ስንዳዮ አኹዋቲስ አሜሬትጝስ ቴኬምስታንታ ያኼካማጊያኽ

ንግስቴ ተስፋ

ስንዳዬ አኹዋቲስ አሜሬትጝ አግፃሺኑ ምርትዴስ አኾቲ ታፋሳ ዴሜክⶓ ዳንግሊ ወረዳው አርሳቻንትካ ዙሙና::

ወረዳው ሰላም ኬቤርስትጝሊ እምትጛማ አኹዋቲስ ሊማው ስንዳዩ ምርትዴስ ኬሻንቴ ዋይሜ ሜዜጌብፅጝስ እንፃኽስስታማጊ አኽⶓ ዳንግሊ ወረዳ ግብርኒው ፅ/ጝና ጌሌፃ::

አቶ አዲስ ትላሁን ዳንግሊ ወረዳ ጉምድሪ ኬቤሊሾ ስልኬ ታስናና አሳቦ እዩንኩ አሬሳቻንትካዴስ እምፕልያኽ:: 2012 ምሬት አሜታዴስ ጉሽፃማ ዙራሙሪዳ አግስታውሳ ብኖ እሊኩ አሬሳቻንትካሊ ባይላዊ ዳድስ ዴዴክካማ ስንዳዬ አኹዋቲስ ሊፅሚⶓ ጄሜርካ:: እንዴስ ቤዴራ ችኽዳ ይቪቺዳስታ ኬፍቲኔ ምርቶ እያቲውሳ ሴብሎ አሜሬታሺንኩ ያኼስጉ ናካዳ ኩፅኒ እሬ ማንዳኑላ አኹዋቲስ ስንዳዬ ዜሬካማጊ ይኮኖሚውሳ ኪሴ ሜዜጌብፅⶓ ድኹዌካ::

ንጙዊኒ አሜትዳ ላጛ ሄክታር ብቲዳ ስንዳዮ ዜርⶓ ጉሽካ:: እንጚኪላ ጝን አቑ ምግቡሳ ዋስትኔ ቼሜትጝፄ ንካማ አኬድካ:: አኹዋቲስ ሊሚፃንታ ግብርኒኩ ውማይቴንካዴስ አግፃኑ ዴስስ ኪሴ ሜዜጌብፅጝስ ካሊⶓኪላ ዙሜካ:: ጛው ብቲዴስ ድምክና አክሞ ሌጌፅካማ ክራይትጝስ ስንዳዮ ዜርጝስ አግፃኑ ሚፂስ እሌቱ ኬሌብዴስ ፊቲስካማ ጌቤልስ ዲግስጝስ አብትሾ ኪስጝስ ካሊⶓ ዲብስካ::

አሬሳቻንቲ አዲስ ናኑውስታጊ ፍትሬቱሳ ማዳባሬ ቴኬምስትጝዴስ ጉሽፃማ አቓግብሬ ማዳባሬስታ ጉልሌ ዜሮ ዋትጜ ቱስቲስ ቴኬምስትጝ ፋይፃው አኽⶓ እርዳትስትጝስ ቴግባርዳ እሽፅካማጊ ምርት እፅፍስ ዴሜካታ ፄውጝስ ቢኪⶓ ድኹዌካ::

“ግብርኒው እንፅኺስ አሬሳቻንትካ ኬሻንቴ ዝኩዊኔ ዝኩጝስ ካላኑ ዋታኮው ዳድስ እንፃኽስስታኒይ?” ናውሳጊ ማሌካማ ስንዳዬ አኹዋቲስ ሊሚፅጝዳ ትኩቶ ፄውንኩ አኽⶓ ጉሽካ::

ስንዳዬ አኹዋቲስ አሜሬትካማ ዝኩዊኔ  ኪሳንታ ምንግስት እይኹ ትኩት ጋሺስታው አኽⶓ ዙሜካ:: ጛው ኬቤሊታጊ እንኩዋ አሜታዴስ ቤዴራ አኹዋቲ ልማቱ እንፅኺ ዝቤንታታ እስታማ አኹዋቲው ዴዴክ ግቢትስትጝስ ካስጙኽ ፅናት ቴግባርዳ እሼውላ ይጉጝ እንፅኺዳ ቻኒስቶ ፌቴርⶓ ጉሽካ:: እንጚ ችግርኪላ ኽይስታያታ ካሴ ዲግስካ::

ዊዛሩ የኔይቱ አደራኪላ ላጚቲ አሜታዴስ ቤዴራ ባይላዊ ዳድስ ስንዳዩ አሜሬትⶓ ጉሽፃ ፄውጝስ ናካዳ ይስጝፄካማ ኬሻንቴ ምርቶ አግፃኑ ዳድስ ክላስተርስ ሹኻ ኩፃ  ብቲዳ አኹዋቲስ ሊማውሳ ስንዳዮ ዜርⶓ ዲብስካ:: ጉልሌ ስንዳዩሳ ዜሮ ዜርጝስስታ ግብርኒውሳ እንፅኼ ሳሴርፃውሳስታ ኬሻንቴ ምርቶ አግፅጝስ ካሊፃውሳ ሴሎ ሲፍጝስ ዝኩዊኔ ኬሽጝፅጝስ ፅሬቶ ፄዋንኩ አኽⶓ ዙሜካ:: እንጚስኪላ ጝን አቖሰታ ጄርካዋ ቺፅጝፅጝስስታ ክንትፅጝስ ካሊፃውሳ ሚፄ አግፅካማጊ አኽⶓ ጉሽካ::

ጛጛርትጛሳ ዴሜካማ ሚንችካ አሬሳቻንትካ ችኹ እሪው ዳንቴና አኽጝዴስ ፌይካማ ጊዝዴስ ጊዞ አኹዋቲስ ሊሚፅጙ ዴስ ኬሽጛማጊ አኽⶓ ቶኬምካ:: ሰላሙ ችግር ምክንያታስ ፌዬንኩ አሜትካዳ ውማይቴንካውስታ አሬሳቻንትካው ታምትጚ ኬሽጛማጊ አኽⶓ ዙሜካ:: ናካዳ ኩፅኒ ኬቤሊታጊ ሰላም ኬቤርስታማ ግብርኒኩ ውማይቴንካ ኬቤሊዳ አግስቴካማ ፋይፃውሳ ድጋፎስታ ክንቴ እይካማጊ አኽⶓ ዲብስካ:: እንጚስኪላ ፋያኑሳ ጉልሌ ዜሮስታ አቓ ግብሬ ማዳባሬ አግፅጝስ ካሌካ:: አኹዋቲስ ሊሙኽ ስንዳዩ ሴብልኪላ ጉድጛ ያኻማ ዋግጝስ ናኪኒ ወክትዳ ኩፔ አፌራማጊ አኽⶓ ጉሽካ::

ዊዛር የኔይቱ ኬቤሊታ አኹዋቲው አኹሳ ቴኬምስትጜ ዝቤንፄ እስታማ እይስትኹ አኹው ፍሽፂ ሞተር ፓምፕ ዝኩⶓ ዙሜካ:: ያኼስጉ እንፃኽስስታው  ብብራንቲስ አኽጝሊ እምትጛማ ዋይሚ ኬቤርጝስ ቴኬምስትጝስ ቼጌርስትካማጊ አኽⶓ ዲብስካ::

ዳንግሊ ወረዳ ጉምድብሪ ኬቤሊዳ አኹዋቱ አብት ልማቱ ውማይቲኒ ጌትነት አለነ ጛሾስ ዜሬቕቲኔ ምርቶ እያሺኹሳ ብቴ ጎሌልጝስስታ አኹዋቲስ ስንዳዮ አሜሬትጝስ 180 ሄክታር ብቲዳ ምሳሊስ ኬሽጙኽ ስንዳዩ ዜር ዜርስትⶓ ጌሌፅካ:: እንጚኪላ ዝቤናዌ እንፃኽስትጜ ቴግባርዳ እሽፅጝስ ሴብልዳ ታምፃውሳ ጉዳቶ ካላካልጝጝስ ካሊፃው አኽⶓ ኽይትጝፄካ::

አሬሳቻንትካስ ውማዩሳ ድግፎ እይጝስ ቼጌርስታሺኑ ሰላሙ ችግር ኽይስታማ አሬሳቻንትካስ ቱስቴ ድጋፎ ፄውጝስ እንፃኽስስትኹ እንፅኺስ ስንዳዩ አኹዋቲስ ሊሚፅጙ ቴግባር ይስጝፂው አችዳ አግስታው አኽⶓ ጉሽካ:: አሬሳቻንትካው ውማዩሳ ኩስጜ ቻቤልጙ ዴስኪላ ጊዝዴስ ጊዞ ኪሴ ሜዜጌብፅⶓ ቶኬምካ::

አሬሳቻንትካ ዝቤናዊ ቴክኖሎጂሊ ዴስጛንታ ፄውስቱኽ ቴግባርስ ኪላ ዋይሚ ሜዜጌብስትⶓ ጌሌፅካ:: 18 ሞተር ፓምፕ አኹዋቲ ልማትስ እሼው ኬቤሊዳ አግስታው አኽⶓ ጉሽካ:: አኹዋቲ ልማትስ እሼውሳ አኾ ቱስቲስ ቴኬምስትጝዳ ፄውስታው ፅሬት ጋሺስታው ያኹኒውላ ብብራንቲው ኬቤርጝሊ እምትጛማ ኩፅኒ አሬሳቻንትካዳ ቻኒስቶ ፌቴርⶓ ጌሌፅካ:: እንጚስኪላ ኽይ እይስታታ ወረዳስ አቕፅⶓ ጉሽካ::

ዳንግሊ ወረዳ ግብርኒ ፅፌት ጝናዳ አኹዋቲ ትክልቲስታ ኩፓኪፒ ልማት ኬቹ ጉሳንቲ አቶ ዋለልኝ ገዛኸኝ 14 ኽሳንትካ ብንካ፣ 144 አልካ ዝክኑስታ አይር እግልታስኪላ ኩላ ዲሪኺ አኽⶓ ጉሽካ:: ወረዳታ አኹዋቲስ ሊሚጝስ ካላው 10ሻይ ሄክታርዴስ ጃላ ብቲ አግስታው አኽⶓ ጌሌፅካ::

2018 ምርቱ ዝቤንዳ 4ሻይ 214 ሄክታር ብቲ ሊሊትጙኽ ሴብልስ አኹዋቲስ ሊማማጊ አኽⶓ ጉሽካ:: እንዴስኪላ 14 ኬቤልካዳ 24 ክላስተርስ 3ሻይ 200 ሄክታርዴስ ጃላ ብቲዳ አኹዋቲስ ስንዳይ ሊማማጊ አኽⶓ ጌሌፅካ:: 6ሻይ 100 አሬሳቻንትካ እንፅኺዳኪላ አሴቴፍጜካማጊ አኽⶓ ቶኬምካ:: ስንዳዩ ሴብልኪላ ኬሻንቴ ምርቶ እይጝስ ካላታ ጉልሌ ዜሮ  ማዳባሬስታ ፍትሬቱሳ ማዳባሬ ቱስቲስ ቴኬምስታንታ ፄውጝስ ናካዳ ስንዳዩ ሴብል አኬድስትኹዴስ ጃላ ምርቶ እይጝስ ካላው አችዳ አግስታው አኽⶓ ኽይትጝፄካ:: እንጚስኪላ ትክላሊስ አኹዋቲስ ሊማው ስንዳዩ ሴብልዴስ 102 ሻይ 442 ኩንታልዴስ ጃላ ምርት አግስቴ እስታማ ማንዲስታው አኽⶓ አቕፄካ::

እንዳ አሜትዳ ወረዳው ሰላም ኬቤርስትጝሊ እምትጛማ ኬቤሊ ቺፋ ውማይቴን አግስቴካማ አሬሳቻንትካስ ፋይፃንቴ ድግፎ ፄውጝስ አሬሳቻንትካ ዝቤናዌ ቴክኖሎጂስ ምርቶ አሜሬትጙሳ ሴሎ ሲፋንታ ፄውስቱኽ ቴግባርኪላ ወረዳታ ይስጝፃው አኽⶓ ጉሽካ:: ሞተር ፓንፑ ቴክኖሎጂው እንፅኺስ ወረዳዳ 642 አኹዋ ፍሽፂ ሞተር ፓንፕ ዝኩⶓ ቶኬምካ::

ወረዳዳ ዝኩኽሳ ብኖስታ አሌ አኹዋቲ ዴዴክሾ ሚፅⶓ ቴግባርኪላ ሊኽዴስ 80 ታፋ ታምብⶓ አቕፄካ:: አሬሳቻንትካ ዲግሳኑሳ አኹዋቲውሳ ዴዴኮ እንፃኽስስትጝስ ምንግስታዋ ያኼካያስኩ አችትካሊ እምሰታሺኹ ውላ ሳኪትጛውላ ይጉኒውላ ወረዳው አክምስ እንፃኽስስትጝስ እክድ እምስትⶓ ቶኬምካ::

ሞተር ፓንፕስ ያኻው ብብራንቲው ክብርናቲሊስታ ድስጝሊ እንቲታኪ ወረፊሊ እምትጛማ ዝኩኽሳ  ችግሮኪላ ኽይጝስ ትኩታኩ ቤንካሊ ኩስጜ ፄውጝስ አሬሳቻንትካው ልማቱ ቴኬምስታንት ቼሜትጛታ ወረዳው ግብርኒጝና ትኩትስ እንፃኽስስታማጊ አኽⶓ አቕፄካ::