አገው ፊሪሲው ባይል እዝቡሳ ባይሎ አቕትጝፃማጊያኽ

ንግስቴ ተስፋ

አገው ፊሪሲው ባይል ኬቤርስትጝ ባይላዌ ሴይጜስታ ምግቦ አቕትጝፅጝ እንቲታኪ ጌቤሉሳ ታምትጜ ፌቴርጝስ ካሊፅኹ አኽⶓ ዜርፍዳ አሴሜርጙንኩ ውማይቴን ዙሙና::

ባይላዊ ግድኩስታ እንፅኺኩ ሜሳርካዋ ውማይቴን ዲግስካማ አቕትጝፃንታስታ ሜፄ አግፃንታ ፄውስታማጊ አኽⶓ ብሄረሰቡ ቺፅጝፂ ባይልስታ ቱሪዝም ሜምሪ አቕፃ::

85 አሜታስ አደባባዩ ባላ ያኻማ ኬቤርስቱስ እጂኹ አገው ፊሪሲው ባይል ሚንችካ ውማዮ ቴግባርሾ ኪስካማ ሚፄ አግፃንታ ካሊፃ:: ታፍ እንፅኻሳ ካላንኩስጊ ጌቤሉሳ ታምትጜ ፌቴርጝስ ባል ኬቤርስትጝ ፍሼ ፄዋማጊያኽ:: እኒጛ ቴኬምስታንትካ ወታትካደስ ዎታት በላይ ገድፍ እምፕሊያኽ::

እንፃኺታስ ኮቤስታ ዴብቴሮ ጄውጝስ ዋዚታ ዴስኹሳ ችሪ ግብራሳ ይስጝፃማ ሲፍፅጝስ ናካዳ ኬፄርስታማ አርፊ ቺፋ ደሞዜ አግፃው ዎታት በላይ ችሪ ግብራሳ ኩፅኒ ናካኪላ እሊው ሚፂው አግፅፃ ፄዋማ ሲፍፃ::

ኬፄርስታማ እንፃኽስታው ኾቱ እንፅኺው ሳትዴስ ፋሌንጋ ጊዞ ቱስቲስ ቴኬምስታማጊ ቴርሳው ችሪ ግብራስ አዊውሳ ትቤቦ አቕትጝፅጝዴስ ጃላ ሚፂው አግፅፃ ፄዋማኪላ ሲፍፃ:: አሜት ቺፋ ኬቤርስታማጊ 85 አሜታስ ሲፍኹ አገው ፌሬስቴኑ ባልኪላ እንፅኼ ይስጝፃታ ቢኪፅⶓ ጉሻ:: ጝንዳ ግቢታማጊ ቴኬምስታንትካስስታ ጌፄንስ ችሬ ግዲፃማ ዲግሳው ዎታት በላይ አገው ፌሬስቴኑ ባል ኬቤርስቱስ ኩፅኒ አደባባይዳ ዲግሳማ አቕትጝፃማጊ ዋይጝስ ጌንዜቦ አግፃው አኽⶓ እንክርፃ::

86ንቲ ጊዝስ ኬቤርስታው አገው ፌሬስቴኑ ባልስ ያኻውሳ ችሬኪላ ትቤብስ ግዲትፃ ግቢታማ ቴርስⶓ ዲብሳ:: ቹዋ ታብል አችትጝፄካማ እጂፅካይኑ አገው ፌሬስቴኑ ባል ታሪኮ፣ ባይሎ ሴይጜስታ ትቤቦ አቕትጝፅጝስ ዳዶ ብስጝዴስ ጃላ ሚንችካው ጌንዜቦ አግፅፃ ያኻማ ሲፍⶓ ቶኬማ::

እንጃቪሪ ኬቴምዳ ጉዝጉዞ፣ አብዜ፣ ምሼ፣ ስልኼ፣ ፅምቔ፣ ዱኒዜስታ ሌግ ቱሻሳ ቴርሳማ ጌቤልስ ዲግስጝስ አቕስታንኩ ውማይ ዊዛሩ ሊሻንወርክ መኮንንኪላ አገው ፌሬስቴኑ ባል ኬቤርስታው ጌርክስ ቴርቴካማ ቴርትⶓ ዙሜካ፡፡::

ዊዛሩ ሊሻንወርክ ናኑውስታጊ ጉዝጉዞስታ አብዜ፣ ዱኒዜስታ ፅምቔ እንቲታኪ ስልኼ ፣ ምሼ ዲግስጝስ ቴርሴካማጊ ባይላዌ ምግቦስታ ዝቔ ዋይጝስ እንቲታኪ አቕትጝፅጝስ ይኮኖሚስ ቴኬምስታንኩ አኽⶓ ጉሽካ::

አገው ፌሬስቴኑ ባል አሜት ቺፋ አደባባዩ ባላ ያኻማ ኬቤርስትጝኪላ ጛስ ሊሊቲ እድል አኽⶓ ዙሜካ:: ባይላዌ ምግቦስታ ዝቔ ቴርሴካማ ሌንጌድስ ዲግሳንታ ባይልስታ ቱሪዝሙ ሜምሪ ጌቤሉሳ ታምትጜ ፌቴርጝስኪላ ዴስቴንካ አኽⶓ ድኹዌካ::

አዊውሳ ስልታኔስታ ትቤቦ ካንፅፅጝስ፣ ዋይካማ ዴሜካ ሚፄ አግፃኑሳ ድጋጐ ግቢቴካማጊ አሜት ቺፋ ፋያንትካስ ዲግሳንኩ አኽⶓ ጉሹንኩ መርጌታ ልኡል ሀይሉ አዊውሳ ድጋጐ ግቢትፅጝስ ፋያው አቒስጊ ግቢትካማ ሜቴቴንጙኽ ዋይሚስ ዲግስጝስ ቴርትⶓ ቶኬምካ::

አገው ፌሬስቴኑ ባል አደባባዩ ባላ ያኻማ አሜት ቺፋ ኬቤርስትጝ ውማዮ አቕትጝፅጝዴስ ፌይኹስ ግቢታኑሳ ድጋጐ ጌቤልስ ዲግስጝስ ዳዶ ብስⶓ ጉሽካ:: ላጛ አይኔታሳ  አፄፍስታውስታ አፄፋስታቲውሳ ድጋጐ ፋያንትካስ ዲግሳንኩ አኽⶓ ዙሜካ:: ኽሳንቲ እስታውሳ ድጋጐ 1ሻይ 500ዴስ 3ሻዮ ኺስታ ሜቴንስ ፅላዋ ዴሜካ 5 ሊኻ ብርስ ዋይጝስ ዲግሳንኩ አኽⶓ ቶኬምካ::

86ንቲ ጊዝስ ኬቤርስታው አገው ፌሬስቴኑ ባልዳ ባይላዌ አዊውሳ ድጋጐ ግቢቴካማ ጌቤልስ ዲግስጝስስታ አቕትጝፅጝስ ካላኑሳ እድሎ ኪላ ትኩታው ቤንጊ አሜችጝፃታ መርጌታ ልኡል ካሴ ዲግስካ::

አዊ ቤረሰቡ ቺፅጝፂው ባይልስታ ቱሪዝም ሜምሪዳ ባይል እሴትካው ኬቹ ጉሳንቲ ወለሊ ጌቴ ጛሾስ አገው ፌሬስቴኑ ባል ፌዩንኩ 85 አሜትካስ ኬቤርስቱስ ታሪኮስታ ጄግንቶ ዜኬርጝዴስ ጃላ አዊው ባይል፣ እሴት፣ ሴይጚ፣ ባይላዊ እንፅኺው ሜሳሪ እንቲታኪ ባይላዊ ምግብ አቕትጛታ ኽሳንቴ ታምቦ ፊትጝⶓ አቕፄካ:: አደባባይዳ ባል ኬቤርስትጝ አዊው እዝብስ ሚንቾ ድሎ ብስኹ አኽⶓ ጉሽካ::

ባይላዌ ምግቦ፣ ስዮስታ ሚቴ፣ አኒኒዴስ ግቢትስታውሳ ባይላዌ እንፅኺውሳስታ ግዱሳ ሜሳሬ፣ ችሬስታ ዋንቼ ግቢታንኩስታ ቴርሳንኩ ውማይቴንስስታ ጌፄንስ ኽሳንቴ ጌቤሉሳ ታምትጜ ፌቴራማጊ አኽⶓ ኽይትጝፄካ::

ፌሬስቴኑ ባል ኬቤርስቱስ ባሎ ኬፍፃውሳስታ አሌምስ አቕትጝፅጝስ ካላው ዋሺኒኪ ባይላዊ ውማዩ ዋይሚጊ ጌቤልስስታ አቕትጝፅጝስ ዲጋታ ፄውጙ ቤዴራ ቴርት አሌድስትⶓ ጉሽካ::

አገው ፌሬስቴኑ ባል 86ንቲ ጊዝስ ኬቤርስቱስ ባይላዊ ትቤቡ ዋይምካ፣ ስይስታ ፌሬስቴኖ አቕትጝፅጝስ እንቲታኪ አዊው እዝብስ ቴኬማውስታ ዎኬላው ጉዳይጊ ዲጋታ ጌቤሉሳ ታምትጜ ፌቴርጙ ቴግባር ይስጛማ ሲፍⶓ ጌሌፅካ:: እንጚስኪላ አች ቺፋ ኮሚቴ ቲሪትጛማ ይሴን ቴግባር አኮሜችስታማጊ አኽⶓ ጉሽካ::

አገው ፌሬስቴኑሳ ባይሎስታ አዊውሳ ታሪኮ፣ ዝኩዊኔስታ ባይላዌ አኺኔ አቕትጝፅጝ እንቲታኪ ሚፄ አግፅጝስ ካላውሳ ጉዳዮ ዲግስጝስ ካላንኩጊ ሜምሪስ አቕፄካማ ዲግስጝስ ካላንኩ አኽⶓ አቶ ወለሊ ዙሜካ:: እኒጚስኪላ ዋይፄ ብቴ አግፃንታስታ ጌቤሉሳ ታምትጜ ፌቴርጙሳ ቴግባሮ አኮሜቻንኩ አኽⶓ አቕፄካ::