ዛብ ልማቱ እንፅኺ ምርታምቶ ዴሜክጝስ ፍሼ ፄዋማጊያኽ

ታደለ አጋጄ

ተፋስስ ልማቱ እንፅኺስ ጉዲስትኹሳ ብቴ ዙርፅጝስ ኬሽኹሳ ምርቶ ዋግፅጝስ ቴኬምስታንታ አኽⶓ አንኪሺ ጉዋጉሲ ወረዳው አሬሳቻንትካ ዙሙና::

አሬሳቻንትካ ሳኑ ወርፍዳ እሳንስ አኮሜቻንኩ እንፅኽካ ክቻዴስ ፍትሬት አብት ማንዲጚው እንፅኺ ቶኬምስቴ:: ፍትሬት አብት ማንዲጚው እንፅኺ አሬሳቻንትካ ሴብሎ ጉሹኒዴስ ፋሌንጋ ብቲ ሊሊትጙንኩ ምክኒያትካስ ጉዲስታቲታ ፄውጝስ እንፃኽስታኑ ልማቱ እንፅኺያኽ::

አሬሳቻንትካ ተፋስስ ልማቱ እንፅኺዳ ሊሙኽ ኽብፂ ኩሪስ ሺሽርስታማ ካቲታ፣ ሺሽርስትኹ ብቲ ዙራታስታ ምርትስታ ምርታምት ዴሜካታ ፄውጝስ ፍትሬት አብት ማንዲጚው እንፅኺዳ እሳንስ አሴቴፍጛና::

አንኪሺ ጉዋጉሲ ወረዳ ባኮኒ ኬቤሊው አሬሳቻንቲ የኔሰው መለስ ምንግስት አሬሳቻንትካ ቴኬምስታንታ ያኻንታ ያጋው ልማቱ እንፅኺ ማልጛ ፋይፃንቲ አኽⶓ ዲብስካ:: ምንጊ ሚንች ውጋቢ ብቲ ኩሪስ ሺሽርስታማ ካስሺኹስታ ሴብል ዜርስታቲው ብቲጊ እሺⶓ ቶኬምካ:: ግብርኒው ውማይቴንካውሳ ኩስጜ ቻቤልካማ እንፃኽስትጝስ ብቲ ዙራታ ፄውጝስ ካሊⶓ ዙሜካ::

ባኮኒ ኬቤሊ ካናጋሚ ዙራሙሪ አኽጝስ ኽብፂ ሳሴርስ ኩሪስ ሺሽርስታማ ካስጝ፣ ብቲ ጋኺስ ካዲስታማጊ ካስጝስታ አሬ ዋግፃቲው  እሺⶓ ጉሽካ:: አሬሳቻንቲ ተፋሰስ ልማቱ እንፅኺስ ብቲዳ እርኬኖ ግቢትጝስ፣ ሺሽርስትኹሳ ፄጌንጝስታ፣ ጋኻ ያኹኽሳ ዙርፅጝስ ብቲዳ ኽብፂው አሉምት ዴሜካታ ፄውኽ አኽⶓ ዲብስካ:: አኽጝስኪላ ፍትሬት አብት ማንዲጚው እንፅኺ ጄሜርኹዴስ ናቴ ኬሽኹሳ ምርቶ አግፅጝስ ቴኬምስታንት አኽⶓ ድኹዌካ::

አሬሳቻንትካ ተፋሰስ ልማቱ እንፅኺ ቴሳስ እምፕልዴስ ጄሜርካማ እንፃኽስትⶓ ቶኬምካማ አሬሳቻንትካው ይዎት ያኹኽሳ ብቴ ኬሽፅጝስ ውላ እምፕልትስ እንፃኽስቱንኩ አኽⶓ ጉሽካ::

እሊት ባኮኒ ኬቤሊው አሬሳቻንታ መደነክ አይናለም ኹንኪላ ጝርጃሊ ተፋስስ ልማቱ እንፅኺዳ ክቻ አሴቴፍጜካማ እንፃኽስትⶓ ዲብስካ:: አሬሳቻንትካ ተፋስስ ልማቱ እንፅኺ እንፃኽስትኹ ብቲ ኬሽኹሳ ምርቶ ዋግፅⶓ እርዳትስትጝስ ፍትሬት አብት ማንዲጚው እንፅኺዳ ጛውስ ጁትጚስ እንፃኽስቴካማጊ አኽⶓ ቶኬምካ::

“ፌይኹ ጊዝዳ ብቲ አሬ ይጉዋማ ኩርቲቤውላ ዋግፃቲው እሺኾ:: ጋኻ ያኻማ ክምካ ካያቲኑ እሺኹሳ ብቴ ተፋስስ ልማቱ እንፅኺስ ብቲው አሉምት ዙራማ ኬሽኹሳ ምርቶ አሜሬትጝስ ካሊና” ናኒስ ዙሜካ::

ተፋስሱ ልማት እንፃኽስስትኹ ብቲዳ እንሴስካ ቱዋቲንታ ፄውጝስ አንኬባንኬባንኩ አኽⶓ ቶኬምካ::

ቤዴራ እንፃኽስትኹሳ ዙርፃማ ፄጌንጙስታ እንፃኽስስታያሱሳ እንፃኽስትጝስ ይስጝፄካማ ሲፋንኩ አኽⶓ ዲብስካ::

አንኪሺ ጉዋጉሲ ወረዳ ባኮኒ ኬቤሊው ግብርኒ ፅፌት ጝናሱ አላፊ አንተነህ ካሳ ፍትሬት አብት ማንዲጚውሳ እንፅኼ ቴሳስ አርፊዳ ጄሜርካማ እንፃኽስስታማጊ አግስታው አኽⶓ ጌሌፅካ::

ግብርኒው ውማይቲኒ ዙሙኑውስታጊ ቴሳስ አርፊዳ ጄሜርጝስ እንፃኽስታንታ ፄውስትኹ ብቲ ካጋዉላስ ሳሴርስ ግሽስቴ:: ውላ እምፕልታቕኩ ቤንካዋ አሴቴፍጝፅጝስ ሺሽርስትኹሳ ብቴ ዙራታ ፄውሰትⶓ እርዳትፅካ::

ተፋስስ ልማቱ እንፅኺ እንፃኽስትኹ ብቲዳ እንሴስካ ቱዋቲንታ ማንዲስታው አኽⶓ ጌሌፅካ:: ትር አርፊዴስ ጄሜራማ ዴሜካ ኽብፄ ማንዲጙ እንፅኺ አኮሜችስታው አኽⶓ ቶኬምካ::

ኬቤሊታ 50 ሄክታር ብቲ ተፋስስ ልማትስ እንፃኽስትⶓ ጉሽካማ አሬሳቻንትካ እርዳትስታኑላስ ብቲ ጉዲስታማ እጂⶓ ጉሽካ::

“ቤዴራ ብቲ ካጊ፣ ኩሪስ ሺሽርስትኹስታ አሪ ዜርስታቲው እሺኾ” ኑንኩ አቶ አንተነህ ፍትሬት አብት ልማት እንፃኽስትⶓ ጄሜርኹዴስ ናቴ ኽብፂው አሉምት ዴሜክጝስ ምርት ዴሜካታ ፄውስትⶓ እርዳትፅካ:: ብቲዳ ፍትሬት አብት ማንዲጚው እንፅኺ እንፃኽስትጝ አቓ ግብሪ ማዳባሪስ ፋውሳ ጌንዜቡሳ ፍሼ ይጉፅጝስ ካሊⶓ ጌሌፅካ::

አንኪሺ ጉዋጉሲ ወረዳው ግብርኒው ፅፌት ጝና ፍትሬት አብት ማንዲጚው ኬቹ ጉሳንታ ዊዛሩ ሙሉ ይስማው ወረዳታጊ ፌይኹ አርፊዳ ተፋሰስ ልማቱ እንፅኺዳ አኮሜችስትⶓ ቶኬምካ:: ፍትሬት አብት ማንዲጚው እንፅኺ እንፃኽስስትጝ አሬሳቻንትካውሳ ምርቶ ዴሜካታ ፄውጝስ ኬሽኹሳ ዝኩዊኔ ጉሳንታ ካሊፅⶓ እርዳትፅካ::

አሬሳቻንትካኪላ ተፋስስ ልማቱ እንፅኺዳ ጛው ፋይስ እንፃኽስትጝስ ጁትጝⶓ ቶኬምካ:: ናካሱ ጊዝዳ ኩፅኒ አሬሳቻንትካ ሴብሎ ኩፕፅጙ እንፅኺዳ አኽⶓ ኽይትጝፅካ:: ሴብሎ ኩፕፁኒዴስ ፋሌንጋ ዴሜካ እርኬኖ ግቢትጙ እንፅኺ አኮሜችስታው አኽⶓ ጌሌፅካ:: ፍትሬት አብት ማንዲጚው እንፅኺስ ጉዲስትኹ ብቲ ዙራማ ሊማታ ፄውስትⶓ ቶኬምካ:: ግብርኒኩ ውማይቴንካ ፍትሬት አብቱ እንፅኺዳ አሬሳቻንትካስ ውማዩሳ እርዳቴ እይካማጊ አኽⶓኪላ ጉሽካ::