ቓሊትስ ማንዲስታው

አለሚቱ የኔት

አገው ፌሬስቴንካው ማቢሪ ሜሴሬትስትኹ አጌሩሳ ዳር ድንብሮ ወሬራንቲዴስ ካላካልጝጚስ ወሬሙ ግንባርሾ ዜሜችካማ ድላ ፄውጝስ ዙሩንኩ ታብሎስታ ቹትካዋ እንቲታኪ ፊሪሴ ዜኬርጝስ ታክስስታማኽ::

ፊሪሲ አገው እዝብስ አሜሬታንቲ፣ እንፅኺኔ ታምፃንቲ፣ ኻስዳስታ ሴንቲዳ ቴርቶ ብርፃንቲ፣ ምርቶ ዙራዙርፃንቲስታ ውላ ዲቢያኽ::

አገው ፌሬስቴኑ ማቢሪ 1933 ም/አ አችትጛማ 30ዴስ ኽሳቲንኩ ማቢሪው አባልካስ ቲሪትጙኽ ያኹኽ ናካዳኪላ 62 ሻይዴስ ጃላ ማቢሪው አባልካዋ አፌራ::

አገው ፌሬስቴኑ ማቢሪ አሜትቺፋ ትር 23ስ ብሩኽ ዳድስ ብሄረሰቡ ቺፅጝፂዳ አግስታንኩ ወረድካዳ ቴርስ ኬቤርስቱስ ሴጛ:: ሱኺቲ አሜታዴስ ናቴ ኩፅኒ ብሄረሰቡ ቺፅጝፂው አችስ እንጃቢሪ ኬቴምዳ ብሩኽ ዳድስ ኬቤርስታማጊ አግስቴ:: ባል ኬቤርስትጝ ዴሜካ እምፕልታቑ ባይል፣ ወግ፣ እሴትስታ አይት ማንዲስትኹ ዳድስ ኬቤርስታታ ፄውስ ሴጙኽ ፍንሾስኪላ ኬፄላው ኽሳንቲ ማቢሪያኽ::

እን ባል ኬቤርስትጝስኪላ ዙራሙሪዳ አግስታንኩ ቻሞ ግዲትፃንኩዴስ ጄሜራማ ጊፁ እንፅኺዳ አሴሜርጙንኩ እምፕልታቖ ይኮኖሚው ዜርፍስ ቴኬምስታንታ ያኻንታ ፄዋውያኽ:: እምፕልታቑ ባይል አሌም አቩቑ አችስ አቕስታታ ፄውጝስኪላ ፍሺ ኬፍንኹያኽ::

አገው ፌሬስቴኑ ማቢሪ ቤዴራ ጄግንካ ቹዋ ታብል አጌራዋ ካይ ክማስ እምስታቲንታ ፄውኑሳ ሜስዋትቶ ዜኬርጝዴስ ፌይኹስ ናካኪላ እምፕልታቑ ጛስጛው ጋቻዴስ ጄሜራማ ክልልዳ ጌቴሙኽ ሰላሙ ችግር ኽዬ አግፃታ ፄውጝሾስኪላ ልቓ እስታቲውሳ ፍሼ ፄዋማጊያኽ:: ዙራሙሪው እምፕልታቕውላዳ ጌቴማውሳ ዋሺኔኪ ችግሮ ኽይጝስኪላ እንፃኽስታማጊ ዝኩኽ ቴግባር ልቓ እስታቲዊያኽ::

አገው ፌሬስቴኑ ማቢሪ ካስጝፃው ፊሪሲው ግልብ፣ ሽርት፣ ጉግስስታ እሊኩጊ ፊሪሲውሳ ባይሎ ካንትኹስኪላ ዩኒስኮዳ ሜዜጌብፅጝስ ጄሜርስትኹ እንፅኺ ዝኮ:: እን ዴሜካ አገው ፊሪሲው ባይል ናውስ አጌር አቩቑ አችስ አቕስቶ አግፃማ ዩኒስኮዳ ሜዜጌብፅጝስ አሊዲ ፋንቲቲዳ አግስቴ:: እስጜ ባይሎ ሜዜጌብፅጝስ ኩፅኒ ባይሎ ቱስቲስ ማንዲጝስ ውላዴስጊ ማንዲስታውሳጊ ፄውጝ ፋይፃንቲያኽ::