ዳንጉት ካንትስታው ሜብት

ታደለ አጋጄ

አሌሙ ቲኑ አችት 2019 አውሮፓው ዝቤን ቼፍዴስ ፋሌንጋ ካንትፃው ንባርታ አሌም አቡቑ አችስ ሹኻ ኹንዴስ እምፕላዳ ፆቲው ፅካት ፌፄምስቴ:: ሊኽዴስ 34 ታፋ ያኻንኩ ኹንዳ ፆቴ ስራ ፄውኽ ችግር ታምቤ ንጚያኽ::

ቹዋስ ፆቲው ፅካትስ ፂኪፃንኩ ዲብካ ክቻዴስ አልኮሉ ዝቒስታ ድኪ ሱስያኽ:: ቴቬቬርጙንኩ ምንግስትካው አችቱ ንባር ምልኻታውስታ አሌምዳ አግስታንኩ ኹንዴስ 35 ታፋ ያኻንኩዳ ዲጊኩ አፄብካስ አኹ እሊኩ አካልካስ ፍካድዴስ ሴጋ ያኹኽ ፆቲው ፅካት ታምቤ:: 30 ታፋ ያኻንኩ ኹንዳ ጜራስ አካሉስታ ፆቲዉ ፅካት ፌፄምስቴ:: አሌምዳ ኹንዳ ፌፄምስታው ክርጝዴስ 38 ታፋ ያኻንኩዳ አፄብካስ ፌፄምስታው ክርጝ አኽⶓ ንባርካ ቶኬማና::

ይቶፒያው እገ ምንግስት ቱንዚ 36ዳ ስታ ስራስሪው ሜብትካዉ ኮንቬንሽንዳ ስራስሪው ሜብት እሳንስ ዛራዛርስታማ አግስቴ:: ኹንዳስታ ስራስሪዳ ታምባንኩ ፅካትካ ጊዝዴስ ጊዞ ዴሜካማጊያኽ:: ሊሊትጙንኩ አጌራኩ ቤንካዳ ኹንዳስታ ስራስራዳ ማይቤራዊ አካሉስታ፣ ሼው ፅንታው ቤዴልካ ፌፄምስትካማጊያኽ::

ኹንዳስታ ስራስሪዳ ታምባንኩ ፅካትዴስ ድምክና ኹኑሳ አብቶስታ ንብሬቶ አትሌልፃማ ካፅጝ ሚንችካ ኹንዳ ጌቴማማጊ ዝኩኽ እሊው ኹኑ ፅካት ያኻማጊያኽ::

እንጃቢሪ ኬቴሙ ዝኩዋንታ ዊዛሩ ቤዛዊት ጋሹ ኹንዳ ሊሊትጙንኩ ፅካትካ ታምብጝዴስ ፌይኹስ ኹን አፌሩኑሳ አብቶስታ ንብሬቶ ካፅጝስ ኹንዳ ቻኒስቶ ታምፃማጊ አኽⶓ ዙሜካ::

ዊዛሩ ቤዛዊት ዙሙኑውስታጊ እንካንታው አፄብሊ ትዳሮ ሜሳሬትጝስ ዝኩዊኔ ጉስቱስ እጂቴ:: ያኼስጉ አራኹናዳ ቱትጜ አቲጙ ችግር ፌቴርስታኒ ትፍትጚስ ፍርድ ጝናዳ ካራካርጛኒስ እጂካ:: ዊዛሩ ቤዛዊት ጜራሳ ሚፅጝዴስ ፍና ሲግቲኒ ጝን እሺⶓ ቶኬምካ:: “እያዋ ኹና ፄዋማ ካራካርጜ ታቓያስቲያኽ ናማ” ጝኖ ካፅጝስ ፍርድ ጝናዳ ዲግጝኾ” ኒስ እሺኹሳ አኺኔ እንክርፄ::

“ይው ጝን አብርታ ግቢትንኹ” ናማ ፍርድ ጝናዳ ካራካርጛኒ ቲቢኬ ቲሪፅጝስ አክም እላቲኻ አቓኒ እሊኩ አቕ ኩስጝፄካማ ኔፃ ፍቱሳ አግልግሎቴ እንጃቢሪ ዩኒቨርሲቲ እያማ አብቶ ዎሬስስትጝዴስ ፊቱኻ” ኒስ ጛዳ ታምቡኽሳ አኺኔ ዲብስካ::ዉን ዉን አኽጝስ ክችክቼ ፍቶ አግፅⶓ ዙሚጝስ እንታኮው ዳድስ ኹንዳ ታምባው ቤዴል ሚንች አኽⶓ ጉሽካ::

ኹን እንዳራኪ ዲቦ ፄውጝዴስ ቤዴርካማ ሼውንጝ ፋይፃው አኽⶓ ዲብስካ::

እሊት እንጃቢሪ ኬቴሙ ዝኩዋንታ ክህነት አግዴውኪላ ጜራሊ ትዳሮ ሜስሬትካማ ዝኩዋኒስ ጜራ ክራ:: ጜራ ፄውታታ እጂቲኹ ጝርጂ ኩፅኒ ላጛንታ ኹናሊ ትዳሮ ሜሴሬታ:: “እንታ ፄውኽኪላ አን ቑንዳስታታ ፄቤልዳ ቱዋኒኽ” ናኒስ እሺኹሳ አኺኔ እንክርፄካ:: ጜራ ክሩኒዴስ ፋሌንጋ ላንጊጊ እጋዊ ያኹኽ ቱትጚው ዎሬኬትስ አብቶ ቤንስትጝስ” ፍርድ ጝናዳ ካራካርጝⶓ ዙሜካ:: ጜራ ፄውታታ እጂቲኹ ጝርጂ ቑንዳስቴታ ፄብልዳ ካትኹ ጊዝዳ አሱውሳ ትዳሮ ሜሴሬታማ እጂⶓ ቶኬምካ:: ክሩኒዴስ ፋሌንጋ ኩፅኒ ላንጊጊ አብቶ ክቻ ቤንስትናታ ፍርድ ጝናዳ ውሳኒ እይስቱኒውላ አብቶ አግፅጝስ  ካሊስቲያስቲ አኽⶓ እንክርፄ:: ይጋሪስ አፌሩኑሳ አብቶ ቤንስታቲታ ሊሊትጙኽ ዳድስ ቻኒስት ታምባማጊ አኽⶓ ዲብስካ::

እንጃቢሪ ኬቴሙ ቺፅጝፂዳ ኹኑስታ ስራስሪ ፅፌት ጝናዳ ኬቹ ጉሳንቲ ባይህ አያሌው ኹኑስታ ስራስሪው ፅፌት ጝናሾ ሊሊትጙንኩ ጉዳይካስ ቤዴልስቱንኩ ኹን ይንታንኩ አኽⶓ ቶኬምካ:: እኒጛዴስኪላ ኹን አብቶ ኪምስትጝስታ ክቻ አብቶ ቤንስትጚዳ ካንትስታንኩ ችግርካዳ እርዳቴ ፋይጛ ይንታንኩ አኽⶓ ጉሽካ:: ሊሊትጙንኩ እንፅኺው ስፍርካዳስታ ክንቲ ጝንካዳ ኹንዳ ፆቲው ፅካት እሳንስ ፌፄምስታማጊ አግስታው አኽⶓኪላ ጌሌፅካ::

ኬቴሙ ጝንዳ አራኹንካ ካራካርጛኑ ጊዝስ ጝኖ ቱስታ ጋቲው ዳድስ ካፅጝስ ፄውስታው ፅሬትዳ ንቫሮ ክችክቺስ ፃንኩፁኒዴስ ፋሌንጋ ፍትኩ አካልካሊ ታምትጝፅጝስ ክስ ሜሴሬትስታማ ክችክቼ ፍቶ አግፃንታ ፄዋንኩ አኽⶓኪላ እርዳትፅካ::

እምስትኹ ባጄት አሜትዳ 15ዴስ ጃላ ያኻንኩ ኹን ፅፌት ጝናሾ አንትጝስ እርዳቴ ካሲⶓ ኽይትጝፅካ:: አራኹና ትፍትጙኒዴስ ፋሌንጋ እሺኹሳ ጝኖ ክቻ ቤንስታኑ ጊዛይ 200 ካሬ ሜትርዴስ ኩክራ ያኹኽ ብቲዳ ግቢትስትኹ ጝን ያኹኒጊ አግልግሎቲው ፅፌት ጝና ኬቴሙ ስታንዳርድስ ፌኬድስታላ ንጝስ ጝን ቻራቲስ ዋይስታማ ቤንጛቲንታ ፄውስታው አኽⶓ ጌሌፅካ::እንኪላ ኹን ጝና ጋቲታ ዝኩዋንታ ፄዋው ችግር አኽⶓ ጉሽካ:: ዙራሙሪታጊ ኽሳንቲ ችግር ያኹኽ ዴሜካ ጝርጂ ውላ ዲብስ ኽስጙ ካንቲ ክቺጝ ቱስታው አኽⶓ ጉሽካ::

ኹኖ ሊሊትጙኽ ዲብስ አትሌልፅጝስ ኹኖ ባስኹ ችግርዳ ቱዋንታ ፄውስታው አኺኒ ዝኩⶓ ጌሌፅካ:: ኹንዳ ታምባንኩ ችግርካ ሚንችካ አኽጝስ ኹኑስታ ስራስራው ፅፌት ጝናዳ እጉ ውማይቲኒ ፋይፃው አኽⶓ ቶኬምካ::