ሰላምስ ቲሪኹ እዝብ

ንግስቴ ተስፋ

አገው ፌሬስቴኑ ባል 85 አሜታዴስ ጃላ ባይላዌስታ ማቤራዌ ቱፊቶ ቤዴርፃማ እንካንጚስስታ እምፕልትስ ፂናማ ናካስ ታምባ:: ጌዌስጙኽሳ አሬኬጝፃማ፣ ቑንዳስትኹሳ አኬምፃማ፣ ሊንጊዴ ክብርስ ቻቤላማ፣ ኻሶ ግዲፃማ እንቲታኪ ልማቱ እንፅኺዳ ታምቦ ፊትጛማ ክምንቱ ኩራቱስታ ጄግንቱ ጌሌፃ ያኻ::

ናኪኒ ክምንት ፅናትስ ታሪኮስታ ጄግንቶ ዜኬራማጊ ክብርስ ሊጊሲሚ አሜትስ እጂኹ ፌሬስቴኑ ባልዴስ እምፕልቶ፣ እጎስታ ፅናቶ ዴስጝስስታ ዎሬስጝስ ካላው ኽሳንቲ ኾቲያኽ:: ፌዩንኩ 85 አሜትካስ እንዳርኪ ችግራ ጋቲታ አደባባዩ ባላ ያኻማ ኬቤርስታማጊ እጂኹሳ ታሪካዌ ባሎ ትር 23/2018 ምሬት አሜታዳኪላ ኬቤርፅጝስ ቤዴራ ቴርት ካስጛማጊያኽ::

እንጃቢሪ ኬቴሙ ዝኩዋንትካኪላ ሌንጌዶ ዴክስ ቻቤላማ ሌንጌድፅጝስ ቤዴራ ቴርቶ አሌድካ::

ዊዛሩ ቦጋለች ሽመልስ እንጃቢሪ ኬቴምዳ ምግብ ጝናሳ ብስካማ ጊፁ እንፅኺዳ አሴማርጜካ:: ፌዩንኩ 85 አሜታስ አገው ፌሬስቴኑ ባል ሰላምስ ኬቤርስታታስታ እንጃቢሪሾ ካሳንኩ ሌንጌድስ ቱስቴ አግልግሎቴ እይጝስኪላ አቕስታና:: ኬቴሙሳ ኹኖ ቴቬቬርጝፅጝስ ዎታትካ ባኩ ፋያው እንፅኺዳ አሴሜርጜካማ ሰላሞ ኬቤርፃንታ ታምቦ ፊትጜካማጊ አኽⶓኪላ ዊዛሩ ቦጋለች ዲብስካ::

“ዝክ ጌጌር ናማ ሊንጊዴ ቻቤልጝስ አቕስቱኺያኽ አዊው እዝብ” ናንኩ ዊዛሩ ቦጋለች 86ንቲ ጊዝስ ኬቤርስታው አገው ፌሬስቴኑ ባል ሰላምስ ኬቤርስታታ እንቲታኪ ሌንጌድ አግፃኑ ዋሺኒኪ አግልግሎቲስ ዴስቴንካ ያኼካማ ይንታው አሜትስጊ ኬፄሮ እሚካማ ካሳንታ ፄውጝስ አግስታኑ ኬቤሊ ቺፋ ቤዴራ ቴርቶ ካስጝፄካማጊ አኽⶓ ጉሽካ::

“ሊንጊዴኽ አግፅኑኽ” ናማ ዋሺኔኪ ዋይሚውሳ ድምክኔስታ እጋፌ ቴግባሮ ፄውጝኪላ አዊውሳ እዝቦ ጌሌፃቲው አኽጝስ ዋሺኔኪ ጉዳዮ ትንካኪስ ካስጝፅጝስ ኹኑ ታምብ ኬፍቲኒ አኽⶓ ዙሜካ::

እንጃቢሪ ኬቴም ሰላም፤ አዊው እዝብ ዴሜካ ሊንጊዴ ቻቤልጝስ አቕስቱኽ እዝብ አኽጝታጊ ዋሺኒኪ አሌም ዙራሙሪዴስኪ ያኻ ይቶፒያዴስ እንጃቢሪሾ ትር 23/2018 ምሬት አሜታ አግስቴካማ ባሎ ኬቤርፃንታ ዊዛሩ ቦጋለች እቑዌ ዲግስካ::

ኬቴሙ እዝብ ፆቲስ፣ ድሚስስታ አይማኖትስ አግሌልጛውላ እምፕልታ አኽጝስ አዳባባዩ ባላ ፄዌካማ ኬቤርፃኑሳ አገው ፌሬስቴኑሳ ባሎ ሰላምስስታ ዴስቲስ ኬቤርፅጝስ ቤዴራ ቴርት ካስጛታ ታምቦ ፊትጛንኩ አጌር ሹማጌልዴስ እምፕል አቶ ትላዩ ሞላኪላ ካንቴ እይካ::

እንጃቢሪ ኬቴሙ ዝኩዋንትካ ባል ኬቤርስቱስ አክምታስታ አችታ ቲቪቪርጚስ ሰላሞ ኬቤርፅካማጊ ቱስቴ አግልግሎቴ እይጝስ ቴርቴካማጊ አኽⶓ ጉሽካ:: ሰላም ኬርፃንትካዋ አችትጝፅጙ ቴግባርኪላ ይስጛማ ሲፍⶓ ዲብስካ:: ፄትቲኩ አካልካሊ ኬምፕዳ ያኼካማ ዎታትካ አግልግሎቴ እይጝዳኪ ያኻ ሰላሞ ኬቤርፅጝዳ አሴሜርጛንታ ፄውስታማጊ አኽⶓ ዙሜካ::

ስጋቶ ፌቴራና እስትካማ ታራታርስታንኩሳጊ ካላካልጜካማጊ አግስታንኩ አኽⶓ ጉሹንኩ አቶ ትላዬ ሰላማዊ ኬቴም ያኹኽ እንጃቢሪሾ ሌንጌድ ይንታኒ ክብርስ ቻቤልጝስ ቴርትካማጊ አኽⶓ ዲብስካ:: ቹዋ ታብል እጂፄካይኑ ታሪካዊ ባል ኬቤርስቱስ አዊው አይት አሌምስ አቕትጛው አኽጝታጊ እንዳርኪ ችግራ ጋቲታ ኬቤርስትጝ ግዴቲ አኽጝስ ውላጊ ታምቦ ፊትጝጝ ፋይፃው አኽⶓ ጉሽካ::

ዩኒስኮዳ ሜዜጌብስትጝስ አሊዲ ቤንዳ ታምብጝኪላ ድርቮ ዴስቴ ፌቴርኹ አሜትዳ ኬቤርስታው 86 አገው ፌሬስቴኑ ባልዳ አግስታንኩ ሌንጌድ ዋሺኒኪ ዜርፍስ ዴስንካማ ዜኔግስታቲውሳ ጊዞ ፌይፃንታ ታምቦ ፊትጛንኩ አኽⶓ ቶኬምካ::

አገው ፌሬስቴኑ ማቢሪው ቹዋ አሊኪ ትላዩ አየነው ጛሾስ 1932 አሊዲዳ አሳብ ዲጋማ 1933 ምሬት አሜታዳ ቲሪትጙኽ፣ ታሊያኑሳ ወራሬ ድላ ፄውጝሊስታ አድዋው ድሉ ታሪክሊ ኽሳንቲ ታሪኩ ታምትጚ ዝኩኽ አንቲታኪ አርቬን ፌረስቴኖስታ ፊሪሲውሳ ጄግንቶ ዜኬርጝስ ቲሪትጙኽ ማቢሪ እንዳርኪ ችግራ ጋቲታ 85 አሜታስ ኬቤርስታማጊ ክምንትስ ካይጝⶓ ጉሽካ::

ዋሺኒኪ ፖለቲካው ካንቲዴስስታ አላሚዴስ ኔፃ ያኹኽ አገው ፌሬስቴኑ ማቢሪ ናካዳ 62 ሻይ 739 አባልካ አግስታኑ አኽⶓ ጉሽካ::

እጎስታ ሰላም ኬቤርፅጝስ አቕስታው እዝብኪላ 86ንቲ ጊዝስ ኬቤርስታው አገው ፌሬስቴንካው ባልስ አላፍቶ ፊትጛው አኽⶓ ዋኽ እምኔትስ ዲብስካ:: ኬቤሊዴስ ወረዳዋ፣ ወረዳዴስ እንጃቢሬ ኬቴሞ ኺስታ ዝኩኽ ፌሬስቴኑ አችትጚኪላ ሰላምስ ኬቤርፃማጊ ባል ዴስቲውስታ እምፕልቱ ያኻታ ቤዴራ ቴርት ካስጝⶓ ጉሽካ:: እዝቡ ባል አኽጝስ ችግሮ ፌቴራው ዋሺኒኪ አካል ክብስስታታስታ ቹዋ ታብልዴስ ታሪኮስታ ጄግንቶ፣ አጌራው ክብርስ ቲሪⶓ ክንቴ ካፃንታ እቑዌ ዲግስካ::

አገው ፌሬስቴኑሳ ባሎ ዴኔክፃው፣ እንካናው፣ ታሪኮ አቕጝስስታ ባይሎ ካንትጝስ ፋያው ዋሺኒኪ አቒጊ ባሎ ስፍሪዳ አግስታማ ኬቤርፅጝስስታ ሰላምስ አሌድስታታ ፄውጝስ ታምቦ ፊትጛንታ አሊኪ ትላየ እንፅኼንቶ ፌይጝፄካ::

አዊ ብሄረሰቡ ቺፅጝፂ ሰላሙስታ ዴክት ሜምሪው አላፊ ጌታቸው ቢሻው 85 አሜታስ ሰላሙስታ ኪቪቪርጚው ምሳላ ያኻማ ኬቤርስቱስ እጂኹ አገው ፌሬስቴኑ ባል እንዳ አሜትዳ ዴሜካ ሊሊትስ ኬፍ ናማ ኬቤርስታታ ኮሚቴ ቲሪትጛማ ይሴን ቴግባር አኮማችስታማጊ አኽⶓ ጌሌፅካ::

ባሎ ምክንያታ ፄውጝስ ኬሴትስትጝስ ካላው ችግር እላኪያኽ ናው ግምጋሚ ዝኩⶓ ጉሽካ:: አቶ ጌታቸው እጋፌ ቴግባሮ ካላካልጝጝስ እምፕልታቖ አችትጝፅጝስ፣ ዎታትካ ሰላምስስታ ዴክትስ ቢዲሬ እይካማ እንፃኽስታንታ አችትጝፅጙስታ ሼውቴ ፌቴርጙ ቴግባር ይስጛማ ሲፍⶓ አቕፄካ:: ሆቴልካዋ ዴሜካማ አግልግሎቴ እያንትካ ኾትካ ሌንጌዶ ሜቴናውሳ ቻቢልጜ ፄውጝስ ቤዴራ ቴርቶ አሌዳንታ ፄውጙ ቴግባር አኮሜችስታማጊ አኽⶓ ቶኬምካ::

ፄትቲው አይልኪላ ዋኒዴስኪ ጃላ ትንካኪስስታ አላፍቱ እንኩዋኽስትስ እንፃኽስታታ ትዛዝ እይስትⶓ ጉሽካ:: እዝብኪላ እግስ ቢዲሬ እያው አኽጝስ ዳራኪ ስጋታ ጋቲታ ባሎ ኬቤርፅጝስ ካሊፃው አችዳ አግስታው አኽⶓ ቼሜትጝፄካ::

ትራፊኩ ልቕልቕቲዳኪላ ዳዱ ፄቤብጝስታ አዲጊ ኬሴትስታቲታ ትኩትስ ስምሪቶ እይጙ ጉዳይ አኮሜችስትⶓ ጉሽካ:: እንጃቢሪው ዝኩዋንትካ እንቲታኪ ብሄረሰቡ ቺፅጝፂው እዝብ ባሎ ጜዋንቱ እንኩዋኽስትስ ኬቤርፁስ ዋሺኔኪ እጋፊ ቴግባርዴስ ቴንኬክስትጝስ ባል ዴክስ ኬቤርስታታ ፄውጝ እዝብዴስ ማንዲስታው አላፍት አኽⶓ አቕፄካ::

አገው ፌሬስቴኑ ባል 86ንቲ ጊዝስ ሰላምስስታ ዴክስ ኬቤርስታማ አዊው አይቱ ጌሌፃ አኽጝዴስ ፌያማ ይቶፒያዋ አሌምስ አቕትጝፅጝስ ካላታ ውላጊ አላፍትስ ሰላሙ ኬምፕዳ ቲሬንታ አቶ ጌታቸው እቑዌ ዲግስካ::