ጊኒው ባል

ታደለ አጋጄ

ይቶፒያዳ ብሩኽ ዳድስ ኬቤርስታንኩ ባልካ ክቻዴስ ኢየሱስ ክርስቶሱ ክምንቱ /ጊኒው/ ባል እምፕልያኽ:: ይቶፒያ አክሱሙ መንበረ ፕፕስኒዴስ ጄሜርታታ ሊሊትጙንኩ ቴርትካስ ባሎ ኪቢርፂስ ሴጝታ::

አማኻሪ ክልል ሰሜን ወሉ ዞን ላሊበላዳ ኢየሱስ ክርስቶሱ ክምንቱ /ጊኒው/ ባል አሜት ቺፋ ብሩኽ አኺኒስ ኬቤርስታው ዙራሙሪያኽ:: አጌራኻዴስስታ ባርኾቼዴስ ባሎ ኬቤርፅጛ ሊሊትጙንኩ ቱሪስትካ ስፍሪሾ አንዜጛና::

ክዱስ ላሊበላስታ ኢየሱስ ክርስቶስ ካሜንስትኹ ምስሊ ጌርክ ቴሳስ 29 ጌርክ አኽጝስ ባል አሜት ቺፋ ላሊበላዳ ሊሊትጙንኩ ቴርትካስ ኬቤርስቴ:: ጋያኪ ቴሳስ 29 ጌርክስ ብታቺዳ ላሊበላ ብሽታንካው ክቻክቺ “ማሜ ጋራ” እስታማ እቑስታው ስፍሪዳ ቤዛኩሉ እስታው ቴርት ካስጛዊያኽ::

ቤዛኩሉ ውላ አሌሙ ቤዛ ናካ ካሜንስትኾ ንካማጊ ምስጋኔ ዲግሳኑዊያኽ:: እልልቲስስታ ችብቻቢስ ብርፃና:: ቤዛ ኩሉ ቴርት አሌድስቱኒዴስ ፋሌንጋ ዜሜራንትካ ሜዝሙሮ ዜሜራና:: እሊኩ እምኔቶ ሲፋንትካ ዴሜካ ኩፔካማ እልል ንካማጊ ምስጋኔ ዲግሳና::

ኢየሱስ ክርስቶስ ካሜንስትኹ ክምንቱ ጌርክ ሊሊትጙንኩ አይማኖታዊስታ ባይላዊ ቴርትካስ ኬቤርስቴ:: ድባን አንኩዋ ሻይ 500 አሜት ያኻውሳ ልኻኽዳ እሺኹሳ አሌሞ ብራንሾ ዙርፅጝስ አቒታ እሼ ሴያማ ካሜንስትⶓ አይማኖትኩ ታብልስ ዙሚስቴ:: እየሱስ ክርስቶሱሳ ቤቴልሄምዳ ካሜንስትⶓ እንኮኹንኩ ሰባሰገልካ ዎርኮ፣ እታኖስታ ከርቤ ኻስካማ አንትጝስ ቢሪኪቴ እይካ::

አንኪሺ ጉዋጉሲ ወረዳው ቤተ ክህኔቱ ፃፋንቲ መላከገነት ታደለ ይሁን ስልኪስ ዙሙኑውስታጊ /ጊኒ/ ኢየሱስ ክርስቶሱ ክምንቱ ባሉ አይማኖቱሳ እሜ ጌሌፃኒስ አሌም አቓ ጋቲታ ዝኩጝስ ካሊስታላ እስታማ አዳምስታ ሄዋን ፌቴርስትካ:: አዳምስታ ሄዋን ድባኑሳ ትዛዞ ፌያፌይጜካማ አግስታኒ ገነትዴስ ክብሮ ጌፌፍስትⶓ ጉሽካ:: ድባን ካሜንስታዊያኽ እስታማ ሴቤክስታሺኹ አኽጝስ ክድስት ድንግል ማርያምዴስ ሜጋቢት 29 ሼርስታማ ቴሳስ 29 ካሜንትⶓ ቶኬምካ::

ኽሳንቲ ስፍሪዳ ካሜንስቱኒጊ አሌም አብታምካው ይቪቺ ያኻው አኽጝስ ክምካው ድባይዳ ካሜንስትⶓ ጌሌፅካ:: አኽጝስኪ ክስታንቱሳ እምኔቶ ሲፋንትካ አሌሙ ብራን ካሜንትስትኹ፣ ክስታንት እምኔቱ ሲፋንትካ ኬሽፂ ጌርክ፣ ቴስፌ አግፁኑ፣ አሌም ዴስቴ አግፅኹ ጌርክ አኽጝስ እርድ ፄውስታማ ድባኑሳ ስሞ እቑዊጝስ ኬቤርስታው ባል አኽⶓ ኽይትጝፄካ::

ኢየሱስ ክርስቶስ ክምንቱ ጌርክ ታምብምባኺስታ እምኔቶ ሲፋንትካ ድባንስ ምስጋኔ ዲግሳኑ፣ ፁሚጝስስታ ፆሌትጝስ ጌርኮ ፌይፃኑ አኽⶓ ዙሜካ::

እሊው ጊኒ ባሉ ባይላዊ ቴርት ዴሜካ ጊኒታዋ ዳቫ እንክርስታው ቴርት ሚንችካስ ቓሊትስ ማንዲስታው ጌርክያኽ:: አቶ ደመም ታመነ አይሲ ኻርሺ ኬቤሊው ዝኩዋንትካኽ:: ጊኒው ባል ታምብጝዴስ ቤዴራማ ዳቫዋ እንክርጙ አኺኒ ጛው ዙራሙሪዳ ዴስስትኹ አኽⶓ ዙሜካ:: እንክርጙ ቤዴራ ሲፊኪላ ዳቫዋ እንክርጝስ ያኻው ዳቫስታ እንጁክ ቴርቴ:: ዳቫዋ እንክራንትካ ላጛ ኬችስ ክቻ ቤንስታና::ጛራ ጛራ ኬቾ ጉሳንኩ አቕ ጎሌልስታና:: ዳቫዋ እንክራንትካ አውራውርትጝስ  ንካማጊ ኬችኩ አባልካስ ጎሌልስታንኩ አኽⶓ ዲብስካ::

ጎሌልስቱንኩ እንክራንትካ ዳቫዋ እንክራኑ ውታኺዳ ክችዳ ዳቫዋ አኬችጝስ ጄሜራና:: እምቦ እፃኑ ስፍሪ ምልኻትስቴ:: እንክሪ ክቻዳ አኬችካማ ጄሜሩኒዴስ ፋሌንጋ እምቦ እፅጝስ ምልኻትስኹ ስፍሪዴስ ፌይፁኒጊ ዊፃንትካ አኽጝስ ጅሜካማጊ ውታኼ ዙራና::”እንጉላይ እንጉላይ” .. ንካማጊ ጅማንኩ አኽⶓ አቶ ደመም እንክርፄካ::

ዳቫዋ እምቦ እፅጝ ዊፃንትካ ያኹንኩ እንክራሺኑሳ ዳብዜ ኪስካማ እንክሬ ካስጝፃና:: እንታኮው አኺኒስ ዊፃንትካ ያኹንኩ ኬችካ ውታኺዳ ጅምጝስስታ ሻኽጝስ ባሎ ብርፃና::

እንክሪ ጊዛይ ዳቫስ አኹኪ እንጅኩስ ልኮ ታስስትጝ ኬሴትስቱኒውላ ኪም እምስታላ:: ኬችኩ አባልካኪላ እንታኮው ኬሴት ታምባቲታ ምሮ ማንዴካማ እንክራና:: “ምር” ንጝ ጚው ዳብዚሾ ቲሬማ እንክርጝ ዝኮስኩስ እሊኩሱሳ ዳብዜ እሜኒያኽ:: እንክራንትካኪላ ምሮ ማንዳያሱሳ እንክራንቴ ምሮ እሚት ንጝስ ቴንኬክፃና::

ጊኒታዋ እታኮው አኺኒስ ባል እንክርስታማ ኬቤርስቴ:: ብቲክማኒ ዴሜካ “አያ ሆሆሆ… አያሆሆሆ”.. ንካማጊ ጝን ጝና ዙሬካማጊ ኹስታውሳስታ ዝቕስታውሳ ይማኒስ ቻና:: ጝንዌንካኪላ ዳቔርካማ ኹስታውሳስታ ዝቕስታውሳ እይካማጊ ሲፋና:: እንክራንትካ እያኑሳጊ ኬሜስጝስ እሊው ጝንሾ ካስጝስ ይምⶓ ሲፋና::ኹስታውሳስታ ዝቕስታውሳ አግፁኒዴስ ፋሌንጋ ትሩምባስስታ ኪሪዊስ ጅምጝስ ባሎ ብርፃንኩ አኽⶓ   ዲብስካ::

ትክላሊስ ጊኒው ባል አይማኖታዊስታ ባይላዊ ቴርትስ ኬቤርስትጝዴስ ፌይኹስ ቱሪስታ ጉስፃ አኽጝስ ይኮኖሚውሳ ሚፄ አግፅፄ:: ሚንችካ ቱሪስትካ ላሊበላሾ ካስጝስ ባሎ ኬቤርፃንኩ አኽጝስ አጌራው ይኮኖሚ ኬፍናታ ፄዋዊያኽ::

አንኪሺ ጉዋጉሲ ወረዳው ዝኩዋንታ ዊዛሮ በየነች የኔአባት ጊኒው ባል ታምቡስ ኹን ስልኼ ዜኬታንኩ አኽⶓ እንክርፄካ::

ጊኒው ባልታዋ እንክራሺንኩ ዎታትካስ ብቲ ክማኒ ይምጛ ይንታኒ ስልኺ ሹሚስታማ እይስታው አኽⶓ ዙሜካ:: አክም ዝኩክ አቕ ዴሜካ ምሼ እያንኩ አኽⶓ ዲብስካ::

ጊኒው ባልዳ ታዮ አሬድጙ ዴስ እላቲው አኽⶓስታ ሙሪስ አቕትጜካማ ቢሪ አሬድስታማ እሼ ቤንጝጛንኩ አኽⶓ ድኹዌካ::

ጊኒው ባል እምፕልትስ ኬቤርስታው ባል አኽጝስ ማይቤራዊ ታምትጜኪላ ይስጝፃው አኽⶓ ዊዛሮ በየነች ቶኬምካ::