ዝኩኽሳ አኹሳ እይስቴ ቴኬምስትጝዳ ኩፅኒ ዳንጉዊኒ ዝኩⶓ ጉሽካ:: ወረዳው ባጀትስ 1 ትኩሚ 5 ሚሊዮን ብሮ ኺስታ ሜዴብጝስ አኹዋቲው ዴዴክ ግቢትስታታ ፄውስታማጊ አኽⶓ ቶኬምካ:: ሲንኪሲ ኬቤሊው አሬሳቻንትካ ዲግሳኑ አኹዋቲውሳ ዴዴኮ ካንትኹ ካሲ ወረዳዴስ ጃላ አኽጝስ 2015 ምሬት አሜታዳ ፂኒስስታማ ካሲ ክልልስ ዲግⶓ ጉሽካ:: ክልልኪላ ግንባቴ ካስጝፅጝስ ቤዴራ ሲፌ ማንዳታ ፄውጝስ ካሲስ ዙርሜ እያታ ትኩታኩ ቤንካስ ካሴ ዲግስካማ ኽዮ ማንዴካማጊ አኽⶓ አቶ አምሳሉ ኽይትጝፄካ::

ወረዳታ 2018 ምርቱ ዝቤንዳ ዝቤናዌ እንፃኽስትጜ ግብርኒው ዜርፍዳ ቴግባርዳ እሽፅጝስ እንቲታኪ አኹዋቲስ ስንዳዩ ሊሚፅጝስ ምግቡሳ ዋስትኔ ቼሜትጝፅጝስ ፄውስታው ፅሬትስ ትኩታኩ ቤንካጊ ታምቦ ፊትጛንታ አቶ አምሳሉ እንፅኼንቶ ፌይጝፄካ::