ትርስታ ባርዳር

ታደለ አጋጄ

ባርዳር ትር አርፊዳ ሊሊትጙንኩ ባይሉስታ አይማኖቱሳ ባሎ ኪቢርፄው አርፊያኽ:: ኬቴማው ቱሪዝሙሳ ልቕልቕቴ ጁትጝፅጝስስታ ባይሉስታ ኪነ-ትቤብኩ ኬችካውሳ እንፅኽካዋ ካንትፅጝስ አላማ ፄውኽ ፅክራ ላጜታንቲ ባርዳር ኬቴሙ ቺፅጝፂው ባይሉስታ ኪነ ትቤቡ ፌስቲባል ስንብቶ ካስጛ:: ፌስቲባል “ትሮ ባርዳርዳ” ናው ቹዋ እንፅኼንትስ ካስጙኽ ያኹስ ባይሉስታ ኪነ ትቬቭኩ ኬችካ ሊሊትጙንኩ እንፅኽካስ ልኺትጜ ካስጝፄካ:: ባርዳር ኬቴሙ ቺፅጝፂዴስ ፊትጙንክ ባይሉስታ ኪነ ትቬቭኪ ኬችካ ሊሊትጙንኩሳ ትቬቭኩሳ እንፅኽካዋ ካንትፅጝስ ጄሜርስትኹ ያኹስ ካንታንትካውሳ እሎ ጉሱኽ ሰርከሱሳ ትርኢቶ ካንትፅጝስ ጄሜርስታ::

ስራስሪስታ ዎትትካስ እምፕልታ ፃምርስጜካማ እንፃኽስቱኑ ሰርከሱ ትርኢት አቕ እንፃኽስቱኑሳ ፄጌራቲው ካንታንትካዋ ማልጛ ፍትኽፅኹ፣ ትቬቬንካውሳ ካሌቕቶ ካንትፅኹ አኽጝስ ሚንችካ ጌሬምስትካማ ካንትካ:: ሹኻ አቑ ማቕዳ ማቼካማ እንፃኽስታኒስ ካንትስቱንኩ ዎታትካ፣ ትቬቮ ትቤቤንካስ” ናማ ባይጝዴስ ኪቻ እሊውሳ እንዳራ ንጝስ ካሊስቴ:: ዎታትካ ቲሪኹ አቒው ማቕዳ ቲሪጝስ ሰርከሱሳ ትርኢቶ ካንትፃኒ እቱኒጊ ዱንትጝስ ካላና ንካማ ቼኔክስቱንኩ ሚንችካ እሺና:: ያኼስጉ እንታኮው ትርኢቶ ሳኪትጙኽ አኺኒስ አኮሜችጝስ ካንታንትካዋ ቼኔክፁኒውላ ፍትኽፅጝስ ካሌካ:: ትርኢት አሌድስቱኒዴስ ፋሌንጋኪላ ካንታንትካ ችብቻቢስ መራሎ ኽይጝስ ሲፋና::

እለወ ኪነ- ትቤቡስት ባይሉ ፌስቲባልዳ ባርዳር ኬቴሙ ቺፅጝፂው ኬቴም ቤናው ኬችካ ጛውሳ ባይሎስታ ኪነ-ትቤቡሳ እንፅኽካዋ ጅምጝስስታ ሻኺስ እንቲታኪ አክኽካዋ አሚጝስ ካንትፁኑ ቴርት ካስጙኽያኽ::

ዳግማዊ ሚኒሊክ ፋሲል፣ ጣና፣ ግሽ አባይ፣ በላይ ዘለከ ኬቴም ቤናዴስ ይንቱንኩ ኪነ-ትቤብኩስታ ባይልኩ ኬችካ ጛውስ ማይቤራዌ አኺኔ ካንትፃውሳ ልቕልቕቴ ፌስቲቫልዳ ዲግስካ:: ፍትሬቱ ፄጊ፣ ባይሉ እሴትካ፣ ታሪኩስታ ሊሊትጙንኩ ትቬቭኩስታ ባይልኩ እንፅኽካስ አቕስቴት ባርዳር ትር አርፊ ቱሪስትካስ አሜቻውሳ አኺኔ አኮሜችጝስ ግትሙ፣ ቲያትሩ፣ ልቦልዱ (ፌቴሪው) ፁፍስ፣ ተውኔትስስታ እሊኩ ትቬቭኩ እንፅኽካውሳ ልኺትጜ ካስጝፅጝስ ትቬቬንካ ሼሌምስትካ::

እሊው ትሮ ባርዳርዳ ናው ቹዋ እንፅኼንትስ ካስጙኽ ፌስቲቫልዳ ግሽ አባይስታ መክደላ ባይሉስታ ኪነ-ትቬቩ ኬችካ ጅሚስስታ ሻኺስ ካንታንትካዋ ፍትኽፅካ:: አማኻሪ ክልልዳ ካስጛው ኪነ-ትቬቩስታ ባይሉ ኬችካው ልኺትጚስ ዲግሳንኩሳ ትቬቭኩ እንፅኽካዋ ዲግስካ::

ዎክታዊ ክልሉሳ አኺኔ ካንትፃው ትያትሩ እንፅኺ ሊሊትጙንኩ ትያትርኩ ኬችካስ ዲግኹ እሊው ቴርትያኽ:: ጛራ ጛራ ትያትርዳ ዋልታዴስ እንፃቲንኩ አቕ አሴቴፍጝጝስ ካንታንትካዋ ፍትኽፃውሳ ትያትሮ ዲግስካ:: ልላኻዳ ኬሴትስትኹ ሰላሙስታ ፄትቲው ችግር እምፕልታቕዳ ታምፅኹሳ ጉዳዩ ካንትፃው ትያትሩ እንፅኺ ሚንችካ ቲያትርኩ ኬችካስ ዲግኹ እሺኾ:: ዮቶር ቲያትሩ ኬች ልኺትጜ ዊፅጝስ ሼሌምስትኹ ያኹስ ባርዳር ኬቴሙሳ ቺፅጝፄ ዎኬልጝስ አማኻሪ ክልልዳ ካስጛው ባይሉስታ ኪነ ትቬቩ ፌስቲባልዳ ልኺትጛው ቲያትሩ ኬች ያኻ::

ባርዳር ኬቴሙ ቺፅጝፂው ባይሉስታ ስፖርት ፅፌት ጝናሱ አላፊ ጋሻው እንዳለው ባርዳር ኬቴማ ፍትሬትስ አዲልስስቲት፣ ባይሉ እሴትካ ዝኩቲ፣ ኪነ- ትቬቭ ሌጌስቱት፣ ታሪኩስታ ሊሊትጙንኩ ታፍ ትቬቭኩ  አብትካ ዝኩናቲ ኬቴማ አኽⶓ ጌሌፅካ:: ታሪክስ አጅንኩ ባይል ዝኩዋንቲ ክልላ አኽጝስ እን ባይልካዋ ትክምዳ እሽፅጝስ ፖሊሲው ማይኬፍዳ ኬሽጝጛማጊ ይንትኹሳ እንፃኽስትጝጜ ሲፍጝስ ኬቴምዳ ሊሊትጙንኩ ኪነ-ትቬቭኩ ኬችካዋ አችትጝፅጝስ ኪነ-ትቬቩ እንፅኺው ልግስስ ኬፍንኹሳ ታምቦ ፊትጛንት ፄውⶓ ቶኬምካ::

“ትሮ ባርዳርዳ ናውሳ ቴርቶ ካስጝፅጝ እምፕል ቤን ያኹኽ ባይሉስታ ኪነ-ትቬቨሳ ፌስቲቫሎ ካስጝፅጝስ ፍንሾስ ኬቴማ ማይስ ቱሪዝም እሳንጛታ ቲያትሪካልስታ አርቲስቲካል እንፅኽካዋ እንፃኽስትጝስ  ካሊፃንኩ ኮርደር ልማትስ እንፃኽስቱንኩ ፍክር አደባባይ ቲያትርስታ ታናው መናፈሺዳ ግቢትስትኹ አንፎ ቲያትር ውታኺዳ አኮሜችስታንኩሳ ትያትርኩ እንፅኽካዋ ይስጝፅጝስ ካ ሊፃው አኽⶓ ጌሌፅካ::

ኬቴማው ይኮኖሚው፣ ማይቤራዊውስታ፣ ፖለቲካው ልቕልቕቲ ኬፍናታስታ ባይሉ እሴት ዝኩዋታ ፄውጝስ ባይሉስታ ኪነ-ትቬቩ ፌስቲባል ካስጝጝ ፋይፃንቲ አኽⶓ ጉሽካ::

ኪነ-ትቬቩስታ ባይሉ ፌስቲቫል ኪስጝጝ ትቬቭስ እይስት ዝኩክ ዎትትካዋ ጁትጝፅጝስ፣ ቱሪዝሙሳ ልቕልቕቴ ይስጝፅጝስ፣ ቱሪስትካውሳ እጂጚውሳ ጊዞ ሌጌፅጝስ አላማ ፄውኽ ኪነ-ትቬቩስታ ባይሉ ፌስቲቫል አኽⶓ ጌሌፅካ:: እንዴስ ድምክና ባርዳር ኬቴሙሳ ቺፅጝፄ ዎኬላንኩ ኪነ-ትቬቩስታ ባይሉ ፌስቲቫልዳ ልኺትጛንኩሳ ኬችካዋ ጎሌልጝ ዴሜካ እሊው ፌስቲቫሉ አላሚ አኽⶓ ቶኬምካ::

ባይሉስታ ኪነ-ትቬቭ ፌስቲቫልዳ ምንጊሱ ባይሉሳ ቱትጚውሳ ቴርቶ ካንትፃው ቴርት፣ ፌሬስቴንካው ትርኢት፣ ሊሊትጙንኩ ኪነ ትቬቭኩ እንፅኽካ፣ ታፍ ትቬቭኩ አብትካ፣ አሲው ምርትስታ እሊኩ ቴርትካጊ ዲግⶓ ቶኬምካ::

ባርዳር ኬቴሙ ቤዴራንቲ ትክትሊ ክንቲባ ጎሹ እንዳላማው ትሮ ባርዳርዳ ናው እንፅኼንትስ አማኻሪ ክልሉ እዝብኩስታ አይማኖታዊ ባልካ ኬቤርታኑ አርፊ አኽጝስ ሊሊትጙንኩ ቴርትካስ ኬቤርፅጝ ታክስስታማ እንፃኽስስታማጊ አኽⶓ ጌሌፅካ::

ትሮ ባርዳርዳ ናው እንፅኼንትስ ሊሊትጙንኩ ቴርትካስ ኬቤርስትጙ ቹዋ አላሚ ኬቴማውሳ ሰላሞ፣ ልማቶ፣ ፍትሬቱሳ አብቶ እምቲት ባርዳር ኬቴማ አጌር አቩቕስታ አሌም አቩቕኩ ቱሪስትካስ ታምብፃ ኬቴማ ፄውጝስ አኽⶓ እርዳትፅካ:: አኽጝስኪላ ኬቴማዋ አቕትጝፅጝስ ካሊፃው እንፅኼ አኮሜችስትካማጊ አኽⶓ ጉሽካ::

ባይሉስታ ኪነ-ትቬቩ ፌስቲቫል ካስጝጝ ዴሜካ ባይሉ እሴትካ ክምንትዴስ ክምንቶ ፌያፌይጛንታ ፄውጝስስታ እምፕልታቑ ማይቤራዊስታ ይኮኖሚው ልቕልቕቲ ይስጛታ ፄውጝስ አኽⶓ ጌሌፅካ::

ባይሉስታ ኪነ-ትቬቭ ፌስቲቫል ካስጝሾ ዎታታካው ጛው አይትስ፣ ባይልስ፣ ታሪክስ ኩራንታስታ ባይሎስታ ታሪኮ ሌጌፅጝስ አኽⶓ ቶኬምካ::

ባይሉስታ ኪነ-ትቬቩ ፌስቲቫልዳ አሴቴፍጝቱት እንይ ጋሹ ኪነ-ትቬቭስ እይስት ዝኩክሳ ዎታትካዋ ጁትጝፅጝስ ቴኬማው አኽⶓ ዙሜ:: ዎታትካዳ ሊሊትጙንኩ ኪነ-ትቬቭኩ ካሌቕትካ ዝኩንኩ አኽጝስ ጛውሳ እይስቶ ካንትፁኑ ፌስቲቫል አኽⶓ ድኹታ:: ባይሎ፣ ታሪኮ፣ እሴቶ ክምንትዴስ ክምንትሾ ፌያፌይጝፅጝስ ቴኬማው አኽⶓ ዙሜ:: ሊሊትጙንኩ ምክንያትካስ ቓቔፅኹሳ ባይሉስታ ኪነ-ትቬቡሳ ኬቾ ጁትጝፅጝስስታ ኬፍናማ ይስጛታ ፄውጝስ ፌስቲቫል ካስጝጝ ማልጛ ፋይፃንቲ አኽⶓ ድኹታ::